ອມຣາວິກ຺ເຂປວາທວຓ຺ຓນາ

໖໑. ນ ມຣຕີຕິ ອມຣາ. ກາ ສາ? ເອວນ຺ຕິປິ ເມ ໂນຕິອາທິນາ ນເຍນ ປຣິຍນ຺ຕຣຫິຕາ ທິຏ຺ຐິຄຕິກສ຺ສ ທິຏ຺ຐິ ເຈວ ວາຈາ ຈ. ວິວິໂຘ ເຂໂປຕິ ວິກ຺ເຂໂປ, ອມຣາຍ ທິຏ຺ຐິຍາ ວາຈາຍ ຈ ວິກ຺ເຂໂປຕິ ອມຣາວິກ຺ເຂໂປ, ໂສ ເອເຕສໍ ອຕ຺ຖີຕິ ອມຣາວິກ຺ເຂປິກາ, ອປໂຣ ນໂຍ – ອມຣາ ນາມ ເອກາ ມຈ຺ຉຊາຕິ, ສາ ອຸມ຺ມຸຊ຺ຊນນິມຸຊ຺ຊນາທິວເສນ ອຸທເກ ສນ຺ຘາວມານາ ຄເຫຕຸໍ ນ ສກ຺ກາຕິ, ເອວເມວ ອຍມ຺ປິ ວາໂທ ອິໂຕຈິໂຕ ຈ ສນ຺ຘາວຕິ, ຄາຫໍ ນ ອຸປຄຈ຺ຉຕີຕິ ອມຣາວິກ຺ເຂໂປຕິ ວຸຈ຺ຈຕິ. ໂສ ເອເຕສໍ ອຕ຺ຖີຕິ ອມຣາວິກ຺ເຂປິກາ.

໖໒. ‘‘ອິທໍ ກຸສລ’’ນ຺ຕິ ຍຖາຠູຕໍ ນປ຺ປຊານາຕີຕິ ທສ ກຸສລກມ຺ມປເຖ ຍຖາຠູຕໍ ນປ຺ປຊານາຕີຕິ ອຕ຺ໂຖ. ອກຸສເລປິ ທສ ອກຸສລກມ຺ມປຖາວ ອຘິປ຺ເປຕາ. ໂສ ມມສ຺ສ ວິຆາໂຕຕິ ‘‘ມຸສາ ມຍາ ຠຓິຕ’’ນ຺ຕິ ວິປ຺ປຏິສາຣຸປ຺ປຕ຺ຕິຍາ ມມ ວິຆາໂຕ ອສ຺ສ, ທຸກ຺ຂໍ ຠເວຍ຺ຍາຕິ ອຕ຺ໂຖ. ໂສ ມມສ຺ສ ອນ຺ຕຣາໂຍຕິ ໂສ ມມ ສຄ຺ຄສ຺ສ ເຈວ ມຄ຺ຄສ຺ສ ຈ ອນ຺ຕຣາໂຍ ອສ຺ສ. ມຸສາວາທຠຍາ ມຸສາວາທປຣິເຊຄຸຈ຺ຉາຕິ ມຸສາວາເທ ໂອຕ຺ຕປ຺ເປນ ເຈວ ຫິຣິຍາ ຈ. ວາຈາວິກ຺ເຂປໍ ອາປຊ຺ຊຕີຕິ ວາຈາຍ ວິກ຺ເຂປໍ ອາປຊ຺ຊຕິ. ກີທິສໍ? ອມຣາວິກ຺ເຂປໍ, ອປຣິຍນ຺ຕວິກ຺ເຂປນ຺ຕິ ອຕ຺ໂຖ.

