ປຎ຺ຫາວາຣສ຺ສ ຆຏເນ ອນຸໂລມຄຓນາ

໔໓໙. ອິທາເນຕ຺ຖ ຍຖາລທ຺ຘານິ ວິສ຺ສຊ຺ຊນານິ ຄຓນາວເສນ ທສ຺ເສຕຸໍ ເຫຕຸຍາ ສຕ຺ຕາຕິອາທິ ວຸຕ຺ຕໍ. ຕຕ຺ຖ ສຕ຺ຕາຕິ ກຸສເລນ ກຸສລໍ, ອພ຺ຍາກຕໍ, ກຸສລາພ຺ຍາກຕນ຺ຕິ ຕີຓິ. ຕຖາ ອກຸສເລນ; ອພ຺ຍາກເຕນ ອພ຺ຍາກຕເມວາຕິ ເອວໍ ສຕ຺ຕ. ອາຣມ຺ມເຓ ນວາຕິ ເອກມູລກເອກາວສານານິ ນວ. ອຘິປຕິຍາ ທສາຕິ ກຸສລໍ ກຸສລສ຺ສ ສຫຊາຕໂຕ ເຈວ ອາຣມ຺ມຓໂຕ ຈ; ອກຸສລສ຺ສ ອາຣມ຺ມຓໂຕວ ອພ຺ຍາກຕສ຺ສ ສຫຊາຕໂຕ ເຈວ ອາຣມ຺ມຓໂຕ ຈ; ກຸສລາພ຺ຍາກຕສ຺ສ ສຫຊາຕໂຕວາຕິ ກຸສລມູລການິ ຈຕ຺ຕາຣິ. ອກຸສລໍ ອກຸສລສ຺ສ ສຫຊາຕໂຕ ເຈວ ອາຣມ຺ມຓໂຕ ຈ; ອພ຺ຍາກຕສ຺ສ ສຫຊາຕໂຕວ ຕຖາ ອກຸສລາພ຺ຍາກຕສ຺ສາຕິ ອກຸສລມູລການິ ຕີຓິ. ອພ຺ຍາກໂຕ ອພ຺ຍາກຕສ຺ສ ສຫຊາຕໂຕ ເຈວ ອາຣມ຺ມຓໂຕ ຈ; ກຸສລສ຺ສ ອາຣມ຺ມຓໂຕວ ຕຖາ ອກຸສລສ຺ສາຕິ ອພ຺ຍາກຕມູລການິ ຕີຓີຕິ ເອວໍ ທສ. ເອຕ຺ຖ ປນ ອາຣມ຺ມຓາຘິປຕິປິ ສຕ຺ຕຘາ, ສຫຊາຕາຘິປຕິປິ ສຕ຺ຕຘາວ ລພ຺ຠຕິ.

ອນນ຺ຕເຣ ສຕ຺ຕາຕິ ກຸສລມູລການິ ທ຺ເວ, ຕຖາ ອກຸສລມູລການິ, ອພ຺ຍາກຕມູລການິ ຕີຓີຕິ ເອວໍ ສຕ຺ຕ. ສມນນ຺ຕເຣປິ ເອຕາເນວ. ສຫຊາເຕ ນວາຕິ ກຸສລມູລການິ ຕີຓິ, ອກຸສລມູລການິ ຕີຓິ, ອພ຺ຍາກຕມູລກໍ ເອກໍ, ຕຖາ ກຸສລາພ຺ຍາກຕມູລກໍ, ອກຸສລາພ຺ຍາກຕມູລກຎ຺ຈາຕິ ເອວໍ ນວ. ອຎ຺ຎມຎ຺ເຎ ຕີຓີຕິ ກຸສເລນ ກຸສລໍ, ອກຸສເລນ ອກຸສລໍ, ອພ຺ຍາກເຕນ ອພ຺ຍາກຕນ຺ຕິ ເອວໍ ຕີຓິ. ນິສ຺ສເຍ ເຕຣສາຕິ ສຫຊາຕໂຕວ ກຸສລມູລການິ ຕີຓິ, ຕຖາ ອກຸສລມູລການິ, ຕຖາ ອພ຺ຍາກຕມູລການິ. ເອຕ຺ຖ ປນ ປຸເຣຊາຕມ຺ປິ ລພ຺ຠຕິ. ອພ຺ຍາກຕຎ຺ຫິ ອພ຺ຍາກຕສ຺ສ ສຫຊາຕມ຺ປິ ໂຫຕິ ປຸເຣຊາຕມ຺ປິ; ກຸສລສ຺ສ ປຸເຣຊາຕເມວ ຕຖາ ອກຸສລສ຺ສ. ປຸນ ກຸສລາພ຺ຍາກໂຕ ສຫຊາຕປຸເຣຊາຕໂຕ ກຸສລສ຺ສ, ສຫຊາຕໂຕວ ອພ຺ຍາກຕສ຺ສ, ຕຖາ ອກຸສລາພ຺ຍາກໂຕຕິ ເອວໍ ເຕຣສ. ອຸປນິສ຺ສເຍ ນວາຕິ ເອກມູລເກກາວສານາ ນວ. ເຕສໍ ວິຠງ຺ເຄ ເຕວີສຕິ ເຠທາ ທສ຺ສິຕາ. ເຕສຸ ອາຣມ຺ມຓູປນິສ຺ສເຍ ສຕ຺ຕ, ອນນ຺ຕຣູປນິສ຺ສເຍ ສຕ຺ຕ, ປກຕູປນິສ຺ສເຍ ນວ ໂຫນ຺ຕິ. ປຸເຣຊາເຕ ຕີຓີຕິ ອພ຺ຍາກໂຕ ອພ຺ຍາກຕສ຺ສ, ກຸສລສ຺ສ, ອກຸສລສ຺ສາຕິ ເອວໍ ຕີຓິ.

ປຈ຺ຉາຊາເຕ ຕີຓີຕິ ກຸສໂລ ອພ຺ຍາກຕສ຺ສ, ອກຸສໂລ ອພ຺ຍາກຕສ຺ສ, ອພ຺ຍາກໂຕ ອພ຺ຍາກຕສ຺ສາຕິ ເອວໍ ຕີຓິ. ອາເສວເນ ຕີຓິ ອຎ຺ຎມຎ຺ຎສທິສານິ. ກມ຺ເມ ສຕ຺ຕ ເຫຕຸສທິສານິ. ຕຕ຺ຖ ທ຺ວີສຸ ວິສ຺ສຊ຺ຊເນສຸ ນານາກ຺ຂຓິກກມ຺ມມ຺ປິ ອາຄຕໍ, ປຎ຺ຈສຸ ສຫຊາຕເມວ. ວິປາເກ ເອກໍ ອພ຺ຍາກເຕນ ອພ຺ຍາກຕໍ. ອາຫາຣອິນ຺ທ຺ຣິຍຌານມຄ຺ເຄສຸ ສຕ຺ຕ ເຫຕຸສທິສາເນວ. ອິນ຺ທ຺ຣິຍໍ ປເນຕ຺ຖ ສຫຊາຕປຸເຣຊາຕວເສນ ອາຄຕໍ. ສມ຺ປຍຸຕ຺ເຕ ຕີຓິ ອຎ຺ຎມຎ຺ຎສທິສານິ. ວິປ຺ປຍຸຕ຺ເຕ ປຎ຺ຈາຕິ ສຫຊາຕປຈ຺ຉາຊາຕໂຕ ກຸສເລນ ອພ຺ຍາກຕໍ, ອກຸສເລນ ອພ຺ຍາກຕໍ, ສຫຊາຕປຸເຣຊາຕປຈ຺ຉາຊາຕໂຕ ອພ຺ຍາກເຕນ ອພ຺ຍາກຕໍ, ວຕ຺ຖຸປຸເຣຊາຕໂຕ ອພ຺ຍາກເຕນ ກຸສລໍ, ຕຖາ ອກຸສລນ຺ຕິ ເອກໍ ກຸສລມູລໍ, ເອກໍ ອກຸສລມູລໍ, ຕີຓິ ອພ຺ຍາກຕມູລານີຕິ ເອວໍ ປຎ຺ຈ.

ອຕ຺ຖິຍາ ເຕຣສາຕິ ສຫຊາຕໂຕ ກຸສເລນ ກຸສລໍ, ສຫຊາຕປຈ຺ຉາຊາຕໂຕ ກຸສເລນ ອພ຺ຍາກຕໍ, ສຫຊາຕໂຕວ ກຸສເລນ ກຸສລາພ຺ຍາກຕນ຺ຕິ ກຸສລມູລານິ ຕີຓິ, ຕຖາ ອກຸສລມູລານິ, ສຫຊາຕປຸເຣຊາຕປຈ຺ຉາຊາຕາຫາຣິນ຺ທ຺ຣິຍໂຕ ປນ ອພ຺ຍາກເຕນ ອພ຺ຍາກຕໍ, ວຕ຺ຖາຣມ຺ມຓປຸເຣຊາຕໂຕ ອພ຺ຍາກເຕນ ກຸສລໍ, ຕຖາ ອກຸສລໍ, ສຫຊາຕປຸເຣຊາຕໂຕ ກຸສໂລ ຈ ອພ຺ຍາກໂຕ ຈ ອກຸສລສ຺ສ; ສ຺ເວວ ອພ຺ຍາກຕສ຺ສ ສຫຊາຕປຈ຺ຉາຊາຕອາຫາຣິນ຺ທ຺ຣິຍໂຕ ສຫຊາຕປຸເຣຊາຕໂຕ ຈ ກຸສໂລ ຈ ອພ຺ຍາກໂຕ ຈ ກຸສລສ຺ສ; ສ຺ເວວ ອພ຺ຍາກຕສ຺ສ ສຫຊາຕປຈ຺ຉາຊາຕອາຫາຣິນ຺ທ຺ຣິຍໂຕຕິ ເອວໍ ເຕຣສ. ນຕ຺ຖິວິຄເຕສຸ ສຕ຺ຕ ອນນ຺ຕຣສທິສານິ. ອວິຄເຕ ເຕຣສ ອຕ຺ຖິສທິສານີຕິ. ເອວເມຕ຺ຖ ສຕ຺ຕ ຄຓນປຣິຈ຺ເຉທາ ເອກໍ ຕີຓິ ປຎ຺ຈ ສຕ຺ຕ ນວ ທສ ເຕຣສາຕິ. ເຕສຸ ວິປາກວເສນ ເອກເມວ ເອກກໍ, ອຎ຺ຎມຎ຺ຎປຸເຣຊາຕປຈ຺ຉາຊາຕາເສວນສມ຺ປຍຸຕ຺ຕວເສນ ປຎ຺ຈ ຕິກາ, ວິປ຺ປຍຸຕ຺ຕວເສນ ເອກເມວ ປຎ຺ຈກໍ, ເຫຕຸອນນ຺ຕຣສມນນ຺ຕຣກມ຺ມອາຫາຣິນ຺ທ຺ຣິຍຌານມຄ຺ຄນຕ຺ຖິວິຄຕວເສນ ທສ ສຕ຺ຕກາ, ອາຣມ຺ມຓສຫຊາຕອຸປນິສ຺ສຍວເສນ ຕໂຍ ນວກາ, ອຘິປຕິວເສນ ເອກໍ ທສກໍ, ນິສ຺ສຍອຕ຺ຖິອວິຄຕວເສນ ຕໂຍ ເຕຣສກາຕິ ເອວໍ ຕສ຺ມິໍ ຕສ຺ມິໍ ປຈ຺ຈເຍ ນິທ຺ທິຏ຺ຐວາເຣ ຄຓນວເສນ ສາຘຸກໍ ສລ຺ລກ຺ເຂຕ຺ວາ ເຕສໍ ວເສນ ທຸກຕິກາທີສຸ ປຈ຺ຈຍສໍສນ຺ທເນ ຄຓນາ ເວທິຕພ຺ພາ.

