ສຣີຣຘາຕຸວິຠຊນວຓ຺ຓນາ

໒໓໖. ອສ຺ໂສສິ ໂຂ ຣາຊາຕິ ກຖໍ ອສ຺ໂສສິ? ປຐມເມວ ກິຣສ຺ສ ອມຈ຺ຈາ ສຸຕ຺ວາ ຈິນ຺ຕຍິໍສຸ – ‘‘ສຕ຺ຖາ ນາມ ປຣິນິພ຺ພຸໂຕ, ນ ໂສ ສກ຺ກາ ປຸນ ອາຫຣິຕຸໍ. ໂປຖຸຊ຺ຊນິກສທ຺ຘາຍ ປນ ອມ຺ຫາກໍ ຣຎ຺ຎາ ສທິໂສ ນຕ຺ຖິ, ສເຈ ເອສ ອິມິນາວ ນິຍາເມນ ສຸຓິສ຺ສຕິ, ຫທຍມສ຺ສ ຜລິສ຺ສຕິ. ຣາຊາ ໂຂ ປນ ອມ຺ເຫຫິ ອນຸຣກ຺ຂິຕພ຺ໂພ’’ຕິ ເຕ ຕິສ຺ໂສ ສຸວຓ຺ຓໂທຓິໂຍ ອາຫຣິຕ຺ວາ ຈຕຸມຘຸຣສ຺ສ ປູເຣຕ຺ວາ ຣຎ຺ໂຎ ສນ຺ຕິກໍ ຄນ຺ຕ຺ວາ ເອຕທໂວຈຸໍ – ‘‘ເທວ, ອມ຺ເຫຫິ ສຸປິນໂກ ທິຏ຺ໂຐ, ຕສ຺ສ ປຏິຆາຕຕ຺ຖໍ ຕຸມ຺ເຫຫິ ທຸກູລທຸປຏ຺ຏໍ ນິວາເສຕ຺ວາ ຍຖາ ນາສາປຸຏມຕ຺ຕໍ ປຎ຺ຎາຍຕິ, ເອວໍ ຈຕຸມຘຸຣໂທຓິຍາ ນິປຊ຺ຊິຕຸໍ ວຏ຺ຏຕີ’’ຕິ. ຣາຊາ ອຕ຺ຖຈຣານໍ ອມຈ຺ຈານໍ ວຈນໍ ສຸຕ຺ວາ ‘‘ເອວໍ ໂຫຕຸ ຕາຕາ’’ຕິ ສມ຺ປຏິຈ຺ຉິຕ຺ວາ ຕຖາ ອກາສິ.

ອເຖໂກ ອມຈ຺ໂຈ ອລງ຺ກາຣໍ ໂອມຸຎ຺ຈິຕ຺ວາ ເກເສ ປກິຣິຍ ຍາຍ ທິສາຍ ສຕ຺ຖາ ປຣິນິພ຺ພຸໂຕ, ຕທຠິມຸໂຂ ຫຸຕ຺ວາ ອຎ຺ຊລິໍ ປຄ຺ຄຍ຺ຫ ຣາຊານໍ ອາຫ – ‘‘ເທວ, ມຣຓໂຕ ມຸຈ຺ຈນກສຕ຺ໂຕ ນາມ ນຕ຺ຖິ, ອມ຺ຫາກໍ ອາຍຸວຑ຺ຒໂນ ເຈຕິຍຏ຺ຐານໍ ປຸຎ຺ຎກ຺ເຂຕ຺ຕໍ ອຠິເສກສິຎ຺ຈໂກ ໂສ ຠຄວາ ສຕ຺ຖາ ກຸສິນາຣາຍ ປຣິນິພ຺ພຸໂຕ’’ຕິ. ຣາຊາ ສຸຕ຺ວາວ ວິສຎ຺ຎີຊາໂຕ ຈຕຸມຘຸຣໂທຓິຍໍ ອຸສຸມໍ ມຸຎ຺ຈິ. ອຖ ນໍ ອຸກ຺ຂິປິຕ຺ວາ ທຸຕິຍາຍ ໂທຓິຍາ ນິປຊ຺ຊາເປສຸໍ. ໂສ ປຸນ ສຎ຺ຎໍ ລຠິຕ຺ວາ – ‘‘ຕາຕາ, ກິໍ ວເທຖາ’’ຕິ ປຸຈ຺ຉິ. ‘‘ສຕ຺ຖາ, ມຫາຣາຊ, ປຣິນິພ຺ພຸໂຕ’’ຕິ. ຣາຊາ ປຸນປິ ວິສຎ຺ຎີຊາໂຕ ຈຕຸມຘຸຣໂທຓິຍາ ອຸສຸມໍ ມຸຎ຺ຈິ. ອຖ ນໍ ຕໂຕປິ ອຸກ຺ຂິປິຕ຺ວາ ຕຕິຍາຍ ໂທຓິຍາ ນິປຊ຺ຊາເປສຸໍ. ໂສ ປຸນ ສຎ຺ຎໍ ລຠິຕ຺ວາ ‘‘ຕາຕາ, ກິໍ ວເທຖາ’’ຕິ ປຸຈ຺ຉິ. ‘‘ສຕ຺ຖາ, ມຫາຣາຊ, ປຣິນິພ຺ພຸໂຕ’’ຕິ. ຣາຊາ ປຸນປິ ວິສຎ຺ຎີຊາໂຕ, ອຖ ນໍ ອຸກ຺ຂິປິຕ຺ວາ ນຫາເປຕ຺ວາ ມຕ຺ຖເກ ຆເຏຫິ ອຸທກໍ ອາສິຎ຺ຈິໍສຸ.

ຣາຊາ ສຎ຺ຎໍ ລຠິຕ຺ວາ ອາສນາ ວຸຏ຺ຐາຍ ຄນ຺ຘປຣິຠາວິເຕ ມຓິວຓ຺ເຓ ເກເສ ວິກິຣິຕ຺ວາ ສຸວຓ຺ຓຜລກວຓ຺ຓາຍ ປິຏ຺ຐິຍໍ ປກິຣິຕ຺ວາ ປາຓິນາ ອຸຣໍ ປຫຣິຕ຺ວາ ປວາຬງ຺ກຸຣວຓ຺ຓາຫິ ສຸວຏ຺ຏິຕງ຺ຄຸລີຫິ ສຸວຓ຺ຓພິມ຺ພິສກວຓ຺ຓໍ ອຸຣໍ ສິພ຺ພນ຺ໂຕ ວິຍ ຄເຫຕ຺ວາ ປຣິເທວມາໂນ ອຸມ຺ມຕ຺ຕກເວເສນ ອນ຺ຕຣວີຖິໍ ໂອຕິຓ຺ໂຓ, ໂສ ອລງ຺ກຕນາຏກປຣິວຸໂຕ ນຄຣໂຕ ນິກ຺ຂມ຺ມ ຊີວກມ຺ພວນໍ ຄນ຺ຕ຺ວາ ຍສ຺ມິໍ ຐາເນ ນິສິນ຺ເນນ ຠຄວຕາ ຘມ຺ໂມ ເທສິໂຕ ຕໍ ໂອໂລເກຕ຺ວາ – ‘‘ຠຄວາ ສພ຺ພຎ຺ຎຸ, ນນຸ ອິມສ຺ມິໍ ຐາເນ ນິສີທິຕ຺ວາ ຘມ຺ມໍ ເທສຍິຕ຺ຖ, ໂສກສລ຺ລໍ ເມ ວິໂນທຍິຕ຺ຖ, ຕຸມ຺ເຫ ມຍ຺ຫໍ ໂສກສລ຺ລໍ ນີຫຣິຕ຺ຖ, ອຫໍ ຕຸມ຺ຫາກໍ ສຣຓໍ ຄໂຕ, ອິທານິ ປນ ເມ ປຏິວຈນມ຺ປິ ນ ເທຖ, ຠຄວາ’’ຕິ ປຸນປ຺ປຸນໍ ປຣິເທວິຕ຺ວາ ‘‘ນນຸ ຠຄວາ ອຫໍ ອຎ຺ຎທາ ເອວຣູເປ ກາເລ ‘ຕຸມ຺ເຫ ມຫາຠິກ຺ຂຸສງ຺ຆປຣິວາຣາ ຊມ຺ພຸທີປຕເລ ຈາຣິກໍ ຈຣຖາ’ຕິ ສຸໂຓມິ, ອິທານິ ປນາຫໍ ຕຸມ຺ຫາກໍ ອນນຸຣູປໍ ອຍຸຕ຺ຕໍ ປວຕ຺ຕິໍ ສຸໂຓມີ’’ຕິ ເອວມາທີນິ ຈ ວຕ຺ວາ ສຏ຺ຐິມຕ຺ຕາຫິ ຄາຖາຫິ ຠຄວໂຕ ຄຸຓໍ ອນຸສ຺ສຣິຕ຺ວາ ຈິນ຺ເຕສິ – ‘‘ມມ ປຣິເທວິເຕເນວ ນ ສິຊ຺ຌຕິ, ທສພລສ຺ສ ຘາຕຸໂຍ ອາຫຣາເປສ຺ສາມີ’’ຕິ ເອວໍ ອສ຺ໂສສິ. ສຸຕ຺ວາ ຈ ອິມິສ຺ສາ ວິສຎ຺ຎິຠາວາທິປວຕ຺ຕິຍາ ອວສາເນ ທູຕໍ ປາເຫສິ. ຕໍ ສນ຺ຘາຍ ອຖ ໂຂ ຣາຊາຕິອາທິ ວຸຕ຺ຕໍ.

ຕຕ຺ຖ ທູຕໍ ປາເຫສີຕິ ທູຕຎ຺ຈ ປຓ຺ຓຎ຺ຈ ເປເສສິ. ເປເສຕ຺ວາ ຈ ປນ – ‘‘ສເຈ ທສ຺ສນ຺ຕິ, ສຸນ຺ທຣໍ. ໂນ ເຈ ທສ຺ສນ຺ຕິ, ອາຫຣຓຸປາເຍນ ອາຫຣິສ຺ສາມີ’’ຕິ ຈຕຸຣງ຺ຄິນິໍ ເສນໍ ສນ຺ນຍ຺ຫິຕ຺ວາ ສຍມ຺ປິ ນິກ຺ຂນ຺ໂຕເຍວ. ຍຖາ ຈ ອຊາຕສຕ຺ຕຸ, ເອວໍ ລິຈ຺ຉວີອາທໂຍປິ ທູຕໍ ເປເສຕ຺ວາ ສຍມ຺ປິ ຈຕຸຣງ຺ຄິນິຍາ ເສນາຍ ນິກ຺ຂມິໍສຸເຍວ. ຕຕ຺ຖ ປາເວຍ຺ຍກາ ສພ຺ເພຫິ ອາສນ຺ນຕຣາ ກຸສິນາຣໂຕ ຕິຄາວຸຕນ຺ຕເຣ ນຄເຣ ວສນ຺ຕິ, ຠຄວາປິ ປາວໍ ປວິສິຕ຺ວາວ ກຸສິນາຣໍ ຄໂຕ. ອຖ ກສ຺ມາ ປຐມຕຣໍ ນ ອາຄຕາຕິ ເຈ? ມຫາປຣິວາຣາ ປເນເຕ ຣາຊາໂນ ມຫາປຣິວາຣໍ ກໂຣນ຺ຕາວ ປຈ຺ຉໂຕ ຊາຕາ.

