ມຫາຠູມິຈາລວຓ຺ຓນາ

໑໗໑. ຍໍ ມຫາວາຕາຕິ ເຍນ ສມເຍນ ຍສ຺ມິໍ ວາ ສມເຍ ມຫາວາຕາ ວາຍນ຺ຕິ, ມຫາວາຕາ ວາຍນ຺ຕາປິ ອຸກ຺ເຂປກວາຕາ ນາມ ອຸຏ຺ຐຫນ຺ຕິ, ເຕ ວາຍນ຺ຕາ ສຏ຺ຐິສຫສ຺ສາຘິກນວໂຍຊນສຕສຫສ຺ສພຫລໍ ອຸທກສນ຺ຘາຣກໍ ວາຕໍ ອຸປຈ຺ຉິນ຺ທນ຺ຕິ, ຕໂຕ ອາກາເສ ອຸທກໍ ຠສ຺ສຕິ, ຕສ຺ມິໍ ຠສ຺ສນ຺ເຕ ປຖວີ ຠສ຺ສຕິ. ປຸນ ວາໂຕ ອຕ຺ຕໂນ ພເລນ ອນ຺ໂຕຘມກຣເຓ ວິຍ ອຸທກໍ ອາພນ຺ຘິຕ຺ວາ ຄຓ຺ຫາຕິ, ຕໂຕ ອຸທກໍ ອຸຄ຺ຄຈ຺ຉຕິ, ຕສ຺ມິໍ ອຸຄ຺ຄຈ຺ຉນ຺ເຕ ປຖວີ ອຸຄ຺ຄຈ຺ຉຕິ. ເອວໍ ອຸທກໍ ກມ຺ປິຕໍ ປຖວິໍ ກມ຺ເປຕິ. ເອຕຎ຺ຈ ກມ຺ປນໍ ຍາວ ອຊ຺ຊກາລາປິ ໂຫຕິເຍວ, ພຫລຠາເວນ ປນ ນ ໂອຄຈ຺ຉນຸຄ຺ຄຈ຺ຉນໍ ປຎ຺ຎາຍຕິ.

ມຫິທ຺ຘິໂກ ມຫານຸຠາໂວຕິ ອິຊ຺ຌນສ຺ສ ມຫນ຺ຕຕາຍ ມຫິທ຺ຘິໂກ, ອນຸຠວິຕພ຺ພສ຺ສ ມຫນ຺ຕຕາຍ ມຫານຸຠາໂວ. ປຣິຕ຺ຕາຕິ ທຸພ຺ພລາ. ອປ຺ປມາຓາຕິ ພລວາ. ໂສ ອິມໍ ປຖວິໍ ກມ຺ເປຕີຕິ ໂສ ອິທ຺ຘິໍ ນິພ຺ພຕ຺ເຕຕ຺ວາ ສໍເວເຊນ຺ໂຕ ມຫາໂມຄ຺ຄລ຺ລາໂນ ວິຍ, ວີມໍສນ຺ໂຕ ວາ ມຫານາຄຕ຺ເຖຣສ຺ສ ຠາຄິເນຍ຺ໂຍ ສງ຺ຆຣກ຺ຂິຕສາມເຓໂຣ ວິຍ ປຖວິໍ ກມ຺ເປຕິ. ໂສ ກິຣາຍສ຺ມາ ຂຸຣຄ຺ເຄເຍວ ອຣຫຕ຺ຕໍ ປຕ຺ວາ ຈິນ຺ເຕສິ – ‘‘ອຕ຺ຖິ ນຸ ໂຂ ໂກຈິ ຠິກ຺ຂຸ, ເຍນ ປພ຺ພຊິຕທິວເສເຍວ ອຣຫຕ຺ຕໍ ປຕ຺ວາ ເວຊຍນ຺ໂຕ ປາສາໂທ ກມ຺ປິຕປຸພ຺ໂພ’’ຕິ? ຕໂຕ – ‘‘ນຕ຺ຖິ ໂກຈີ’’ຕິ ຎຕ຺ວາ – ‘‘ອຫໍ ກມ຺ເປສ຺ສາມີ’’ຕິ ອຠິຎ຺ຎາພເລນ ເວຊຍນ຺ຕມຕ຺ຖເກ ຐຕ຺ວາ ປາເທນ ປຫຣິຕ຺ວາ ກມ຺ເປຕຸໍ ນາສກ຺ຂິ. ອຖ ນໍ ສກ຺ກສ຺ສ ນາຏກິຕ຺ຖິໂຍ ອາຫໍສຸ – ‘‘ປຸຕ຺ຕ ສງ຺ຆຣກ຺ຂິຕ, ຕ຺ວໍ ປູຕິຄນ຺ເຘເນວ ສີເສນ ເວຊຍນ຺ຕໍ ກມ຺ເປຕຸໍ ອິຈ຺ຉສິ, ສຸປ຺ປຕິຏ຺ຐິໂຕ ຕາຕ ປາສາໂທ, ກຖໍ ກມ຺ເປຕຸໍ ສກ຺ຂິສ຺ສສີ’’ຕິ?