໔໔໐. ເຍ ປນ ປຈ຺ຈຍາ ເຍສໍ ປຈ຺ຈຍານໍ ວິສຠາຄາ ວາ ວິຣຸທ຺ຘາ ວາ ໂຫນ຺ຕິ, ເຕ ເຕຫິ ສທ຺ຘິໍ ນ ໂຍເຊຕພ຺ພາ. ເສຍ຺ຍຖິທໍ – ເຫຕຸປຈ຺ຈຍສ຺ສ ຕາວ ອາຣມ຺ມຓານນ຺ຕຣສມນນ຺ຕຣູປນິສ຺ສຍປຸເຣຊາຕປຈ຺ຉາຊາຕກມ຺ມາເສວນາຫາຣຌານນຕ຺ຖິວິຄຕາ ອຘິປຕິປຈ຺ຈເຍ ຈ ຐເປຕ຺ວາ ວີມໍສໍ ເສສາຘິປຕິໂນ ວິສຠາຄາ, ສຫຊາຕາທໂຍ ສຠາຄາ. ກສ຺ມາ? ຕຖາ ຠາວາຠາວໂຕ. ເຫຕຸປຈ຺ຈໂຍ ຫິ ເຍສໍ ເຫຕຸປຈ຺ຈໂຍ ໂຫຕິ, ເຕສໍ ສຫຊາຕາທິປຈ຺ຈໂຍປິ ໂຫຕິ, ອາຣມ຺ມຓາທິປຈ຺ຈໂຍ ປນ ນ ໂຫຕີຕິ ອາຣມ຺ມຓາທໂຍ ຕສ຺ສ ວິສຠາຄາ ນາມ. ຕສ຺ມາ ໂສ ເຕຫິ, ເຕ ວາ ເຕນ ສທ຺ຘິໍ, ນ ໂຍເຊຕພ຺ພາ. ປຸເຣຊາຕປຈ຺ຉາຊາຕສມ຺ປຍຸຕ຺ຕວິປ຺ປຍຸຕ຺ຕອຕ຺ຖິນຕ຺ຖິວິຄຕາວິຄຕາ ຈ ອຎ຺ຎມຎ຺ຎວິຣຸທ຺ຘາ, ເຕປິ ອຎ຺ຎມຎ຺ຎໍ ນ ໂຍເຊຕພ຺ພາ. ຕຕ຺ຖ ອໂຍຊນີເຍ ວຊ຺ເຊຕ຺ວາ ໂຍຊນີເຍຫິ ໂຍເຄ ເຍ ວາຣາ ລພ຺ຠນ຺ຕິ, ເຕ ສງ຺ເຂປໂຕ ທສ຺ເສຕຸໍ ເຫຕຸປຈ຺ຈຍາ ອຘິປຕິຍາ ຈຕ຺ຕາຣີຕິອາທິ ວຸຕ຺ຕໍ.

ຕຕ຺ຖ ກິຎ຺ຈາປິ ເຫຕຸປຈ຺ຈຍສ຺ສ ອຘິປຕິນາ ສໍສນ຺ທເນ ອູນຕຣຄຓນວເສນ ສຕ຺ຕຫິ ວາເຣຫິ ຠວິຕພ຺ພໍ, ຍສ຺ມາ ປນ ອຘິປຕີສຸ ວີມໍສາວ ເຫຕຸປຈ຺ຈໂຍ, ນ ອິຕເຣ, ຕສ຺ມາ ວິສຠາເຄ ວຊ຺ເຊຕ຺ວາ ສຠາຄວເສນ ‘‘ຈຕ຺ຕາຣີ’’ຕິ ວຸຕ຺ຕໍ. ຕານິ ເອວໍ ເວທິຕພ຺ພານິ – ກຸສໂລ ຘມ຺ໂມ ກຸສລສ຺ສ ຘມ຺ມສ຺ສ ເຫຕຸປຈ຺ຈເຍນ ປຈ຺ຈໂຍ ອຘິປຕິປຈ຺ຈເຍນ ປຈ຺ຈໂຍ; ກຸສລາ ວີມໍສາ ສມ຺ປຍຸຕ຺ຕການໍ ຂນ຺ຘານໍ, ກຸສໂລ ຘມ຺ໂມ ອພ຺ຍາກຕສ຺ສ ຘມ຺ມສ຺ສ ເຫຕຸປຈ຺ຈເຍນ ປຈ຺ຈໂຍ ອຘິປຕິປຈ຺ຈເຍນ ປຈ຺ຈໂຍ; ກຸສລາ ວີມໍສາ ຈິຕ຺ຕສມຸຏ຺ຐານານໍ ຣູປານໍ, ກຸສໂລ ຘມ຺ໂມ ກຸສລສ຺ສ ຈ ອພ຺ຍາກຕສ຺ສ ຈ ຘມ຺ມສ຺ສ ເຫຕຸປຈ຺ຈເຍນ ປຈ຺ຈໂຍ ອຘິປຕິປຈ຺ຈເຍນ ປຈ຺ຈໂຍ; ກຸສລາ ວີມໍສາ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ, ອພ຺ຍາກໂຕ ຘມ຺ໂມ ອພ຺ຍາກຕສ຺ສ ຘມ຺ມສ຺ສ ເຫຕຸປຈ຺ຈເຍນ ປຈ຺ຈໂຍ ອຘິປຕິປຈ຺ຈເຍນ ປຈ຺ຈໂຍ; ວິປາກາພ຺ຍາກຕາ ກິຣິຍາພ຺ຍາກຕາ ວີມໍສາ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານນ຺ຕິ. ເອຕ຺ຖ ຈ ວິປາກາພ຺ຍາກຕາ ໂລກຸຕ຺ຕຣໂຕວ ຄເຫຕພ຺ພາ. ອາຣມ຺ມຓປຈ຺ຈຍອນນ຺ຕຣປຈ຺ຈຍາທໂຍ ປນ ວິສຠາຄຕ຺ຕາ ນ ໂຍຊິຕາ. ອິມິນາ ອຸປາເຍນ ສພ຺ພຕ຺ຖ ລພ຺ຠມານຎ຺ຈ ອລພ຺ຠມານຎ຺ຈ ຎຕ຺ວາ ລພ຺ຠມານວເສນ ວາຣາ ອຸທ຺ຘຣິຕພ຺ພາ.

ສຫຊາເຕ ສຕ຺ຕາຕິ ເຫຕຸຍາ ລທ຺ຘາເນວ. ອຎ຺ຎມຎ຺ເຎ ຕີຓີຕິ ສຸທ຺ຘິກອຎ຺ຎມຎ຺ເຎ ລທ຺ຘາເນວ. ນິສ຺ສເຍ ສຕ຺ຕາຕິ ເຫຕຸຍາ ລທ຺ຘາເນວ. ວິປາເກ ເອກນ຺ຕິ ສຸທ຺ຘິກວິປາເກ ລທ຺ຘເມວ. ອິນ຺ທ຺ຣິຍມຄ຺ເຄສຸ ຈຕ຺ຕາຣີຕິ ເຫຏ຺ຐາ ວຸຕ຺ຕນຍາເນວ. ສມ຺ປຍຸຕ຺ເຕ ຕີຓີຕິ ສຸທ຺ຘິກສມ຺ປຍຸຕ຺ເຕ ລທ຺ຘາເນວ. ວິປ຺ປຍຸຕ຺ເຕ ຕີຓີຕິ ກຸສລາທິຈິຕ຺ຕສມຸຏ຺ຐານໍ ຣູປໍ ປຈ຺ຈຍຸປ຺ປນ຺ນໍ ກຕ຺ວາ ເວທິຕພ຺ພານິ. ອຕ຺ຖິອວິຄເຕສຸ ສຕ຺ຕາຕິ ເຫຕຸຍາ ລທ຺ຘາເນວ.

