(໕.) ປຎ຺ຈກນິທ຺ເທສວຓ຺ຓນາ

໙໔໐. ປຎ຺ຈກນິທ຺ເທເສ ຍສ຺ມາ ເຍສໍ ສກ຺ກາຍທິຏ຺ຐິອາທີນິ ອປ຺ປຫີນານິ, ເຕ ຠວຄ຺ເຄປິ ນິພ຺ພຕ຺ເຕ ເອຕານິ ອາກຑ຺ຒິຕ຺ວາ ກາມຠເວເຍວ ປາເຕນ຺ຕິ, ຕສ຺ມາ ໂອຣມ຺ຠາຄິຍານິ ສໍໂຍຊນານີຕິ ວຸຕ຺ຕານິ. ອິຕິ ເອຕານິ ປຎ຺ຈ ຄຈ຺ຉນ຺ຕໍ ນ ວາເຣນ຺ຕິ, ຄຕໍ ປນ ອາເນນ຺ຕິ. ຣູປຣາຄາທີນິປິ ປຎ຺ຈ ຄຈ຺ຉນ຺ຕໍ ນ ວາເຣນ຺ຕິ, ອາຄນ຺ຕຸໍ ປນ ນ ເທນ຺ຕິ. ຣາຄາທໂຍ ປຎ຺ຈ ລຄ຺ຄນຏ຺ເຐນ ສງ຺ຄາ, ອນຸປວິຏ຺ຐຏ຺ເຐນ ປນ ສລ຺ລາຕິ ວຸຕ຺ຕາ.

໙໔໑. ເຈໂຕຂິລາຕິ ຈິຕ຺ຕສ຺ສ ຖທ຺ຘຠາວາ ກຈວຣຠາວາ ຂາຓຸກຠາວາ. ສຕ຺ຖຣິ ກງ຺ຂຕີຕິ ສຕ຺ຖຸ ສຣີເຣ ວາ ຄຸເຓ ວາ ກງ຺ຂຕິ. ສຣີເຣ ກງ຺ຂມາໂນ ‘ທ຺ວຕ຺ຕິໍສວຣລກ຺ຂຓປຏິມຓ຺ຑິຕໍ ນາມ ສຣີຣໍ ອຕ຺ຖິ ນຸ ໂຂ ນຕ຺ຖີ’ຕິ ກງ຺ຂຕິ. ຄຸເຓ ກງ຺ຂມາໂນ ‘ອຕີຕານາຄຕປຈ຺ຈຸປ຺ປນ຺ນຊານນສມຕ຺ຖໍ ສພ຺ພຎ຺ຎຸຕຎາຓໍ ອຕ຺ຖິ ນຸ ໂຂ ນຕ຺ຖີ’ຕິ ກງ຺ຂຕິ. ວິຈິກິຈ຺ຉຕີຕິ ວິຈິນນ຺ໂຕ ກິຈ຺ຉຕິ, ທຸກ຺ຂໍ ອາປຊ຺ຊຕິ, ວິນິຈ຺ເຉຕຸໍ ນ ສກ຺ໂກຕິ. ນາຘິມຸຈ຺ຈຕີຕິ ‘ເອວເມຕ’ນ຺ຕິ ອຘິໂມກ຺ຂໍ ນ ປຏິລຠຕິ. ນ ສມ຺ປສີທຕີຕິ ຄຸເຓສຸ ໂອຕຣິຕ຺ວາ ນິພ຺ພິຈິກິຈ຺ຉຠາເວນ ປສີທິຕຸໍ ອນາວິໂລ ຠວິຕຸໍ ນ ສກ຺ໂກຕິ.

ຘມ຺ເມຕິ ປຣິຍຕ຺ຕິຘມ຺ເມ ຈ ປຏິເວຘຘມ຺ເມ ຈ. ປຣິຍຕ຺ຕິຘມ຺ເມ ກງ຺ຂມາໂນ ‘ເຕປິຏກໍ ພຸທ຺ຘວຈນໍ ຈຕຸຣາສີຕິຘມ຺ມກ຺ຂນ຺ຘສຫສ຺ສານີຕິ ວທນ຺ຕິ, ອຕ຺ຖິ ນຸ ໂຂ ເອຕໍ ນຕ຺ຖີ’ຕິ ກງ຺ຂຕິ. ປຏິເວຘຘມ຺ເມ ກງ຺ຂມາໂນ ‘ວິປສ຺ສນານິສ຺ສນ຺ໂທ ມຄ຺ໂຄ ນາມ, ມຄ຺ຄນິສ຺ສນ຺ໂທ ຜລໍ ນາມ, ສພ຺ພສງ຺ຂາຣປຏິນິສ຺ສຄ຺ໂຄ ນິພ຺ພານໍ ນາມາຕິ ວທນ຺ຕິ, ຕໍ ອຕ຺ຖິ ນຸ ໂຂ ນຕ຺ຖີຕິ ກງ຺ຂຕິ’.

