ສຸຠທ຺ທປຣິພ຺ພາຊກວຕ຺ຖຸວຓ຺ຓນາ

໒໑໒. ສຸຠທ຺ໂທ ນາມ ປຣິພ຺ພາຊໂກຕິ ອຸທິຈ຺ຈພ຺ຣາຫ຺ມຓມຫາສາລກຸລາ ປພ຺ພຊິໂຕ ຉນ຺ນປຣິພ຺ພາຊໂກ. ກງ຺ຂາຘມ຺ໂມຕິ ວິມຕິຘມ຺ໂມ. ກສ຺ມາ ປນສ຺ສ ອຊ຺ຊ ເອວໍ ອໂຫສີຕິ? ຕຖາວິຘອຸປນິສ຺ສຍຕ຺ຕາ. ປຸພ຺ເພ ກິຣ ປຸຎ຺ຎກຣຓກາເລ ທ຺ເວ ຠາຕໂຣ ອເຫສຸໍ. ເຕ ເອກໂຕວ ສສ຺ສໍ ອກໍສຸ. ຕຕ຺ຖ ເຊຏ຺ຐກສ຺ສ – ‘‘ເອກສ຺ມິໍ ສສ຺ເສ ນວວາເຣ ອຄ຺ຄສສ຺ສທານໍ ມຍາ ທາຕພ຺ພ’’ນ຺ຕິ ອໂຫສິ. ໂສ ວປ຺ປກາເລ ພີຊຄ຺ຄໍ ນາມ ທຕ຺ວາ ຄພ຺ຠກາເລ ກນິຏ຺ເຐນ ສທ຺ຘິໍ ມນ຺ເຕສິ – ‘‘ຄພ຺ຠກາເລ ຄພ຺ຠໍ ຜາເລຕ຺ວາ ທສ຺ສາມາ’’ຕິ ກນິຏ຺ໂຐ – ‘‘ຕຣຸຓສສ຺ສໍ ນາເສຕຸກາໂມສີ’’ຕິ ອາຫ. ເຊຏ຺ໂຐ ກນິຏ຺ຐສ຺ສ ອນນຸວຕ຺ຕນຠາວໍ ຎຕ຺ວາ ເຂຕ຺ຕໍ ວິຠຊິຕ຺ວາ ອຕ຺ຕໂນ ໂກຏ຺ຐາສໂຕ ຄພ຺ຠໍ ຜາເລຕ຺ວາ ຂີຣໍ ນີຫຣິຕ຺ວາ ສປ຺ປິນວນີເຕນ ສໍໂຍເຊຕ຺ວາ ອທາສິ, ປຸຖຸກກາເລ ປຸຖຸກໍ ກາເຣຕ຺ວາ ອທາສິ, ລາຍນກາເລ ລາຍນຄ຺ຄໍ, ເວຓິກຣເຓ ເວຓຄ຺ຄໍ, ກລາປາທີສຸ ກລາປຄ຺ຄໍ, ຂລຄ຺ຄໍ, ຂລຠຓ຺ຑຄ຺ຄໍ, ໂກຏ຺ຐຄ຺ຄນ຺ຕິ ເອວໍ ເອກສສ຺ເສ ນວວາເຣ ອຄ຺ຄທານໍ ອທາສິ. ກນິຏ຺ໂຐ ປນ ອຸທ຺ຘຣິຕ຺ວາ ອທາສິ.