໔໔໑-໔໔໓. ເອວໍ ເຍຫິ ອຘິປຕິປຈ຺ຈຍາທີຫິ ເອກາທສຫິ ປຈ຺ຈເຍຫິ ສທ຺ຘິໍ ເຫຕຸປຈ຺ຈໂຍ ໂຍຊນໍ ລຠຕິ, ເຕສໍ ວເສນ ທຸມູລກນເຍ ຄຓນໍ ທສ຺ເສຕ຺ວາ ອິທານິ ຕິມູລກາທີສຸ ຕສ຺ສ ທສ຺ສນຕ຺ຖໍ ລກ຺ຂຓໍ ຐເປນ຺ໂຕ ເຫຕຸສຫຊາຕນິສ຺ສຍອຕ຺ຖິອວິຄຕນ຺ຕິ ສຕ຺ຕາຕິອາທິມາຫ. ໂປຕ຺ຖເກສຸ ປນ ນິສ຺ສອຸປນິສ຺ສອຘິປາຕິ ເອວໍ ປຣິຫີນກ຺ຂຣານິ ປຈ຺ຈຍນາມານິ ລິຂນ຺ຕິ, ຕໍ ສຎ຺ຎາກຣຓມຕ຺ຕວເສນ ລິຂິຕໍ. ຕສ຺ມາ ຕາທິເສສຸ ຐາເນສຸ ປຣິປຸຓ຺ຓາ ປາຬິ ກາຕພ຺ພາ. ຍໍ ປນິທໍ ລກ຺ຂຓໍ ຐປິຕໍ, ເຕນ ອິທໍ ທີເປຕິ – ອຍໍ ເຫຕຸປຈ຺ຈໂຍ ສຫຊາຕາທີຫິ ຈຕູຫິ ສທ຺ຘິໍ ສໍສນ຺ທເນ ອຕ຺ຕໂນ ວິຠງ຺ເຄ ລທ຺ຘານິ ສຕ຺ເຕວ ວິສ຺ສຊ຺ຊນານິ ລຠຕິ. ສເຈ ປເນຕ຺ຖ ອຎ຺ຎມຎ຺ຎປຈ຺ຈໂຍ ປວິສຕິ, ອຎ຺ຎມຎ຺ເຎ ລທ຺ຘານິ ຕີຓິ ລຠຕິ. ສເຈ ສມ຺ປຍຸຕ຺ຕປຈ຺ຈໂຍ ປວິສຕິ, ຕາເນວ ຕີຓິ ລຠຕິ. ສເຈ ວິປ຺ປຍຸຕ຺ຕປຈ຺ຈໂຍ ປວິສຕິ, ເຫຕຸວິປ຺ປຍຸຕ຺ຕທຸເກ ລທ຺ຘານິ ຕີຓິ ລຠຕິ. ສເຈ ວິປາກປຈ຺ຈໂຍ ປວິສຕິ, ສພ຺ເພຫິ ວິປາກສຠາເຄຫິ ສທ຺ຘິໍ ສໍສນ຺ທເນ ເອວເມວ ວິສ຺ສຊ຺ຊນໍ ລຠຕິ. ສເຈ ປເນຕ຺ຖ ອິນ຺ທ຺ຣິຍມຄ຺ຄປຈ຺ຈຍາ ປວິສນ຺ຕິ, ເຕຫິ ສທ຺ຘິໍ ທຸມູລເກ ລທ຺ຘານິ ຈຕ຺ຕາຣິເຍວ ລຠຕິ. ສເຈ ເຕຫິ ສທ຺ຘິໍ ອຎ຺ຎມຎ຺ຎປຈ຺ຈໂຍ ປວິສຕິ, ເຫຕາຘິປຕິທຸເກ ທສ຺ສິເຕສຸ ຈຕູສຸ ວິສ຺ສຊ຺ຊເນສຸ ‘‘ກຸສໂລ ຘມ຺ໂມ ອພ຺ຍາກຕສ຺ສ, ກຸສໂລ ຘມ຺ໂມ ກຸສລສ຺ສ ຈ ອພ຺ຍາກຕສ຺ສ ຈາ’’ຕິ ທ຺ເວ ອປເນຕ຺ວາ ເສສານິ ທ຺ເວ ລຠຕິ. ສເຈປິ ຕຕ຺ຖ ສມ຺ປຍຸຕ຺ຕປຈ຺ຈໂຍ ປວິສຕິ, ຕາເນວ ທ຺ເວ ລຠຕິ. ສເຈ ປນ ວິປ຺ປຍຸຕ຺ຕປຈ຺ຈໂຍ ປວິສຕິ, ອິຕຣານິ ທ຺ເວ ລຠຕິ. ສເຈ ປນ ເຕສຸ ວິປາກປຈ຺ຈໂຍ ປວິສຕິ, ສພ຺ພຕ຺ຖ ເອກເມວ ລຠຕິ. ອຘິປຕິນາ ປນ ສທ຺ຘິໍ ເຫຕາຘິປຕິທຸກໂຕ ອູນຕຣຄຓເນສຸ ອປ຺ປວິສນ຺ເຕສຸ ຈຕ຺ຕາຣິເຍວ ລຠຕິ. ອູນຕຣຄຓເນສຸ ປວິສນ຺ເຕສຸ ເຕສໍ ວເສນ ທ຺ເວ ເອກນ຺ຕິ ລຠຕິ. ເອວໍ ເຕສໍ ເຕສໍ ປຈ຺ຈຍານໍ ສມາໂຍເຄ ລພ຺ຠມານໍ ຄຓນໍ ວິທິຕ຺ວາ ຕິມູລກາທີສຸ ຄຓນາ ອຸທ຺ຘຣິຕພ຺ພາຕິ.

ເອເຕສຸ ປນ ຆຏເນສຸ ສພ຺ພປຐມານິ ຈຕ຺ຕາຣິ ຆຏນານິ ສາມຎ຺ຎໂຕ ນວນ຺ນມ຺ປິ ເຫຕູນໍ ວເສນ ວຸຕ຺ຕານິ ອວິປາການິ. ອພ຺ຍາກເຕນ ອພ຺ຍາກຕວິສ຺ສຊ຺ຊເນ ປເນຕ຺ຖ ວິປາກເຫຕຸປິ ລພ຺ຠຕິ.

ຕໂຕ ປຣານິ ປຎ຺ຈ ຆຏນານິ ວິປາກເຫຕຸວເສນ ວຸຕ຺ຕານິ. ຕຕ຺ຖ ສພ຺ເພປິ ສຫຊາຕວິປາກາ ເຈວ ວິປາກສຫຊາຕຣູປາ ຈ. ເຕສຸ ປຐເມ ຆຏເນ ວິປາກາ ເຈວ ຕໍສມຸຏ຺ຐານຣູປາ ຈ ລພ຺ຠນ຺ຕິ, ທຸຕິເຍ ວິປາກາ ເຈວ ປຏິສນ຺ຘິຍຎ຺ຈ ວຕ຺ຖຸຣູປໍ. ຕຕິເຍ ອຣູປຘມ຺ມາວ. ຈຕຸຕ຺ເຖ ວິປາກຈິຕ຺ຕສມຸຏ຺ຐານຣູປເມວ ລພ຺ຠຕິ. ປຎ຺ຈເມ ວຕ຺ຖຸຣູປເມວ.

ຕໂຕ ປຣານິ ປຎ຺ຈທສ ຆຏນານິ ອິນ຺ທ຺ຣິຍມຄ຺ຄຍຸຕ຺ຕານິ ອໂມຫເຫຕຸວເສນ ວຸຕ຺ຕານິ. ຕຕ຺ຖ ປຐມານິ ນວ ນິຣາຘິປຕີນິ, ປຈ຺ຉິມານິ ຉ ສາຘິປຕີນິ. ນິຣາຘິປຕິເກສຸປິ ປຐມານິ ຈຕ຺ຕາຣິ ສາມຎ຺ຎໂຕ ສພ຺ພຕ຺ຖ ອໂມຫວເສນ ວຸຕ຺ຕານິ, ປຈ຺ຉິມານິ ປຎ຺ຈ ວິປາກາໂມຫວເສນ. ຕຕ຺ຖ ນິຣາຘິປຕິເກສຸ ປຐເມ ຈຕ຺ຕາຣີຕິ ເຫຏ຺ຐາ ເຫຕາຘິປຕິທຸເກ ທສ຺ສິຕາເນວ. ທຸຕິເຍ ຈິຕ຺ຕສມຸຏ຺ຐານຣູປໍ ປຣິຫາຍຕິ. ຕຕິເຍ ວຕ຺ຖຸຣູປໍ ປຣິຫາຍຕິ. ຈຕຸຕ຺ເຖ ກຸສໂລ ຘມ຺ໂມ ຈິຕ຺ຕສມຸຏ຺ຐານານໍ, ອພ຺ຍາກໂຕ ຕໍສມຸຏ຺ຐານານນ຺ຕິ ຣູປເມວ ລພ຺ຠຕິ. ຕໂຕ ປຣານິ ວິປາກຍຸຕ຺ຕານິ ປຎ຺ຈ ເຫຏ຺ຐາ ວຸຕ຺ຕນຍາເນວ. ສາຘິປຕິເກສຸ ປຐມານິ ຕີຓິ ຆຏນານິ ສາມຎ຺ຎໂຕ ວິປາກາວິປາກເຫຕຸວເສນ ວຸຕ຺ຕານິ. ເຕສຸ ປຐເມ ຈຕ຺ຕາຣິ ວຸຕ຺ຕນຍາເນວ. ທຸຕິເຍ ຣູປໍ ປຣິຫາຍຕິ, ຕຕິເຍ ອຣູປໍ ປຣິຫາຍຕິ. ຕໂຕ ປຣານິ ຕີຓິ ວິປາກເຫຕຸວເສນ ວຸຕ຺ຕານິ. ເຕສຸ ປຐເມ ຣູປາຣູປໍ ລພ຺ຠຕິ, ທຸຕິເຍ ອຣູປເມວ, ຕຕິເຍ ຣູປເມວ. ເອວມ຺ປິ ເຕສໍ ເຕສໍ ປຈ຺ຈຍານໍ ສມາໂຍເຄ ລພ຺ຠມານໍ ຄຓນໍ ວິທິຕ຺ວາ ຕິມູລກາທີສຸ ຄຓນາ ອຸທ຺ຘຣິຕພ຺ພາຕິ.

ເຫຕຸມູລກໍ ນິຏ຺ຐິຕໍ.

໔໔໔. ອາຣມ຺ມຓມູລເກປິ ອຘິປຕິປຈ຺ຈຍາທໂຍ ສຕ຺ຕ ອາຣມ຺ມເຓນ ສຠາຄາ, ເສສາ ໂສຬສ ວິສຠາຄາຕິ ເຕ ອໂຍເຊຕ຺ວາ ສຕ຺ເຕວ ໂຍຊິຕາ. ເຕສຸ ອຘິປຕິຍາ ສຕ຺ຕາຕິ ກຸສໂລ ຘມ຺ໂມ ກຸສລສ຺ສ ຘມ຺ມສ຺ສ, ອກຸສລສ຺ສ ຘມ຺ມສ຺ສ, ອພ຺ຍາກຕສ຺ສາຕິ ເອວໍ ກຸສລມູລານິ ຕີຓິ, ອກຸສລມູລໍ ເອກໍ, ອພ຺ຍາກຕມູລານິ ຕີຓີຕິ ສຕ຺ຕ. ນິສ຺ສເຍ ຕີຓີຕິ ວຕ຺ຖຸວເສນ ອພ຺ຍາກຕມູລາເນວ. ອຸປນິສ຺ສເຍ ສຕ຺ຕ ເຫຏ຺ຐິມານິ ເອວ. ປຸເຣຊາເຕ ຕີຓີຕິ ວຕ຺ຖາຣມ຺ມຓວເສນ ອພ຺ຍາກຕມູລານິ. ວິປ຺ປຍຸຕ຺ເຕ ຕີຓີຕິ ວຕ຺ຖຸວເສເນວ. ອຕ຺ຖິອວິຄເຕສຸ ຕີຓີຕິ ວຕ຺ຖາຣມ຺ມຓວເສນ. ຍຖາ ປນ ເຫຕຸມູລເກ ລກ຺ຂຓທສ຺ສນຕ຺ຖໍ ຆຏນານິ ຐປິຕານິ, ຕຖາ ອາຣມ຺ມຓມູລກາທີສຸປິ.