ສງ຺ເຆ ກງ຺ຂຕີຕິ ‘ອຸຊຸປ຺ປຏິປນ຺ໂນຕິອາທີນໍ ປທານໍ ວເສນ ເອວຣູປໍ ປຏິປທໍ ປຏິປນ຺ນາ ຈຕ຺ຕາໂຣ ມຄ຺ຄຏ຺ຐາ ຈຕ຺ຕາໂຣ ຜລຏ຺ຐາຕິ ອຏ຺ຐນ຺ນໍ ປຸຄ຺ຄລານໍ ສມູຫຠູໂຕ ສງ຺ໂຆ ນາມ ອຕ຺ຖິ ນຸ ໂຂ ນຕ຺ຖີ’ຕິ ກງ຺ຂຕິ. ສິກ຺ຂາຍ ກງ຺ຂມາໂນ ‘ອຘິສີລສິກ຺ຂາ ນາມ ອຘິຈິຕ຺ຕສິກ຺ຂາ ນາມ ອຘິປຎ຺ຎາ ສິກ຺ຂາ ນາມາຕິ ວທນ຺ຕິ, ສາ ອຕ຺ຖິ ນຸ ໂຂ ນຕ຺ຖີ’ຕິ ກງ຺ຂຕິ.

ເຈຕໂສວິນິພນ຺ຘາຕິ ຈິຕ຺ຕໍ ພນ຺ຘິຕ຺ວາ ມຸຏ຺ຐິຍໍ ກຕ຺ວາ ວິຍ ຄຓ຺ຫນ຺ຕີຕິ ເຈຕໂສວິນິພນ຺ຘາ. ກາເມຕິ ວຕ຺ຖຸກາເມປິ ກິເລສກາເມປິ. ກາເຍຕິ ອຕ຺ຕໂນ ກາເຍ. ຣູເປຕິ ພຫິທ຺ຘາ ຣູເປ. ຍາວທຕ຺ຖນ຺ຕິ ຍຕ຺ຕກໍ ອິຈ຺ຉຕິ ຕຕ຺ຕກໍ. ອຸທຣາວເທຫກນ຺ຕິ ອຸທຣປູຣໍ. ຕຎ຺ຫິ ອຸທຣໍ ອວເທຫນໂຕ ອຸທຣາວເທຫກນ຺ຕິ ວຸຈ຺ຈຕິ. ເສຍ຺ຍສຸຂນ຺ຕິ ມຎ຺ຈປີຐສຸຂໍ ອຸຕຸສຸຂໍ ວາ. ປສ຺ສສຸຂນ຺ຕິ ຍຖາ ສມ຺ປຣິວຕ຺ຕກໍ ສຍນ຺ຕສ຺ສ ທກ຺ຂິຓປສ຺ສວາມປສ຺ສານໍ ສຸຂໍ ໂຫຕິ, ເອວໍ ອຸປ຺ປນ຺ນສຸຂໍ. ມິທ຺ຘສຸຂນ຺ຕິ ນິທ຺ທາສຸຂໍ. ອນຸຍຸຕ຺ໂຕຕິ ຍຸຕ຺ຕປຍຸຕ຺ໂຕ ວິຫຣຕິ. ປຓິຘາຍາຕິ ປຕ຺ຖຍິຕ຺ວາ. ສີເລນາຕິອາທີສຸ ສີລນ຺ຕິ ຈຕຸປາຣິສຸທ຺ຘິສີລໍ. ວຕນ຺ຕິ ວຕສມາທານໍ. ຕໂປຕິ ຕປຈຣຓໍ. ພ຺ຣຫ຺ມຈຣິຍນ຺ຕິ ເມຖຸນວິຣຕິ. ເທໂວ ວາ ຠວິສ຺ສາມີຕິ ມເຫສກ຺ຂເທໂວ ວາ ຠວິສ຺ສາມິ. ເທວຎ຺ຎຕໂຣ ວາຕິ ອປ຺ເປສກ຺ຂເທເວສຸ ວາ ອຎ຺ຎຕໂຣ. ກຸສລຘມ຺ເມ ອາວຣນ຺ຕິ ນິວາເຣນ຺ຕີຕິ ນີວຣຓານິ.

