(໘.) ອຏ຺ຐກນິທ຺ເທສວຓ຺ຓນາ

໙໕໒. ອຏ຺ຐກນິທ຺ເທເສ ກິເລສາເຍວ ກິເລສວຕ຺ຖູນິ. ກຸສີຕວຕ຺ຖູນີຕິ ກຸສີຕສ຺ສ ອລສສ຺ສ ວຕ຺ຖູນິ, ປຕິຏ຺ຐາ, ໂກສຊ຺ຊກາຣຓານີຕິ ອຕ຺ໂຖ. ກມ຺ມໍ ກາຕພ຺ພໍ ໂຫຕີຕິ ຈີວຣວິຈາຣຓາທິກມ຺ມໍ ກາຕພ຺ພໍ ໂຫຕິ. ນ ວີຣິຍໍ ອາຣຠຕີຕິ ທຸວິຘມ຺ປິ ວີຣິຍໍ ນາຣຠຕິ. ອປ຺ປຕ຺ຕສ຺ສາຕິ ຌານວິປສ຺ສນາມຄ຺ຄຜລຘມ຺ມສ຺ສ ອປ຺ປຕ຺ຕສ຺ສ ປຕ຺ຕິຍາ. ອນຘິຄຕສ຺ສາຕິ ຕສ຺ເສວ ອນຘິຄຕສ຺ສ ອຘິຄມຕ຺ຖາຍ. ອສຈ຺ຉິກຕສ຺ສາຕິ ຕສ຺ເສວ ອສຈ຺ຉິກຕສ຺ສ ສຈ຺ຉິກຣຓຕ຺ຖາຍ. ອິທໍ ປຐມນ຺ຕິ ‘ອິທໍ ຫນ຺ທາຫໍ ນິປຊ຺ຊາມີ’ຕິ ເອວໍ ໂອສີທນໍ ປຐມໍ ກຸສີຕວຕ຺ຖຸ. ອິມິນາ ນເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ມາສາຈິຕໍ ມຎ຺ເຎຕິ ເອຕ຺ຖ ປນ ມາສາຈິຕໍ ນາມ ຕິນ຺ຕມາໂສ; ຍຖາ ຕິນ຺ຕມາໂສ ຄຣຸໂກ ໂຫຕິ, ເອວໍ ຄຣຸໂກຕິ ອຘິປ຺ປາໂຍ. ຄິລານາ ວຸຏ຺ຐິໂຕ ໂຫຕີຕິ ຄິລາໂນ ຫຸຕ຺ວາ ປຈ຺ຉາ ວຸຏ຺ຐິໂຕ ໂຫຕິ.

໙໕໔. ອຏ຺ຐສຸ ໂລກຘມ຺ເມສູຕິ ເອຕ຺ຖ ໂລກສ຺ສ ຘມ຺ມາຕິ ໂລກຘມ຺ມາ. ເອເຕຫິ ວິມຸຕ຺ໂຕ ນາມ ນຕ຺ຖິ, ພຸທ຺ຘານມ຺ປິ ໂຫນ຺ຕິ ເອວ. ຕສ຺ມາ ‘ໂລກຘມ຺ມາ’ຕິ ວຸຈ຺ຈນ຺ຕິ. ປຏິຆາໂຕຕິ ປຏິຫຎ຺ຎນາກາໂຣ. ລາເຠ ສາຣາໂຄຕິ ‘ອຫໍ ລາຠໍ ລຠາມີ’ຕິ ເອວໍ ເຄຫສິຕໂສມນສ຺ສວເສນ ອຸປ຺ປນ຺ໂນ ສາຣາໂຄ; ໂສ ຈິຕ຺ຕໍ ປຏິຫນຕິ. ອລາເຠ ປຏິວິໂຣໂຘຕິ ‘ອຫໍ ລາຠໍ ນ ລຠາມີ’ຕິ ໂທມນສ຺ສວເສນ ອຸປ຺ປນ຺ນວິໂຣໂຘ; ໂສປິ ຈິຕ຺ຕໍ ປຏິຫນຕິ. ຕສ຺ມາ ‘ປຏິຆາໂຕ’ຕິ ວຸຕ຺ໂຕ. ຍສາທີສຸປິ ‘ອຫໍ ມຫາປຣິວາໂຣ, ອຫໍ ອປ຺ປປຣິວາໂຣ, ອຫໍ ປສໍສປ຺ປຕ຺ໂຕ, ອຫໍ ຄຣຫປ຺ປຕ຺ໂຕ, ອຫໍ ສຸຂປ຺ປຕ຺ໂຕ, ອຫໍ ທຸກ຺ຂປ຺ປໂຕ’ຕິ ເອວເມເຕສໍ ອຸປ຺ປຕ຺ຕິ ເວທິຕພ຺ພາ. ອນຣິຍໂວຫາຣາຕິ ອນຣິຍານໍ ໂວຫາຣາ.