໔໔໕. ຕຕ຺ຖ ຍານິ ຕາວ ອິມສ຺ມິໍ ອາຣມ຺ມຓມູລເກ ປຎ຺ຈ ຆຏນານິ ຐປິຕານິ. ຕຕ຺ຖ ປຐມໍ ອາຣມ຺ມຓາຘິປຕິວເສນ ສາຘິປຕິກໍ. ຕຕ຺ຖ ສຕ຺ຕາຕິ ອາຣມ຺ມຓາຘິປຕິທຸເກ ລທ຺ຘວິສ຺ສຊ຺ຊນາເນວ. ທຸຕິຍໍ ນິຣາຘິປຕິກໍ. ຕຕ຺ຖ ຕີຓີຕິ ວຕ຺ຖາຣມ຺ມຓວເສນ ອາຣມ຺ມຓວເສເນວ ວາ ອພ຺ຍາກຕມູລານິ. ຕຕິຍໍ ນິສ຺ສເຍນ ວຸຕ຺ຕໍ. ຕຕ຺ຖ ຕີຓີຕິ ວຕ຺ຖຸວເສນ ອພ຺ຍາກຕມູລານິ. ຈຕຸຕ຺ຖປຎ຺ຈມານິ ສາຘິປຕິການິ. ເຕສຸ ຈຕຸຕ຺ເຖ ເອກນ຺ຕິ ວຕ຺ຖາຣມ຺ມຓວເສນ ອາຣມ຺ມຓວເສເນວ ວາ ອພ຺ຍາກຕມູລໍ ອກຸສລໍ. ປຎ຺ຈເມ ເອກນ຺ຕິ ນິສ຺ສຍໂຕ ອພ຺ຍາກຕມູລກໍ ອກຸສລໍ. ເອວມິຘາປິ ລພ຺ຠມານວເສນ ຕິກາທີສຸ ຄຓນາ ເວທິຕພ຺ພາ. ຕຖາ ອຘິປຕິມູລກາທີສຸ. ອາຣມ຺ມຓອິນ຺ທ຺ຣິຍວິປາກວເສນ ວິຕ຺ຖາຣໂຍຊນໍ ປນ ອວຕ຺ວາ ຕຕ຺ຖ ຕຕ຺ຖ ວຕ຺ຕພ຺ພຍຸຕ຺ຕກເມວ ວທາມາຕິ.

໔໔໖. ອຘິປຕິມູລເກ ສຫຊາເຕ ສຕ຺ຕາຕິ ສຫຊາຕາຘິປຕິວເສນ ກຸສລມູລານິ ຕີຓິ, ອກຸສລມູລານິ ຕີຓິ, ອພ຺ຍາກຕມູລໍ ເອກໍ. ສຫຊາເຕນ ປນ ສທ຺ຘິໍ ອາຣມ຺ມຓາຘິປຕິ, ອາຣມ຺ມຓາຘິປຕິນາ ຈ ສທ຺ຘິໍ ສຫຊາຕໍ ນ ລພ຺ຠຕິ. ອຎ຺ຎມຎ຺ເຎ ຕີຓີຕິ ສຫຊາຕາຘິປຕິວເສເນວ. ນິສ຺ສເຍ ອຏ຺ຐາຕິ ກຸສລມູລານິ ຕີຓິ, ອກຸສລມູລານິ ຕີຓິ, ອພ຺ຍາກຕມູລານິ ທ຺ເວ. ອພ຺ຍາກໂຕ ຫິ ອຘິປຕິ ອພ຺ຍາກຕສ຺ສ ສຫຊາຕໂຕ ເຈວ ອາຣມ຺ມຓໂຕ ຈ ນິສ຺ສໂຍ ໂຫຕິ, ອກຸສລສ຺ສ ອາຣມ຺ມຓໂຕວ. ກຸສລສ຺ສ ປນ ອຸຠຍຖາປິ ນ ໂຫຕີຕິ ອພ຺ຍາກຕມູລານິ ທ຺ເວເຍວາຕິ ເອວໍ ອຏ຺ຐ. ອຸປນິສ຺ສເຍ ສຕ຺ຕ ອາຣມ຺ມຓສທິສາເນວ. ປຸເຣຊາເຕ ເອກນ຺ຕິ ອພ຺ຍາກຕາຘິປຕິ ອາຣມ຺ມຓວເສນ ອກຸສລສ຺ສ. ວິປາເກ ເອກໍ ອພ຺ຍາກເຕນ ອພ຺ຍາກຕໍ ໂລກຸຕ຺ຕຣໍ. ອາຫາຣາທີສຸ ສຕ຺ຕ ເຫຏ຺ຐາ ເອກມູລເກ ລທ຺ຘາເນວ. ວິປ຺ປຍຸຕ຺ເຕ ຈຕ຺ຕາຣີຕິ ກຸສເລນ ອພ຺ຍາກຕໍ, ຕຖາ ອກຸສເລນ, ອພ຺ຍາກເຕນ ອພ຺ຍາກຕຎ຺ຈ ກຸສລຎ຺ຈ. ອຕ຺ຖິອວິຄເຕສຸ ອຏ຺ຐ ນິສ຺ສຍສທິສາເນວ.

໔໔໗-໔໕໒. ຆຏນານິ ປເນຕ຺ຖ ປຏິປາຏິຍາ ອາຣມ຺ມຓາທີຫິ ອໂຍເຊຕ຺ວາ ປຐມໍ ອຕ຺ຖິອວິຄເຕຫິ ໂຍຊິຕານິ. ກິໍ ກາຣຓາຕິ? ອຸຠຍາຘິປຕິມິສ຺ສກຕ຺ຕາ. ຕຕ຺ຖ ປຐເມ ຆຏເນ ອາຣມ຺ມຓາຘິປຕິວເສນ ວຕ຺ຖາຣມ຺ມຓໍ ລພ຺ຠຕິ, ທຸຕິເຍ ນິສ຺ສຍວເສນ ຄຣຸໍ ກຕ຺ວາ ອສ຺ສາເທນ຺ຕສ຺ສ ວຕ຺ຖຸເມວ, ຕຕິເຍ ສຫຊາຕາຘິປຕິວເສນ ກຸສລາທໂຍ ຣູປານໍ, ອາຣມ຺ມຓາຘິປຕິວເສນ ວຕ຺ຖຸ ອກຸສລສ຺ສ. ຕໂຕ ປຣານິ ຕີຓິ ຆຏນານິ ອາຣມ຺ມຓາຘິປຕິວເສນ ວຸຕ຺ຕານິ. ຕຕ຺ຖ ປຐເມ ສຕ຺ຕາຕິ ເຫຏ຺ຐາ ວຸຕ຺ຕາເນວ. ທຸຕິເຍ ເອກນ຺ຕິ ປຸເຣຊາຕານິ ວຕ຺ຖາຣມ຺ມຓານິ ອກຸສລສ຺ສ. ຕຕິເຍ ວຕ຺ຖຸເມວ ອກຸສລສ຺ສ. ຕໂຕ ປຣານິ ຕີຓິ ຆຏນານິ ວິປາກາວິປາກສາຘາຣຓານິ ສຫຊາຕາຘິປຕິວເສນ ວຸຕ຺ຕານິ. ຕຕ຺ຖ ປຐເມ ຣູປາຣູປໍ ລພ຺ຠຕິ, ທຸຕິເຍ ອຣູປເມວ, ຕຕິເຍ ຣູປເມວ. ຕໂຕ ປຣານິ ຕີຓິ ວິປາກາຘິປຕິວເສນ ວຸຕ຺ຕານິ. ເຕສຸປິ ປຐເມ ຣູປາຣູປໍ ລພ຺ຠຕິ, ທຸຕິເຍ ອຣູປໍ, ຕຕິເຍ ຣູປເມວ. ຕໂຕ ປຣານິ ຉ ຆຏນານິ ອາຫາຣິນ຺ທ຺ຣິຍຍຸຕ຺ຕານິ ຈິຕ຺ຕາຘິປຕິວເສນ ວຸຕ຺ຕານິ. ຕຕ຺ຖ ຕີຓິ ອວິປາການິ, ຕີຓິ ສວິປາການິ. ເຕສຸ ຄຓນາ ປາກຏາເຍວ. ຕໂຕ ປຣານິ ຉ ຆຏນານິ ຕເຖວ ວິຣິຍາຘິປຕິວເສນ ວຸຕ຺ຕານິ. ນນຸ ຈ ອຘິປຕິປຏິປາຏິຍາ ປຐມໍ ວິຣິຍາຘິປຕິວເສນ ວຕ຺ຕພ຺ພານິ ສິຍຸໍ, ກສ຺ມາ ຕຖາ ນ ວຸຕ຺ຕານີຕິ? ປຣໂຕ ເຫຕຸວເສນ ວຸຕ຺ຕຆຏເນຫິ ສທິສຕ຺ຕາ. ປຣໂຕ ຫິ ເຫຕຸວເສນ ຆຏນານິ ອໂມຫສ຺ສ ວີມໍສາຘິປຕິຕ຺ຕາ ວີມໍສາຍ ຈ ສມ຺ມາທິຏ຺ຐິຠາວໂຕ ມຄ຺ຄສມ຺ປຍຸຕ຺ຕານິ. ວິຣິຍມ຺ປິ ຈ ສມ຺ມາວາຍາມມິຈ຺ຉາວາຍາມຠາເວນ ມຄ຺ໂຄຕິ ເຕນ ສທ຺ຘິໍ ຆຏນານິ ປຣໂຕ ເຫຕຸວເສນ ວຸຕ຺ຕຆຏເນຫິ ສທິສານີຕິ ປຣິວຕ຺ເຕຕ຺ວາ ວຸຕ຺ຕານິ. ເຕສຸປິ ຄຓນາ ປາກຏາເຍວ.

໔໕໓-໔໕໖. ອນນ຺ຕຣສມນນ຺ຕຣມູລເກສຸ ສຕ຺ຕາຕິ ກຸສໂລ ກຸສລສ຺ສ ອພ຺ຍາກຕສ຺ສ ຈ, ຕຖາ ອກຸສໂລ, ອພ຺ຍາກໂຕ ຕິຓ຺ຓນ຺ນມ຺ປີຕິ ເອວໍ ສຕ຺ຕ. ກມ຺ເມ ເອກນ຺ຕິ ກຸສລາ ມຄ຺ຄເຈຕນາ ອຕ຺ຕໂນ ວິປາກາພ຺ຍາກຕສ຺ສ. ຆຏນານິ ປເນເຕສຸ ຕີຓິ ຕີຓິເຍວ. ຕານິ ພຫຸຕຣປຏິປາຏິຍາ ວຸຕ຺ຕານິ.

