ອຸຈ຺ເຉທວາທວຓ຺ຓນາ

໘໔. ອຸຈ຺ເຉທວາເທ ສໂຕຕິ ວິຊ຺ຊມານສ຺ສ. ອຸຈ຺ເຉທນ຺ຕິ ອຸປຈ຺ເຉທໍ. ວິນາສນ຺ຕິ ອທສ຺ສນໍ. ວິຠວນ຺ຕິ ຠາວວິຄມໍ. ສພ຺ພາເນຕານິ ອຎ຺ຎມຎ຺ຎເວວຈນາເນວ. ຕຕ຺ຖ ທ຺ເວ ຊນາ ອຸຈ຺ເຉທທິຏ຺ຐິໍ ຄຓ຺ຫນ຺ຕິ, ລາຠີ ຈ ອລາຠີ ຈ. ລາຠີ ອຣຫໂຕ ທິພ຺ເພນ ຈກ຺ຂຸນາ ຈຸຕິໍ ທິສ຺ວາ ອຸປປຕ຺ຕິໍ ອປສ຺ສນ຺ໂຕ, ໂຍ ວາ ຈຸຕິມຕ຺ຕເມວ ທຏ຺ຐຸໍ ສກ຺ໂກຕິ, ນ ອຸປປາຕໍ; ໂສ ອຸຈ຺ເຉທທິຏ຺ຐິໍ ຄຓ຺ຫາຕິ. ອລາຠີ ຈ ‘‘ໂກ ປຣໂລກໍ ນ ຊານາຕີ’’ຕິ ກາມສຸຂຄິທ຺ຘຕາຍ ວາ. ‘‘ຍຖາ ຣຸກ຺ຂໂຕ ປຓ຺ຓານິ ປຕິຕານິ ນ ປຸນ ວິຣຸຫນ຺ຕິ, ເອວເມວ ສຕ຺ຕາ’’ຕິອາທິນາ ຕກ຺ເກນ ວາ ອຸຈ຺ເຉທໍ ຄຓ຺ຫາຕິ. ອິຘ ປນ ຕຓ຺ຫາທິຏ຺ຐີນໍ ວເສນ ຕຖາ ຈ ອຎ຺ຎຖາ ຈ ວິກປ຺ເປຕ຺ວາວ ອິມາ ສຕ຺ຕ ທິຏ຺ຐິໂຍ ອຸປ຺ປນ຺ນາຕິ ເວທິຕພ຺ພາ.

໘໕. ຕຕ຺ຖ ຣູປີຕິ ຣູປວາ. ຈາຕຸມຫາຠູຕິໂກຕິ ຈຕຸມຫາຠູຕມໂຍ. ມາຕາປິຕູນໍ ເອຕນ຺ຕິ ມາຕາເປຕ຺ຕິກໍ. ກິໍ ຕໍ? ສຸກ຺ກໂສຓິຕໍ. ມາຕາເປຕ຺ຕິເກ ສມ຺ຠູໂຕ ຊາໂຕຕິ ມາຕາເປຕ຺ຕິກສມ຺ຠໂວ. ອິຕິ ຣູປກາຍສີເສນ ມນຸສ຺ສຕ຺ຕຠາວໍ ‘‘ອຕ຺ຕາ’’ຕິ ວທຕິ. ອິຕ຺ເຖເກຕິ ອິຕ຺ຖໍ ເອເກ ເອວເມເກຕິ ອຕ຺ໂຖ.

໘໖. ທຸຕິໂຍ ຕໍ ປຏິກ຺ຂິປິຕ຺ວາ ທິພ຺ພຕ຺ຕຠາວໍ ວທຕິ. ທິພ຺ໂພຕິ ເທວໂລເກ ສມ຺ຠູໂຕ. ກາມາວຈໂຣຕິ ຉ ກາມາວຈຣເທວປຣິຍາປນ຺ໂນ. ກພຬີກາຣໍ ອາຫາຣໍ ຠກ຺ຂຕີຕິ ກພຬີກາຣາຫາຣຠກ຺ໂຂ.

໘໗. ມໂນມໂຍຕິ ຌານມເນນ ນິພ຺ພຕ຺ໂຕ. ສພ຺ພງ຺ຄປຈ຺ຈງ຺ຄີຕິ ສພ຺ພງ຺ຄປຈ຺ຈງ຺ຄຍຸຕ຺ໂຕ. ອຫີນິນ຺ທ຺ຣິໂຍຕິ ປຣິປຸຓ຺ຓິນ຺ທ຺ຣິໂຍ. ຍານິ ພ຺ຣຫ຺ມໂລເກ ອຕ຺ຖິ, ເຕສໍ ວເສນ ອິຕເຣສຎ຺ຈ ສຓ຺ຐານວເສເນຕໍ ວຸຕ຺ຕໍ.

໘໘-໙໒. ສພ຺ພໂສ ຣູປສຎ຺ຎານໍ ສມຕິກ຺ກມາຕິອາທີນໍ ອຕ຺ໂຖ ວິສຸທ຺ຘິມຄ຺ເຄ ວຸຕ຺ໂຕ. ອາກາສານຎ຺ຈາຍຕນູປໂຄຕິອາທີສຸ ປນ ອາກາສານຎ຺ຈາຍຕນຠວໍ ອຸປຄໂຕຕິ, ເອວມຕ຺ໂຖ ເວທິຕພ຺ໂພ. ເສສເມຕ຺ຖ ອຸຕ຺ຕານເມວາຕິ.