ໂສຓທຓ຺ຑຄຸຓກຖາ

໓໐໓. ນານາເວຣຊ຺ຊການນ຺ຕິ ນານາວິເຘສຸ ຣຊ຺ເຊສຸ, ອຎ຺ເຎສຸ ອຎ຺ເຎສຸ ກາສິໂກສລາທີສຸ ຣຊ຺ເຊສຸ ຊາຕາ, ຕານິ ວາ ເຕສໍ ນິວາສາ, ຕໂຕ ວາ ອາຄຕາຕິ ນານາເວຣຊ຺ຊກາ, ເຕສໍ ນານາເວຣຊ຺ຊການໍ. ເກນຈິເທວ ກຣຓີເຍນາຕິ ຕສ຺ມິໍ ກິຣ ນຄເຣ ທ຺ວີຫິ ກຣຓີເຍຫິ ພ຺ຣາຫ຺ມຓາ ສນ຺ນິປຕນ຺ຕິ – ຍຎ຺ຎານຸຠວນຕ຺ຖໍ ວາ ມນ຺ຕສຊ຺ຌາຍນຕ຺ຖໍ ວາ. ຕທາ ຈ ຕສ຺ມິໍ ນຄເຣ ຍມຎ຺ຎາ ນຕ຺ຖິ. ໂສຓທຓ຺ຑສ຺ສ ປນ ສນ຺ຕິເກ ມນ຺ຕສຊ຺ຌາຍນຕ຺ຖໍ ເອເຕ ສນ຺ນິປຕິຕາ. ຕໍ ສນ຺ຘາຍ ວຸຕ຺ຕໍ – ‘‘ເກນຈິເທວ ກຣຓີເຍນາ’’ຕິ. ເຕ ຕສ຺ສ ຄມນໍ ສຸຕ຺ວາ ຈິນ຺ເຕສຸໍ – ‘‘ອຍໍ ໂສຓທຓ຺ໂຑ ອຸຄ຺ຄຕພ຺ຣາຫ຺ມໂຓ ເຍຠຸຍ຺ເຍນ ຈ ອຎ຺ເຎ ພ຺ຣາຫ຺ມຓາ ສມຓໍ ໂຄຕມໍ ສຣຓໍ ຄຕາ, ອຍເມວ ນ ຄໂຕ. ສ຺ວາຍໍ ສເຈ ຕຕ຺ຖ ຄມິສ຺ສຕິ, ອທ຺ຘາ ສມຓສ຺ສ ໂຄຕມສ຺ສ ອາວຏ຺ຏນິຍາ ມາຍາຍ ອາວຏ຺ຏິໂຕ, ຕໍ ສຣຓໍ ຄມິສ຺ສຕິ. ຕໂຕ ເອຕສ຺ສາປິ ເຄຫທ຺ວາເຣ ພ຺ຣາຫ຺ມຓານໍ ສນ຺ນິປາໂຕ ນ ຠວິສ຺ສຕີ’’ຕິ. ‘‘ຫນ຺ທສ຺ສ ຄມນນ຺ຕຣາຍໍ ກໂຣມາ’’ຕິ ສມ຺ມນ຺ຕຍິຕ຺ວາ ຕຕ຺ຖ ອຄມໍສຸ. ຕໍ ສນ຺ຘາຍ – ອຖ ໂຂ ເຕ ພ຺ຣາຫ຺ມຓາຕິອາທິ ວຸຕ຺ຕໍ.

ຕຕ຺ຖ ອິມິນາປງ຺ເຄນາຕິ ອິມິນາປິ ກາຣເຓນ. ເອວໍ ເອຕໍ ກາຣຓໍ ວຕ຺ວາ ປຸນ – ‘‘ອຕ຺ຕໂນ ວຓ຺ເຓ ຠຎ຺ຎມາເນ ອຕຸສ຺ສນກສຕ຺ໂຕ ນາມ ນຕ຺ຖິ. ຫນ຺ທສ຺ສ ວຓ຺ຓໍ ຠຓເນນ ຄມນໍ ນິວາເຣສ຺ສາມາ’’ຕິ ຈິນ຺ເຕຕ຺ວາ ຠວຎ຺ຫິ ໂສຓທຓ຺ໂຑ ອຸຠໂຕ ສຸຊາໂຕຕິອາທີນິ ກາຣຓານິ ອາຫໍສຸ.

