ອຏ຺ຐປຣິສວຓ຺ຓນາ

໑໗໒. ຕຕ຺ຖ ອເນກສຕໍ ຂຕ຺ຕິຍປຣິສນ຺ຕິ ພິມ຺ພິສາຣສມາຄມຎາຕິສມາຄລິຈ຺ຉວີສມາຄມາທິສທິສໍ, ສາ ປນ ອຎ຺ເຎສຸ ຈກ຺ກວາເຬສຸປິ ລພ຺ຠເຕເຍວ. ສລ຺ລປິຕປຸພ຺ພນ຺ຕິ ອາລາປສລ຺ລາໂປ ກຕປຸພ຺ໂພ. ສາກຈ຺ຉາຕິ ຘມ຺ມສາກຈ຺ຉາປິ ສມາປຊ຺ຊິຕປຸພ຺ພາ. ຍາທິສໂກ ເຕສໍ ວຓ຺ໂຓຕິ ເຕ ໂອທາຕາປິ ໂຫນ຺ຕິ ກາຬາປິ ມງ຺ຄຸຣຈ຺ຉວີປິ, ສຕ຺ຖາ ສຸວຓ຺ຓວຓ຺ໂຓວ. ອິທໍ ປນ ສຓ຺ຐານໍ ປຏິຈ຺ຈ ກຖິຕໍ. ສຓ຺ຐານມ຺ປິ ຈ ເກວລໍ ເຕສໍ ປຎ຺ຎາຍຕິເຍວ, ນ ປນ ຠຄວາ ມິລກ຺ຂຸສທິໂສ ໂຫຕິ, ນາປິ ອາມຸຕ຺ຕມຓິກຸຓ຺ຑໂລ, ພຸທ຺ຘເວເສເນວ ນິສີທຕິ. ເຕ ປນ ອຕ຺ຕໂນ ສມານສຓ຺ຐານເມວ ປສ຺ສນ຺ຕິ. ຍາທິສໂກ ເຕສໍ ສໂຣຕິ ເຕ ຉິນ຺ນສ຺ສຣາປິ ໂຫນ຺ຕິ ຄຄ຺ຄຣສ຺ສຣາປິ ກາກສ຺ສຣາປິ, ສຕ຺ຖາ ພ຺ຣຫ຺ມສ຺ສໂຣວ. ອິທໍ ປນ ຠາສນ຺ຕຣໍ ສນ຺ຘາຍ ກຖິຕໍ. ສເຈປິ ຫິ ສຕ຺ຖາ ຣາຊາສເນ ນິສິນ຺ໂນ ກເຖຕິ, ‘‘ອຊ຺ຊ ຣາຊາ ມຘຸເຣນ ສເຣນ ກເຖຕີ’’ຕິ ເຕສໍ ໂຫຕິ. ກເຖຕ຺ວາ ປກ຺ກນ຺ເຕ ປນ ຠຄວຕິ ປຸນ ຣາຊານໍ ອາຄຕໍ ທິສ຺ວາ – ‘‘ໂກ ນຸ ໂຂ ອຍ’’ນ຺ຕິ ວີມໍສາ ອຸປ຺ປຊ຺ຊຕິ. ຕຕ຺ຖ ໂກ ນຸ ໂຂ ອຍນ຺ຕິ ອິມສ຺ມິໍ ຐາເນ ອິທາເນວ ມາຄຘຠາສາຍ ສີຫຬຠາສາຍ ມຘຸເຣນາກາເຣນ ກເຖນ຺ໂຕ ໂກ ນຸ ໂຂ ອຍໍ ອນ຺ຕຣຫິໂຕ, ກິໍ ເທໂວ, ອຸທາຫຸ ມນຸສ຺ໂສຕິ ເອວໍ ວີມໍສນ຺ຕາປິ ນ ຊານນ຺ຕີຕິ ອຕ຺ໂຖ. ກິມຕ຺ຖໍ ປເນວໍ ອຊານນ຺ຕານໍ ຘມ຺ມໍ ເທເສຕີຕິ? ວາສນຕ຺ຖາຍ. ເອວໍ ສຸໂຕປິ ຫິ ຘມ຺ໂມ ອນາຄເຕ ປຈ຺ຈໂຍ ໂຫຕິ ເຍວາຕິ ອນາຄຕໍ ປຏິຈ຺ຈ ເທເສຕິ. ອເນກສຕໍ ພ຺ຣາຫ຺ມຓປຣິສນ຺ຕິອາທີນມ຺ປິ ໂສຓທຓ຺ຑກູຏທຓ຺ຑສມາຄມາທິວເສນ ເຈວ ອຎ຺ຎຈກ຺ກວາຬວເສນ ຈ ສມ຺ຠໂວ ເວທິຕພ຺ໂພ.

ອິມາ ປນ ອຏ຺ຐ ປຣິສາ ຠຄວາ ກິມຕ຺ຖໍ ອາຫຣິ? ອຠີຕຠາວທສ຺ສນຕ຺ຖເມວ. ອິມາ ກິຣ ອາຫຣິຕ຺ວາ ເອວມາຫ – ‘‘ອານນ຺ທ, ອິມາປິ ອຏ຺ຐ ປຣິສາ ອຸປສງ຺ກມິຕ຺ວາ ຘມ຺ມໍ ເທເສນ຺ຕສ຺ສ ຕຖາຄຕສ຺ສ ຠຍໍ ວາ ສາຣຊ຺ຊໍ ວາ ນຕ຺ຖິ, ມາຣໍ ປນ ເອກກໍ ທິສ຺ວາ ຕຖາຄໂຕ ຠາເຍຍ຺ຍາຕິ ໂກ ເອວໍ ສຎ຺ຎໍ ອຸປ຺ປາເທຕຸມຣຫຕິ. ອຠີໂຕ, ອານນ຺ທ, ຕຖາຄໂຕ ອຈ຺ຉມ຺ຠີ, ສໂຕ ສມ຺ປຊາໂນ ອາຍຸສງ຺ຂາຣໍ ໂອສ຺ສຊີ’’ຕິ.