ອມ຺ພປາລີຄຓິກາວຕ຺ຖຸວຓ຺ຓນາ

໑໖໑. ເວສາລິຍໍ ວິຫຣຕີຕິ ເອຕ຺ຖ ເຕນ ໂຂ ປນ ສມເຍນ ເວສາລີ ອິທ຺ຘາ ເຈວ ໂຫຕິ ຜີຕາຈາຕິອາທິນາ ຂນ຺ຘເກ ວຸຕ຺ຕນເຍນ ເວສາລິຍາ ສມ຺ປນ຺ນຠາໂວ ເວທິຕພ຺ໂພ. ອມ຺ພປາລິວເນຕິ ອມ຺ພປາລິຍາ ຄຓິກາຍ ອຸຍ຺ຍານຠູເຕ ອມ຺ພວເນ. ສໂຕ ຠິກ຺ຂເວຕິ ຠຄວາ ອມ຺ພປາລິທສ຺ສເນ ສຕິປຈ຺ຈຸປຏ຺ຐານຕ຺ຖໍ ວິເສສໂຕ ອິຘ ສຕິປຏ຺ຐານເທສນໍ ອາຣຠິ. ຕຕ຺ຖ ສຣຕີຕິ ສໂຕ. ສມ຺ປຊານາຕີຕິ ສມ຺ປຊາໂນ. ສຕິຍາ ຈ ສມ຺ປຊຎ຺ເຎນ ຈ ສມນ຺ນາຄໂຕ ຫຸຕ຺ວາ ວິຫເຣຍ຺ຍາຕິ ອຕ຺ໂຖ. ກາເຍ ກາຍານຸປສ຺ສີຕິອາທີສຸ ຍໍ ວຕ຺ຕພ຺ພໍ, ຕໍ ມຫາສຕິປຏ຺ຐາເນ ວກ຺ຂາມ.

ນີລາຕິ ອິທໍ ສພ຺ພສງ຺ຄາຫກໍ. ນີລວຓ຺ຓາຕິອາທິ ຕສ຺ເສວ ວິຠາຄທສ຺ສນໍ. ຕຕ຺ຖ ນ ເຕສໍ ປກຕິວຓ຺ໂຓ ນີໂລ, ນີລວິເລປນວິລິຕ຺ຕຕ຺ຕາ ປເນຕໍ ວຸຕ຺ຕໍ. ນີລວຕ຺ຖາຕິ ປຏທຸກູລໂກເສຍ຺ຍາທີນິປິ ເຕສໍ ນີລາເນວ ໂຫນ຺ຕິ. ນີລາລງ຺ກາຣາຕິ ນີລມຓີຫິ ນີລປຸປ຺ເຜຫິ ອລງ຺ກຕາ, ຣຖາປິ ເຕສໍ ນີລມຓິຂຈິຕາ ນີລວຕ຺ຖປຣິກ຺ຂິຕ຺ຕາ ນີລທ຺ຘຊາ ນີລວມ຺ມິເກຫິ ນີລາຠຣເຓຫິ ນີລອສ຺ເສຫິ ຍຸຕ຺ຕາ, ປໂຕທລຏ຺ຐິໂຍປິ ນີລາ ເຍວາຕິ. ອິມິນາ ນເຍນ ສພ຺ພປເທສຸ ອຕ຺ໂຖ ເວທິຕພ຺ໂພ. ປຣິວຏ຺ເຏສີຕິ ປຫຣິ. ກິໍ ເຊ ອມ຺ພປາລີຕິ ເຊຕິ ອາລປນວຈນໍ, ໂຠຕິ ອມ຺ພປາລິ, ກິໍ ກາຣຓາຕິ ວຸຕ຺ຕໍ ໂຫຕິ. ‘‘ກິຎ຺ຈາ’’ຕິປິ ປາໂຐ, ອຍເມເວຕ຺ຖ ອຕ຺ໂຖ. ສາຫາຣນ຺ຕິ ສຊນປທໍ. ອງ຺ຄຸລິໍ ໂຜເຏສຸນ຺ຕິ ອງ຺ຄຸລິໍ ຈາເລສຸໍ. ອມ຺ພກາຍາຕິ ອິຕ຺ຖິກາຍ.