ເຕ ສງ຺ເຆ ຄເຓ ເອຕທໂວຈຸນ຺ຕິ ສພ຺ເພປິ ເຕ ສຕ຺ຕນຄຣວາສິໂນ ອາຄນ຺ຕ຺ວາ – ‘‘ອມ຺ຫາກໍ ຘາຕຸໂຍ ວາ ເທນ຺ຕຸ, ຍຸທ຺ຘໍ ວາ’’ຕິ ກຸສິນາຣານຄຣໍ ປຣິວາເຣຕ຺ວາ ຐິເຕ – ‘‘ເອຕໍ ຠຄວາ ອມ຺ຫາກໍ ຄາມກ຺ເຂຕ຺ເຕ’’ຕິ ປຏິວຈນໍ ອໂວຈຸໍ. ເຕ ກິຣ ເອວມາຫໍສຸ – ‘‘ນ ມຍໍ ສຕ຺ຖຸ ສາສນໍ ປຫິຓິມ຺ຫ, ນາປິ ຄນ຺ຕ຺ວາ ອານຍິມ຺ຫ. ສຕ຺ຖາ ປນ ສຍເມວ ອາຄນ຺ຕ຺ວາ ສາສນໍ ເປເສຕ຺ວາ ອມ຺ເຫ ປກ຺ໂກສາເປສິ. ຕຸມ຺ເຫປິ ໂຂ ປນ ຍໍ ຕຸມ຺ຫາກໍ ຄາມກ຺ເຂຕ຺ເຕ ຣຕນໍ ອຸປ຺ປຊ຺ຊຕິ, ນ ຕໍ ອມ຺ຫາກໍ ເທຖ. ສເທວເກ ຈ ໂລເກ ພຸທ຺ຘຣຕນສມໍ ຣຕນໍ ນາມ ນຕ຺ຖິ, ເອວຣູປໍ ອຸຕ຺ຕມຣຕນໍ ລຠິຕ຺ວາ ມຍໍ ນ ທສ຺ສາມ. ນ ໂຂ ປນ ຕຸມ຺ເຫຫິເຍວ ມາຕຸຖນໂຕ ຂີຣໍ ປີຕໍ, ອມ຺ເຫຫິປິ ມາຕຸຖນໂຕ ຂີຣໍ ປີຕໍ. ນ ຕຸມ຺ເຫເຍວ ປຸຣິສາ, ອມ຺ເຫປິ ປຸຣິສາ ໂຫຕູ’’ຕິ ອຎ຺ຎມຎ຺ຎໍ ອຫໍກາຣໍ ກຕ຺ວາ ສາສນປຏິສາສນໍ ເປເສນ຺ຕິ, ອຎ຺ຎມຎ຺ຎໍ ມານຄຊ຺ຊິຕໍ ຄຊ຺ຊນ຺ຕິ. ຍຸທ຺ເຘ ປນ ສຕິ ໂກສິນາຣການໍເຍວ ຊໂຍ ອຠວິສ຺ສ. ກສ຺ມາ? ຍສ຺ມາ ຘາຕຸປາສນຕ຺ຖໍ ອາຄຕາ ເທວຕາ ເນສໍ ປກ຺ຂາ ອເຫສຸໍ. ປາຬິຍໍ ປນ – ‘‘ຠຄວາ ອມ຺ຫາກໍ ຄາມກ຺ເຂຕ຺ເຕ ປຣິນິພ຺ພຸໂຕ, ນ ມຍໍ ທສ຺ສາມ ຠຄວໂຕ ສຣີຣານໍ ຠາຄ’’ນ຺ຕິ ເອຕ຺ຕກເມວ ອາຄຕໍ.

