(໗.) ສຕ຺ຕກນິທ຺ເທສວຓ຺ຓນາ

໙໔໙. ສຕ຺ຕກນິທ຺ເທເສ ຖາມຄຕຏ຺ເຐນ ອປ຺ປຫີນຏ຺ເຐນ ຈ ອນຸເສນ຺ຕີຕິ ອນຸສຍາ. ວຏ຺ຏສ຺ມິໍ ສຕ຺ເຕ ສໍໂຍເຊນ຺ຕິ ຆເຏນ຺ຕີຕິ ສໍໂຍຊນານິ. ສມຸທາຈາຣວເສນ ປຣິຍຸຏ຺ຐຫນ຺ຕີຕິ ປຣິຍຸຏ຺ຐານານິ. ກາມຣາໂຄວ ປຣິຍຸຏ຺ຐານໍ ກາມຣາຄປຣິຍຸຏ຺ຐານໍ. ເສເສສຸປິ ເອເສວ ນໂຍ.

໙໕໐. ອສຕໍ ຘມ຺ມາ, ລາມກຏ຺ເຐນ ວາ ອສນ຺ຕາ ຘມ຺ມາຕິ ອສທ຺ຘມ຺ມາ. ຣາຄາທີຫິ ໂທເສຫິ ທຸຏ຺ຐານິ ຈຣິຕານີຕິ ທຸຈ຺ຈຣິຕານິ. ເຕນ ເຕນາກາເຣນ ມຎ຺ຎນ຺ຕີຕິ ມານາ.

໙໕໑. ທິຏ຺ຐິນິທ຺ເທເສ ຣູປີຕິ ຣູປວາ. ຈາຕຸມຫາຠູຕິໂກຕິ ຈຕຸມຫາຠູຕມໂຍ. ມາຕາປິຕູນໍ ເອຕນ຺ຕິ ມາຕາເປຕ຺ຕິກໍ. ກິນ຺ຕໍ? ສຸກ຺ກໂສຓິຕໍ. ມາຕາເປຕ຺ຕິເກ ສມ຺ຠູໂຕ ຊາໂຕຕິ ມາຕາເປຕ຺ຕິກສມ຺ຠໂວ. ອິຘ ຣູປກາຍສີເສນ ມນຸສ຺ສຕ຺ຕຠາວໍ ອຕ຺ຕາຕິ ວທຕິ. ທຸຕິໂຍ ຕໍ ປຏິກ຺ຂິປິຕ຺ວາ ທິພ຺ພຕ຺ຕຠາວໍ ວທຕິ. ທິພ຺ໂພຕິ ເທວໂລເກ ສມ຺ຠູໂຕ. ກາມາວຈໂຣຕິ ຉກາມາວຈຣເທວປຣິຍາປນ຺ໂນ. ກພຬີກາຣໍ ຠກ຺ຂຍຕີຕິ ກພຬີກາຣຠກ຺ໂຂ. ມໂນມໂຍຕິ ຌານມເນນ ນິພ຺ພຕ຺ໂຕ. ສພ຺ພງ຺ຄປຈ຺ຈງ຺ຄີຕິ ສພ຺ພງ຺ຄປຈ຺ຈງ຺ຄຍຸຕ຺ໂຕ. ອຫີນິນ຺ທ຺ຣິໂຍຕິ ປຣິປຸຓ຺ຓິນ຺ທ຺ຣິໂຍ; ຍານິ ພ຺ຣຫ຺ມໂລເກ ອຕ຺ຖິ ເຕສໍ ວເສນ, ອິຕເຣສຎ຺ຈ ສຓ຺ຐານວເສເນຕໍ ວຸຕ຺ຕໍ. ອາກາສານຎ຺ຈາຍຕນູປໂຄຕິ ອາກາສານຎ຺ຈາຍຕນຠາວໍ ອຸປຄໂຕ. ອິຕເຣສຸປິ ເອເສວ ນໂຍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ສຕ຺ຕກນິທ຺ເທສວຓ຺ຓນາ.