ອຸຠໂຕຕິ ທ຺ວີຫິ ປກ຺ເຂຫິ. ມາຕິໂຕ ຈ ປິຕິໂຕ ຈາຕິ ໂຠໂຕ ມາຕາ ພ຺ຣາຫ຺ມຓີ, ມາຕຸມາຕາ ພ຺ຣາຫ຺ມຓີ, ຕສ຺ສາປິ ມາຕາ ພ຺ຣາຫ຺ມຓີ; ປິຕາ ພ຺ຣາຫ຺ມໂຓ, ປິຕຸປິຕາ ພ຺ຣາຫ຺ມໂຓ, ຕສ຺ສາປິ ປິຕາ ພ຺ຣາຫ຺ມໂຓຕິ, ເອວໍ ຠວໍ ອຸຠໂຕ ສຸຊາໂຕ ມາຕິໂຕ ຈ ປິຕິໂຕ ຈ. ສໍສຸທ຺ຘຄຫຓິໂກຕິ ສໍສຸທ຺ຘາ ເຕ ມາຕຸຄຫຓີ ກຸຈ຺ຉີຕິ ອຕ຺ໂຖ. ສມເວປາກິນິຍາ ຄຫຓິຍາຕິ ເອຕ຺ຖ ປນ ກມ຺ມຊເຕໂຊຘາຕຸ ‘‘ຄຫຓີ’’ຕິ ວຸຈ຺ຈຕິ.

ຍາວ ສຕ຺ຕມາ ປິຕາມຫຍຸຄາຕິ ເອຕ຺ຖ ປິຕຸປິຕາ ປິຕາມໂຫ, ປິຕາມຫສ຺ສ ຍຸຄໍ ປິຕາມຫຍຸຄໍ. ຍຸຄນ຺ຕິ ອາຍຸປ຺ປມາຓໍ ວຸຈ຺ຈຕິ. ອຠິລາປມຕ຺ຕເມວ ເຈຕໍ. ອຕ຺ຖໂຕ ປນ ປິຕາມໂຫເຍວ ປິຕາມຫຍຸຄໍ. ຕໂຕ ອຸທ຺ຘໍ ສພ຺ເພປິ ປຸພ຺ພປຸຣິສາ ປິຕາມຫຄ຺ຄຫເຓເນວ ຄຫິຕາ. ເອວໍ ຍາວ ສຕ຺ຕໂມ ປຸຣິໂສ, ຕາວ ສໍສຸທ຺ຘຄຫຓິໂກ. ອຖ ວາ ອກ຺ຂິຕ຺ໂຕ ອນຸປກຸຏ຺ໂຐ ຊາຕິວາເທນາຕິ ທສ຺ເສນ຺ຕິ. ອກ຺ຂິຕ຺ໂຕຕິ – ‘‘ອປເນຖ ເອຕໍ, ກິໍ ອິມິນາ’’ຕິ ເອວໍ ອກ຺ຂິຕ຺ໂຕ ອນວກ຺ຂິຕ຺ໂຕ. ອນຸປກຸຏ຺ໂຐຕິ ນ ອຸປກຸຏ຺ໂຐ, ນ ອກ຺ໂກສໍ ວາ ນິນ຺ທໍ ວາ ລທ຺ຘປຸພ຺ໂພ. ເກນ ກາຣເຓນາຕິ? ຊາຕິວາເທນ. ອິຕິປິ – ‘‘ຫີນຊາຕິໂກ ເອໂສ’’ຕິ ເອວຣູເປນ ວຈເນນາຕິ ອຕ຺ໂຖ.

ອຑ຺ໂຒຕິ ອິສ຺ສໂຣ. ມຫທ຺ຘໂນຕິ ມຫຕາ ຘເນນ ສມນ຺ນາຄໂຕ. ຠວໂຕ ຫິ ເຄເຫ ປຖວິຍໍ ປໍສຸວາລິກາ ວິຍ ພຫຸຘນໍ, ສມໂຓ ປນ ໂຄຕໂມ ອຘໂນ ຠິກ຺ຂາຍ ອຸທຣໍ ປູເຣຕ຺ວາ ຍາເປຕີຕິ ທສ຺ເສນ຺ຕິ. ມຫາໂຠໂຄຕິ ປຎ຺ຈກາມຄຸຓວເສນ ມຫາອຸປໂຠໂຄ. ເອວໍ ຍໍ ຍໍ ຄຸຓໍ ວທນ຺ຕິ, ຕສ຺ສ ຕສ຺ສ ປຏິປກ຺ຂວເສນ ຠຄວໂຕ ອຄຸຓໍເຍວ ທສ຺ເສມາຕິ ມຎ຺ຎມານາ ວທນ຺ຕິ.