໙໕໗. ປຸຣິສໂທສາຕິ ປຸຣິສານໍ ໂທສາ. ນ ສຣາມີຕິ ‘ມຍາ ເອຕສ຺ສ ກມ຺ມສ຺ສ ກຕຏ຺ຐານໍ ນ ສຣາມິ ນ ສລ຺ລກ຺ເຂມີ’ຕິ ເອວໍ ອສ຺ສຕິຠາເວນ ນິພ຺ເພເຐຕິ ໂມເຈຕິ. ໂຈທກໍເຍວ ປຏິປ຺ຜຣຕີຕິ ປຏິວິຣຸທ຺ໂຘ ຫຸຕ຺ວາ ຜຣຕິ, ປຏິຠາຓິຕຠາເວນ ຕິຏ຺ຐຕິ. ກິໍ ນຸ ໂຂ ຕຸຍ຺ຫນ຺ຕິ ‘ຕຸຍ຺ຫໍ ພາລສ຺ສ ອພ຺ຍຕ຺ຕສ຺ສ ຠຓິເຕນ ນາມ ກິໍ’ ໂຍ ຕ຺ວໍ ເນວ ວຕ຺ຖຸນາ ອາປຕ຺ຕິໍ, ນ ໂຈທນໍ ຊານາສີ’ຕິ ທີເປຕິ; ‘ຕ຺ວໍ ປິ ນາມ ເອວໍ ກິຎ຺ຈິ ອຊານນ຺ໂຕ ຠຓິຕພ຺ພໍ ມຎ຺ຎິສ຺ສສີ’ຕິ ອຊ຺ໂຌຕ຺ຖຣຕິ. ປຈ຺ຈາໂຣເປຕີຕິ ‘ຕ຺ວໍ ປິ ໂຂສີ’ຕິອາທີນິ ວທນ຺ໂຕ ປຏິອາໂຣເປຕິ. ປຏິກໂຣຫີຕິ ເທສນາຄາມິນິໍ ເທເສຫິ, ວຸຏ຺ຐານຄາມິນິໂຕ ວຸຏ຺ຐາຫິ ຕໂຕ ສຸທ຺ຘນ຺ເຕ ປຕິຏ຺ຐິໂຕ ອຎ຺ຎໍ ໂຈເທສ຺ສສີ’ຕິ ທີເປຕິ.

ອຎ຺ເຎນາຎ຺ຎໍ ປຏິຈຣຕີຕິ ອຎ຺ເຎນ ກາຣເຓນ ວຈເນນ ວາ ອຎ຺ຎໍ ກາຣຓໍ ວຈນໍ ວາ ປຏິຈ຺ຉາເທຕິ. ‘ອາປຕ຺ຕິໍ ອາປນ຺ໂນສີ’ຕິ ວຸຕ຺ໂຕ ‘ໂກ ອາປນ຺ໂນ? ກິໍ ອາປນ຺ໂນ? ກຖໍ ອາປນ຺ໂນ? ກິສ຺ມິໍ ອາປນ຺ໂນ? ກໍ ຠຓຖ? ກິໍ ຠຓຖາ’ຕິ ວທຕິ. ‘ເອວຣູປໍ ກິຎ຺ຈິ ຕຍາ ທິຏ຺ຐ’ນ຺ຕິ ວຸຕ຺ເຕ ‘ນ ສຸຓາມີ’ຕິ ໂສຕໍ ວາ ອຸປເນຕິ. ພຫິທ຺ຘາ ກຖໍ ອປນາເມຕີຕິ ‘ອິຕ຺ຖນ຺ນາມໍ ອາປຕ຺ຕິໍ ອາປນ຺ໂນສີ’ຕິ ປຸຏ຺ໂຐ ‘ປາຏລິປຸຕ຺ຕໍ ຄໂຕມ຺ຫີ’ຕິ ວຕ຺ວາ ປຸນ ‘ຕວ ປາຏລິປຸຕ຺ຕຄມນໍ ນ ປຸຈ຺ຉາມາ’ຕິ ວຸຕ຺ເຕ ‘ຕໂຕ ຣາຊຄຫໍ ຄໂຕມ຺ຫີ’ຕິ ‘ຣາຊຄຫໍ ວາ ຍາຫິ, ພ຺ຣາຫ຺ມຓເຄຫໍ ວາ; ອາປຕ຺ຕິໍ ອາປນ຺ໂນສີ’ຕິ? ‘ຕຕ຺ຖ ເມ ສູກຣມໍສໍ ລທ຺ຘ’ນ຺ຕິອາທີນິ ວທນ຺ໂຕ ກຖໍ ພຫິທ຺ຘາ ວິກ຺ຂິປຕິ. ໂກປນ຺ຕິ ກຸປິຕຠາວໍ. ໂທສນ຺ຕິ ທຸຏ຺ຐຠາວໍ. ອຸຠຍມ຺ເປຕໍ ໂກຘສ຺ເສວ ນາມໍ. ອປ຺ປຈ຺ຈຍນ຺ຕິ ອສນ຺ຕຸຏ຺ຐາກາຣໍ; ໂທມນສ຺ສສ຺ເສຕໍ ນາມໍ. ປາຕຸກໂຣຕີຕິ ທສ຺ເສຕິ ປກາເສຕິ. ພາຫາວິກ຺ເຂປກໍ ຠຓຕີຕິ ພາຫາ ວິກ຺ຂິປິຕ຺ວາ ອລຊ຺ຊິວຈນໍ ວທຕິ. ວິເຫເສຕີຕິ ວິເຫເຐຕິ ພາຘຕິ. ອນາທິຍິຕ຺ວາຕິ ຈິຕ຺ຕີກາເຣນ ອຄ຺ຄເຫຕ຺ວາ ອວຊານິຕ຺ວາ; ອນາທໂຣ ຫຸຕ຺ວາຕິ ອຕ຺ໂຖ.