໒໓໗. ເອວໍ ວຸຕ຺ເຕ ໂທໂຓ ພ຺ຣາຫ຺ມໂຓຕິ ໂທຓພ຺ຣາຫ຺ມໂຓ ອິມໍ ເຕສໍ ວິວາທໍ ສຸຕ຺ວາ – ‘‘ເອເຕ ຣາຊາໂນ ຠຄວໂຕ ປຣິນິພ຺ພຸຕຏ຺ຐາເນ ວິວາທໍ ກໂຣນ຺ຕິ, ນ ໂຂ ປເນຕໍ ປຕິຣູປໍ, ອລໍ ອິມິນາ ກລເຫນ, ວູປສເມສ຺ສາມິ ນ’’ນ຺ຕິ ໂສ ຄນ຺ຕ຺ວາ ເຕ ສງ຺ເຆ ຄເຓ ເອຕທໂວຈ. ກິມໂວຈ? ອຸນ຺ນຕປ຺ປເທເສ ຐຕ຺ວາ ທ຺ວິຠາຓວາຣປຣິມາຓໍ ໂທຓຄຊ຺ຊິຕໍ ນາມ ອໂວຈ. ຕຕ຺ຖ ປຐມຠາຓວາເຣ ຕາວ ເອກປທມ຺ປິ ເຕ ນ ຊານິໍສຸ. ທຸຕິຍຠາຓວາຣປຣິໂຍສາເນ – ‘‘ອາຈຣິຍສ຺ສ ວິຍ ໂຠ ສທ຺ໂທ, ອາຈຣິຍສ຺ສ ວິຍ ໂຠ ສທ຺ໂທ’’ຕິ ສພ຺ເພ ນິຣວາ ອເຫສຸໍ. ຊມ຺ພຸທີປຕເລ ກິຣ ກຸລຆເຣ ຊາຕາ ເຍຠຸຍ຺ເຍນ ຕສ຺ສ ນ ອນ຺ເຕວາສິໂກ ນາມ ນຕ຺ຖິ. ອຖ ໂສ ເຕ ອຕ຺ຕໂນ ວຈນໍ ສຸຕ຺ວາ ນິຣເວ ຕຸຓ຺ຫີຠູເຕ ວິທິຕ຺ວາ ປຸນ ເອຕທໂວຈ – ‘‘ສຸຓນ຺ຕຸ ໂຠນ຺ໂຕ’’ຕິ ເອຕໍ ຄາຖາທ຺ວຍໍ ອໂວຈ.

ຕຕ຺ຖ ອມ຺ຫາກໍ ພຸທ຺ໂຘຕິ ອມ຺ຫາກໍ ພຸທ຺ໂຘ. ອຫຸ ຂນ຺ຕິວາໂທຕິ ພຸທ຺ຘຠູມິໍ ອປ຺ປຕ຺ວາປິ ປາຣມິໂຍ ປູເຣນ຺ໂຕ ຂນ຺ຕິວາທິຕາປສກາເລ ຘມ຺ມປາລກຸມາຣກາເລ ຉທ຺ທນ຺ຕຫຕ຺ຖິກາເລ ຠູຣິທຕ຺ຕນາຄຣາຊກາເລ ຈມ຺ເປຍ຺ຍນາຄຣາຊກາເລ ສງ຺ຂປາລນາຄຣາຊກາເລ ມຫາກປິກາເລ ອຎ຺ເຎສຸ ຈ ພຫູສຸ ຊາຕເກສຸ ປເຣສຸ ໂກປໍ ອກຕ຺ວາ ຂນ຺ຕິເມວ ອກາສິ. ຂນ຺ຕິເມວ ວຓ຺ຓຍິ. ກິມງ຺ຄໍ ປນ ເອຕຣຫິ ອິຏ຺ຐານິຏ຺ເຐສຸ ຕາທິລກ຺ຂຓໍ ປຕ຺ໂຕ, ສພ຺ພຖາປິ ອມ຺ຫາກໍ ພຸທ຺ໂຘ ຂນ຺ຕິວາໂທ ອໂຫສິ, ຕສ຺ສ ເອວໍວິຘສ຺ສ. ນ ຫິ ສາຘຸ ຍໍ ອຸຕ຺ຕມປຸຄ຺ຄລສ຺ສ, ສຣີຣຠາເຄ ສິຍາ ສມ຺ປຫາໂຣຕິ ນ ຫິ ສາຘຸຍນ຺ຕິ ນ ຫິ ສາຘຸ ອຍໍ. ສຣີຣຠາເຄຕິ ສຣີຣວິຠາຄນິມິຕ຺ຕໍ, ຘາຕຸໂກຏ຺ຐາສເຫຕູຕິ ອຕ຺ໂຖ. ສິຍາ ສມ຺ປຫາໂຣຕິ ອາວຸຘສມ຺ປຫາໂຣ ສາຘຸ ນ ສິຍາຕິ ວຸຕ຺ຕໍ ໂຫຕິ.

