(໖.) ຉກ຺ກນິທ຺ເທສວຓ຺ຓນາ

໙໔໔. ຉກ຺ກນິທ຺ເທເສ ຍສ຺ມາ ກຸທ຺ໂຘ ວາ ໂກຘວເສນ, ສນ຺ທິຏ຺ຐິປຣາມາສີ ວາ ສນ຺ທິຏ຺ຐິປຣາມາສິຕາຍ ກລຫໍ ວິຄ຺ຄຫໍ ວິວາທໍ ອາປຊ຺ຊຕິ, ຕສ຺ມາ ໂກຘາທໂຍ ‘ວິວາທມູລານີ’ຕິ ວຸຕ຺ຕາ.

ຉນ຺ທຣາຄນິທ຺ເທເສ ກາມເຄຫສິຕຕ຺ຕາ ຉນ຺ທຣາຄາ ເຄຫສ຺ສິຕາ ຘມ຺ມາຕິ ສງ຺ຄຫໂຕ ວຕ຺ວາ ປຸນ ປເຠທໂຕ ທສ຺ເສຕຸໍ ມນາປິເຍສຸ ຣູເປສູຕິອາທິ ວຸຕ຺ຕໍ. ຕຕ຺ຖ ມນາປິເຍສູຕິ ມນວຑ຺ຒນເກສຸ ອິຏ຺ເຐສຸ. ວິໂຣຘາ ເອວ ວິໂຣຘວຕ຺ຖູນິ. ອມນາປິເຍສູຕິ ອນິຏ຺ເຐສຸ.

໙໔໕. ອຄາຣເວສຸ ອຄາຣໂວຕິ ຄາຣວວິຣຫິໂຕ. ອປ຺ປຕິສ຺ໂສຕິ ອປ຺ປຕິສ຺ສໂຍ ອນີຈວຸຕ຺ຕິ. ເອຕ຺ຖ ປນ ໂຍ ຠິກ຺ຂຸ ສຕ຺ຖຣິ ຘຣມາເນ ຕີສຸ ກາເລສຸ ອຸປຏ຺ຐານໍ ນ ຍາຕິ, ສຕ຺ຖຣິ ອນຸປາຫເນ ຈງ຺ກມນ຺ເຕ ສອຸປາຫໂນ ຈງ຺ກມຕິ, ນີເຈ ຈງ຺ກເມ ຈງ຺ກມນ຺ເຕ ອຸຈ຺ເຈ ຈງ຺ກເມ ຈງ຺ກມຕິ, ເຫຏ຺ຐາ ວສນ຺ເຕ ອຸປຣິ ວສຕິ, ສຕ຺ຖຸທສ຺ສນຏ຺ຐາເນ ອຸໂຠ ອໍເສ ປາຣຸປຕິ, ຉຕ຺ຕໍ ຘາເຣຕິ, ອຸປາຫນໍ ຘາເຣຕິ, ນ຺ຫາຍຕິ, ອຸຈ຺ຈາຣໍ ວາ ປສ຺ສາວໍ ວາ ກໂຣຕິ, ປຣິນິພ຺ພຸເຕ ວາ ປນ ເຈຕິຍໍ ວນ຺ທິຕຸໍ ນ ຄຈ຺ຉຕິ, ເຈຕິຍສ຺ສ ປຎ຺ຎາຍນຏ຺ຐາເນ ສຕ຺ຖຸທສ຺ສນຏ຺ຐາເນ ວຸຕ຺ຕໍ ສພ຺ພໍ ກໂຣຕິ – ອຍໍ ສຕ຺ຖຣິ ອຄາຣໂວ ນາມ. ໂຍ ປນ ຘມ຺ມສວເນ ສງ຺ຆຸຏ຺ເຐ ສກ຺ກຈ຺ຈໍ ນ ຄຈ຺ຉຕິ, ສກ຺ກຈ຺ຈໍ ຘມ຺ມໍ ນ ສຸຓາຕິ, ສມຸລ຺ລປນ຺ໂຕ ນິສີທຕິ, ນ ສກ຺ກຈ຺ຈໍ ຄຓ຺ຫາຕິ, ນ ສກ຺ກຈ຺ຈໍ ວາເຈຕິ – ‘ອຍໍ ຘມ຺ເມ ອຄາຣໂວ ນາມ. ໂຍ ປນ ເຖເຣນ ຠິກ຺ຂຸນາ ອນຊ຺ຌິຏ຺ໂຐ ຘມ຺ມໍ ເທເສຕິ, ປຎ຺ຫໍ ກເຖຕິ, ວຸຑ຺ເຒ ຠິກ຺ຂູ ຆຏ຺ເຏນ຺ໂຕ ຄຈ຺ຉຕິ, ຕິຏ຺ຐຕິ, ນິສີທຕິ, ທຸສ຺ສປລ຺ລຕ຺ຖິກໍ ວາ ຫຕ຺ຖປລ຺ລຕ຺ຖິກໍ ວາ ກໂຣຕິ, ສງ຺ຆມຊ຺ເຌ ອຸໂຠ ອໍເສ ປາຣຸປຕິ, ຉຕ຺ຕຸປາຫນໍ ຘາເຣຕິ – ອຍໍ ສງ຺ເຆ ອຄາຣໂວ ນາມ. ເອກຠິກ຺ຂຸສ຺ມິມ຺ປິ ຫິ ອຄາຣເວ ກເຕ ສງ຺ເຆ ອຄາຣໂວ ກໂຕວ ໂຫຕິ. ຕິສ຺ໂສ ສິກ຺ຂາ ປນ ອປູຣຍມາໂນວ ສິກ຺ຂາຍ ອຄາຣໂວ ນາມ. ອປ຺ປມາທລກ຺ຂຓໍ ອນນຸພ຺ຣູຫຍມາໂນ ອປ຺ປມາເທ ອຄາຣໂວ ນາມ. ທຸວິຘໍ ປຏິສນ຺ຖາຣໍ ອກໂຣນ຺ໂຕ ປຏິສນ຺ຖາເຣ ອຄາຣໂວ ນາມ.