ເອວນ຺ຕິປິ ເມ ໂນຕິອາທີສຸ ເອວນ຺ຕິປິ ເມ ໂນຕິ ອນິຍມິຕວິກ຺ເຂໂປ. ຕຖາຕິປິ ເມ ໂນຕິ ‘‘ສສ຺ສໂຕ ອຕ຺ຕາ ຈ ໂລໂກ ຈາ’’ຕິ ວຸຕ຺ຕໍ ສສ຺ສຕວາທໍ ປຏິກ຺ຂິປຕິ. ອຎ຺ຎຖາຕິປິ ເມ ໂນຕິ ສສ຺ສຕໂຕ ອຎ຺ຎຖາ ວຸຕ຺ຕໍ ເອກຈ຺ຈສສ຺ສຕໍ ປຏິກ຺ຂິປຕິ. ໂນຕິປິ ເມ ໂນຕິ – ‘‘ນ ໂຫຕິ ຕຖາຄໂຕ ປຣໍ ມຣຓາ’’ຕິ ວຸຕ຺ຕໍ ອຸຈ຺ເຉທໍ ປຏິກ຺ຂິປຕິ. ໂນ ໂນຕິປິ ເມ ໂນຕິ ‘‘ເນວ ໂຫຕິ ນ ນ ໂຫຕີ’’ຕິ ວຸຕ຺ຕໍ ຕກ຺ກີວາທໍ ປຏິກ຺ຂິປຕິ. ສຍໍ ປນ ‘‘ອິທໍ ກຸສລ’’ນ຺ຕິ ວາ ‘‘ອກຸສລ’’ນ຺ຕິ ວາ ປຸຏ຺ໂຐ ນ ກິຎ຺ຈິ ພ຺ຍາກໂຣຕິ. ‘‘ອິທໍ ກຸສລ’’ນ຺ຕິ ປຸຏ຺ໂຐ ‘‘ເອວນ຺ຕິປິ ເມ ໂນ’’ຕິ ວທຕິ. ຕໂຕ ‘‘ກິໍ ອກຸສລ’’ນ຺ຕິ ວຸຕ຺ເຕ ‘‘ຕຖາຕິປິ ເມ ໂນ’’ຕິ ວທຕິ. ‘‘ກິໍ ອຸຠຍໂຕ ອຎ຺ຎຖາ’’ຕິ ວຸຕ຺ເຕ ‘‘ອຎ຺ຎຖາຕິປິ ເມ ໂນ’’ຕິ ວທຕິ. ຕໂຕ ‘‘ຕິວິເຘນາປິ ນ ໂຫຕິ, ກິໍ ເຕ ລທ຺ຘີ’’ຕິ ວຸຕ຺ເຕ ‘‘ໂນຕິປິ ເມ ໂນ’’ຕິ ວທຕິ. ຕໂຕ ‘‘ກິໍ ໂນ ໂນຕິ ເຕ ລທ຺ຘີ’’ຕິ ວຸຕ຺ເຕ ‘‘ໂນ ໂນຕິປິ ເມ ໂນ’’ຕິ ເອວໍ ວິກ຺ເຂປເມວ ອາປຊ຺ຊຕິ, ເອກສ຺ມິມ຺ປິ ປກ຺ເຂ ນ ຕິຏ຺ຐຕິ.