ເຕສຸ ເຊຏ຺ຐໂກ ອຎ຺ຎາສິໂກຓ຺ຑຎ຺ຎຕ຺ເຖໂຣ ຊາໂຕ. ຠຄວາ – ‘‘ກສ຺ສ ນຸ ໂຂ ອຫໍ ປຐມໍ ຘມ຺ມໍ ເທເສຍ຺ຍ’’ນ຺ຕິ ໂອໂລເກນ຺ໂຕ ‘‘ອຎ຺ຎາສິໂກຓ຺ຑຎ຺ໂຎ ເອກສ຺ມິໍ ສສ຺ເສ ນວ ອຄ຺ຄທານານິ ອທາສິ, ອິມໍ ອຄ຺ຄຘມ຺ມໍ ຕສ຺ສ ເທເສສ຺ສາມີ’’ຕິ ສພ຺ພປຐມໍ ຘມ຺ມໍ ເທເສສິ. ໂສ ອຏ຺ຐາຣສຫິ ພ຺ຣຫ຺ມໂກຏີຫິ ສທ຺ຘິໍ ໂສຕາປຕ຺ຕິຜເລ ປຕິຏ຺ຐາສິ. ກນິຏ຺ໂຐ ປນ ໂອຫີຍິຕ຺ວາ ປຈ຺ຉາ ທານສ຺ສ ທິນ຺ນຕ຺ຕາ ສຕ຺ຖຸ ປຣິນິພ຺ພານກາເລ ເອວໍ ຈິນ຺ເຕຕ຺ວາ ສຕ຺ຖາຣໍ ທຏ຺ຐຸກາໂມ ອໂຫສິ.

ມາ ຕຖາຄຕໍ ວິເຫເຐສີຕິ ເຖໂຣ ກິຣ – ‘‘ເອເຕ ອຎ຺ຎຕິຕ຺ຖິຍາ ນາມ ອຕ຺ຕໂນ ຄຫຓເມວ ຄຓ຺ຫນ຺ຕິ, ຕສ຺ສ ວິສ຺ສຊ຺ຊາປນຕ຺ຖາຍ ຠຄວໂຕ ພຫຸໍ ຠາສມານສ຺ສ ກາຍວາຈາວິເຫສາ ຠວິສ຺ສຕິ, ປກຕິຍາປິ ຈ ກິລນ຺ໂຕເຍວ ຠຄວາ’’ຕິ ມຎ຺ຎມາໂນ ເອວມາຫ. ປຣິພ຺ພາຊໂກ – ‘‘ນ ເມ ອຍໍ ຠິກ຺ຂຸ ໂອກາສໍ ກໂຣຕິ, ອຕ຺ຖິເກນ ປນ ອນຸວຕ຺ຕິຕ຺ວາ ກາເຣຕພ຺ໂພ’’ຕິ ເຖຣໍ ອນຸວຕ຺ຕນ຺ໂຕ ທຸຕິຍມ຺ປິ ຕຕິຍມ຺ປິ ອາຫ.

໒໑໓. ອສ຺ໂສສິ ໂຂຕິ ສາຓິທ຺ວາເຣ ຐິຕສ຺ສ ຠາສໂຕ ປກຕິໂສເຕເນວ ອສ຺ໂສສິ, ສຸຕ຺ວາ ຈ ປນ ສຸຠທ຺ທສ຺ເສວ ອຕ຺ຖາຍ ມຫຕາ ອຸສ຺ສາເຫນ ອາຄຕຕ຺ຕາ ອລໍ ອານນ຺ທາຕິອາທິມາຫ. ຕຕ຺ຖ ອລນ຺ຕິ ປຏິກ຺ເຂປຕ຺ເຖ ນິປາໂຕ. ອຎ຺ຎາເປກ຺ໂຂວາຕິ ອຎ຺ຎາຕຸກາໂມວ ຫຸຕ຺ວາ. ອພ຺ຠຎ຺ຎິໍສູຕິ ຍຖາ ເຕສໍ ປຏິຎ຺ຎາ, ຕເຖວ ຊານິໍສຸ. ອິທໍ ວຸຕ຺ຕໍ ໂຫຕິ – ສເຈ ເນສໍ ສາ ປຏິຎ຺ຎາ ນິຍ຺ຍານິກາ, ສພ຺ເພ ອພ຺ຠຎ຺ຎໍສຸ, ໂນ ເຈ, ນ ອພ຺ຠຎ຺ຎໍສຸ. ຕສ຺ມາ ກິໍ ເຕສໍ ປຏິຎ຺ຎາ ນິຍ຺ຍານິກາ, ອນິຍ຺ຍານິກາຕິ ອຍເມວ ຕສ຺ສ ປຎ຺ຫສ຺ສ ອຕ຺ໂຖ. ອຖ ຠຄວາ ເຕສໍ ອນິຍ຺ຍານິກຠາວກຖເນນ ອຕ຺ຖາຠາວໂຕ ເຈວ ໂອກາສາຠາວໂຕ ຈ ‘‘ອລ’’ນ຺ຕິ ປຏິກ຺ຂິປິຕ຺ວາ ຘມ຺ມເມວ ເທເສສິ. ປຐມຍາມສ຺ມິຎ຺ຫິ ມລ຺ລານໍ ຘມ຺ມໍ ເທເສຕ຺ວາ ມຊ຺ຌິມຍາເມ ສຸຠທ຺ທສ຺ສ, ປຈ຺ຉິມຍາເມ ຠິກ຺ຂຸສງ຺ຆໍ ໂອວທິຕ຺ວາ ພລວປຈ຺ຈູສສມເຍ ປຣິນິພ຺ພາຍິສ຺ສາມິຈ຺ເຈວ ຠຄວາ ອາຄໂຕ.