໔໕໗-໔໖໐. ສຫຊາຕອຎ຺ຎມຎ຺ຎນິສ຺ສຍມູລເກສຸ ເຍ ເຍ ທຸກມູລເກ ປຈ຺ຈຍາ ວຸຕ຺ຕາ ເຕ ເຕເຍວ ອາທິໂຕ ຐິເຕນ ສຠາຄາ. ຕສ຺ມາ ທຸກມູລເກ ຄຓນໍ ຎຕ຺ວາ ເຍ ອຸປຣິ ປຈ຺ຈຍາ ຆຏິຕາ, ເຕສຸ ອູນຕຣຄຓນສ຺ສ ວເສນ ສພ຺ພຆຏເນສຸ ຄຓນາ ເວທິຕພ຺ພາ. ຕຕ຺ຖ ສຫຊາຕມູລເກ ທສ ຆຏນານິ. ເຕສຸ ປຎ຺ຈ ອວິປາການິ, ປຎ຺ຈ ສວິປາການິ. ຕຕ຺ຖ ອວິປາເກສຸ ຕາວ ປຐເມ ກຸສໂລ ກຸສລສ຺ສ ອພ຺ຍາກຕສ຺ສ, ກຸສລາພ຺ຍາກຕສ຺ສ, ກຸສລາພ຺ຍາກໂຕ ອພ຺ຍາກຕສ຺ສາຕິ ຈຕ຺ຕາຣິ, ຕຖາ ອກຸສໂລ, ອພ຺ຍາກໂຕ ອພ຺ຍາກຕສ຺ເສວາຕິ ເອວໍ ນວ. ຕຕ຺ຖ ກຸສລາກຸສລາທິເກສຸ ອຏ຺ຐສຸ ວິສ຺ສຊ຺ຊເນສຸ ອຣູປຎ຺ເຈວ ຈິຕ຺ຕສມຸຏ຺ຐານຣູປຎ຺ຈ ລພ຺ຠຕິ. ອພ຺ຍາກເຕ ວຕ຺ຖຸຣູປມ຺ປິ. ທຸຕິເຍ ຆຏເນ ອພ຺ຍາກຕວິສ຺ສຊ຺ຊເນ ຣູເປສຸ ວຕ຺ຖຸເມວ ລພ຺ຠຕິ, ຕຕິເຍ ຕີສຸປິ ອຣູປເມວ, ຈຕຸຕ຺ເຖ ຈິຕ຺ຕສມຸຏ຺ຐານຣູປເມວ, ປຎ຺ຈເມ ປຏິສນ຺ຘິຍໍ ວຕ຺ຖຸນາ ສທ຺ຘິໍ ອຣູປຘມ຺ມາ. ສວິປາເກສຸ ປຐເມ ວິປາກາ ເຈວ ວິປາກຈິຕ຺ຕສມຸຏ຺ຐານຣູປຎ຺ຈ, ທຸຕິເຍ ວິປາກາ ເຈວ ວຕ຺ຖຸຣູປຎ຺ຈ, ຕຕິເຍ ວິປາກເມວ, ຈຕຸຕ຺ເຖ ວິປາກຈິຕ຺ຕສມຸຏ຺ຐານເມວ, ປຎ຺ຈເມ ວຕ຺ຖຸຣູປເມວ ລພ຺ຠຕິ.

ອຎ຺ຎມຎ຺ຎມູລເກ ຉ ຆຏນານິ. ເຕສຸ ປຐມານິ ຕີຓິ ອວິປາການິ, ປຈ຺ຉິມານິ ຕີຓິ ສວິປາການິ. ເຕສຸ ຄຓນາ ປາກຏາເຍວ.

໔໖໑. ນິສ຺ສຍມູລເກ ນິສ຺ສຍປຈ຺ຈຍາ ອາຣມ຺ມເຓ ຕີຓີຕິ ວຕ຺ຖຸໍ ອາຣມ຺ມຓໍ ກຕ຺ວາ ປວຕ຺ຕກຸສລາທິວເສນ ເວທິຕພ຺ພານິ. ອຸປນິສ຺ສເຍ ເອກນ຺ຕິ ວຕ຺ຖຸໍ ອາຣມ຺ມຓູປນິສ຺ສຍໍ ກຕ຺ວາ ອຸປ຺ປນ຺ນາກຸສລໍ. ເສສໍ ທຸມູລເກ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ.

໔໖໒-໔໖໔. ອິມສ຺ມິໍ ປນ ນິສ຺ສຍປຈ຺ຈເຍ ວີສຕິ ຆຏນານິ. ເຕສຸ ປຸຣິມານິ ຉ ຆຏນານິ ປຸເຣຊາຕສຫຊາຕວເສນ ວຸຕ຺ຕານິ, ຕໂຕ ຈຕ຺ຕາຣິ ປຸເຣຊາຕວເສເນວ, ຕໂຕ ທສ ສຫຊາຕວເສເນວ. ຕຕ຺ຖ ປຐເມ ຆຏເນ ເຕຣສາຕິ ນິສ຺ສຍປຈ຺ຈຍວິຠງ຺ເຄ ວຸຕ຺ຕາເນວ. ທຸຕິເຍ ອຏ຺ຐາຕິ ສຫຊາຕາຘິປຕິວເສນ ສຕ຺ຕ, ວຕ຺ຖຸໍ ຄຣຸໍ ກຕ຺ວາ ອກຸສລຎ຺ຈາຕິ ອຏ຺ຐ. ຕຕິເຍ ສຕ຺ຕ ອິນ຺ທ຺ຣິຍປຈ຺ຈເຍ ລທ຺ຘາເນວ. ຈຕຸຕ຺ເຖ ປຎ຺ຈ ວິປ຺ປຍຸຕ຺ເຕ ລທ຺ຘານິ. ປຎ຺ຈເມ ຈຕ຺ຕາຣີຕິ ກຸສລາທີນິ ຈິຕ຺ຕສມຸຏ຺ຐານານໍ, ວຕ຺ຖຸ ຈ ອກຸສລສ຺ສ. ຉຏ຺ເຐ ຕີຓີຕິ ກຸສລາທີນິ ຈິຕ຺ຕສມຸຏ຺ຐານສ຺ສ. ປຸເຣຊາຕວເສນ ຈຕູສຸ ປຐເມ ຕີຓີຕິ ວຕ຺ຖຸ ກຸສລາທີນໍ, ຈກ຺ຂາທີນິ ຈ ອພ຺ຍາກຕສ຺ສ. ທຸຕິເຍ ວຕ຺ຖຸເມວ ກຸສລາທີນໍ. ຕຕິເຍ ເອກນ຺ຕິ ວຕ຺ຖຸ ອກຸສລສ຺ສ. ຈຕຸຕ຺ເຖ ຈກ຺ຂາທີນິ ວິຎ຺ຎາຓປຎ຺ຈກສ຺ສ. ສຫຊາຕວເສນ ທສ ສວິປາກາວິປາກວເສນ ທ຺ວິຘາ ຠິນ຺ທິຕ຺ວາ ສຫຊາຕມູລເກ ວຸຕ຺ຕນເຍເນວ ເວທິຕພ຺ພານິ.

໔໖໕. ອຸປນິສ຺ສຍມູລເກ ອາຣມ຺ມເຓ ສຕ຺ຕາຕິ ອາຣມ຺ມຓູປນິສ຺ສເຍ ລທ຺ຘາເນວ. ອຘິປຕິຍາ ສຕ຺ຕາຕິ ຕາເນວ. ອນນ຺ຕຣສມນນ຺ຕເຣສຸ ອນນ຺ຕຣູປນິສ຺ສເຍ ລທ຺ຘາເນວ. ນິສ຺ສເຍ ເອກນ຺ຕິ ວຕ຺ຖຸ ອກຸສລສ຺ສ. ປຸເຣຊາເຕ ເອກນ຺ຕິ ຕສ຺ເສວ ວຕ຺ຖຸໍ ວາ ອາຣມ຺ມຓໍ ວາ. ອາເສວເນ ຕີຓິ ອນນ຺ຕຣູປນິສ຺ສຍວເສນ. ກມ຺ເມ ທ຺ເວ ປກຕູປນິສ຺ສຍວເສນ. ໂລກຸຕ຺ຕຣກຸສລເຈຕນາ ປນ ອນນ຺ຕຣູປນິສ຺ສໂຍປິ ໂຫຕິ. ວິປ຺ປຍຸຕ຺ເຕ ເອກໍ ອາຣມ຺ມຓູປນິສ຺ສຍວເສນ, ຕຖາ ອຕ຺ຖິອວິຄເຕສຸ. ນຕ຺ຖິວິຄເຕສຸ ສຕ຺ຕ ອນນ຺ຕຣສມາເນວ.

໔໖໖. ອຸປນິສ຺ສຍມູລການິ ປນ ສຕ຺ຕ ຆຏນານິ ໂຫນ຺ຕິ. ຕຕ຺ຖ ປຸຣິມານິ ຕີຓິ ອາຣມ຺ມຓູປນິສ຺ສຍວເສນ ວຸຕ຺ຕານິ. ຕຕ຺ຖ ປຐເມ ສຕ຺ຕາຕິ ກຸສໂລ ກຸສລາທີນໍ, ຕຖາ ອພ຺ຍາກໂຕ, ອກຸສໂລ ອກຸສລສ຺ເສວາຕິ ເອວໍ ສຕ຺ຕ. ທຸຕິເຍ ເອກນ຺ຕິ ຈກ຺ຂາທິອພ຺ຍາກຕໍ ອກຸສລສ຺ສ. ຕຕິເຍ ວຕ຺ຖຸ ອກຸສລສ຺ສ. ຕໂຕ ປຣານິ ທ຺ເວ ອນນ຺ຕຣູປນິສ຺ສຍວເສນ ວຸຕ຺ຕານິ. ເຕສຸ ຄຓນາ ປາກຏາເຍວ. ຕໂຕ ທ຺ເວ ອນນ຺ຕຣປກຕູປນິສ຺ສຍວເສນ ວຸຕ຺ຕານິ. ຕຕ຺ຖ ປຐເມ ໂລກິຍກຸສລາກຸສລເຈຕນາປຈ຺ຈຍຠາວໂຕ ຄເຫຕພ຺ພາ, ທຸຕິເຍ ໂລກຸຕ຺ຕຣກຸສລາວ.

໔໖໗-໔໖໘. ປຸເຣຊາຕມູລເກ ອາຣມ຺ມເຓ ຕີຓີຕິ ອພ຺ຍາກໂຕ ກຸສລາທີນໍ. ອຘິປຕິຍາ ເອກນ຺ຕິ ອພ຺ຍາກໂຕ ອກຸສລສ຺ສ. ເສເສສຸປິ ເອເສວ ນໂຍ. ເອຕ຺ຖ ປນ ສຕ຺ຕ ຆຏນານິ. ເຕສຸ ປຐມໍ ວຕ຺ຖາຣມ຺ມຓວເສນ ວຸຕ຺ຕໍ, ທຸຕິຍໍ ວຕ຺ຖຸວເສເນວ, ຕຕິຍໍ ອາຣມ຺ມຓວເສນ, ຈຕຸຕ຺ຖໍ ວຕ຺ຖຸສ຺ສ ອາຣມ຺ມຓກາລວເສນ, ປຎ຺ຈມໍ ອາຣມ຺ມຓາຘິປຕິວເສນ, ຉຏ຺ຐໍ ວຕ຺ຖຸໂນ ອາຣມ຺ມຓາຘິປຕິກາລວເສນ, ສຕ຺ຕມໍ ຈກ຺ຂາທິວເສນ.