໖໓. ຉນ຺ໂທ ວາ ຣາໂຄ ວາຕິ ອຊານນ຺ໂຕປິ ສຫສາ ກຸສລເມວ ‘‘ກຸສລ’’ນ຺ຕິ ວຕ຺ວາ ອກຸສລເມວ ‘‘ອກຸສລ’’ນ຺ຕິ ວຕ຺ວາ ມຍາ ອສຸກສ຺ສ ນາມ ເອວໍ ພ຺ຍາກຕໍ, ກິໍ ຕໍ ສຸພ຺ຍາກຕນ຺ຕິ ອຎ຺ເຎ ປຓ຺ຑິເຕ ປຸຈ຺ຉິຕ຺ວາ ເຕຫິ – ‘‘ສຸພ຺ຍາກຕໍ, ຠທ຺ຣມຸຂ, ກຸສລເມວ ຕຍາ ກຸສລໍ, ອກຸສລເມວ ອກຸສລນ຺ຕິ ພ຺ຍາກຕ’’ນ຺ຕິ ວຸຕ຺ເຕ ນຕ຺ຖິ ມຍາ ສທິໂສ ປຓ຺ຑິໂຕຕິ ເອວໍ ເມ ຕຕ຺ຖ ຉນ຺ໂທ ວາ ຣາໂຄ ວາ ອສ຺ສາຕິ ອຕ຺ໂຖ. ເອຕ຺ຖ ຈ ຉນ຺ໂທ ທຸພ຺ພລຣາໂຄ, ຣາໂຄ ພລວຣາໂຄ. ໂທໂສ ວາ ປຏິໂຆ ວາຕິ ກຸສລໍ ປນ ‘‘ອກຸສລ’’ນ຺ຕິ, ອກຸສລໍ ວາ ‘‘ກຸສລ’’ນ຺ຕິ ວຕ຺ວາ ອຎ຺ເຎ ປຓ຺ຑິເຕ ປຸຈ຺ຉິຕ຺ວາ ເຕຫິ – ‘‘ທຸພ຺ຍາກຕໍ ຕຍາ’’ຕິ ວຸຕ຺ເຕ ເອຕ຺ຕກມ຺ປິ ນາມ ນ ຊານາມີຕິ ຕຕ຺ຖ ເມ ອສ຺ສ ໂທໂສ ວາ ປຏິໂຆ ວາຕິ ອຕ຺ໂຖ. ອິຘາປິ ໂທໂສ ທຸພ຺ພລໂກໂຘ, ປຏິໂຆ ພລວໂກໂຘ.

ຕໍ ມມສ຺ສ ອຸປາທານໍ, ໂສ ມມສ຺ສ ວິຆາໂຕຕິ ຕໍ ຉນ຺ທຣາຄທ຺ວຍໍ ມມ ອຸປາທານໍ ອສ຺ສ, ໂທສປຏິຆທ຺ວຍໍ ວິຆາໂຕ. ອຸຠຍມ຺ປິ ວາ ທຬ຺ຫຄ຺ຄຫຓວເສນ ອຸປາທານໍ, ວິຫນນວເສນ ວິຆາໂຕ. ຣາໂຄ ຫິ ອມຸຎ຺ຈິຕຸກາມຕາຍ ອາຣມ຺ມຓໍ ຄຓ຺ຫາຕິ ຊລູກາ ວິຍ. ໂທໂສ ວິນາເສຕຸກາມຕາຍ ອາສີວິໂສ ວິຍ. ອຸໂຠປິ ເຈເຕ ສນ຺ຕາປກຏ຺ເຐນ ວິຫນນ຺ຕິ ເຍວາຕິ ‘‘ອຸປາທານ’’ນ຺ຕິ ຈ ‘‘ວິຆາໂຕ’’ຕິ ຈ ວຸຕ຺ຕາ. ເສສໍ ປຐມວາຣສທິສເມວ.