ອຠິຣູໂປຕິ ອຎ຺ເຎຫິ ມນຸສ຺ເສຫິ ອຠິຣູໂປ ອຘິກຣູໂປ. ທສ຺ສນີໂຍຕິ ທິວສມ຺ປິ ປສ຺ສນ຺ຕານໍ ອຕິຕ຺ຕິກຣຓໂຕ ທສ຺ສນໂຍຄ຺ໂຄ. ທສ຺ສເນເນວ ຈິຕ຺ຕປສາທຊນນໂຕ ປາສາທິໂກ. ໂປກ຺ຂຣຕາ ວຸຈ຺ຈຕິ ສຸນ຺ທຣຠາໂວ, ວຓ຺ຓສ຺ສ ໂປກ຺ຂຣຕາ ວຓ຺ຓໂປກ຺ຂຣຕາ, ຕາຍ ວຓ຺ຓສມ຺ປຕ຺ຕິຍາ ຍຸຕ຺ໂຕຕິ ອຕ຺ໂຖ. ໂປຣາຓາ ປນາຫຸ – ‘‘ໂປກ຺ຂຣນ຺ຕິ ສຣີຣໍ ວທນ຺ຕິ, ວຓ຺ຓໍ ວຓ຺ຓເມວາ’’ຕິ. ເຕສໍ ມເຕນ ວຓ຺ຓຎ຺ຈ ໂປກ຺ຂຣຎ຺ຈ ວຓ຺ຓໂປກ຺ຂຣານິ. ເຕສໍ ຠາໂວ ວຓ຺ຓໂປກ຺ຂຣຕາ. ອິຕິ ປຣມາຍ ວຓ຺ຓໂປກ຺ຂຣຕາຍາຕິ ອຸຕ຺ຕເມນ ປຣິສຸທ຺ເຘນ ວຓ຺ເຓນ ເຈວ ສຣີຣສຓ຺ຐານສມ຺ປຕ຺ຕິຍາ ຈາຕິ ອຕ຺ໂຖ. ພ຺ຣຫ຺ມວຓ຺ຓີຕິ ເສຏ຺ຐວຓ຺ຓີ. ປຣິສຸທ຺ຘວຓ຺ເຓສຸປິ ເສຏ຺ເຐນ ສຸວຓ຺ຓວຓ຺ເຓນ ສມນ຺ນາຄໂຕຕິ ອຕ຺ໂຖ. ພ຺ຣຫ຺ມວຈ຺ຉສີຕິ ມຫາພ຺ຣຫ຺ມຸໂນ ສຣີຣສທິເສເນວ ສຣີເຣນ ສມນ຺ນາຄໂຕ. ອຂຸທ຺ທາວກາໂສ ທສ຺ສນາຍາຕິ ‘‘ໂຠໂຕ ສຣີເຣ ທສ຺ສນສ຺ສ ໂອກາໂສ ນ ຂຸທ຺ທໂກ ມຫາ, ສພ຺ພາເນວ ເຕ ອງ຺ຄປຈ຺ຈງ຺ຄານິ ທສ຺ສນີຍາເນວ, ຕານິ ຈາປິ ມຫນ຺ຕາເນວາ’’ຕິ ທີເປນ຺ຕິ.

ສີລມສ຺ສ ອຕ຺ຖີຕິ ສີລວາ. ວຸທ຺ຘໍ ວທ຺ຘິຕໍ ສີລມສ຺ສາຕິ ວຸທ຺ຘສີລີ. ວຸທ຺ຘສີເລນາຕິ ວຸທ຺ເຘນ ວທ຺ຘິເຕນ ສີເລນ. ສມນ຺ນາຄໂຕຕິ ຍຸຕ຺ໂຕ. ອິທໍ ວຸທ຺ຘສີລີປທສ຺ເສວ ເວວຈນໍ. ສພ຺ພເມຕໍ ປຎ຺ຈສີລມຕ຺ຕເມວ ສນ຺ຘາຍ ວທນ຺ຕິ.

