ພ຺ຣາຫ຺ມຓປຎ຺ຎຕ຺ຕິວຓ຺ຓນາ

໓໐໙-໓໑໐. ເຈຕສາ ເຈໂຕປຣິວິຕກ຺ກນ຺ຕິ ຠຄວາ – ‘‘ອຍໍ ພ຺ຣາຫ຺ມໂຓ ອາຄຕກາລໂຕ ປຏ຺ຐາຍ ອໂຘມຸໂຂ ຖທ຺ຘຄຕ຺ໂຕ ກິໍ ຈິນ຺ຕຍມາໂນ ນິສິນ຺ໂນ, ກິໍ ນຸ ໂຂ ຈິນ຺ເຕຕີ’’ຕິ ອາວຊ຺ຊນ຺ໂຕ ອຕ຺ຕໂນ ເຈຕສາ ຕສ຺ສ ຈິຕ຺ຕໍ ອຎ຺ຎາສິ. ເຕນ ວຸຕ຺ຕໍ – ‘‘ເຈຕສາ ເຈໂຕປຣິວິຕກ຺ກມຎ຺ຎາຍາ’’ຕິ. ວິຫຎ຺ຎຕີຕິ ວິຆາຕໍ ອາປຊ຺ຊຕິ. ອນຸວິໂລເກຕ຺ວາ ປຣິສນ຺ຕິ ຠຄວໂຕ ສກສມເຍ ປຎ຺ຫປຸຈ຺ຉເນນ ອຸທເກ ມິຍມາໂນ ອຸກ຺ຂິປິຕ຺ວາ ຖເລ ຐປິໂຕ ວິຍ ສມປສ຺ສທ຺ຘກາຍຈິຕ຺ໂຕ ຫຸຕ຺ວາ ປຣິສໍ ສງ຺ຄຓ຺ຫນຕ຺ຖໍ ທິຏ຺ຐິສຎ຺ຊາເນເນວ ‘‘ອຸປຘາເຣນ຺ຕຸ ເມ ໂຠນ຺ໂຕ ວຈນ’’ນ຺ຕິ ວທນ຺ໂຕ ວິຍ ອນຸວິໂລເກຕ຺ວາ ປຣິສໍ ຠຄວນ຺ຕໍ ເອຕທໂວຈ.

໓໑໑-໓໑໓. ສຸຊໍ ປຄ຺ຄຓ຺ຫນ຺ຕານນ຺ຕິ ຍຎ຺ຎຍຊນຕ຺ຖາຍ ສຸຊໍ ຄຓ຺ຫນ຺ເຕສຸ ພ຺ຣາຫ຺ມເຓສຸ ປຐໂມ ວາ ທຸຕິໂຍ ວາຕິ ອຕ຺ໂຖ. ສຸຊາຍ ທິຍ຺ຍມານໍ ມຫາຍາຄໍ ປຏິຄ຺ຄຓ຺ຫນ຺ຕານນ຺ຕິ ໂປຣາຓາ. ອິຕິ ພ຺ຣາຫ຺ມໂຓ ສກສມຍວເສນ ສມ຺ມເທວ ປຎ຺ຫໍ ວິສ຺ສຊ຺ເຊສິ. ຠຄວາ ປນ ວິເສສໂຕ ອຸຕ຺ຕມພ຺ຣາຫ຺ມຓສ຺ສ ທສ຺ສນຕ຺ຖໍ – ‘‘ອິເມສໍ ປນາ’’ຕິອາທິມາຫ. ເອຕທໂວຈຸນ຺ຕິ ສເຈ ຊາຕິວຓ຺ຓມນ຺ຕສມ຺ປນ຺ໂນ ພ຺ຣາຫ຺ມໂຓ ນ ໂຫຕິ, ອຖ ໂກ ຈຣຫິ ໂລເກ ພ຺ຣາຫ຺ມໂຓ ຠວິສ຺ສຕິ? ນາເສຕິ ໂນ ອຍໍ ໂສຓທຓ຺ໂຑ, ຫນ຺ທສ຺ສ ວາທໍ ປຏິກ຺ຂິປິສ຺ສາມາຕິ ຈິນ຺ເຕຕ຺ວາ ເອຕທໂວຈຸໍ. ອປວທຕີຕິ ປຏິກ຺ຂິປຕິ. ອນຸປກ຺ຂນ຺ທຕີຕິ ອນຸປວິສຕິ. ອິທໍ – ‘‘ສເຈ ຕ຺ວໍ ປສາທວເສນ ສມຓໍ ໂຄຕມໍ ສຣຓໍ ຄນ຺ຕຸກາໂມ, ຄຈ຺ຉ; ມາ ພ຺ຣາຫ຺ມຓສ຺ສ ສມຍໍ ຠິນ຺ທີ’’ຕິ ອຘິປ຺ປາເຍນ ອາຫໍສຸ.