໖໔. ປຓ຺ຑິຕາຕິ ປຓ຺ຑິຈ຺ເຈນ ສມນ຺ນາຄຕາ. ນິປຸຓາຕິ ສຓ຺ຫສຸຂຸມພຸທ຺ຘິໂນ ສຸຂຸມອຕ຺ຖນ຺ຕຣໍ ປຏິວິຊ຺ຌນສມຕ຺ຖາ. ກຕປຣປ຺ປວາທາຕິ ວິຎ຺ຎາຕປຣປ຺ປວາທາ ເຈວ ປເຣຫິ ສທ຺ຘິໍ ກຕວາທປຣິຈຍາ ຈ. ວາລເວຘິຣູປາຕິ ວາລເວຘິຘນຸຄ຺ຄຫສທິສາ. ເຕ ຠິນ຺ທນ຺ຕາ ມຎ຺ເຎຕິ ວາລເວຘິ ວິຍ ວາລໍ ສຸຂຸມານິປິ ປເຣສໍ ທິຏ຺ຐິຄຕານິ ອຕ຺ຕໂນ ປຎ຺ຎາຄເຕນ ຠິນ຺ທນ຺ຕາ ວິຍ ຈຣນ຺ຕີຕິ ອຕ຺ໂຖ. ເຕ ມໍ ຕຕ຺ຖາຕິ ເຕ ສມຓພ຺ຣາຫ຺ມຓາ ມໍ ເຕສຸ ກຸສລາກຸສເລສຸ. ສມນຸຍຸຎ຺ເຊຍ຺ຍຸນ຺ຕິ ‘‘ກິໍ ກຸສລໍ, ກິໍ ອກຸສລນ຺ຕິ ອຕ຺ຕໂນ ລທ຺ຘິໍ ວທາ’’ຕິ ລທ຺ຘິໍ ປຸຈ຺ເຉຍ຺ຍຸໍ. ສມນຸຄາເຫຍ຺ຍຸນ຺ຕິ ‘‘ອິທໍ ນາມາ’’ຕິ ວຸຕ຺ເຕ ‘‘ເກນ ກາຣເຓນ ເອຕມຕ຺ຖໍ ຄາເຫຍ຺ຍຸ’’ນ຺ຕິ ກາຣຓໍ ປຸຈ຺ເຉຍ຺ຍຸໍ. ສມນຸຠາເສຍ຺ຍຸນ຺ຕິ ‘‘ອິມິນາ ນາມ ກາຣເຓນາ’’ຕິ ວຸຕ຺ເຕ ກາຣເຓ ໂທສໍ ທສ຺ເສຕ຺ວາ ‘‘ນ ຕ຺ວໍ ອິທໍ ຊານາສິ, ອິທໍ ປນ ຄຓ຺ຫ, ອິທໍ ວິສ຺ສຊ຺ເຊຫີ’’ຕິ ເອວໍ ສມນຸຍຸຎ຺ເຊຍ຺ຍຸໍ. ນ ສມ຺ປາເຍຍ຺ຍນ຺ຕິ ນ ສມ຺ປາເທຍ຺ຍໍ, ສມ຺ປາເທຕ຺ວາ ກເຖຕຸໍ ນ ສກ຺ກຸເຓຍ຺ຍນ຺ຕິ ອຕ຺ໂຖ. ໂສ ມມສ຺ສ ວິຆາໂຕຕິ ຍໍ ຕໍ ປຸນປ຺ປຸນໍ ວຕ຺ວາປິ ອສມ຺ປາຍນໍ ນາມ, ໂສ ມມ ວິຆາໂຕ ອສ຺ສ, ໂອຏ຺ຐຕາລຸຊິວ຺ຫາຄລໂສສນທຸກ຺ຂເມວ ອສ຺ສາຕິ ອຕ຺ໂຖ. ເສສເມຕ຺ຖາປິ ປຐມວາຣສທິສເມວ.

໖໕-໖໖. ມນ຺ໂທຕິ ມນ຺ທປຎ຺ໂຎ ອປຎ຺ຎສ຺ເສເວຕໍ ນາມໍ. ໂມມູໂຫຕິ ອຕິສມ຺ມູຬ຺ໂຫ. ໂຫຕິ ຕຖາຄໂຕຕິອາທີສຸ ສຕ຺ໂຕ ‘‘ຕຖາຄໂຕ’’ຕິ ອຘິປ຺ເປໂຕ. ເສສເມຕ຺ຖ ອຸຕ຺ຕານເມວ. ອິເມປິ ຈຕ຺ຕາໂຣ ປຸພ຺ເພ ປວຕ຺ຕຘມ຺ມານຸສາເຣເນວ ທິຏ຺ຐິຍາ ຄຫິຕຕ຺ຕາ ປຸພ຺ພນ຺ຕກປ຺ປິເກສຸ ປວິຏ຺ຐາ.