ກລ຺ຍາຓວາໂຈຕິອາທີສຸ ກລ຺ຍາຓາ ສຸນ຺ທຣາ ປຣິມຓ຺ຑລປທພ຺ຍຎ຺ຊນາ ວາຈາ ອສ຺ສາຕິ ກລ຺ຍາຓວາໂຈ. ກລ຺ຍາຓໍ ມຘຸຣໍ ວາກ຺ກຣຓໍ ອສ຺ສາຕິ ກລ຺ຍາຓວາກ຺ກຣໂຓ. ວາກ຺ກຣຓນ຺ຕິ ອຸທາຫຣຓໂຆໂສ. ຄຸຓປຣິປຸຓ຺ຓຠາເວນ ປຸເຣ ຠວາຕິ ໂປຣີ. ປຸເຣ ວາ ຠວຕ຺ຕາ ໂປຣີ. ໂປຣິຍາ ນາຄຣິກິຕ຺ຖິຍາ ສຸຂຸມາລຕ຺ຕເນນ ສທິສາຕິ ໂປຣີ, ຕາຍ ໂປຣິຍາ. ວິສ຺ສຏ຺ຐາຍາຕິ ອປລິພຸທ຺ຘາຍ ສນ຺ທິຏ຺ຐວິລມ຺ພິຕາທິໂທສຣຫິຕາຍ. ອເນລຄລາຍາຕິ ເອລຄເຬນວິຣຫິຕາຍ. ຍສ຺ສ ກສ຺ສຈິ ຫິ ກເຖນ຺ຕສ຺ສ ເອລາ ຄຬນ຺ຕິ, ລາລາ ວາ ປຄ຺ຆຣນ຺ຕິ, ເຂຬຜຸສິຕານິ ວາ ນິກ຺ຂມນ຺ຕິ, ຕສ຺ສ ວາຈາ ເອລຄຬໍ ນາມ ໂຫຕິ, ຕພ຺ພິປຣິຕາຍາຕິ ອຕ຺ໂຖ. ອຕ຺ຖສ຺ສ ວິຎ຺ຎາປນິຍາຕິ ອາທິມຊ຺ຌປຣິໂຍສານໍ ປາກຏໍ ກຕ຺ວາ ຠາສິຕຕ຺ຖສ຺ສ ວິຎ຺ຎາປນສມຕ຺ຖາຍ.

ຊິຓ຺ໂຓຕິ ຊຣາຊິຓ຺ຓຕາຍ ຊິຓ຺ໂຓ. ວຸທ຺ໂຘຕິ ອງ຺ຄປຈ຺ຈງ຺ຄານໍ ວຸທ຺ຘິຠາວມຣິຍາທປ຺ປຕ຺ໂຕ. ມຫລ຺ລໂກຕິ ຊາຕິມຫລ຺ລກຕາຍ ສມນ຺ນາຄໂຕ. ຈິຣກາລປ຺ປສຸໂຕຕິ ວຸຕ຺ຕໍ ໂຫຕິ. ອທ຺ຘຄໂຕຕິ ອທ຺ຘານໍ ຄໂຕ, ທ຺ເວ ຕໂຍ ຣາຊປຣິວຏ຺ເຏ ອຕີໂຕຕິ ອຘິປ຺ປາໂຍ. ວໂຍອນຸປ຺ປຕ຺ໂຕຕິ ປຈ຺ຉິມວຍໍ ສມ຺ປຕ຺ໂຕ, ປຈ຺ຉິມວໂຍ ນາມ ວສ຺ສສຕສ຺ສ ປຈ຺ຉິໂມ ຕຕິຍຠາໂຄ.

ອປິ ຈ ຊິຓ຺ໂຓຕິ ໂປຣາໂຓ, ຈິຣກາລປ຺ປວຕ຺ຕກຸລນ຺ວໂຍຕິ ວຸຕ຺ຕໍ ໂຫຕິ. ວຸທ຺ໂຘຕິ ສີລາຈາຣາທິຄຸຓວຸທ຺ຘິຍາ ຍຸຕ຺ໂຕ. ມຫລ຺ລໂກຕິ ວິຠວມຫນ຺ຕາຍ ສມນ຺ນາຄໂຕ. ອທ຺ຘຄໂຕຕິ ມຄ຺ຄປ຺ປຏິປນ຺ໂນ ພ຺ຣາຫ຺ມຓານໍ ວຕຈຣິຍາທິມຣິຍາທໍ ອວີຕິກ຺ກມ຺ມ ຈຣຓສີໂລ. ວໂຍອນຸປ຺ປຕ຺ໂຕຕິ ຊາຕິວຸທ຺ຘຠາວມ຺ປິ ອນ຺ຕິມວຍໍ ອນຸປ຺ປຕ຺ໂຕ.