ປຣິຫານິຍາ ຘມ຺ມາຕິ ປຣິຫານກຣາ ຘມ຺ມາ. ກມ຺ມາຣາມຕາຕິ ນວກມ຺ເມ ວາ ຈີວຣວິຈາຣຓາທີສຸ ວາ ກມ຺ເມສຸ ອຠິຣຕິ ຍຸຕ຺ຕປຍຸຕ຺ຕຕາ. ຠສ຺ສາຣາມຕາຕິ ຕິຣຈ຺ຉານກຖາວເສນ ຠສ຺ເສ ຍຸຕ຺ຕປຍຸຕ຺ຕຕາ. ນິທ຺ທາຣາມຕາຕິ ນິທ຺ທາຍ ຍຸຕ຺ຕປຍຸຕ຺ຕຕາ. ສງ຺ຄຓິກາຣາມຕາຕິ ສງ຺ຄຓິກາຍ ຍຸຕ຺ຕປຍຸຕ຺ຕຕາ. ສໍສຄ຺ຄາຣາມຕາຕິ ສວນສໍສຄ຺ເຄ, ທສ຺ສນສໍສຄ຺ເຄ, ສມຸລ຺ລາປສໍສຄ຺ເຄ, ປຣິໂຠຄສໍສຄ຺ເຄ, ກາຍສໍສຄ຺ເຄຕິ ປຎ຺ຈວິເຘ ສໍສຄ຺ເຄ ຍຸຕ຺ຕປຍຸຕ຺ຕຕາ. ປປຎ຺ຈາຣາມຕາຕິ ຕຓ຺ຫາມານທິຏ຺ຐິປປຎ຺ເຈສຸ ຍຸຕ຺ຕປຍຸຕ຺ຕຕາ.

໙໔໖. ໂສມນສ຺ສຸປວິຈາຣາທີສຸ ໂສມນສ຺ເສນ ສທ຺ຘິໍ ອຸປວິຈຣນ຺ຕີຕິ ໂສມນສ຺ສຸປວິຈາຣາ. ຈກ຺ຂຸນາ ຣູປໍ ທິສ຺ວາຕິ ຈກ຺ຂຸວິຎ຺ຎາເຓນ ຣູປໍ ປສ຺ສິຕ຺ວາ. ໂສມນສ຺ສຏ຺ຐານິຍນ຺ຕິ ໂສມນສ຺ສສ຺ສ ອາຣມ຺ມຓວເສນ ກາຣຓຠູຕໍ. ອຸປວິຈຣຕີຕິ ຕຕ຺ຖ ວິຈາຣປ຺ປວຕ຺ຕເນນ ອຸປວິຈຣຕິ. ວິຕກ຺ໂກ ປນ ຕໍສມ຺ປຍຸຕ຺ໂຕ ວາຕິ ອິມິນາ ນເຍນ ຕີສຸປິ ຉກ຺ເກສຸ ອຕ຺ໂຖ ເວທິຕພ຺ໂພ.

