ໂສຓທຓ຺ຑອຸປາສກຕ຺ຕປຏິເວທນາກຖາ

໓໑໙-໓໒໒. ສ຺ວາຕນາຍາຕິ ປທສ຺ສ ອຕ຺ໂຖ ອຊ຺ຊຕນາຍາຕິ ເອຕ຺ຖ ວຸຕ຺ຕນເຍເນວ ເວທິຕພ຺ໂພ. ເຕນ ມໍ ສາ ປຣິສາ ປຣິຠເວຍ຺ຍາຕິ ເຕນ ຕຸມ຺ເຫ ທູຣໂຕວ ທິສ຺ວາ ອາສນາ ວຸຏ຺ຐິຕກາຣເຓນ ມໍ ສາ ປຣິສາ – ‘‘ອຍໍ ໂສຓທຓ຺ໂຑ ປຈ຺ຉິມວເຍ ຐິໂຕ ມຫລ຺ລໂກ, ໂຄຕໂມ ປນ ທຫໂຣ ຍຸວາ ນຕ຺ຕາປິສ຺ສ ນປ຺ປໂຫຕິ, ໂສ ນາມ ອຕ຺ຕໂນ ນຕ຺ຕຸມຕ຺ຕຠາວມ຺ປິ ອປ຺ປຕ຺ຕສ຺ສ ອາສນາ ວຸຏ຺ຐາຕີ’’ຕິ ປຣິຠເວຍ຺ຍ. ອາສນາ ເມ ຕໍ ຠວໍ ໂຄຕໂມ ປຈ຺ຈຸຏ຺ຐານນ຺ຕິ ມມ ອຄາຣເວນ ອວຸຏ຺ຐານໍ ນາມ ນຕ຺ຖິ, ໂຠຄນາສນຠເຍນ ປນ ນ ວຸຏ຺ຐຫິສ຺ສາມິ, ຕໍ ຕຸມ຺ເຫ ຫິ ເຈວ ມຍາ ຈ ຎາຕຸໍ ວຏ຺ຏຕິ. ຕສ຺ມາ ອາສນາ ເມ ເອຕໍ ຠວໍ ໂຄຕໂມ ປຈ຺ຈຸຏ຺ຐານໍ ຘາເຣຕູຕິ, ອິມິນາ ກິຣ ສທິໂສ ກຸຫໂກ ທຸລ຺ລໂຠ, ຠຄວຕິ ປນສ຺ສ ອຄາຣວໍ ນາມ ນຕ຺ຖິ, ຕສ຺ມາ ໂຠຄນາສນຠຍາ ກຸຫນວເສນ ເອວໍ ວທຕິ. ປຣປເທສຸປິ ເອເສວ ນໂຍ. ຘມ຺ມິຍາ ກຖາຍາຕິອາທີສຸ ຕງ຺ຂຓານຸຣູປາຍ ຘມ຺ມິຍາ ກຖາຍ ທິຏ຺ຐຘມ຺ມິກສມ຺ປຣາຍິກໍ ອຕ຺ຖໍ ສນ຺ທສ຺ເສຕ຺ວາ ກຸສເລ ຘມ຺ເມ ສມາທເປຕ຺ວາ ຄຓ຺ຫາເປຕ຺ວາ. ຕຕ຺ຖ ນໍ ສມຸຕ຺ເຕເຊຕ຺ວາ ສອຸສ຺ສາຫໍ ກຕ຺ວາ ຕາຍ ຈ ສອຸສ຺ສາຫຕາຍ ອຎ຺ເຎຫິ ຈ ວິຊ຺ຊມານຄຸເຓຫິ ສມ຺ປຫໍເສຕ຺ວາ ຘມ຺ມຣຕນວສ຺ສໍ ວສ຺ສິຕ຺ວາ ອຸຏ຺ຐາຍາສນາ ປກ຺ກາມິ. ພ຺ຣາຫ຺ມໂຓ ປນ ອຕ຺ຕໂນ ກຸຫກຕາຍ ເອວມ຺ປິ ຠຄວຕິ ຘມ຺ມວສ຺ສໍ ວສ຺ສິເຕ ວິເສສໍ ນິພ຺ພຕ຺ເຕຕຸໍ ນາສກ຺ຂິ. ເກວລມສ຺ສ ອາຍຕິໍ ນິພ຺ພານຕ຺ຖາຍ ວາສນາຠາຄິຍາຍ ຈ ສພ຺ພາ ປຸຣິມປຈ຺ຉິມກຖາ ອໂຫສີຕິ.

ອິຕິ ສຸມງ຺ຄລວິລາສິນິຍາ ທີຆນິກາຍຏ຺ຐກຖາຍໍ

ໂສຓທຓ຺ຑສຸຕ຺ຕວຓ຺ຓນາ ນິຏ຺ຐິຕາ.