ສພ຺ເພວ ໂຠນ຺ໂຕ ສຫິຕາຕິ ສພ຺ເພວ ໂຠນ຺ໂຕ ສຫິຕາ ໂຫຖ, ມາ ຠິຊ຺ຊຖ. ສມຄ຺ຄາຕິ ກາເຍນ ຈ ວາຈາຍ ຈ ເອກສນ຺ນິປາຕາ ເອກວຈນາ ສມຄ຺ຄາ ໂຫຖ. ສມ຺ໂມທມານາຕິ ຈິຕ຺ເຕນາປິ ອຎ຺ຎມຎ຺ຎໍ ສມ຺ໂມທມານາ ໂຫຖ. ກໂຣມຏ຺ຐຠາເຄຕິ ຠຄວໂຕ ສຣີຣານິ ອຏ຺ຐ ຠາເຄ ກໂຣມ. ຈກ຺ຂຸມໂຕຕິ ປຎ຺ຈຫິ ຈກ຺ຂູຫິ ຈກ຺ຂຸມໂຕ ພຸທ຺ຘສ຺ສ. ນ ເກວລໍ ຕຸມ຺ເຫເຍວ, ພຫຸຊໂນປິ ປສນ຺ໂນ, ເຕສຸ ເອໂກປິ ລທ຺ຘຸໍ ອຍຸຕ຺ໂຕ ນາມ ນຕ຺ຖີຕິ ພຫຸໍ ກາຣຓໍ ວຕ຺ວາ ສຎ຺ຎາເປສິ.

໒໓໘. ເຕສໍ ສງ຺ຆານໍ ຄຓານໍ ປຏິສ຺ສຸຕ຺ວາຕິ ເຕສໍ ເຕສໍ ຕໂຕ ຕໂຕ ສມາຄຕສງ຺ຆານໍ ສມາຄຕຄຓານໍ ປຏິສ຺ສຸຓິຕ຺ວາ. ຠຄວໂຕ ສຣີຣານິ ອຏ຺ຐຘາ ສມໍ ສຸວິຠຕ຺ຕໍ ວິຠຊິຕ຺ວາຕິ ເອຕ຺ຖ ອຍມນຸກ຺ກໂມ – ໂທໂຓ ກິຣ ເຕສໍ ປຏິສ຺ສຸຓິຕ຺ວາ ສຸວຓ຺ຓໂທຓິໍ ວິວຣາເປສິ. ຣາຊາໂນ ອາຄນ຺ຕ຺ວາ ໂທຓິຍໍເຍວ ຐິຕາ ສຸວຓ຺ຓວຓ຺ຓາ ຘາຕຸໂຍ ທິສ຺ວາ – ‘‘ຠຄວາ ສພ຺ພຎ຺ຎຸ ປຸພ຺ເພ ມຍໍ ຕຸມ຺ຫາກໍ ທ຺ວຕ຺ຕິໍສມຫາປຸຣິສລກ຺ຂຓປຏິມຓ຺ຑິຕໍ ຉພ຺ພຓ຺ຓພຸທ຺ຘຣສ຺ມິຂຈິຕໍ ອສີຕິອນຸພ຺ຍຎ຺ຊນສມຸຊ຺ຊລິຕໂສຠໍ ສຸວຓ຺ຓວຓ຺ຓໍ ສຣີຣໍ ອທ຺ທສາມ, ອິທານິ ປນ ສຸວຓ຺ຓວຓ຺ຓາວ ຘາຕຸໂຍ ອວສິຏ຺ຐາ ຊາຕາ, ນ ຍຸຕ຺ຕມິທໍ ຠຄວາ ຕຸມ຺ຫາກ’’ນ຺ຕິ ປຣິເທວິໍສຸ.

