ປິຍວິປ຺ປໂຍຄນິທ຺ເທໂສ

໒໐໐. ປິຍວິປ຺ປໂຍຄນິທ຺ເທໂສ ວຸຕ຺ຕປຏິປກ຺ຂນເຍນ ເວທິຕພ຺ໂພ. ມາຕາ ວາຕິອາທິ ປເນຕ຺ຖ ອຕ຺ຖກາເມ ສຣູເປນ ທສ຺ເສຕຸໍ ວຸຕ຺ຕໍ. ຕຕ຺ຖ ມມາຍຕີຕິ ມາຕາ. ປິຍາຍຕີຕິ ປິຕາ. ຠຊຕີຕິ ຠາຕາ. ຕຖາ ຠຄິນີ. ເມຕ຺ຕາຍນ຺ຕີຕິ ມິຕ຺ຕາ, ມິນນ຺ຕີຕິ ວາ ມິຕ຺ຕາ; ສພ຺ພຄຸຍ຺ເຫສຸ ອນ຺ໂຕ ປກ຺ຂິປນ຺ຕີຕິ ອຕ຺ໂຖ. ກິຈ຺ຈກຣຓີເຍສຸ ສຫຠາວຏ຺ເຐນ ອມາ ໂຫນ຺ຕີຕິ ອມຈ຺ຈາ. ອຍໍ ອມ຺ຫາກໍ ອຊ຺ຌຕ຺ຕິໂກຕິ ເອວໍ ຊານນ຺ຕິ ຎາຍນ຺ຕີຕິ ວາ ຎາຕີ. ໂລຫິເຕນ ສມ຺ພນ຺ຘາຕິ ສາໂລຫິຕາ. ເອວເມຕານິ ປທານິ ອຕ຺ຖໂຕ ເວທິຕພ຺ພານິ. ອຍໍ ວຸຈ຺ຈຕີຕິ ອຍໍ ປິເຍຫິ ວິປ຺ປໂຍໂຄ ນາມ ກຖິຍຕິ. ໂສ ອິຏ຺ຐວຕ຺ຖຸວິໂຍຄລກ຺ຂໂຓ, ໂສກຸປ຺ປາທນຣໂສ, ພ຺ຍສນປຈ຺ຈຸປຏ຺ຐາໂນ.

ໂສ ອຕ຺ຖໂຕ ເອໂກ ຘມ຺ໂມ ນາມ ນຕ຺ຖິ. ເກວລໍ ປິຍວິປ຺ປຍຸຕ຺ຕານໍ ທຸວິຘສ຺ສາປິ ທຸກ຺ຂສ຺ສ ວຕ຺ຖຸຠາວໂຕ ທຸກ຺ໂຂຕິ ວຸຕ຺ໂຕ. ອິຏ຺ຐານິ ຫິ ວຕ຺ຖູນິ ວິຍຸຊ຺ຊມານານິ ສຣີຣສ຺ສ ໂສສນມິລາປນາທິຠາເວນ ກາຍິກມ຺ປິ ທຸກ຺ຂໍ ອຸປ຺ປາເທນ຺ຕິ, ‘ຍມ຺ປິ ໂນ ອໂຫສິ, ຕມ຺ປິ ໂນ ນຕ຺ຖີ’ຕິ ອນຸໂສຈາປນໂຕ ມານສມ຺ປິ. ເຕເນຕໍ ວຸຈ຺ຈຕິ –

ຎາຕິຘນາທິວິໂຍຄາ, ໂສກສຣສມປ຺ປິຕາ ວິຕຸຊ຺ຊນ຺ຕິ;

ພາລາ ຍໂຕ ຕໂຕ ຍໍ, ທຸກ຺ໂຂຕິ ມໂຕ ປິຍວິໂຍໂຄຕິ.