ເຍສນ຺ຕິ ກຣຓຕ຺ເຖ ສາມິວຈນໍ, ເຍຫິ ອທິຏ຺ຐາຕິ ວຸຕ຺ຕໍ ໂຫຕິ. ໂອໂລເກຖາຕິ ປສ຺ສຖ. ອວໂລເກຖາຕິ ປຸນປ຺ປຸນໍ ປສ຺ສຖ. ອຸປສໍຫຣຖາຕິ ອຸປເນຖ. ອິມໍ ລິຈ຺ຉວິປຣິສໍ ຕຸມ຺ຫາກໍ ຈິຕ຺ເຕນ ຕາວຕິໍສສທິສໍ ອຸປສໍຫຣຖ ອຸປເນຖ ອລ຺ລີຍາເປຖ. ຍເຖວ ຕາວຕິໍສາ ອຠິຣູປາ ປາສາທິກາ ນີລາທິນານາວຓ຺ຓາ, ເອວມິເມ ລິຈ຺ຉວິຣາຊາໂນປີຕິ ຕາວຕິໍເສຫິ ສມເກ ກຕ຺ວາ ປສ຺ສຖາຕິ ອຕ຺ໂຖ.

ກສ຺ມາ ປນ ຠຄວາ ອເນກສເຕຫິ ສຸຕ຺ເຕຫິ ຈກ຺ຂາທີນໍ ຣູປາທີສຸ ນິມິຕ຺ຕຄ຺ຄາຫໍ ປຏິເສເຘຕ຺ວາ ອິຘ ມຫນ຺ເຕນ ອຸສ຺ສາເຫນ ນິມິຕ຺ຕຄ຺ຄາເຫ ອຸຍ຺ໂຍເຊຕີຕິ? ຫິຕກາມຕາຍ. ຕຕ຺ຣ ກິຣ ເອກຈ຺ເຈ ຠິກ຺ຂູ ໂອສນ຺ນວີຣິຍາ, ເຕສໍ ສມ຺ປຕ຺ຕິຍາ ປໂລເຠນ຺ໂຕ – ‘‘ອປ຺ປມາເທນ ສມຓຘມ຺ມໍ ກໂຣນ຺ຕານໍ ເອວຣູປາ ອິສ຺ສຣິຍສມ຺ປຕ຺ຕິ ສຸລຠາ’’ຕິ ສມຓຘມ຺ເມ ອຸສ຺ສາຫຊນນຕ຺ຖໍ ອາຫ. ອນິຈ຺ຈລກ຺ຂຓວິຠາວນຕ຺ຖຎ຺ຈາປິ ເອວມາຫ. ນຈິຣສ຺ເສວ ຫິ ສພ຺ເພປິເມ ອຊາຕສຕ຺ຕຸສ຺ສ ວເສນ ວິນາສໍ ປາປຸຓິສ຺ສນ຺ຕິ. ອຖ ເນສໍ ຣຊ຺ຊສິຣິສມ຺ປຕ຺ຕິໍ ທິສ຺ວາ ຐິຕຠິກ຺ຂູ – ‘‘ຕຖາຣູປາຍປິ ນາມ ສິຣິສມ຺ປຕ຺ຕິຍາ ວິນາໂສ ປຎ຺ຎາຍິສ຺ສຕີ’’ຕິ ອນິຈ຺ຈລກ຺ຂຓໍ ຠາເວຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິສ຺ສນ຺ຕີຕິ ອນິຈ຺ຈລກ຺ຂຓວິຠາວນຕ຺ຖໍ ອາຫ.

ອຘິວາເສຕູຕິ ອມ຺ພປາລິຍາ ນິມນ຺ຕິຕຠາວໍ ຎຕ຺ວາປິ ກສ຺ມາ ນິມນ຺ເຕນ຺ຕີຕິ? ອສທ຺ທຫນຕາຍ ເຈວ ວຕ຺ຕສີເສນ ຈ. ສາ ຫິ ຘຸຕ຺ຕາ ອິຕ຺ຖີ ອນິມນ຺ເຕຕ຺ວາປິ ນິມນ຺ເຕມີຕິ ວເທຍ຺ຍາຕິ ເຕສໍ ຈິຕ຺ຕໍ ອໂຫສິ, ຘມ຺ມໍ ສຸຕ຺ວາ ຄມນກາເລ ຈ ນິມນ຺ເຕຕ຺ວາ ຄມນໍ ນາມ ມນຸສ຺ສານໍ ວຕ຺ຕເມວ.