ໂສຓທຓ຺ຑປຣິວິຕກ຺ກວຓ຺ຓນາ

໓໐໖-໓໐໘. ຕິໂຣວນສຓ຺ຑຄຕສ຺ສາຕິ ອນ຺ໂຕວນສຓ຺ເຑ ຄຕສ຺ສ, ວິຫາຣພ຺ຠນ຺ຕຣໍ ປວິຏ຺ຐສ຺ສາຕິ ອຕ຺ໂຖ. ອຎ຺ຊລິໍ ປຓາເມຕ຺ວາຕິ ເອເຕ ອຸຠໂຕປກ຺ຂິກາ, ເຕ ເອວໍ ຈິນ຺ຕຍິໍສຸ – ‘‘ສເຈ ໂນ ມິຈ຺ຉາທິຏ຺ຐິກາ ໂຈເທສ຺ສນ຺ຕິ – ‘ກສ຺ມາ ຕຸມ຺ເຫ ສມຓໍ ໂຄຕມໍ ວນ຺ທິຕ຺ຖາ’ຕິ? ເຕສໍ – ‘ກິໍ ອຎ຺ຊລິມຕ຺ຕກຣເຓນາປິ ວນ຺ທນໍ ນາມ ໂຫຕີ’ຕິ ວກ຺ຂາມ. ສເຈ ໂນ ສມ຺ມາທິຏ຺ຐິກາ ໂຈເທສ຺ສນ຺ຕິ – ‘ກສ຺ມາ ຕຸມ຺ເຫ ຠຄວນ຺ຕໍ ນ ວນ຺ທິຕ຺ຖາ’ຕິ. ‘ກິໍ ສີເສນ ຠູມິຍໍ ປຫຣນ຺ເຕເນວ ວນ຺ທນໍ ນາມ ໂຫຕິ, ນນຸ ອຎ຺ຊລິກມ຺ມມ຺ປິ ວນ຺ທນໍ ເອວາ’ຕິ ວກ຺ຂາມາ’’ຕິ. ນາມໂຄຕ຺ຕນ຺ຕິ ‘‘ໂຠ, ໂຄຕມ, ອຫໍ ອສຸກສ຺ສ ປຸຕ຺ໂຕ ທຕ຺ໂຕ ນາມ, ມິຕ຺ໂຕ ນາມ, ອິຘາຄໂຕ’’ຕິ ວທນ຺ຕາ ນາມໍ ສາເວນ຺ຕິ ນາມ. ‘‘ໂຠ, ໂຄຕມ, ອຫໍ ວາເສຏ຺ໂຐ ນາມ, ກຈ຺ຈາໂນ ນາມ, ອິຘາຄໂຕ’’ຕິ ວທນ຺ຕາ ໂຄຕ຺ຕໍ ສາເວນ຺ຕິ ນາມ. ເອເຕ ກິຣ ທລິທ຺ທາ ຊິຓ຺ຓາ ກຸລປຸຕ຺ຕາ ‘‘ປຣິສມຊ຺ເຌ ນາມໂຄຕ຺ຕວເສນ ປາກຏາ ຠວິສ຺ສາມາ’’ຕິ ເອວມກໍສຸ. ເຍ ປນ ຕຸຓ຺ຫີຠູຕາ ນິສີທິໍສຸ, ເຕ ເກຣາຏິກາ ເຈວ ອນ຺ຘພາລາ ຈ. ຕຕ຺ຖ ເກຣາຏິກາ – ‘‘ເອກໍ ທ຺ເວ ກຖາສລ຺ລາເປປິ ກໂຣນ຺ໂຕ ວິສ຺ສາສິໂກ ໂຫຕິ, ອຖ ວິສ຺ສາເສ ສຕິ ເອກໍ ທ຺ເວ ຠິກ຺ຂາ ອທາຕຸໍ ນ ຍຸຕ຺ຕ’’ນ຺ຕິ ຕໂຕ ອຕ຺ຕານໍ ໂມເຈຕ຺ວາ ຕຸຓ຺ຫີ ນິສີທນ຺ຕິ. ອນ຺ຘພາລາ ອຎ຺ຎາຓຕາເຍວ ອວກ຺ຂິຕ຺ຕມຕ຺ຕິກາປິຓ຺ໂຑ ວິຍ ຍຕ຺ຖ ກຕ຺ຖຈິ ຕຸຓ຺ຫີຠູຕາ ນິສີທນ຺ຕິ.