ຕຕິຍພລນິທ຺ເທໂສ

໘໑໑. ຕຕິຍພລນິທ຺ເທເສ ມຄ຺ໂຄຕິ ວາ ປຏິປທາຕິ ວາ ກມ຺ມສ຺ເສເວຕໍ ນາມໍ. ນິຣຍຄາມິນີຕິອາທີສຸ ນິຣສ຺ສາທຏ຺ເຐນ ນິຣຕິອຕ຺ເຖນ ຈ ນິຣໂຍ. ອຸທ຺ຘໍ ອນຸຄນ຺ຕ຺ວາ ຕິຣິຍໍ ອຎ຺ຈິຕາຕິ ຕິຣຈ຺ຉານາ; ຕິຣຈ຺ຉານາເຍວ ຕິຣຈ຺ຉານໂຍນິ. ເປຕຕາຍ ເປຕ຺ຕິ; ອິໂຕ ເປຈ຺ຈ ຄຕຠາເວນາຕິ ອຕ຺ໂຖ. ເປຕ຺ຕິເຍວ ເປຕ຺ຕິວິສໂຍ. ມນສ຺ສ ອຸສ຺ສນ຺ນຕາຍ ມນຸສ຺ສາ; ມນຸສ຺ສາວ ມນຸສ຺ສໂລໂກ. ທິພ຺ພນ຺ຕິ ປຎ຺ຈຫິ ກາມຄຸເຓຫິ ອຘິມຕ຺ຕາຍ ວາ ຐານສມ຺ປຕ຺ຕິຍາຕິ ເທວາ; ເທວາວ ເທວໂລໂກ. ວານໍ ວຸຈ຺ຈຕິ ຕຓ຺ຫາ; ຕໍ ຕຕ຺ຖ ນຕ຺ຖີຕິ ນິພ຺ພານໍ. ນິຣຍໍ ຄຈ຺ຉຕີຕິ ນິຣຍຄາມີ. ອິທໍ ມຄ຺ຄໍ ສນ຺ຘາຍ ວຸຕ຺ຕໍ. ປຏິປທາ ປນ ນິຣຍຄາມິນີ ນາມ ໂຫຕິ. ເສສປເທສຸປິ ເອເສວ ນໂຍ. ອິທໍ ສພ຺ພມ຺ປິ ປຏິປທໍ ຕຖາຄໂຕ ປຊານາຕິ.

ກຖໍ? ສກລຄາມວາສິເກສຸປິ ຫິ ເອກໂຕ ເອກໍ ສູກຣໍ ວາ ມິຄໍ ວາ ຊີວິຕາ ໂວໂຣເປນ຺ເຕສຸ ສພ຺ເພສມ຺ປິ ເຈຕນາ ປຣສ຺ສ ຊີວິຕິນ຺ທ຺ຣິຍາຣມ຺ມຓາວ ໂຫຕິ. ຕໍ ປນ ກມ຺ມໍ ເຕສໍ ອາຍູຫນກ຺ຂເຓເຍວ ນານາ ໂຫຕິ. ເຕສຸ ຫິ ເອໂກ ອາທເຣນ ຉນ຺ທຊາໂຕ ກໂຣຕິ. ເອໂກ ‘ເອຫິ ຕ຺ວມ຺ປິ ກໂຣຫີ’ຕິ ປເຣຫິ ນິປ຺ປີຬິຕຕ຺ຕາ ກໂຣຕິ. ເອໂກ ສມານຈ຺ຉນ຺ໂທ ວິຍ ຫຸຕ຺ວາ ອປ຺ປຏິພາຫິຍມາໂນ ວິຈຣຕິ. ເຕສຸ ເອໂກ ເຕເນວ ກມ຺ເມນ ນິຣເຍ ນິພ຺ພຕ຺ຕຕິ, ເອໂກ ຕິຣຈ຺ຉານໂຍນິຍໍ, ເອໂກ ເປຕ຺ຕິວິສເຍ. ຕໍ ຕຖາຄໂຕ ອາຍູຫນກ຺ຂເຓເຍວ ‘ອິມິນາ ນີຫາເຣນ ອາຍູຫິຕຕ຺ຕາ ເອສ ນິຣເຍ ນິພ຺ພຕ຺ຕິສ຺ສຕິ, ເອສ ຕິຣຈ຺ຉານໂຍນິຍໍ, ເອສ ເປຕ຺ຕິວິສເຍ’ຕິ ປຊານາຕິ. ນິຣເຍ ນິພ຺ພຕ຺ຕມານມ຺ປິ ‘ເອສ ອຏ຺ຐສຸ ມຫານິຣເຍສຸ ນິພ຺ພຕ຺ຕິສ຺ສຕິ, ເອສ ໂສຬສສຸ ອຸສ຺ສທນິຣເຍສຸ ນິພ຺ພຕ຺ຕິສ຺ສຕີ’ຕິ ປຊານາຕິ. ຕິຣຈ຺ຉານໂຍນິຍໍ ນິພ຺ພຕ຺ຕມານມ຺ປິ ‘ເອສ ອປາທໂກ ຠວິສ຺ສຕິ, ເອສ ທ຺ວິປາທໂກ, ເອສ ຈຕຸປ຺ປາທໂກ, ເອສ ພຫຸປ຺ປາທໂກ’ຕິ ປຊານາຕິ. ເປຕ຺ຕິວິສເຍ ນິພ຺ພຕ຺ຕມານມ຺ປິ ‘ເອສ ນິຊ຺ຌາມຕຓ຺ຫິໂກ ຠວິສ຺ສຕິ, ເອສ ຂຸປ຺ປິປາສິໂກ, ເອສ ປຣທຕ຺ຕູປຊີວີ’ຕິ ປຊານາຕິ. ເຕສຸ ຈ ກມ຺ເມສຸ ‘ອິທໍ ກມ຺ມໍ ປຏິສນ຺ຘິໍ ອາກຑ຺ຒິຕຸໍ ນ ສກ຺ຂິສ຺ສຕິ, ທຸພ຺ພລໍ ທິນ຺ນາຍ ປຏິສນ຺ຘິຍາ ອຸປຘິເວປກ຺ກໍ ຠວິສ຺ສຕີຕິ ປຊານາຕິ.