ມາຕາ ຊີວິຕາ ໂວໂຣປິຕາ ໂຫຕີຕິ ມນຸສ຺ເສເນວ ສກຊນິກາ ມນຸສ຺ສມາຕາ ຊີວິຕາ ໂວໂຣປິຕາ ໂຫຕິ. ປິຕາປິ ມນຸສ຺ສປິຕາວ. ອຣຫາປິ ມນຸສ຺ສອຣຫາວ. ທຸຏ຺ເຐນ ຈິຕ຺ເຕນາຕິ ວຘກຈິຕ຺ເຕນ.

ສຎ຺ຎີຕິ ສຎ຺ຎາສມງ຺ຄີ. ອໂຣໂຄຕິ ນິຈ຺ໂຈ. ອິຕ຺ເຖເກ ອຠິວທນ຺ຕີຕິ ອິຕ຺ຖໍ ເອເກ ອຠິວທນ຺ຕິ, ເອວເມເກ ອຠິວທນ຺ຕີຕິ ອຕ຺ໂຖ. ເອຕ຺ຕາວຕາ ໂສຬສ ສຎ຺ຎີວາທາ ກຖິຕາ. ອສຎ຺ຎີຕິ ສຎ຺ຎາວິຣຫິໂຕ. ອິມິນາ ປເທນ ອຏ຺ຐ ອສຎ຺ຎີວາທາ ກຖິຕາ. ຕຕິຍປເທນ ອຏ຺ຐ ເນວສຎ຺ຎີນາສຎ຺ຎີວາທາ ກຖິຕາ. ສໂຕ ວາ ປນ ສຕ຺ຕສ຺ສາຕິ ອຖວາ ປນ ວິຊ຺ຊມານສ຺ເສວ ສຕ຺ຕສ຺ສ. ອຸຈ຺ເຉທນ຺ຕິ ອຸປຈ຺ເຉທໍ. ວິນາສນ຺ຕິ ອທສ຺ສນໍ. ວິຠວນ຺ຕິ ຠາວວິຄມໍ. ສພ຺ພາເນຕານິ ອຎ຺ຎມຎ຺ຎເວວຈນາເນວ. ຕຕ຺ຖ ທ຺ເວ ຊນາ ອຸຈ຺ເຉທທິຏ຺ຐິໍ ຄຓ຺ຫນ຺ຕິ – ລາຠີ ຈ ອລາຠີ ຈ. ຕຕ຺ຖ ລາຠີ ອຣຫໂຕ ທິພ຺ເພນ ຈກ຺ຂຸນາ ຈຸຕິໍ ທິສ຺ວາ ອຸປປຕ຺ຕິໍ ອປສ຺ສນ຺ໂຕ, ໂຍ ວາ ຈຸຕິມຕ຺ຕເມວ ທຏ຺ຐຸໍ ສກ຺ໂກຕິ ນ ອຸປປາຕໍ, ໂສ ອຸຈ຺ເຉທທິຏ຺ຐິໍ ຄຓ຺ຫາຕິ. ອລາຠີ ‘ໂກ ປຣໂລກໍ ຊານາຕີ’ຕິ ກາມສຸຂຄິທ຺ຘຕາຍ ວາ ‘ຍຖາ ຣຸກ຺ຂໂຕ ປຓ຺ຓານິ ປຕິຕານິ ນ ປຸນ ວິຣຸຫນ຺ຕິ, ເອວໍ ສຕ຺ຕາ’ຕິອາທິນາ ວິຕກ຺ເກນ ວາ ອຸຈ຺ເຉທໍ ຄຓ຺ຫາຕິ. ອິຘ ປນ ຕຓ຺ຫາທິຏ຺ຐີນໍ ວເສນ ຕຖາ ຈ ອຎ຺ຎຖາ ຈ ວິກປ຺ເປຕ຺ວາວ ອຸປ຺ປນ຺ນາ ສຕ຺ຕ ອຸຈ຺ເຉທວາທາ ກຖິຕາ. ເຕສຎ຺ຫິ ອິທໍ ສງ຺ຄຫວຈນໍ. ທິຏ຺ຐຘມ຺ມນິພ຺ພານໍ ວາ ປເນເກຕິ ເອຕ຺ຖ ທິຏ຺ຐຘມ຺ໂມຕິ ປຈ຺ຈກ຺ຂຘມ຺ໂມ ວຸຈ຺ຈຕິ. ຕຕ຺ຖ ຕຕ຺ຖ ປຏິລທ຺ຘຕ຺ຕຠາວສ຺ເສຕໍ ອຘິວຈນໍ. ທິຏ຺ຐຘມ຺ເມ ນິພ຺ພານໍ ທິຏ຺ຐຘມ຺ມນິພ຺ພານໍ; ອິມສ຺ມິໍເຍວ ອຕ຺ຕຠາເວ ທຸກ຺ຂາ ວູປສມ຺ມນ຺ຕິ ອຕ຺ໂຖ. ອິທໍ ປຎ຺ຈນ຺ນໍ ທິຏ຺ຐຘມ຺ມນິພ຺ພານວາທານໍ ສງ຺ຄຫວຈນໍ.