໔໖໙-໔໗໒. ປຈ຺ຉາຊາຕມູລເກ ວີສຕິ ປຈ຺ຈຍາ ນ ຍຸຊ຺ຊນ຺ຕິ, ຕໂຍວ ໂຍຊນໍ ລຠນ຺ຕິ. ເອກເມເວຕ຺ຖ ຆຏນໍ, ຕໍ ກາຍສ຺ສ ກຸສລາທີນໍ ວເສນ ເວທິຕພ຺ພໍ. ອາເສວນມູລເກປິ ເອກເມວ ຆຏນໍ.

໔໗໓-໔໗໗. ກມ຺ມມູລເກ ອນນ຺ຕເຣ ເອກນ຺ຕິ ມຄ຺ຄເຈຕນາວເສນ ວຸຕ຺ຕໍ. ອຎ຺ຎມຎ຺ເຎ ຕີຓີຕິ ເອຕ຺ຖ ປຏິສນ຺ຘິຍໍ ວຕ຺ຖຸປິ ຄເຫຕພ຺ພໍ. ອຸປນິສ຺ສເຍ ທ຺ເວຕິ ອນນ຺ຕຣປກຕູປນິສ຺ສຍວເສນ ເຫຏ຺ຐາ ວຸຕ຺ຕາເນວ. ເອວໍ ເສສານິປິ ເຫຏ຺ຐາ ວຸຕ຺ຕນເຍເນວ ເວທິຕພ຺ພານິ. ເອຕ຺ຖ ປນ ເອກາທສ ຆຏນານິ. ຕຕ຺ຖ ປຐມານິ ທ຺ເວ ປກຕູປນິສ຺ສຍານນ຺ຕຣູປນິສ຺ສຍວິຠາຄໂຕ ນານາກ຺ຂຓິກກມ຺ມວເສນ ວຸຕ຺ຕານິ. ຕໂຕ ປຣານິ ຈຕ຺ຕາຣິ ວິປາກາວິປາກໂຕ ເອກກ຺ຂຓິກກມ຺ມວເສນ ວຸຕ຺ຕານິ. ຕຕ຺ຖ ປຐເມ ອຣູເປນ ສທ຺ຘິໍ ຈິຕ຺ຕສມຸຏ຺ຐານຣູປໍ ລພ຺ຠຕິ, ທຸຕິເຍ ອຣູເປນ ສທ຺ຘິໍ ວຕ຺ຖຸ, ຕຕິເຍ ອຣູປເມວ, ຈຕຸຕ຺ເຖ ຈິຕ຺ຕສມຸຏ຺ຐານຣູປເມວ. ປຏິສນ຺ຘິຍໍ ປນ ກຏຕ຺ຕາຣູປມ຺ປິ ລພ຺ຠຕິ. ຕໂຕ ປຣານິ ປຎ຺ຈ ສວິປາການິ, ຕານິ ເຫຏ຺ຐາ ວຸຕ຺ຕນຍາເນວ. ວິປາກມູລເກ ປຎ຺ຈ ຆຏານານິ ອຸຕ຺ຕານຕ຺ຖາເນວ.

໔໗໘-໔໘໓. ອາຫາຣມູລເກ ສຕ຺ຕາຕິອາທີນິ ວຸຕ຺ຕນຍາເນວ. ຆຏນານິ ປເນຕ຺ຖ ຈຕຸຕ຺ຕິໍສ. ເຕສຸ ປຐມານິ ປຎ຺ຈ ວິປາກາວິປາກສາມຎ຺ຎໂຕ ວຸຕ຺ຕານິ. ຕຕ຺ຖ ປຐເມ ຈຕ຺ຕາໂຣປິ ອາຫາຣາ ລພ຺ຠນ຺ຕິ; ທຸຕິເຍ ຕໂຍ ອຣູປາຫາຣາວ. ຕຕິເຍ ວຕ຺ຖຸປິ ປຈ຺ຈຍຸປ຺ປນ຺ນໍ ໂຫຕິ, ຈຕຸຕ຺ເຖ ຕໍ ປຣິຫາຍຕິ. ປຎ຺ຈເມ ຣູປເມວ ປຈ຺ຈຍຸປ຺ປນ຺ນໍ. ຕໂຕ ປຣານິ ປຎ຺ຈ ສວິປາກຆຏນານິ, ຕານິ ເຫຏ຺ຐາ ວຸຕ຺ຕນຍາເນວ. ຕໂຕ ປຣານິ ນວ ຆຏນານິ ເຈຕນາຫາຣວເສນ ວຸຕ຺ຕານິ. ຕໂຕ ປຣານິ ນວ ນິຣາຘິປຕິວິຎ຺ຎາຓາຫາຣວເສນ. ຕໂຕ ປຣານິ ສາຘິປຕິວິຎ຺ຎາຓາຫາຣວເສນ ຉ ຆຏນານິ ວຸຕ຺ຕານິ. ຕຕ຺ຖ ຕີຓິ ວິປາກາວິປາກສາມຎ຺ຎວເສນ ວຸຕ຺ຕານິ. ຕີຓິ ວິປາກວເສເນວ. ຕຕ຺ຖ ໂລກິຍານໍ ວິປາການໍ ອຠາວໂຕ ວຕ຺ຖຸ ປຣິຫາຍຕິ.

໔໘໔-໔໙໕. ອິນ຺ທ຺ຣິຍມູລເກ ປຸເຣຊາເຕ ເອກນ຺ຕິ ຈກ຺ຂຸນ຺ທ຺ຣິຍາທີນໍ ວເສນ ອພ຺ຍາກເຕນ ອພ຺ຍາກຕໍ. ເສສໍ ທຸມູລກໍ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ. ຆຏນານິ ປເນຕ຺ຖ ຉ ສຕ຺ຕຕິ. ຕຕ຺ຖ ປຐເມ ສພ຺ພານິປິ ອິນ຺ທ຺ຣິຍານິ ປຈ຺ຈຍຏ຺ເຐນ ລພ຺ຠນ຺ຕິ. ທຸຕິເຍ ຣູປຊີວິຕິນ຺ທ຺ຣິຍໍ ຫາຍຕິ. ນ ຫິ ຕໍ ນິສ຺ສໂຍ ໂຫຕິ. ຕຕິເຍ ອຣູປິນ຺ທ຺ຣິຍານິ ຣູປານໍ. ຈຕຸຕ຺ເຖ ຈກ຺ຂາທີນິ ຈກ຺ຂຸວິຎ຺ຎາຓາທີນໍ. ຕໂຕ ປຣານິ ນວ ຆຏນານິ ສຫຊາຕອຣູປິນ຺ທ຺ຣິຍວເສນ ວຸຕ຺ຕານິ, ຕໂຕ ນວ ມຄ຺ຄຠູຕານໍ ອິນ຺ທ຺ຣິຍານໍ ວເສນ, ຕໂຕ ນວ ຌານງ຺ຄຠູຕານໍ, ຕໂຕ ນວ ຌານມຄ຺ຄຠູຕານໍ, ຕໂຕ ນວ ມນິນ຺ທ຺ຣິຍວເສເນວ, ຕໂຕ ສາຘິປຕີນິ ຉ, ຕໂຕ ວີຣິຍວເສນ ມຄ຺ຄສມ຺ປຍຸຕ຺ຕານິ ຉ, ຕໂຕ ອໂມຫເຫຕຸວເສນ ນິຣາຘິປຕີນິ ນວ, ສາຘິປຕີນິ ຉ. ເຕສຸ ສພ຺ເພສຸ ວິປາກປຈ຺ຈເຍນ ອຍຸຕ຺ຕານິ ຈ ຍຸຕ຺ຕານິ ຈ ເຫຏ຺ຐາ ວຸຕ຺ຕນເຍເນວ ເວທິຕພ຺ພານິ.

໔໙໖-໕໐໐. ຌານມູລເກປິ ທຸມູລກໍ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ. ຆຏນານິ ປເນຕ຺ຖ ຉຕ຺ຕິໍສ. ເຕສຸ ປຐມານິ ນວ ອິນ຺ທ຺ຣິຍມຄ຺ຄຠາວໍ ອນາມສິຕ຺ວາ ສາຘາຣຓຌານງ຺ຄວເສເນວ ວຸຕ຺ຕານິ. ຕໂຕ ປຣານິ ນວ ອິນ຺ທ຺ຣິຍຠູຕຌານງ຺ຄວເສນ, ຕໂຕ ນວ ມຄ຺ຄຠູຕຌານງ຺ຄວເສນ, ຕໂຕ ນວ ອິນ຺ທ຺ຣິຍມຄ຺ຄຠູຕຌານງ຺ຄວເສນ. ຈຕູສຸປິ ເຈເຕສຸ ນວເກສຸ ອາທິໂຕ ຈຕ຺ຕາຣິ ຈຕ຺ຕາຣິ ວິປາກາວິປາກສາຘາຣຓານິ. ອວສາເນ ປຎ຺ຈ ປຎ຺ຈ ວິປາກາເນວ, ຕານິ ເຫຏ຺ຐາ ວຸຕ຺ຕນຍາເນວ.

໕໐໑-໕໐໘. ມຄ຺ຄມູລເກປິ ທຸມູລກໍ ວຸຕ຺ຕນເຍເນວ ເວທິຕພ຺ພໍ. ຆຏນານິ ປເນຕ຺ຖ ສຕ຺ຕປຎ຺ຎາສ. ເຕສຸ ປຐມານິ ນວ ອິນ຺ທ຺ຣິຍຌານຠາວໍ ອນາມສິຕ຺ວາ ສຸທ຺ຘິກມຄ຺ຄວເສເນວ ວຸຕ຺ຕານິ. ຕໂຕ ນວ ອິນ຺ທ຺ຣິຍຠູຕມຄ຺ຄວເສນ, ຕໂຕ ນວ ຌານຠູຕມຄ຺ຄວເສນ, ຕໂຕ ນວ ອິນ຺ທ຺ຣິຍຌານຠູຕມຄ຺ຄວເສນ, ຕໂຕ ຉ ອຘິປຕິຠູຕມຄ຺ຄວເສນ, ຕໂຕ ນວ ນິຣາຘິປຕິມຄ຺ຄເຫຕຸວເສນ, ຕໂຕ ຉ ສາຘິປຕິມຄ຺ຄເຫຕຸວເສນ, ຕຕ຺ຖ ນວເກສຸ ປຎ຺ຈ ປຎ຺ຈ ຉກ຺ເກສຸ ຕີຓິ ຕີຓິ ວິປາການິ. ເສສານິ ສາຘາຣຓານິ, ຕານິ ເຫຏ຺ຐາ ວຸຕ຺ຕນຍາເນວ.

