໓. ປຎ຺ຫາປຸຈ຺ຉກວຓ຺ຓນາ

໓໘໖. ປຎ຺ຫາປຸຈ຺ຉເກ ປາຬິອນຸສາເຣເນວ ສຕິປຏ຺ຐານານໍ ກຸສລາທິຠາໂວ ເວທິຕພ຺ໂພ. ອາຣມ຺ມຓຕ຺ຕິເກສຸ ປນ ສພ຺ພານິປິ ເອຕານິ ອປ຺ປມາຓໍ ນິພ຺ພານໍ ອາຣພ຺ຠ ປວຕ຺ຕນໂຕ ອປ຺ປມາຓາຣມ຺ມຓາເນວ, ນ ມຄ຺ຄາຣມ຺ມຓານິ; ສຫຊາຕເຫຕຸວເສນ ປນ ມຄ຺ຄເຫຕຸການິ; ວີຣິຍໍ ວາ ວີມໍສໍ ວາ ເຊຏ຺ຐກໍ ກຕ຺ວາ ມຄ຺ຄຠາວນາກາເລ ມຄ຺ຄາຘິປຕີນິ; ຉນ຺ທຈິຕ຺ຕເຊຏ຺ຐກາຍ ມຄ຺ຄຠາວນາຍ ນວຕ຺ຕພ຺ພານິ ມຄ຺ຄາຘິປຕີນີຕິ ຜລກາເລປິ ນວຕ຺ຕພ຺ພາເນວ; ອຕີຕາທີສຸ ເອກາຣມ຺ມຓຠາເວນປິ ນວຕ຺ຕພ຺ພານິ; ນິພ຺ພານສ຺ສ ປນ ພຫິທ຺ຘາຘມ຺ມຕ຺ຕາ ພຫິທ຺ຘາຣມ຺ມຓານິ ນາມ ໂຫນ຺ຕີຕິ. ເອວເມຕສ຺ມິໍ ປຎ຺ຫາປຸຈ຺ຉເກ ນິພ຺ພຕ຺ຕິຕໂລກຸຕ຺ຕຣາເນວ ສຕິປຏ຺ຐານານິ ກຖິຕານິ. ສມ຺ມາສມ຺ພຸທ຺ເຘນ ຫິ ສຸຕ຺ຕນ຺ຕຠາຊນີຍສ຺ມິໍເຍວ ໂລກິຍໂລກຸຕ຺ຕຣມິສ຺ສກາ ສຕິປຏ຺ຐານາ ກຖິຕາ; ອຠິຘມ຺ມຠາຊນີຍປຎ຺ຫາປຸຈ຺ຉເກສຸ ປນ ໂລກຸຕ຺ຕຣາເຍວາຕິ. ເອວມຍໍ ສຕິປຏ຺ຐານວິຠງ຺ໂຄປິ ເຕປຣິວຏ຺ຏໍ ນີຫຣິຕ຺ວາ ຠາເຊຕ຺ວາ ທສ຺ສິໂຕຕິ.

ສມ຺ໂມຫວິໂນທນິຍາ ວິຠງ຺ຄຏ຺ຐກຖາຍ

ສຕິປຏ຺ຐານວິຠງ຺ຄວຓ຺ຓນາ ນິຏ຺ຐິຕາ.