ຕຖາ ສກລຄາມວາສິເກສຸ ເອກໂຕ ປິຓ຺ຑປາຕໍ ທທມາເນສຸ ສພ຺ເພສມ຺ປິ ເຈຕນາ ປິຓ຺ຑປາຕາຣມ຺ມຓາວ ໂຫຕິ. ຕໍ ປນ ກມ຺ມໍ ເຕສໍ ອາຍູຫນກ຺ຂເຓເຍວ ປຸຣິມນເຍນ ນານາ ໂຫຕິ. ເຕສຸ ເກຈິ ເທວໂລເກ ນິພ຺ພຕ຺ຕິສ຺ສນ຺ຕິ, ເກຈິ ມນຸສ຺ສໂລເກ. ຕໍ ຕຖາຄໂຕ ອາຍູຫນກ຺ຂເຓເຍວ ‘ອິມິນາ ນີຫາເຣນ ອາຍູຫິຕຕ຺ຕາ ເອສ ມນຸສ຺ສໂລເກ ນິພ຺ພຕ຺ຕິສ຺ສຕິ, ເອສ ເທວໂລເກ’ຕິ ປຊານາຕິ. ເທວໂລເກ ນິພ຺ພຕ຺ຕມານານມ຺ປິ ‘ເອສ ປຣນິມ຺ມິຕວສວຕ຺ຕີສຸ ນິພ຺ພຕ຺ຕິສ຺ສຕິ, ເອສ ນິມ຺ມານຣຕີສຸ, ເອສ ຕຸສິເຕສຸ, ເອສ ຍາເມສຸ, ເອສ ຕາວຕິໍເສສຸ, ເອສ ຈາຕຸມຫາຣາຊິເກສຸ, ເອສ ຠຸມ຺ມເທເວສຸ; ເອສ ປນ ເຊຏ຺ຐກເທວຣາຊາ ຫຸຕ຺ວາ ນິພ຺ພຕ຺ຕິສ຺ສຕິ, ເອສ ເອຕສ຺ສ ທຸຕິຍໍ ວາ ຕຕິຍໍ ວາ ຐານນ຺ຕຣໍ ກໂຣນ຺ໂຕ ປຣິຈາຣໂກ ຫຸຕ຺ວາ ນິພ຺ພຕ຺ຕິສ຺ສຕີ’ຕິ ປຊານາຕິ. ມນຸສ຺ເສສຸ ນິພ຺ພຕ຺ຕມານານມ຺ປິ ‘ເອສ ຂຕ຺ຕິຍກຸເລ ນິພ຺ພຕ຺ຕິສ຺ສຕິ, ເອສ ພ຺ຣາຫ຺ມຓກຸເລ, ເອສ ເວສ຺ສກຸເລ, ເອສ ສຸທ຺ທກຸເລ; ເອສ ປນ ມນຸສ຺ເສສຸ ຣາຊາ ຫຸຕ຺ວາ ນິພ຺ພຕ຺ຕິສ຺ສຕິ, ເອສ ເອຕສ຺ສ ທຸຕິຍໍ ວາ ຕຕິຍໍ ວາ ຐານນ຺ຕຣໍ ກໂຣນ຺ໂຕ ປຣິຈາຣໂກ ຫຸຕ຺ວາ ນິພ຺ພຕ຺ຕິສ຺ສຕີ’ຕິ ປຊານາຕິ. ເຕສຸ ຈ ກມ຺ເມສຸ ‘ອິທໍ ກມ຺ມໍ ປຏິສນ຺ຘິໍ ອາກຑ຺ຒິຕຸໍ ນ ສກ຺ຂິສ຺ສຕິ, ທຸພ຺ພລໍ ທິນ຺ນາຍ ປຏິສນ຺ຘິຍາ ອຸປຘິເວປກ຺ກໍ ຠວິສ຺ສຕີ’ຕິ ປຊານາຕິ.