໒໑໔. ສມໂຓປິ ຕຕ຺ຖ ນ ອຸປລພ຺ຠຕີຕິ ປຐໂມ ໂສຕາປນ຺ນສມໂຓປິ ຕຕ຺ຖ ນຕ຺ຖິ, ທຸຕິໂຍ ສກທາຄາມິສມໂຓປິ, ຕຕິໂຍ ອນາຄາມິສມໂຓປິ, ຈຕຸຕ຺ໂຖ ອຣຫຕ຺ຕສມໂຓປິ ຕຕ຺ຖ ນຕ຺ຖີຕິ ອຕ຺ໂຖ. ‘‘ອິມສ຺ມິໍ ໂຂ’’ຕິ ປຸຣິມເທສນາຍ ອນິຍມໂຕ ວຕ຺ວາ ອິທານິ ອຕ຺ຕໂນ ສາສນໍ ນິຍເມນ຺ໂຕ ອາຫ. ສຸຎ຺ຎາ ປຣປ຺ປວາທາ ສມເຓຠີຕິ ຈຕຸນ຺ນໍ ມຄ຺ຄານໍ ອຕ຺ຖາຍ ອາຣທ຺ຘວິປສ຺ສເກຫິ ຈຕູຫິ, ມຄ຺ຄຏ຺ເຐຫິ ຈຕູຫິ, ຜລຏ຺ເຐຫິ ຈຕູຫີຕິ ທ຺ວາທສຫິ ສມເຓຫິ ສຸຎ຺ຎາ ປຣປ຺ປວາທາ ຕຸຈ຺ຉາ ຣິຕ຺ຕກາ. ອິເມ ຈ ສຸຠທ຺ທາຕິ ອິເມ ທ຺ວາທສ ຠິກ຺ຂູ. ສມ຺ມາ ວິຫເຣຍ຺ຍຸນ຺ຕິ ເອຕ຺ຖ ໂສຕາປນ຺ໂນ ອຕ຺ຕໂນ ອຘິຄຕຏ຺ຐານໍ ອຎ຺ຎສ຺ສ ກເຖຕ຺ວາ ຕໍ ໂສຕາປນ຺ນໍ ກໂຣນ຺ໂຕ ສມ຺ມາ ວິຫຣຕິ ນາມ. ເອສ ນໂຍ ສກທາຄາມິອາທີສຸ. ໂສຕາປຕ຺ຕິມຄ຺ຄຏ຺ໂຐ ອຎ຺ຎມ຺ປິ ໂສຕາປຕ຺ຕິມຄ຺ຄຏ຺ຐໍ ກໂຣນ຺ໂຕ ສມ຺ມາ ວິຫຣຕິ ນາມ. ເອສ ນໂຍ ເສສມຄ຺ຄຏ຺ເຐສຸ. ໂສຕາປຕ຺ຕິມຄ຺ຄຕ຺ຖາຍ ອາຣທ຺ຘວິປສ຺ສໂກ ອຕ຺ຕໂນ ປຄຸຓໍ ກມ຺ມຏ຺ຐານໍ ກເຖຕ຺ວາ ອຎ຺ຎມ຺ປິ ໂສຕາປຕ຺ຕິມຄ຺ຄຕ຺ຖາຍ ອາຣທ຺ຘວິປສ຺ສກໍ ກໂຣນ຺ໂຕ ສມ຺ມາ ວິຫຣຕິ ນາມ. ເອສ ນໂຍ ເສສມຄ຺ຄຕ຺ຖາຍ ອາຣທ຺ຘວິປສ຺ສເກສຸ. ອິທໍ ສນ຺ຘາຍາຫ – ‘‘ສມ຺ມາ ວິຫເຣຍ຺ຍຸ’’ນ຺ຕິ. ອສຸຎ຺ໂຎ ໂລໂກ ອຣຫນ຺ເຕຫິ ອສ຺ສາຕິ ນຬວນໍ ສຣວນໍ ວິຍ ນິຣນ຺ຕໂຣ ອສ຺ສ.

