ອຘິຈ຺ຈສມຸປ຺ປນ຺ນວາທວຓ຺ຓນາ

໖໗. ‘‘ອຘິຈ຺ຈສມຸປ຺ປນ຺ໂນ ອຕ຺ຕາ ຈ ໂລໂກ ຈາ’’ຕິ ທສ຺ສນໍ ອຘິຈ຺ຈສມຸປ຺ປນ຺ນໍ. ຕໍ ເອເຕສໍ ອຕ຺ຖີຕິ ອຘິຈ຺ຈສມຸປ຺ປນ຺ນິກາ. ອຘິຈ຺ຈສມຸປ຺ປນ຺ນນ຺ຕິ ອກາຣຓສມຸປ຺ປນ຺ນໍ.

໖໘-໗໓. ອສຎ຺ຎສຕ຺ຕາຕິ ເທສນາສີສເມຕໍ, ອຈິຕ຺ຕຸປ຺ປາທາ ຣູປມຕ຺ຕກອຕ຺ຕຠາວາຕິ ອຕ຺ໂຖ. ເຕສໍ ເອວໍ ອຸປ຺ປຕ຺ຕິ ເວທິຕພ຺ພາ – ເອກຈ຺ໂຈ ຫິ ຕິຕ຺ຖາຍຕເນ ປພ຺ພຊິຕ຺ວາ ວາໂຍກສິເຓ ປຣິກມ຺ມໍ ກຕ຺ວາ ຈຕຸຕ຺ຖຊ຺ຌານໍ ນິພ຺ພຕ຺ເຕຕ຺ວາ ຌານາ ວຸຏ຺ຐາຍ – ‘‘ຈິຕ຺ເຕ ໂທສໍ ປສ຺ສຕິ, ຈິຕ຺ເຕ ສຕິ ຫຕ຺ຖຈ຺ເຉທາທິທຸກ຺ຂຎ຺ເຈວ ສພ຺ພຠຍານິ ຈ ໂຫນ຺ຕິ, ອລໍ ອິມິນາ ຈິຕ຺ເຕນ, ອຈິຕ຺ຕກຠາໂວວ ສນ຺ໂຕ’’ຕິ, ເອວໍ ຈິຕ຺ເຕ ໂທສໍ ປສ຺ສິຕ຺ວາ ອປຣິຫີນຊ຺ຌາໂນ ກາລໍ ກຕ຺ວາ ອສຎ຺ຎສຕ຺ເຕສຸ ນິພ຺ພຕ຺ຕຕິ, ຈິຕ຺ຕມສ຺ສ ຈຸຕິຈິຕ຺ຕນິໂຣເຘນ ອິເຘວ ນິວຕ຺ຕຕິ, ຣູປກ຺ຂນ຺ຘມຕ຺ຕເມວ ຕຕ຺ຖ ປາຕຸຠວຕິ. ເຕ ຕຕ຺ຖ ຍຖາ ນາມ ຊິຍາເວຄກ຺ຂິຕ຺ໂຕ ສໂຣ ຍຕ຺ຕໂກ ຊິຍາເວໂຄ, ຕຕ຺ຕກເມວ ອາກາເສ ຄຈ຺ຉຕິ. ເອວເມວ ຌານເວຄກ຺ຂິຕ຺ຕາ ອຸປປຊ຺ຊິຕ຺ວາ ຍຕ຺ຕໂກ ຌານເວໂຄ, ຕຕ຺ຕກເມວ ກາລໍ ຕິຏ຺ຐນ຺ຕິ, ຌານເວເຄ ປນ ປຣິຫີເນ ຕຕ຺ຖ ຣູປກ຺ຂນ຺ໂຘ ອນ຺ຕຣຘາຍຕິ, ອິຘ ປນ ປຏິສນ຺ຘິສຎ຺ຎາ ອຸປ຺ປຊ຺ຊຕິ. ຍສ຺ມາ ປນ ຕາຍ ອິຘ ອຸປ຺ປນ຺ນສຎ຺ຎາຍ ເຕສໍ ຕຕ຺ຖ ຈຸຕິ ປຎ຺ຎາຍຕິ, ຕສ຺ມາ ‘‘ສຎ຺ຎຸປ຺ປາທາ ຈ ປນ ເຕ ເທວາ ຕມ຺ຫາ ກາຍາ ຈວນ຺ຕີ’’ຕິ ວຸຕ຺ຕໍ. ສນ຺ຕຕາຍາຕິ ສນ຺ຕຠາວາຍ. ເສສເມຕ຺ຖ ອຸຕ຺ຕານເມວ. ຕກ຺ກີວາໂທປິ ວຸຕ຺ຕນເຍເນວ ເວທິຕພ຺ໂພຕິ.