ສາມເຓໂຣ – ‘‘ອິມາ ເທວຕາ ມຍາ ສທ຺ຘິໍ ເກຬິໍ ກໂຣນ຺ຕິ, ອຫໍ ໂຂ ປນ ອາຈຣິຍໍ ນາລຕ຺ຖໍ, ກຫໍ ນຸ ໂຂ ເມ ອາຈຣິໂຍ ສາມຸທ຺ທິກມຫານາຄຕ຺ເຖໂຣ’’ຕິ ອາວຊ຺ເຊນ຺ໂຕ ມຫາສມຸທ຺ເທ ອຸທກເລຓໍ ມາເປຕ຺ວາ ທິວາວິຫາຣໍ ນິສິນ຺ໂນຕິ ຎຕ຺ວາ ຕຕ຺ຖ ຄນ຺ຕ຺ວາ ເຖຣໍ ວນ຺ທິຕ຺ວາ ອຏ຺ຐາສິ. ຕໂຕ ນໍ ເຖໂຣ – ‘‘ກິໍ, ຕາຕ ສງ຺ຆຣກ຺ຂິຕ, ອສິກ຺ຂິຕ຺ວາວ ຍຸທ຺ຘໍ ປວິຏ຺ໂຐສີ’’ຕິ ວຕ຺ວາ ‘‘ນາສກ຺ຂິ, ຕາຕ, ເວຊຍນ຺ຕໍ ກມ຺ເປຕຸ’’ນ຺ຕິ ປຸຈ຺ຉິ. ອາຈຣິຍໍ, ຠນ຺ເຕ, ນາລຕ຺ຖນ຺ຕິ. ອຖ ນໍ ເຖໂຣ – ‘‘ຕາຕ ຕຸມ຺ຫາທິເສ ອກມ຺ເປນ຺ເຕ ໂກ ອຎ຺ໂຎ ກມ຺ເປສ຺ສຕິ. ທິຏ຺ຐປຸພ຺ພໍ ເຕ, ຕາຕ, ອຸທກປິຏ຺ເຐ ໂຄມຍຂຓ຺ຑໍ ປິລວນ຺ຕໍ, ຕາຕ, ກປລ຺ລກປູວໍ ປຈນ຺ຕາ ອນ຺ຕນ຺ເຕນ ປຣິຈ຺ຉິນ຺ທນ຺ຕິ, ອິມິນາ ໂອປມ຺ເມນ ຊານາຫີ’’ຕິ ອາຫ. ໂສ – ‘‘ວຏ຺ຏິສ຺ສຕິ, ຠນ຺ເຕ, ເອຕ຺ຕເກນາ’’ຕິ ວຕ຺ວາ ປາສາເທນ ປຕິຏ຺ຐິໂຕກາສໍ ອຸທກໍ ໂຫຕູຕິ ອຘິຏ຺ຐາຍ ເວຊຍນ຺ຕາຠິມຸໂຂ ອຄມາສິ.

ເທວຘີຕໂຣ ຕໍ ທິສ຺ວາ – ‘‘ເອກວາຣໍ ລຊ຺ຊິຕ຺ວາ ຄໂຕ, ປຸນປິ ສາມເຓໂຣ ເອຕິ, ປຸນປິ ເອຕີ’’ຕິ ວທິໍສຸ. ສກ຺ໂກ ເທວຣາຊາ – ‘‘ມາ ມຍ຺ຫໍ ປຸຕ຺ເຕນ ສທ຺ຘິໍ ກຖຍິຕ຺ຖ, ອິທານິ ເຕນ ອາຈຣິໂຍ ລທ຺ໂຘ, ຂເຓນ ປາສາທໍ ກມ຺ເປສ຺ສຕີ’’ຕິ ອາຫ. ສາມເຓໂຣປິ ປາທງ຺ຄຸຏ຺ເຐນ ປາສາທຖູປິກໍ ປຫຣິ. ປາສາໂທ ຈຕູຫິ ທິສາຫິ ໂອຓມຕິ. ເທວຕາ – ‘‘ປຕິຏ຺ຐາຕຸໍ ເທຫິ, ຕາຕ, ປາສາທສ຺ສ ປຕິຏ຺ຐາຕຸໍ ເທຫິ, ຕາຕ, ປາສາທສ຺ສາ’’ຕິ ວິຣວິໍສຸ. ສາມເຓໂຣ ປາສາທໍ ຍຖາຐາເນ ຐເປຕ຺ວາ ປາສາທມຕ຺ຖເກ ຐຕ຺ວາ ອຸທານໍ ອຸທາເນສິ –

‘‘ອຊ຺ເຊວາຫໍ ປພ຺ພຊິໂຕ, ອຊ຺ຊ ປຕ຺ຕາສວກ຺ຂຍໍ;

ອຊ຺ຊ ກມ຺ເປມິ ປາສາທໍ, ອໂຫ ພຸທ຺ຘສ຺ສຸຬາຣຕາ.