ເອກູນຕິໍໂສ ວຍສາຕິ ວເຍນ ເອກູນຕິໍສວສ຺ໂສ ຫຸຕ຺ວາ. ຍໍ ປພ຺ພຊິນ຺ຕິ ເອຕ຺ຖ ຍນ຺ຕິ ນິປາຕມຕ຺ຕໍ. ກິໍ ກຸສລານຸເອສີຕິ ‘‘ກິໍ ກຸສລ’’ນ຺ຕິ ອນຸເອສນ຺ໂຕ ປຣິເຍສນ຺ໂຕ. ຕຕ຺ຖ – ‘‘ກິໍ ກຸສລ’’ນ຺ຕິ ສພ຺ພຎ຺ຎຸຕຎ຺ຎາຓໍ ອຘິປ຺ເປຕໍ, ຕໍ ຄເວສນ຺ໂຕຕິ ອຕ຺ໂຖ. ຍໂຕ ອຫນ຺ຕິ ຍໂຕ ປຏ຺ຐາຍ ອຫໍ ປພ຺ພຊິໂຕ, ເອຕ຺ຖນ຺ຕເຣ ສມຘິການິ ປຎ຺ຎາສ ວສ຺ສານິ ໂຫນ຺ຕີຕິ ທສ຺ເສຕິ. ຎາຍສ຺ສ ຘມ຺ມສ຺ສາຕິ ອຣິຍມຄ຺ຄຘມ຺ມສ຺ສ. ປເທສວຕ຺ຕີຕິ ປເທເສ ວິປສ຺ສນາມຄ຺ເຄ ປວຕ຺ຕນ຺ໂຕ. ອິໂຕ ພຫິທ຺ຘາຕິ ມມ ສາສນໂຕ ພຫິທ຺ຘາ. ສມໂຓປິ ນຕ຺ຖີຕິ ປເທສວຕ຺ຕິວິປສ຺ສໂກປິ ນຕ຺ຖິ, ປຐມສມໂຓ ໂສຕາປນ຺ໂນປິ ນຕ຺ຖີຕິ ວຸຕ຺ຕໍ ໂຫຕິ.

ເຍ ເອຕ຺ຖາຕິ ເຍ ຕຸມ຺ເຫ ເອຕ຺ຖ ສາສເນ ສຕ຺ຖາຣາ ສມ຺ມຸຂາ ອນ຺ເຕວາສິກາຠິເສເກນ ອຠິສິຕ຺ຕາ, ເຕສໍ ໂວ ລາຠາ ເຕສໍ ໂວ ສຸລທ຺ຘນ຺ຕິ. ພາຫິຣສມເຍ ກິຣ ຍໍ ອນ຺ເຕວາສິກໍ ອາຈຣິໂຍ – ‘‘ອິມໍ ປພ຺ພາເຊຫິ, ອິມໍ ໂອວທ, ອິມໍ ອນຸສາສາ’’ຕິ ວທຕິ, ໂສ ເຕນ ອຕ຺ຕໂນ ຐາເນ ຐປິໂຕ ໂຫຕິ, ຕສ຺ມາ ຕສ຺ສ – ‘‘ອິມໍ ປພ຺ພເຊຫິ, ອິມໍ ໂອວທ, ອິມໍ ອນຸສາສາ’’ຕິ ອິເມ ລາຠາ ໂຫນ຺ຕິ. ເຖຣມ຺ປິ ສຸຠທ຺ໂທ ຕເມວ ພາຫິຣສມຍໍ ຄເຫຕ຺ວາ ເອວມາຫ.