໕໐໙-໕໑໐. ສມ຺ປຍຸຕ຺ຕມູລເກ ທຸມູລກໍ ອຸຕ຺ຕານຕ຺ຖເມວ. ເອຕ຺ຖ ປນ ທ຺ເວເຍວ ຆຏນານິ. ຕຕ຺ຖ ເອກໍ ສາຘາຣຓວເສນ, ເອກໍ ວິປາກວເສນ ວຸຕ຺ຕໍ.

໕໑໑-໕໑໔. ວິປ຺ປຍຸຕ຺ຕມູລເກປິ ທຸມູລກໍ ອຸຕ຺ຕານຕ຺ຖເມວ. ຆຏນານິ ປເນຕ຺ຖ ເຕຣສ. ຕຕ຺ຖ ປຐເມ ປຎ຺ຈາຕິ ກຸສໂລ ອພ຺ຍາກຕສ຺ສ, ຕຖາ ອກຸສໂລ, ອພ຺ຍາກໂຕ ຕິຓ຺ຓນ຺ນມ຺ປິ. ເອຕ຺ຖ ຈ ອິເມ ວິປ຺ປຍຸຕ຺ຕາທໂຍ ສຫຊາຕາປິ ໂຫນ຺ຕິ, ປຈ຺ຉາຊາຕປຸເຣຊາຕາປິ. ທຸຕິເຍ ປຸເຣຊາຕສຫຊາຕາວ ຕຕິເຍ ເຕເຍວ ອຘິປຕິວເສນ. ຕຕ຺ຖ ກຸສໂລ ອພ຺ຍາກຕສ຺ສ ຕຖາ ອກຸສໂລ, ອພ຺ຍາກໂຕ ປນ ອພ຺ຍາກຕສ຺ສ ຈ ອາຣມ຺ມຓາຘິປຕິວເສນ ອກຸສລສ຺ສ ຈາຕິ ເອວໍ ຈຕ຺ຕາຣິ. ຈຕຸຕ຺ເຖ ຕີຓີຕິ ກຸສລາທີນິ ອພ຺ຍາກຕສ຺ສ. ອິນ຺ທ຺ຣິຍານິ ປເນຕ຺ຖ ຣູປານິປິ ອຣູປານິປິ. ປຎ຺ຈເມ ປຈ຺ຈຍາ ອຣູປາວ ຉຏ຺ເຐ ວຕ຺ຖຸວເສນ ຣູປາວ ສຕ຺ຕເມ ກຸສລາພ຺ຍາກຕານໍ ວິປສ຺ສນາວເສນ, ອກຸສລສ຺ສ ອສ຺ສາທນວເສນ ວຕ຺ຖຸເມວ. ອຏ຺ຐເມ ຕເທວາກຸສລສ຺ສ, ນວເມ ຈກ຺ຂາທີນິ ອພ຺ຍາກຕສ຺ສ, ທສເມ ກຸສລາທໂຍ ຈິຕ຺ຕສມຸຏ຺ຐານານໍ, ເອກາທສເມ ປຏິສນ຺ຘິຍໍ ວຕ຺ຖຸ ຂນ຺ຘານໍ, ທ຺ວາທສເມ ປຏິສນ຺ຘິຍໍ ຂນ຺ຘາ ກຏຕ຺ຕາຣູປານໍ, ເຕຣສເມ ປຏິສນ຺ຘິຍໍ ຂນ຺ຘາ ວຕ຺ຖຸສ຺ສ.

໕໑໕-໕໑໘. ອຕ຺ຖິປຈ຺ຈຍມູລເກ ອຸປນິສ຺ສເຍ ເອກນ຺ຕິ ອາຣມ຺ມຓູປນິສ຺ສຍວເສນ ອພ຺ຍາກຕໍ ອກຸສລສ຺ສ. ເສສໍ ທຸມູລເກ ອຸຕ຺ຕານເມວ. ຆຏນານິ ປເນຕ຺ຖ ເອກູນຕິໍສ. ເຕສຸ ປຐເມ ອຣູປວຕ຺ຖາຣມ຺ມຓມຫາຠູຕອິນ຺ທ຺ຣິຍາຫາຣານໍ ວເສນ ສຫຊາຕປຸເຣຊາຕປຈ຺ຉາຊາຕປຈ຺ຈຍາ ລພ຺ຠນ຺ຕິ. ທຸຕິເຍ ປຈ຺ຉາຊາຕກພຬີກາຣາຫາຣາ ນ ລພ຺ຠນ຺ຕິ. ປຐມທຸຕິຍຆຏນາເນວ ອຘິປຕິນາ ສທ຺ຘິໍ ອຸປຣິ ຕຕິຍຈຕຸຕ຺ຖານິ ກຕານິ. ປຸນ ປຐມເມວ ຈຕູຫິ ອາຫາເຣຫິ ສທ຺ຘິໍ ປຎ຺ຈມໍ, ຣູປິນ຺ທ຺ຣິເຍຫິ ສທ຺ຘິໍ ຉຏ຺ຐໍ, ຣູປາຣູປິນ຺ທ຺ຣິເຍຫິ ສທ຺ຘິໍ ສຕ຺ຕມໍ ກຕໍ. ທຸຕິຍເມວ ວາ ປນ ອິນ຺ທ຺ຣິເຍຫິ ສທ຺ຘິໍ ສຕ຺ຕມໍ ກຕໍ. ປຐມທຸຕິຍາເນວ ວິປ຺ປຍຸຕ຺ຕປຈ຺ຈເຍນ ສທ຺ຘິໍ ອຏ຺ຐມນວມານິ. ເຕສຸ ນວມໍ ອຘິປຕິນາ ສທ຺ຘິໍ ທສມໍ ກຕໍ. ຕໂຕ ເອກາທສເມ ປຈ຺ຈຍວເສນ ວຕ຺ຖຸ ຫາຍຕິ. ທ຺ວາທສເມ ອຣູປຘມ຺ມາເຍວ ປຈ຺ຈຍາ, ເຕຣສເມ ວຕ຺ຖາຣມ຺ມຓາ, ຈຸທ຺ທສເມ ວຕ຺ຖຸເມວ, ປນ຺ນຣສເມ ອາຣມ຺ມຓເມວ, ໂສຬສເມ ວຕ຺ຖຸເມວ ອາຣມ຺ມຓໍ, ສຕ຺ຕຣສເມ ປນ ຕເທວ ອາຣມ຺ມຓາຘິປຕິຠາເວນ, ອຏ຺ຐາຣສເມປິ ຕເທວ ອາຣມ຺ມຓູປນິສ຺ສຍວເສນ, ເອກູນວີສຕິເມ ຈກ຺ຂາທໂຍວ ປຈ຺ຈຍາ. ອິມານິ ເອກູນວີສຕິ ປກິຓ຺ຓກຆຏນານິ ນາມ ສຫຊາຕໍ ອຄ຺ຄເຫຕ຺ວາ ວຸຕ຺ຕານິ. ຕໂຕ ປຣານິ ທສ ສຫຊາຕວເສນ ວຸຕ຺ຕານິ.

໕໑໙. ນຕ຺ຖິວິຄຕມູລເກສຸ ອນນ຺ຕຣສມນນ຺ຕຣມູລເກສຸ ວິຍ ອຸປນິສ຺ສຍາເສວນກມ຺ມວເສນ ຕີຓິເຍວ ຆຏນານິ, ອວິຄຕມູລກໍ ອຕ຺ຖິມູລກສທິສເມວາຕິ.

ຍານິ ປເນຕານິ ອິມສ຺ມິໍ ປຎ຺ຫາວາເຣ ຆຏນານິ ວຸຕ຺ຕານິ, ຕານິ ສພ຺ພານິປິ ທຸວິຘານິເຍວ – ປກິຓ຺ຓກໂຕ ສຫຊາຕໂຕ ຈ. ຕຕ຺ຖ ສພ຺ເພສມ຺ປິ ອາຣມ຺ມຓມູລກາທີນໍ ອາທິໂຕ ສຫຊາຕໍ ອຄ຺ຄເຫຕ຺ວາ ວຸຕ຺ຕານິ ປກິຓ຺ຓການິ ນາມ. ຕານິ ອາຣມ຺ມຓມູລເກ ປຎ຺ຈປິ, ອຘິປຕິມູລເກ ຉ, ອນນ຺ຕຣມູລເກ ຕີຓິປິ, ຕຖາ ສມນນ຺ຕຣມູລເກ, ນິສ຺ສຍມູລເກ ທສ, ອຸປນິສ຺ສຍມູລເກ ສຕ຺ຕ, ປຸເຣຊາຕມູລເກ ສຕ຺ຕ, ປຈ຺ຉາຊາຕມູລເກ ເອກເມວ, ຕຖາ ອາເສວນມູລເກ, ກມ຺ມມູລເກ ທ຺ເວ, ອາຫາຣມູລເກ ເອກໍ, ອິນ຺ທ຺ຣິຍມູລເກ ຈຕ຺ຕາຣິ, ວິປ຺ປຍຸຕ຺ຕມູລເກ ນວ, ອຕ຺ຖິມູລເກ ເອກູນວີສຕິ, ນຕ຺ຖິມູລເກ ຕີຓິປິ, ຕຖາວິຄຕມູລເກ. ອວິຄຕມູລເກ ເອກູນວີສຕີຕິ ສພ຺ພານິປິ ສຕຎ຺ເຈວ ຕີຓິ ຈ ໂຫນ຺ຕິ. ສຫຊາຕນິສ຺ສຍຠາເວນ ປເນຕານິ ປກິຓ຺ຓການີຕິ ວຸຕ຺ຕານິ.