໓໑໔. ເອຕທໂວຈາຕິ ອິເມສຸ ພ຺ຣາຫ຺ມເຓສຸ ເອວໍ ເອກປ຺ປຫາເຣເນວ ວິຣວນ຺ເຕສຸ ‘‘ອຍໍ ກຖາ ປຣິໂຍສານໍ ນ ຄມິສ຺ສຕິ, ຫນ຺ທ ເນ ນິສ຺ສທ຺ເທ ກຕ຺ວາ ໂສຓທຓ຺ເຑເນວ ສທ຺ຘິໍ ກເຖມີ’’ຕິ ຈິນ຺ເຕຕ຺ວາ – ‘‘ເອຕໍ ສເຈ ໂຂ ຕຸມ຺ຫາກ’’ນ຺ຕິອາທິກໍ ວຈນໍ ອໂວຈ.

໓໑໕-໓໑໖. ສຫຘມ຺ເມນາຕິ ສກາຣເຓນ. ສມສໂມຕິ ຐເປຕ຺ວາ ເອກເທສສມຕ຺ຕໍ ສມຠາເວນ ສໂມ, ສພ຺ພາກາເຣນ ສໂມຕິ ອຕ຺ໂຖ. ອຫມສ຺ສ ມາຕາປິຕໂຣ ຊານາມີຕິ ຠຄິນິຍາ ປຸຕ຺ຕສ຺ສ ມາຕາປິຕໂຣ ກິໍ ນ ຊານິສ຺ສຕິ, ກຸລໂກຏິປຣິທີປນໍ ສນ຺ຘາເຍວ ວທຕິ. ມຸສາວາທມ຺ປິ ຠເຓຍ຺ຍາຕິ ອຕ຺ຖຠຎ຺ຊນກໍ ມຸສາວາທໍ ກເຖຍ຺ຍ. ກິໍ ວຓ຺ໂຓ ກຣິສ຺ສຕີຕິ ອພ຺ຠນ຺ຕເຣ ຄຸເຓ ອສຕິ ກິໍ ກຣິສ຺ສຕິ? ກິມສ຺ສ ພ຺ຣາຫ຺ມຓຠາວໍ ຣກ຺ຂິຕຸໍ ສກ຺ຂິສ຺ສຕີຕິ ອຕ຺ໂຖ. ອຖາປິ ສິຍາ ປຸນ – ‘‘ປກຕິສີເລ ຐິຕສ຺ສ ພ຺ຣາຫ຺ມຓຠາວໍ ສາເຘນ຺ຕີ’’ຕິ ເອວມ຺ປິ ສີລເມວ ສາເຘສ຺ສຕິ, ຕສ຺ມິໍ ຫິສ຺ສ ອສຕິ ພ຺ຣາຫ຺ມຓຠາໂວ ນາໂຫສີຕິ ສມ຺ໂມຫມຕ຺ຕໍ ວຓ຺ຓາທໂຍ. ອິທໍ ປນ ສຸຕ຺ວາ ເຕ ພ຺ຣາຫ຺ມຓາ – ‘‘ສຠາວໍ ອາຈຣິໂຍ ອາຫ, ອກາຣຓາວ ມຍໍ ອຸຊ຺ຌາຍິມ຺ຫາ’’ຕິ ຕຸຓ຺ຫີ ອເຫສຸໍ.