໙໔໗. ເຄຫສິຕານີຕິ ກາມຄຸຓນິສ຺ສິຕານິ. ໂສມນສ຺ສານີຕິ ເຈຕສິກສຸຂານິ. ໂທມນສ຺ສານີຕິ ເຈຕສິກທຸກ຺ຂານິ. ອຸເປກ຺ຂາຕິ ອຎ຺ຎາຓສມ຺ປຍຸຕ຺ຕາ ອຸເປກ຺ຂາ ເວທນາ, ອຎ຺ຎາຓຸເປກ຺ຂາຕິປິ ເອຕາສໍເຍວ ນາມໍ.

໙໔໘. ອຕ຺ຖິ ເມ ອຕ຺ຕາຕິ ວາຕິ ສພ຺ພປເທສຸ ວາ-ສທ຺ໂທ ວິກປ຺ປຕ຺ໂຖ; ເອວໍ ວາ ທິຏ຺ຐິ ອຸປ຺ປຊ຺ຊຕີຕິ ວຸຕ຺ຕໍ ໂຫຕິ. ອຕ຺ຖິ ເມ ອຕ຺ຕາຕິ ເຈຕ຺ຖ ສສ຺ສຕທິຏ຺ຐິ ສພ຺ພກາເລສຸ ອຕ຺ຕໂນ ອຕ຺ຖິຕໍ ຄຓ຺ຫາຕິ. ສຈ຺ຈໂຕ ເຖຕໂຕຕິ ຠູຕໂຕ ຈ ຖິຣໂຕ ຈ; ອິທໍ ສຈ຺ຈນ຺ຕິ ສຸຏ຺ຐຸ ທຬ຺ຫຠາເວນາຕິ ວຸຕ຺ຕໍ ໂຫຕິ. ນຕ຺ຖິ ເມ ອຕ຺ຕາຕິ ອຍໍ ປນ ອຸຈ຺ເຉທທິຏ຺ຐິ, ສໂຕ ສຕ຺ຕສ຺ສ ຕຕ຺ຖ ຕຕ຺ຖ ວິຠວຄ຺ຄຫຓໂຕ. ອຖ ວາ ປຸຣິມາປິ ຕີສຸ ກາເລສຸ ອຕ຺ຖີຕິ ຄຫຓໂຕ ສສ຺ສຕທິຏ຺ຐິ, ປຈ຺ຈຸປ຺ປນ຺ນເມວ ອຕ຺ຖີຕິ ຄຓ຺ຫນ຺ຕີ ອຸຈ຺ເຉທທິຏ຺ຐິ. ປຈ຺ຉິມາປິ ອຕີຕານາຄເຕສຸ ນຕ຺ຖີຕິ ຄຫຓໂຕ ‘ຠສ຺ມນ຺ຕາ ອາຫຸຕິໂຍ’ຕິ ຄຫິຕທິຏ຺ຐິການໍ ວິຍ ອຸຈ຺ເຉທທິຏ຺ຐິ, ອຕີເຕເຍວ ນຕ຺ຖີຕິ ຄຓ຺ຫນ຺ຕີ ອຘິຈ຺ຈສມຸປ຺ປນ຺ນິກສ຺ເສວ ສສ຺ສຕທິຏ຺ຐິ. ອຕ຺ຕນາ ວາ ອຕ຺ຕານໍ ສຎ຺ຊານາມີຕິ ສຎ຺ຎາກ຺ຂນ຺ຘສີເສນ ຂນ຺ເຘ ອຕ຺ຕາຕິ ຄເຫຕ຺ວາ ສຎ຺ຎາຍ ອວເສສກ຺ຂນ຺ເຘ ສຎ຺ຊານນໂຕ ‘ອິມິນາ ອຕ຺ຕນາ ອິມໍ ອຕ຺ຕານໍ ສຎ຺ຊານາມີ’ຕິ ເອວໍ ໂຫຕິ. ອຕ຺ຕນາ ວາ ອນຕ຺ຕານນ຺ຕິ ສຎ຺ຎາກ຺ຂນ຺ຘໍເຍວ ອຕ຺ຕາຕິ ຄເຫຕ຺ວາ ອິຕເຣ ຈຕ຺ຕາໂຣ ຂນ຺ເຘ ອນຕ຺ຕາຕິ ຄເຫຕ຺ວາ ສຎ຺ຎາຍ ເຕສໍ ຊານນໂຕ ເອວໍ ໂຫຕິ. ອນຕ຺ຕນາ ວາ ອຕ຺ຕານນ຺ຕິ ສຎ຺ຎາກ຺ຂນ຺ຘໍ ອນຕ຺ຕາຕິ ອິຕເຣ ຈ ຈຕ຺ຕາໂຣ ຂນ຺ເຘ ອຕ຺ຕາຕິ ຄເຫຕ຺ວາ ສຎ຺ຎາຍ ເຕສໍ ຊານນໂຕ ເອວໍ ໂຫຕິ. ສພ຺ພາປິ ສສ຺ສຕຸຈ຺ເຉທທິຏ຺ຐິໂຍວ.

