ອປ຺ປິຍສມ຺ປໂຍຄນິທ຺ເທໂສ

໑໙໙. ອປ຺ປິຍສມ຺ປໂຍຄນິທ຺ເທເສ ຍສ຺ສາຕິ ເຍ ອສ຺ສ. ອນິຏ຺ຐາຕິ ອປຣິເຍສິຕາ. ປຣິເຍສິຕາ ວາ ໂຫນ຺ຕຸ ອປຣິເຍສິຕາ ວາ, ນາມເມເວຕໍ ອມນາປາຣມ຺ມຓານໍ. ມນສ຺ມິໍ ນ ກມນ຺ຕິ, ນ ປວິສນ຺ຕີຕິ ອກນ຺ຕາ. ມນສ຺ມິໍ ນ ອປ຺ປິຍນ຺ຕິ, ນ ວາ ມນໍ ວຑ຺ເຒນ຺ຕີຕິ ອມນາປາ. ຣູປາຕິອາທິ ເຕສໍ ສຠາວນິທສ຺ສນໍ. ອນຕ຺ຖໍ ກາເມນ຺ຕິ ອິຈ຺ຉນ຺ຕີຕິ ອນຕ຺ຖກາມາ. ອຫິຕໍ ກາເມນ຺ຕິ ອິຈ຺ຉນ຺ຕີຕິ ອຫິຕກາມາ. ອຜາສຸກໍ ທຸກ຺ຂວິຫາຣໍ ກາເມນ຺ຕິ ອິຈ຺ຉນ຺ຕີຕິ ອຜາສຸກກາມາ. ຈຕູຫິ ໂຍເຄຫິ ເຂມໍ ນິພ຺ຠຍໍ ວິວຏ຺ຏໍ ນ ອິຈ຺ຉນ຺ຕິ, ສຠຍໍ ວຏ຺ຏເມວ ເນສໍ ກາເມນ຺ຕິ ອິຈ຺ຉນ຺ຕີຕິ ອາໂຍຄກ຺ເຂມກາມາ.

ອປິຈ ສທ຺ຘາທີນໍ ວຸທ຺ຘິສງ຺ຂາຕສ຺ສ ອຕ຺ຖສ຺ສ ອກາມນໂຕ ເຕສໍເຍວ ຫານິສງ຺ຂາຕສ຺ສ ອນຕ຺ຖສ຺ສ ຈ ກາມນໂຕ ອນຕ຺ຖກາມາ. ສທ຺ຘາທີນໍເຍວ ອຸປາຍຠູຕສ຺ສ ຫິຕສ຺ສ ອກາມນໂຕ ສທ຺ຘາຫານິອາທີນໍ ອຸປາຍຠູຕສ຺ສ ອຫິຕສ຺ສ ຈ ກາມນໂຕ ອຫິຕກາມາ. ຜາສຸກວິຫາຣສ຺ສ ອກາມນໂຕ ອຜາສຸກວິຫາຣສ຺ສ ຈ ກາມນໂຕ ອຜາສຸກກາມາ. ຍສ຺ສ ກສ຺ສຈິ ນິພ຺ຠຍສ຺ສ ອກາມນໂຕ ຠຍສ຺ສ ຈ ກາມນໂຕ ອໂຍຄກ຺ເຂມກາມາຕິ ເອວມ຺ເປຕ຺ຖ ອຕ຺ໂຖ ທຏ຺ຐພ຺ໂພ.

ສງ຺ຄຕີຕິ ຄນ຺ຕ຺ວາ ສໍໂຍໂຄ. ສມາຄໂມຕິ ອາຄເຕຫິ ສໍໂຍໂຄ. ສໂມຘານນ຺ຕິ ຐານນິສຊ຺ຊາທີສຸ ສຫຠາໂວ. ມິສ຺ສີຠາໂວຕິ ສພ຺ພກິຈ຺ຈານໍ ສຫກຣຓໍ. ອຍໍ ສຕ຺ຕວເສນ ໂຍຊນາ. ສງ຺ຂາຣວເສນ ປນ ຍໍ ລພ຺ຠຕິ ຕໍ ຄເຫຕພ຺ພໍ. ອຍໍ ວຸຈ຺ຈຕີຕິ ອຍໍ ອປ຺ປິຍສມ຺ປໂຍໂຄ ນາມ ກຖິຍຕິ. ໂສ ອນິຏ຺ຐສໂມຘານລກ຺ຂໂຓ, ຈິຕ຺ຕວິຆາຕກຣຓຣໂສ, ອນຕ຺ຖຠາວປຈ຺ຈຸປຏ຺ຐາໂນ.

ໂສ ອຕ຺ຖໂຕ ເອໂກ ຘມ຺ໂມ ນາມ ນຕ຺ຖິ. ເກວລໍ ອປ຺ປິຍສມ຺ປຍຸຕ຺ຕານໍ ທຸວິຘສ຺ສາປິ ທຸກ຺ຂສ຺ສ ວຕ຺ຖຸຠາວໂຕ ທຸກ຺ໂຂຕິ ວຸຕ຺ໂຕ. ອນິຏ຺ຐານິ ຫິ ວຕ຺ຖູນິ ສໂມຘານຄຕານິ ວິຊ຺ຌນເຉທນຜາລນາທີຫິ ກາຍິກມ຺ປິ ທຸກ຺ຂໍ ອຸປ຺ປາເທນ຺ຕິ, ອຸພ຺ເພຄຊນນໂຕ ມານສມ຺ປິ. ເຕເນຕໍ ວຸຈ຺ຈຕິ –

ທິສ຺ວາວ ອປ຺ປິເຍ ທຸກ຺ຂໍ, ປຐມໍ ໂຫຕິ ເຈຕສິ;

ຕທຸປກ຺ກມສມ຺ຠູຕ-ມຖ ກາເຍ ຍໂຕ ອິຘ.

ຕໂຕ ທຸກ຺ຂທ຺ວຍສ຺ສາປິ, ວຕ຺ຖຸໂຕ ໂສ ມເຫສິນາ;

ທຸກ຺ໂຂ ວຸຕ຺ໂຕຕິ ວິຎ຺ເຎຍ຺ໂຍ, ອປ຺ປິເຍຫິ ສມາຄໂມຕິ.