ອຕິພາຬ຺ຫນ຺ຕິ ອຕິທຬ຺ຫໍ ອຕິປ຺ປມາຓໍ. ມຍິ ພ຺ຍາວຏາຕິ ມຍິ ພ຺ຍາປາຣໍ ອາປນ຺ນາ. ຫີນາຍາວຕ຺ຕິຕ຺ວາຕິ ຫີນສ຺ສ ຄິຫິຠາວສ຺ສ ອຕ຺ຖາຍ ອາວຕ຺ຕິຕ຺ວາ; ຄິຫີ ຫຸຕ຺ວາຕິ ອຕ຺ໂຖ. ອຕ຺ຕມນາ ໂຫຖາຕິ ຕຸຏ຺ຐຈິຕ຺ຕາ ໂຫຖ, ‘ມຍາ ລຠິຕພ຺ພໍ ລຠຖ, ມຍາ ວສິຕພ຺ພຏ຺ຐາເນ ວສຖ, ຜາສຸວິຫາໂຣ ໂວ ມຍາ ກໂຕ’ຕິ ອຘິປ຺ປາເຍນ ວທຕິ.

໙໕໘. ອສຎ຺ຎີຕິ ປວຕ຺ໂຕ ວາໂທ ອສຎ຺ຎີວາໂທ; ໂສ ເຕສໍ ອຕ຺ຖີຕິ ອສຎ຺ຎີວາທາ. ຣູປີ ອຕ຺ຕາຕິອາທີສຸ ລາຠິໂນ ກສິຓຣູປໍ ອຕ຺ຕາຕິ ຄເຫຕ຺ວາ ຣູປີຕິ ທິຏ຺ຐິ ອຸປ຺ປຊ຺ຊຕິ; ອລາຠິໂນ ຕກ຺ກມຕ຺ເຕເນວ, ອາຊີວການໍ ວິຍ. ລາຠິໂນເຍວ ຈ ປນ ອຣູປສມາປຕ຺ຕິນິມິຕ຺ຕໍ ອຕ຺ຕາຕິ ຄເຫຕ຺ວາ ອຣູປີຕິ ທິຏ຺ຐິ ອຸປ຺ປຊ຺ຊຕິ; ອລາຠິໂນ ຕກ຺ກມຕ຺ເຕເນວ, ນິຄຓ຺ຐານໍ ວິຍ. ອສຎ຺ຎີຠາເວ ປເນຕ຺ຖ ເອກນ຺ເຕເນວ ກາຣຓໍ ນ ປຣິເຍສິຕພ຺ພໍ. ທິຏ຺ຐິຄຕິໂກ ຫິ ອຸມ຺ມຕ຺ຕໂກ ວິຍ ຍໍ ວາ ຕໍ ວາ ຄຓ຺ຫາຕິ. ຣູປີ ຈ ອຣູປີ ຈາຕິ ຣູປາຣູປມິສ຺ສກຄາຫວເສນ ວຸຕ຺ຕໍ. ອຍໍ ທິຏ຺ຐິ ຣູປາວຈຣາຣູປາວຈຣສມາປຕ຺ຕິລາຠິໂນປິ ຕກ຺ກິກສ຺ສາປິ ອຸປ຺ປຊ຺ຊຕິ. ເນວ ຣູປີ ນາຣູປີຕິ ປນ ເອກນ຺ຕໂຕ ຕກ຺ກິກທິຏ຺ຐິເຍວ. ອນ຺ຕວາຕິ ປຣິຕ຺ຕກສິຓໍ ອຕ຺ຕໂຕ ຄຓ຺ຫນ຺ຕສ຺ສ ທິຏ຺ຐິ. ອນນ຺ຕວາຕິ ອປ຺ປມາຓກສິຓໍ. ອນ຺ຕວາ ຈ ອນນ຺ຕວາ ຈາຕິ ອຸທ຺ຘມໂຘ ສປຣິຍນ຺ຕໍ ຕິຣິຍໍ ອປຣິຍນ຺ຕໍ ກສິຓໍ ອຕ຺ຕາຕິ ຄເຫຕ຺ວາ ອຸປ຺ປນ຺ນທິຏ຺ຐິ. ເນວນ຺ຕວາ ນານນ຺ຕວາຕິ ຕກ຺ກິກທິຏ຺ຐິເຍວ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ອຏ຺ຐກນິທ຺ເທສວຓ຺ຓນາ.