ວໂທ ເວເທຍ຺ໂຍຕິ ອາທໂຍ ປນ ສສ຺ສຕທິຏ຺ຐິຍາ ເອວ ອຠິນິເວສາກາຣາ. ຕຕ຺ຖ ວທຕີຕິ ວໂທ; ວຈີກມ຺ມສ຺ສ ກາຣໂກຕິ ວຸຕ຺ຕໍ ໂຫຕິ. ເວທຍຕີຕິ ເວເທຍ຺ໂຍ; ຊານາຕິ ອນຸຠວຕິ ຈາຕິ ວຸຕ຺ຕໍ ໂຫຕິ. ອິທານິ ຍໍ ໂສ ເວເທຕິ ຕໍ ທສ຺ເສຕຸໍ ຕຕ຺ຣ ຕຕ຺ຣ ທີຆຣຕ຺ຕໍ ກລ຺ຍາຓປາປການນ຺ຕິອາທິ ວຸຕ຺ຕໍ. ຕຕ຺ຖ ຕຕ຺ຣ ຕຕ຺ຣາຕິ ເຕສຸ ເຕສຸ ໂຍນິຄຕິຐິຕິນິວາສນິກາເຍສຸ ອາຣມ຺ມເຓສຸ ວາ. ທີຆຣຕ຺ຕນ຺ຕິ ຈິຣຣຕ຺ຕໍ. ປຈ຺ຈນຸໂຠຕີຕິ ປຏິສໍເວທຍຕິ. ນ ໂສ ຊາໂຕ ນາໂຫສີຕິ ໂສ ອຕ຺ຕາ ອຊາຕິຘມ຺ມໂຕ ນ ຊາໂຕ ນາມ; ສທາ ວິຊ຺ຊມາໂນ ເຍວາຕິ ອຕ຺ໂຖ. ເຕເນວ ອຕີເຕ ນາໂຫສິ, ອນາຄເຕປິ ນ ຠວິສ຺ສຕິ. ໂຍ ຫິ ຊາໂຕ ໂສ ອໂຫສິ, ໂຍ ຈ ຊາຍິສ຺ສຕິ ໂສ ຠວິສ຺ສຕີຕິ. ອຖວາ ‘ນ ໂສ ຊາໂຕ ນາໂຫສີ’ຕິ ໂສ ສທາ ວິຊ຺ຊມານຕ຺ຕາ ອຕີເຕປິ ນ ຊາຕຸ ນາໂຫສິ, ອນາຄເຕປິ ນ ຊາຕຸ ນ ຠວິສ຺ສຕິ. ນິຈ຺ໂຈຕິ ອຸປ຺ປາທວຍຣຫິໂຕ. ຘຸໂວຕິ ຖິໂຣ ສາຣຠູໂຕ. ສສ຺ສໂຕຕິ ສພ຺ພກາລິໂກ. ອວິປຣິຓາມຘມ຺ໂມຕິ ອຕ຺ຕໂນ ປກຕິຠາວໍ ອວິຊຫນຘມ຺ໂມ ກກຓ຺ຏໂກ ວິຍ ນານປ຺ປກາຣຕ຺ຕໍ ນາປຊ຺ຊຕິ. ເອວມຍໍ ສພ຺ພາສວທິຏ຺ຐິ (ມ. ນິ. ໑.໑໗ ອາທໂຍ) ນາມ ກຖິຕາ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຉກ຺ກນິທ຺ເທສວຓ຺ຓນາ.