໙໔໒. ເວຣາຕິ ເວຣເຈຕນາ. ພ຺ຍສນາຕິ ວິນາສາ. ອກ຺ຂນ຺ຕິຍາຕິ ອນຘິວາສນາຍ. ອປ຺ປິໂຍຕິ ທສ຺ສນສວນປຏິກູລຕາຍ ນ ປິຍາຍິຕພ຺ໂພ. ຈິນ຺ເຕຕຸມ຺ປິ ປຏິກູລຕ຺ຕາ ມໂນ ເອຕສ຺ມິໍ ນ ອປ຺ເປຕີຕິ ອມນາໂປ. ເວຣພຫຸໂລຕິ ພຫຸເວໂຣ. ວຊ຺ຊພຫຸໂລຕິ ພຫຸໂທໂສ.

ອາຊີວກຠຍນ຺ຕິ ອາຊີວໍ ຊີວິຕວຸຕ຺ຕິໍ ປຏິຈ຺ຈ ອຸປ຺ປນ຺ນໍ ຠຍໍ. ຕໍ ອຄາຣິກສ຺ສປິ ໂຫຕິ ອນຄາຣິກສ຺ສປິ. ຕຕ຺ຖ ອຄາຣິເກນ ຕາວ ອາຊີວເຫຕຸ ພຫຸໍ ອກຸສລໍ ກຕໍ ໂຫຕິ. ອຖສ຺ສ ມຣຓສມເຍ ນິຣເຍ ອຸປຏ຺ຐຫນ຺ເຕ ຠຍໍ ອຸປ຺ປຊ຺ຊຕິ. ອນຄາຣິເກນາປິ ພຫຸ ອເນສນາ ກຕາ ໂຫຕິ. ອຖສ຺ສ ມຣຓກາເລ ນິຣເຍ ອຸປຏ຺ຐຫນ຺ເຕ ຠຍໍ ອຸປ຺ປຊ຺ຊຕິ. ອິທໍ ອາຊີວກຠຍໍ ນາມ. ອສິໂລກຠຍນ຺ຕິ ຄຣຫຠຍໍ ປຣິສສາຣຊ຺ຊຠຍນ຺ຕິ ກຕປາປສ຺ສ ປຸຄ຺ຄລສ຺ສ ສນ຺ນິປຕິຕໍ ປຣິສໍ ອຸປສງ຺ກມນ຺ຕສ຺ສ ສາຣຊ຺ຊສງ຺ຂາຕໍ ຠຍໍ ອຸປ຺ປຊ຺ຊຕິ. ອິທໍ ປຣິສສາຣຊ຺ຊຠຍໍ ນາມ. ອິຕຣທ຺ວຍໍ ປາກຏເມວ.