ອຊ຺ເຊວາຫໍ ປພ຺ພຊິໂຕ…ເປ… ອໂຫ ຘມ຺ມສ຺ສຸຬາຣຕາ.

ອຊ຺ເຊວາຫໍ ປພ຺ພຊິໂຕ…ເປ… ອໂຫ ສງ຺ຆສ຺ສຸຬາຣຕາຕິ.

ອິໂຕ ປເຣສຸ ຉສຸ ປຖວີກມ຺ເປສຸ ຍໍ ວຕ຺ຕພ຺ພໍ, ຕໍ ມຫາປທາເນ ວຸຕ຺ຕເມວ.

ອິຕິ ອິເມສຸ ອຏ຺ຐສຸ ປຖວີກມ຺ເປສຸ ປຐໂມ ຘາຕຸໂກເປນ, ທຸຕິໂຍ ອິທ຺ຘານຸຠາເວນ, ຕຕິຍຈຕຸຕ຺ຖາ ປຸຎ຺ຎເຕເຊນ, ປຎ຺ຈໂມ ຎາຓເຕເຊນ, ຉຏ຺ໂຐ ສາຘຸກາຣທານວເສນ, ສຕ຺ຕໂມ ກາຣຸຎ຺ຎຠາເວນ, ອຏ຺ຐໂມ ອາໂຣທເນນ. ມາຕຸກຸຈ຺ຉິໍ ໂອກ຺ກມນ຺ເຕ ຈ ຕໂຕ ນິກ຺ຂມນ຺ເຕ ຈ ມຫາສຕ຺ເຕ ຕສ຺ສ ປຸຎ຺ຎເຕເຊນ ປຖວີ ອກມ຺ປິຕ຺ຖ. ອຠິສມ຺ໂພຘິຍໍ ຎາຓເຕເຊນ ອຠິຫຕາ ຫຸຕ຺ວາ ອກມ຺ປິຕ຺ຖ. ຘມ຺ມຈກ຺ກປ຺ປວຕ຺ຕເນ ສາຘຸກາຣຠາວສຓ຺ຐິຕາ ສາຘຸກາຣໍ ທທມານາ ອກມ຺ປິຕ຺ຖ. ອາຍຸສງ຺ຂາໂຣສ຺ສຊ຺ຊເນ ກາຣຸຎ຺ຎສຠາວສຓ຺ຐິຕາ ຈິຕ຺ຕສງ຺ໂຂຠໍ ອສຫມານາ ອກມ຺ປິຕ຺ຖ. ປຣິນິພ຺ພາເນ ອາໂຣທນເວຄຕຸນ຺ນາ ຫຸຕ຺ວາ ອກມ຺ປິຕ຺ຖ. ອຍໍ ປນຕ຺ໂຖ ປຖວີເທວຕາຍ ວເສນ ເວທິຕພ຺ໂພ, ມຫາຠູຕປຖວິຍາ ປເນຕໍ ນຕ຺ຖິ ອເຈຕນຕ຺ຕາຕິ.

ອິເມ ໂຂ, ອານນ຺ທ, ອຏ຺ຐ ເຫຕູຕິ ເອຕ຺ຖ ອິເມຕິ ນິທ຺ທິຏ຺ຐນິທສ຺ສນໍ. ເອຕ຺ຕາວຕາ ຈ ປນາຍສ຺ມາ ອານນ຺ໂທ – ‘‘ອທ຺ຘາ ອຊ຺ຊ ຠຄວຕາ ອາຍຸສງ຺ຂາໂຣ ໂອສ຺ສຏ຺ໂຐ’’ຕິ ສລ຺ລກ຺ເຂສິ. ຠຄວາ ປນ ສລ຺ລກ຺ຂິຕຠາວໍ ຊານນ຺ໂຕປິ ໂອກາສໍ ອທຕ຺ວາວ ອຎ຺ຎານິປິ ອຏ຺ຐການິ ສມ຺ປິຓ຺ເຑນ຺ໂຕ – ‘‘ອຏ຺ຐ ໂຂ ອິມາ’’ຕິອາທິມາຫ.