ພ຺ຣາຫ຺ມໂຓປິ ຕສ຺ມິໍ ສມເຍ ເຕສໍ ປມຕ຺ຕຠາວໍ ຎຕ຺ວາ ທກ຺ຂິຓທາຐໍ ຄເຫຕ຺ວາ ເວຐນ຺ຕເຣ ຐເປສິ, ອຖ ປຈ຺ຉາ ອຏ຺ຐຘາ ສມໍ ສຸວິຠຕ຺ຕໍ ວິຠຊິ, ສພ຺ພາປິ ຘາຕຸໂຍ ປາກຕິກນາຬິຍາ ໂສຬສ ນາຬິໂຍ ອເຫສຸໍ, ເອເກກນຄຣວາສິໂນ ທ຺ເວ ທ຺ເວ ນາຬິໂຍ ລຠິໍສຸ. ພ຺ຣາຫ຺ມຓສ຺ສ ປນ ຘາຕຸໂຍ ວິຠຊນ຺ຕສ຺ເສວ ສກ຺ໂກ ເທວານມິນ຺ໂທ – ‘‘ເກນ ນຸ ໂຂ ສເທວກສ຺ສ ໂລກສ຺ສ ກງ຺ຂຈ຺ເຉທນຕ຺ຖາຍ ຈຕຸສຈ຺ຈກຖາຍ ປຈ຺ຈຍຠູຕາ ຠຄວໂຕ ທກ຺ຂິຓທາຐາ ຄຫິຕາ’’ຕິ ໂອໂລເກນ຺ໂຕ ‘‘ພ຺ຣາຫ຺ມເຓນ ຄຫິຕາ’’ຕິ ທິສ຺ວາ – ‘‘ພ຺ຣາຫ຺ມໂຓປິ ທາຐາຍ ອນຸຈ຺ຉວິກໍ ສກ຺ກາຣໍ ກາຕຸໍ ນ ສກ຺ຂິສ຺ສຕິ, ຄຓ຺ຫາມິ ນ’’ນ຺ຕິ ເວຐນ຺ຕຣໂຕ ຄເຫຕ຺ວາ ສຸວຓ຺ຓຈງ຺ໂກຏເກ ຐເປຕ຺ວາ ເທວໂລກໍ ເນຕ຺ວາ ຈູຬາມຓິເຈຕິເຍ ປຕິຏ຺ຐເປສິ.

ພ຺ຣາຫ຺ມໂຓປິ ຘາຕຸໂຍ ວິຠຊິຕ຺ວາ ທາຐໍ ອປສ຺ສນ຺ໂຕ ໂຈຣິກາຍ ຄຫິຕຕ຺ຕາ – ‘‘ເກນ ເມ ທາຐາ ຄຫິຕາ’’ຕິ ປຸຈ຺ຉິຕຸມ຺ປິ ນາສກ຺ຂິ. ‘‘ນນຸ ຕຍາວ ຘາຕຸໂຍ ຠາຊິຕາ, ກິໍ ຕ຺ວໍ ປຐມໍເຍວ ອຕ຺ຕໂນ ຘາຕຸຍາ ອຕ຺ຖິຠາວໍ ນ ອຎ຺ຎາສີ’’ຕິ ອຕ຺ຕນິ ໂທສາໂຣປນໍ ສມ຺ປສ຺ສນ຺ໂຕ – ‘‘ມຍ຺ຫມ຺ປິ ໂກຏ຺ຐາສໍ ເທຖາ’’ຕິ ວຕ຺ຕຸມ຺ປິ ນາສກ຺ຂິ. ຕໂຕ – ‘‘ອຍມ຺ປິ ສຸວຓ຺ຓຕຸມ຺ໂພ ຘາຕຸຄຕິໂກວ, ເຍນ ຕຖາຄຕສ຺ສ ຘາຕຸໂຍ ມິຕາ, ອິມສ຺ສາຫໍ ຖູປໍ ກຣິສ຺ສາມີ’’ຕິ ຈິນ຺ເຕຕ຺ວາ ອິມໍ ເມ ໂຠນ຺ໂຕ ຕຸມ຺ພໍ ທທນ຺ຕູຕິ ອາຫ.

ປິປ຺ປລິວນິຍາ ໂມຣິຍາປິ ອຊາຕສຕ຺ຕຸອາທໂຍ ວິຍ ທູຕໍ ເປເສຕ຺ວາ ຍຸທ຺ຘສຊ຺ຊາວ ນິກ຺ຂມິໍສຸ.