໙໔໓. ທິຏ຺ຐຘມ຺ມນິພ຺ພານວາເຣສຸ ປຎ຺ຈຫິ ກາມຄຸເຓຫີຕິ ມນາປິຍຣູປາທີຫິ ປຎ຺ຈຫິ ກາມໂກຏ຺ຐາເສຫິ ພນ຺ຘເນຫິ ວາ. ສມປ຺ປິໂຕຕິ ສຸຏ຺ຐຸ ອປ຺ປິໂຕ ອລ຺ລີໂນ ຫຸຕ຺ວາ. ສມງ຺ຄີຠູໂຕຕິ ສມນ຺ນາຄໂຕ. ປຣິຈາເຣຕີຕິ ເຕສຸ ກາມຄຸເຓສຸ ຍຖາສຸຂໍ ອິນ຺ທ຺ຣິຍານິ ຈາເຣຕິ ສຎ຺ຈາເຣຕິ ອິໂຕ ຈິໂຕ ຈ ອຸປເນຕິ; ອຖ ວາ ປນ ລຬຕິ ຣມຕິ ກີຬຕີຕິ. ເອຕ຺ຖ ຈ ທຸວິຘາ ກາມຄຸຓາ – ມານຸສ຺ສກາ ເຈວ ທິພ຺ພາ ຈ. ມານຸສ຺ສກາ ມນ຺ຘາຕຸກາມຄຸຓສທິສາ ທຏ຺ຐພ຺ພາ; ທິພ຺ພາ ປຣນິມ຺ມິຕວສວຕ຺ຕິເທວຣາຊສ຺ສ ກາມຄຸຓສທິສາຕິ. ເອວຣູເປ ກາເມ ອຸປຄຕຎ຺ຫິ ເຕ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕີຕິ ວທນ຺ຕິ. ຕຕ຺ຖ ປຣມທິຏ຺ຐຘມ຺ມນິພ຺ພານນ຺ຕິ ປຣມໍ ທິຏ຺ຐຘມ຺ມນິພ຺ພານໍ, ອຸຕ຺ຕມນ຺ຕິ ອຕ຺ໂຖ.

ທຸຕິຍວາເຣ ຫຸຕ຺ວາ ອຠາວຏ຺ເຐນ ອນິຈ຺ຈາ; ປຏິປີຬນຏ຺ເຐນ ທຸກ຺ຂາ; ປກຕິຊຫນຏ຺ເຐນ ວິປຣິຓາມຘມ຺ມາຕິ ເວທິຕພ຺ພາ. ເຕສໍ ວິປຣິຓາມຎ຺ຎຖາຠາວາຕິ ເຕສໍ ກາມານໍ ວິປຣິຓາມສງ຺ຂາຕາ ອຎ຺ຎຖາຠາວາ. ‘ຍມ຺ປິ ເມ ອໂຫສິ ຕມ຺ປິ ເມ ນຕ຺ຖີ’ຕິ ວຸຕ຺ຕນເຍນ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ຕຕ຺ຖ ອນ຺ໂຕນິຊ຺ຌາຍນລກ຺ຂໂຓ ໂສໂກ; ຕນ຺ນິສ຺ສິຕລາລປ຺ປລກ຺ຂໂຓ ປຣິເທໂວ; ກາຍປຏິປີຬນລກ຺ຂຓໍ ທຸກ຺ຂໍ; ມໂນວິຆາຕລກ຺ຂຓໍ ໂທມນສ຺ສໍ; ວິຆາຕລກ຺ຂໂຓ ອຸປາຍາໂສ.

ວິຕກ຺ກິຕນ຺ຕິ ອຠິນິໂຣປນວເສນ ປວຕ຺ໂຕ ວິຕກ຺ໂກ. ວິຈາຣິຕນ຺ຕິ ອນຸມຊ຺ຊນວເສນ ປວຕ຺ໂຕ ວິຈາໂຣ. ເອເຕນ ເອຕນ຺ຕິ ເອເຕນ ວິຕກ຺ເກນ ຈ ວິຈາເຣນ ຈ ເອຕໍ ປຐມຊ຺ຌານໍ ໂອຬາຣິກໍ ສກຓ຺ຏກໍ ວິຍ ຂາຍຕິ.

ປີຕິຄຕນ຺ຕິ ປີຕິເມວ. ເຈຕໂສ ອຸປ຺ປິລາວິຕນ຺ຕິ ຈິຕ຺ຕສ຺ສ ອຸປ຺ປິລຠາວກຣຓໍ. ເຈຕໂສ ອາໂຠໂຄຕິ ຌານາ ວຸຏ຺ຐາຍ ຕສ຺ມິໍ ສຸເຂ ປຸນປ຺ປຸນໍ ຈິຕ຺ຕສ຺ສ ອາໂຠໂຄ ມນສິກາໂຣຕິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປຎ຺ຈກນິທ຺ເທສວຓ຺ຓນາ ນິຏ຺ຐິຕາ.