ພຸທ຺ຘສຣີຣປູຊາວຓ຺ຓນາ

໒໒໗. ສພ຺ພຎ຺ຈ ຕາຬາວຈຣນ຺ຕິ ສພ຺ພໍ ຕູຣິຍຠຓ຺ຑໍ. ສນ຺ນິປາເຕຖາຕິ ເຠຣິໍ ຈຣາເປຕ຺ວາ ສມາຫຣຖ. ເຕ ຕເຖວ ອກໍສຸ. ມຓ຺ຑລມາເຬຕິ ທຸສ຺ສມຓ຺ຑລມາເຬ. ປຏິຍາເທນ຺ຕາຕິ ສຊ຺ເຊນ຺ຕາ.

ທກ຺ຂິເຓນ ທກ຺ຂິຓນ຺ຕິ ນຄຣສ຺ສ ທກ຺ຂິຓທິສາຠາເຄເນວ ທກ຺ຂິຓທິສາຠາຄໍ. ພາຫິເຣນ ພາຫິຣນ຺ຕິ ອນ຺ໂຕນຄຣໍ ອປ຺ປເວເສຕ຺ວາ ພາຫິເຣເນວ ນຄຣສ຺ສ ພາຫິຣປສ຺ສໍ ຫຣິຕ຺ວາ. ທກ຺ຂິຓໂຕ ນຄຣສ຺ສາຕິ ອນຸຣາຘປຸຣສ຺ສ ທກ຺ຂິຓທ຺ວາຣສທິເສ ຐາເນ ຐເປຕ຺ວາ ສກ຺ກາຣສມ຺ມານໍ ກຕ຺ວາ ເຊຕວນສທິເສ ຐາເນ ຌາເປສ຺ສາມາຕິ ອຕ຺ໂຖ.

໒໒໘. ອຏ຺ຐ ມລ຺ລປາໂມກ຺ຂາຕິ ມຊ຺ຌິມວຍາ ຖາມສມ຺ປນ຺ນາ ອຏ຺ຐມລ຺ລຣາຊາໂນ. ສີສໍ ນ຺ຫາຕາຕິ ສີສໍ ໂຘວິຕ຺ວາ ນຫາຕາ. ອາຍສ຺ມນ຺ຕໍ ອນຸຣຸທ຺ຘນ຺ຕິ ເຖໂຣວ ທິພ຺ພຈກ຺ຂຸໂກຕິ ປາກໂຏ, ຕສ຺ມາ ເຕ ສນ຺ເຕສຸປິ ອຎ຺ເຎສຸ ມຫາເຖເຣສຸ – ‘‘ອຍໍ ໂນ ປາກຏໍ ກຕ຺ວາ ກເຖສ຺ສຕີ’’ຕິ ເຖຣໍ ປຸຈ຺ຉິໍສຸ. ກຖໍ ປນ, ຠນ຺ເຕ, ເທວຕານໍ ອຘິປ຺ປາໂຍຕິ ຠນ຺ເຕ, ອມ຺ຫາກໍ ຕາວ ອຘິປ຺ປາຍໍ ຊານາມ. ເທວຕານໍ ກຖໍ ອຘິປ຺ປາໂຍຕິ ປຸຈ຺ຉນ຺ຕິ. ເຖໂຣ ປຐມໍ ເຕສໍ ອຘິປ຺ປາຍໍ ທສ຺ເສນ຺ໂຕ ຕຸມ຺ຫາກໍ ໂຂຕິອາທິມາຫ. ມກຸຏພນ຺ຘນໍ ນາມ ມລ຺ລານໍ ເຈຕິຍນ຺ຕິ ມລ຺ລຣາຊູນໍ ປສາຘນມງ຺ຄລສາລາຍ ເອຕໍ ນາມໍ. ຈິຕ຺ຕີກຕຏ຺ເຐນ ປເນສາ ‘‘ເຈຕິຍ’’ນ຺ຕິ ວຸຈ຺ຈຕິ.