ຕຖາ ວິປສ຺ສນໍ ປຏ຺ຐເປນ຺ເຕສຸເຍວ ເຍນ ນີຫາເຣນ ວິປສ຺ສນາ ອາຣທ຺ຘາ, ‘ເອສ ອຣຫຕ຺ຕໍ ປາປຸຓິສ຺ສຕິ, ເອສ ອຣຫຕ຺ຕໍ ປຕ຺ຕຸໍ ນ ສກ຺ຂິສ຺ສຕິ, ເອສ ອນາຄາມີເຍວ ຠວິສ຺ສຕິ, ເອສ ສກທາຄາມີເຍວ, ເອສ ໂສຕາປນ຺ໂນເຍວ; ເອສ ປນ ມຄ຺ຄໍ ວາ ຜລໍ ວາ ສຈ຺ຉິກາຕຸໍ ນ ສກ຺ຂິສ຺ສຕິ, ລກ຺ຂຓາຣມ຺ມຓາຍ ວິປສ຺ສນາຍເມວ ຐສ຺ສຕິ; ເອສ ປຈ຺ຈຍປຣິຄ຺ຄເຫເຍວ, ເອສ ນາມຣູປປຣິຄ຺ຄເຫເຍວ, ເອສ ອຣູປປຣິຄ຺ຄເຫເຍວ, ເອສ ຣູປປຣິຄ຺ຄເຫເຍວ ຐສ຺ສຕິ, ເອສ ມຫາຠູຕມຕ຺ຕເມວ ວວຕ຺ຖາເປສ຺ສຕິ, ເອສ ກິຎ຺ຈິ ສລ຺ລກ຺ເຂຕຸໍ ນ ສກ຺ຂິສ຺ສຕີ’ຕິ ປຊານາຕິ.

ກສິຓປຣິກມ຺ມໍ ກໂຣນ຺ເຕສຸປິ ‘ເອຕສ຺ສ ປຣິກມ຺ມມຕ຺ຕເມວ ຠວິສ຺ສຕິ, ນິມິຕ຺ຕໍ ອຸປ຺ປາເທຕຸໍ ນ ສກ຺ຂິສ຺ສຕິ; ເອສ ປນ ນິມິຕ຺ຕໍ ອຸປ຺ປາເທຕຸໍ ສກ຺ຂິສ຺ສຕິ, ອປ຺ປນໍ ປາເປຕຸໍ ນ ສກ຺ຂິສ຺ສຕິ; ເອສ ອປ຺ປນໍ ປາເປຕ຺ວາ ຌານໍ ປາທກໍ ກຕ຺ວາ ວິປສ຺ສນໍ ປຏ຺ຐເປຕ຺ວາ ອຣຫຕ຺ຕໍ ຄຓ຺ຫິສ຺ສຕີ’ຕິ ປຊານາຕີຕິ.

ຕຕິຍພລນິທ຺ເທສວຓ຺ຓນາ.