ອລຕ຺ຖ ໂຂຕິ ກຖໍ ອລຕ຺ຖ? ເຖໂຣ ກິຣ ນໍ ເອກມນ຺ຕໍ ເນຕ຺ວາ ອຸທກຕຸມ຺ພໂຕ ປານີເຍນ ສີສໍ ເຕເມຕ຺ວາ ຕຈປຎ຺ຈກກມ຺ມຏ຺ຐານໍ ກເຖຕ຺ວາ ເກສມສ຺ສຸໍ ໂອຫາເຣຕ຺ວາ ກາສາຍານິ ວຕ຺ຖານິ ອຈ຺ຉາທາເປຕ຺ວາ ສຣຓານິ ທຕ຺ວາ ຠຄວໂຕ ສນ຺ຕິກໍ ອາເນສິ. ຠຄວາ ອຸປສມ຺ປາເທຕ຺ວາ ກມ຺ມຏ຺ຐານໍ ອາຈິກ຺ຂິ. ໂສ ຕໍ ຄເຫຕ຺ວາ ອຸຍ຺ຍານສ຺ສ ເອກມນ຺ເຕ ຈງ຺ກມໍ ອຘິຏ຺ຐາຍ ຆເຏນ຺ໂຕ ວາຍມນ຺ໂຕ ວິປສ຺ສນໍ ວຑ຺ເຒນ຺ໂຕ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ອາຄມ຺ມ ຠຄວນ຺ຕໍ ວນ຺ທິຕ຺ວາ ນິສີທິ. ຕໍ ສນ຺ຘາຍ – ‘‘ອຈິຣູປສມ຺ປນ຺ໂນ ໂຂ ປນາ’’ຕິອາທິ ວຸຕ຺ຕໍ.

ໂສ ຈ ຠຄວໂຕ ປຈ຺ຉິໂມ ສກ຺ຂິສາວໂກ ອໂຫສີຕິ ສງ຺ຄີຕິກາຣການໍ ວຈນໍ. ຕຕ຺ຖ ໂຍ ຠຄວຕິ ຘຣມາເນ ປພ຺ພຊິຕ຺ວາ ອປຣຠາເຄ ອຸປສມ຺ປທໍ ລຠິຕ຺ວາ ກມ຺ມຏ຺ຐານໍ ຄເຫຕ຺ວາ ອຣຫຕ຺ຕໍ ປາປຸຓາຕິ, ອຸປສມ຺ປທມ຺ປິ ວາ ຘຣມາເນເຍວ ລຠິຕ຺ວາ ອປຣຠາເຄ ກມ຺ມຏ຺ຐານໍ ຄເຫຕ຺ວາ ອຣຫຕ຺ຕໍ ປາປຸຓາຕິ, ກມ຺ມຏ຺ຐານມ຺ປິ ວາ ຘຣມາເນເຍວ ຄເຫຕ຺ວາ ອປຣຠາເຄ ອຣຫຕ຺ຕເມວ ປາປຸຓາຕິ, ສພ຺ໂພປິ ໂສ ປຈ຺ຉິໂມ ສກ຺ຂິສາວໂກ. ອຍໍ ປນ ຘຣມາເນເຍວ ຠຄວຕິ ປພ຺ພຊິໂຕ ຈ ອຸປສມ຺ປນ຺ໂນ ຈ ກມ຺ມຏ຺ຐານຎ຺ຈ ຄເຫຕ຺ວາ ອຣຫຕ຺ຕໍ ປຕ຺ໂຕຕິ.

ປຎ຺ຈມຠາຓວາຣວຓ຺ຓນາ ນິຏ຺ຐິຕາ.