໒໒໙. ຍາວ ສນ຺ຘິສມລສງ຺ກຏີຣາຕິ ເອຕ຺ຖ ສນ຺ຘິ ນາມ ຆຣສນ຺ຘິ. ສມລໍ ນາມ ຄູຖຣາສິນິທ຺ຘມນປນາຬິ. ສງ຺ກຏີຣໍ ນາມ ສງ຺ກາຣຏ຺ຐານໍ. ທິພ຺ເພຫິ ຈ ມານຸສເກຫິ ຈ ນຈ຺ເຈຫີຕິ ອຸປຣິ ເທວຕານໍ ນຈ຺ຈານິ ໂຫນ຺ຕິ, ເຫຏ຺ຐາ ມນຸສ຺ສານໍ. ເອສ ນໂຍ ຄີຕາທີສຸ. ອປິຈ ເທວຕານໍ ອນ຺ຕເຣ ມນຸສ຺ສາ, ມນຸສ຺ສານໍ ອນ຺ຕເຣ ເທວຕາຕິ ເອວມ຺ປິ ສກ຺ກໂຣນ຺ຕາ ປູເຊນ຺ຕາ ອຄມໍສຸ. ມຊ຺ເຌນ ມຊ຺ຌໍ ນຄຣສ຺ສ ຫຣິຕ຺ວາຕິ ເອວໍ ຫຣິຍມາເນ ຠຄວໂຕ ສຣີເຣ ພນ຺ຘຸລມລ຺ລເສນາປຕິຠຣິຍາ ມລ຺ລິກາ ນາມ – ‘‘ຠຄວໂຕ ສຣີຣໍ ອາຫຣນ຺ຕີ’’ຕິ ສຸຕ຺ວາ ອຕ຺ຕໂນ ສາມິກສ຺ສ ກາລໍ ກິຣິຍໂຕ ປຏ຺ຐາຍ ອປຣິຠຸຎ຺ຊິຕ຺ວາ ຐປິຕໍ ວິສາຂາຍ ປສາຘນສທິສໍ ມຫາລຕາປສາຘນໍ ນີຫຣາເປຕ຺ວາ – ‘‘ອິມິນາ ສຕ຺ຖາຣໍ ປູເຊສ຺ສາມີ’’ຕິ ຕໍ ມຊ຺ຊາເປຕ຺ວາ ຄນ຺ໂຘທເກນ ໂຘວິຕ຺ວາ ທ຺ວາເຣ ຐິຕາ.

ຕໍ ກິຣ ປສາຘນໍ ຕາສຎ຺ຈ ທ຺ວິນ຺ນໍ ອິຕ຺ຖີນໍ, ເທວທານິຍໂຈຣສ຺ສ ເຄເຫຕິ ຕີສຸເຍວ ຐາເນສຸ ອໂຫສິ. ສາ ຈ ສຕ຺ຖຸ ສຣີເຣ ທ຺ວາຣໍ ສມ຺ປຕ຺ເຕ – ‘‘ໂອຕາເຣຖ, ຕາຕາ, ສຕ຺ຖຸສຣີຣ’’ນ຺ຕິ ວຕ຺ວາ ຕໍ ປສາຘນໍ ສຕ຺ຖຸສຣີເຣ ປຏິມຸຎ຺ຈິ. ຕໍ ສີສໂຕ ປຏ຺ຐາຍ ປຏິມຸກ຺ກໍ ຍາວປາທຕລາຄຕໍ. ສຸວຓ຺ຓວຓ຺ຓໍ ຠຄວໂຕ ສຣີຣໍ ສຕ຺ຕຣຕນມເຍນ ມຫາປສາຘເນນ ປສາຘິຕໍ ອຕິວິຍ ວິໂຣຈິຕ຺ຖ. ຕໍ ສາ ທິສ຺ວາ ປສນ຺ນຈິຕ຺ຕາ ປຕ຺ຖນໍ ອກາສິ – ‘‘ຠຄວາ ຍາວ ວຏ຺ເຏ ສໍສຣິສ຺ສາມິ, ຕາວ ເມ ປາຏິເຍກ຺ກໍ ປສາຘນກິຈ຺ຈໍ ມາ ໂຫຕຸ, ນິຈ຺ຈໍ ປຏິມຸກ຺ກປສາຘນສທິສເມວ ສຣີຣໍ ໂຫຕູ’’ຕິ.

ອຖ ຠຄວນ຺ຕໍ ສຕ຺ຕຣຕນມເຍນ ມຫາປສາຘເນນ ອຸກ຺ຂິປິຕ຺ວາ ປຸຣຕ຺ຖິເມນ ທ຺ວາເຣນ ນີຫຣິຕ຺ວາ ປຸຣຕ຺ຖິເມນ ນຄຣສ຺ສ ມກຸຏພນ຺ຘນໍ ມລ຺ລານໍ ເຈຕິຍໍ, ເອຕ຺ຖ ຠຄວໂຕ ສຣີຣໍ ນິກ຺ຂິປິໍສຸ.