ຍານິ ປນ ສຫຊາຕໍ ລພ຺ຠນ຺ຕິ, ຕານິ ສຫຊາຕຆຏນານິ ນາມາຕິ ວຸຈ຺ຈນ຺ຕິ. ຕານິ ອາຣມ຺ມຓມູລເກ ອນນ຺ຕຣສມນນ຺ຕຣປຸເຣຊາຕປຈ຺ຉາຊາຕອາເສວນນຕ຺ຖິວິຄຕມູລເກສຸ ນ ລພ຺ຠນ຺ຕິ. ນ ຫິ ເຕ ປຈ຺ຈຍາ ສຫຊາຕານໍ ປຈ຺ຈຍາ ໂຫນ຺ຕິ. ຍຖາ ຈ ສຫຊາຕານໍ ນ ໂຫນ຺ຕິ, ຕຖາ ເຫຕຸສຫຊາຕອຎ຺ຎມຎ຺ຎວິປາກຌານມຄ຺ຄສມ຺ປຍຸຕ຺ຕປຈ຺ຈຍາ. ອສຫຊາຕານນ຺ຕິ ເຫຕຸມູລເກ ສພ຺ພານິ ຈຕຸວີສຕິປິ ຆຏນານິ ສຫຊາຕຆຏນາເນວ. ຕຖາ ອຘິປຕິມູລເກ ຈຕຸວີສຕິ, ສຫຊາຕມູລເກ ທສປິ, ອຎ຺ຎມຎ຺ຎມູລເກ ຉປິ, ນິສ຺ສຍມູລເກ ທສ, ກມ຺ມມູລເກ ນວ, ວິປາກມູລເກ ປຎ຺ຈປິ, ອາຫາຣມູລເກ ເຕຕ຺ຕິໍສ, ອິນ຺ທ຺ຣິຍມູລເກ ທ຺ວາສຕ຺ຕຕິ ຌານມູລເກ ຉຕ຺ຕິໍສາປິ, ມຄ຺ຄມູລເກ ສຕ຺ຕປຎ຺ຎາສມ຺ປິ, ສມ຺ປຍຸຕ຺ຕມູລເກ ທ຺ເວປິ, ວິປ຺ປຍຸຕ຺ຕມູລເກ ຈຕ຺ຕາຣິ, ອຕ຺ຖິມູລເກ ທສ, ອວິຄຕມູລເກ ທສາຕິ ສພ຺ພານິປິ ຕີຓິ ສຕານິ ທ຺ວາທສ ຈ ໂຫນ຺ຕິ. ອິຕິ ປຸຣິມານິ ສຕໍ ຕີຓິ ຈ ອິມານິ ຈ ທ຺ວາທສຸຕ຺ຕຣານິ ຕີຓິ ສຕານີຕິ ສພ຺ພານິປິ ປຎ຺ຈທສາຘິການິ ຈຕ຺ຕາຣິ ຆຏນສຕານິ ປຎ຺ຫາວາເຣ ອາຄຕານິ. ເຕສຸ ເຍ ເຍ ປຈ຺ຈຍຘມ຺ມາ ນາມວເສນ ນ ປາກຏາ ຫຸຕ຺ວາ ປຎ຺ຎາຍນ຺ຕິ, ເຕປິ ເຫຕຸມູລກາທີນໍ ນຍານໍ ອາທິໂຕ ວິປາກາວິປາກສາມຎ຺ຎໂຕ ວຸຕ຺ເຕສຸ ຆຏເນສຸ ທສ຺ເສຕພ຺ພາ. ທ຺ວາທເສວ ຫິ ເຫຕູ ຉ ອາຣມ຺ມຓາ ຈຕ຺ຕາໂຣ ອຘິປຕໂຍ ຈຕ຺ຕາໂຣ ອາຫາຣາ ວີສຕິ ອິນ຺ທ຺ຣິຍານິ ສຕ຺ຕ ຌານງ຺ຄານິ ທ຺ວາທສ ມຄ຺ຄງ຺ຄານີຕິ ເອເຕ ປຈ຺ຈຍຘມ຺ມາ ນາມ. ເຕສຸ ເຍ ເຍ ຘມ຺ມາ ເອກນ຺ເຕນ ກຸສລາ, ເອກນ຺ເຕເນວ ອກຸສລາ, ເອກນ຺ເຕນ ກຸສລວິປາກາ, ເອກນ຺ເຕເນວາກຸສລວິປາກາ, ເອກນ຺ເຕເນວ ວິປາກາ, ເອກນ຺ເຕເນວ ອວິປາກາ ເຕ ເຕ ສາຘຸກໍ ສລ຺ລກ຺ເຂຕ຺ວາ ເຍ ຕຕ຺ຖ ວິປາກາ, ເຕ ວິປາກຆຏເນສຸ, ເຍ ອວິປາກາ, ເຕ ອວິປາກຆຏເນສຸ ຍຖາໂຍຄໍ ໂຍເຊຕພ຺ພາຕິ.

ປຎ຺ຫາວາຣສ຺ສ ຆຏເນ ອນຸໂລມຄຓນາ.

ປຈ຺ຈນີຍຸທ຺ຘາຣວຓ຺ຓນາ

໕໒໗. ອິທານິ ປຈ຺ຈນີຍໍ ໂຫຕິ. ຕຕ຺ຖ ຍຖາ ປຏິຈ຺ຈ ວາຣາທີສຸ ‘‘ອກຸສລໍ ຘມ຺ມໍ ປຏິຈ຺ຈ ອກຸສໂລ ຘມ຺ໂມ ອຸປ຺ປຊ຺ຊຕິ ນເຫຕຸປຈ຺ຈຍາ’’ຕິອາທິນາ ນເຍນ ລພ຺ຠມານາ ປຎ຺ຫາ ລພ຺ຠມານານໍ ປຈ຺ຈຍານໍ ວເສນ ສຣູປໂຕວ ວິຕ຺ຖາຣິຕາ. ເອວໍ ອວິຕ຺ຖາເຣຕ຺ວາ ເອເກນ ລກ຺ຂເຓນ ສງ຺ເຂປໂຕ ປຈ຺ຈນີຍໍ ທສ຺ເສຕຸໍ ຘມ຺ມສງ຺ຄາຫເກຫິ ກຸສໂລ ຘມ຺ໂມ ກຸສລສ຺ສ ຘມ຺ມສ຺ສ ອາຣມ຺ມຓປຈ຺ຈເຍນ ປຈ຺ຈໂຍຕິອາທິນາ ນເຍນ ອນຸໂລມໂຕ ກຸສລາທີນໍ ປຈ຺ຈຍາ ອຸທ຺ຘຏາ. ເຕ ຈ ໂຂ ປຈ຺ຈຍາ ສມູຫວເສນ, ໂນ ເອເກກປຈ຺ຈຍວເສເນວ; ຕສ຺ມາ ເຍ ຍຕ຺ຖ ສມູຫໂຕ ທສ຺ສິຕາ, ເຕ ວິຠຊິຕ຺ວາ ເວທິຕພ຺ພາ. ສພ຺ເພປິ ຫິ ອິເມ ຈຕຸວີສຕິ ປຈ຺ຈຍາ ອຏ຺ຐສຸ ປຈ຺ຈເຍສຸ ສງ຺ຄຫໍ ຄຈ຺ຉນ຺ຕິ. ກຕເຣສຸ ອຏ຺ຐສຸ? ອາຣມ຺ມເຓ, ສຫຊາເຕ, ອຸປນິສ຺ສເຍ, ປຸເຣຊາເຕ, ປຈ຺ຉາຊາເຕ, ກມ຺ເມ, ອາຫາເຣ, ອິນ຺ທ຺ຣິເຍຕິ. ກຖໍ? ຐເປຕ຺ວາ ຫິ ອິເມ ອຏ຺ຐ ປຈ຺ຈເຍ ເສເສສຸ ໂສຬສສຸ ເຫຕຸປຈ຺ຈໂຍ ອຎ຺ຎມຎ຺ຎວິປາກຌານມຄ຺ຄສມ຺ປຍຸຕ຺ຕປຈ຺ຈໂຍຕິ ອິເມ ຉ ປຈ຺ຈຍາ ເອກນ຺ເຕນ ສຫຊາຕາ ຫຸຕ຺ວາ ສຫຊາຕານຎ຺ເຎວ ປຈ຺ຈຍຠາວໂຕ ສຫຊາຕປຈ຺ຈເຍ ສງ຺ຄຫໍ ຄຈ຺ຉນ຺ຕິ. ອນນ຺ຕຣປຈ຺ຈໂຍ ສມນນ຺ຕຣອາເສວນນຕ຺ຖິວິຄຕປຈ຺ຈໂຍຕິ ອິເມ ປນ ປຎ຺ຈ ອຸປ຺ປຊ຺ຊິຕ຺ວາ ນິຣຸທ຺ຘາ ອຕ຺ຕໂນ ອນນ຺ຕຣໍ ອຸປ຺ປຊ຺ຊມານານຎ຺ເຎວ ປຈ຺ຈຍຠາວໂຕ ອນນ຺ຕຣູປນິສ຺ສຍລກ຺ຂເຓນ ອຸປນິສ຺ສເຍ ສງ຺ຄຫໍ ຄຈ຺ຉນ຺ຕິ. ນິສ຺ສຍປຈ຺ຈໂຍ ສຫຊາຕປຸເຣຊາຕເຠທໂຕ ທຸວິໂຘ. ຕຕ຺ຖ ສຫຊາຕນິສ຺ສໂຍ ສຫຊາຕານຎ຺ເຎວ ນິສ຺ສຍປຈ຺ຈຍຠາວໂຕ ສຫຊາຕປຈ຺ຈເຍ ສງ຺ຄຫໍ ຄຈ຺ຉຕິ, ປຸເຣຊາຕນິສ຺ສໂຍ ປຸເຣຊາຕປຈ຺ຈເຍ ສງ຺ຄຫໍ ຄຈ຺ຉຕິ.

ອຘິປຕິປຈ຺ຈໂຍປິ ສຫຊາຕາຘິປຕິອາຣມ຺ມຓາຘິປຕິວເສນ ທຸວິໂຘ. ຕຕ຺ຖ ສຫຊາຕາຘິປຕິ ສຫຊາຕານໍເຍວ ອຘິປຕິປຈ຺ຈຍຠາວໂຕ ສຫຊາຕປຈ຺ຈເຍ ສງ຺ຄຫໍ ຄຈ຺ຉຕິ. ອາຣມ຺ມຓາຘິປຕິ ອາຣມ຺ມຓູປນິສ຺ສໂຍ ໂຫຕິເຍວາຕິ ອາຣມ຺ມຓູປນິສ຺ສຍລກ຺ຂເຓນ ອຸປນິສ຺ສຍປຈ຺ຈເຍ ສງ຺ຄຫໍ ຄຈ຺ຉຕິ. ວິປ຺ປຍຸຕ຺ຕປຈ຺ຈໂຍ ສຫຊາຕປຸເຣຊາຕປຈ຺ຉາຊາຕເຠທໂຕ ຕິວິໂຘ. ຕຕ຺ຖ ສຫຊາຕວິປ຺ປຍຸຕ຺ໂຕ ສຫຊາຕານຎ຺ເຎວ ວິປ຺ປຍຸຕ຺ຕປຈ຺ຈຍຠາວໂຕ ສຫຊາຕປຈ຺ຈເຍ ສງ຺ຄຫໍ ຄຈ຺ຉຕິ. ປຸເຣຊາຕວິປ຺ປຍຸຕ຺ໂຕ ປຸເຣ ອຸປ຺ປຊ຺ຊິຕ຺ວາ ປຈ຺ຉາ ອຸປ຺ປຊ຺ຊມານານໍ ປຈ຺ຈຍຠາວໂຕ ປຸເຣຊາເຕ ສງ຺ຄຫິໂຕ. ປຈ຺ຉາຊາຕວິປ຺ປຍຸຕ຺ໂຕ ປຈ຺ຉາ ອຸປ຺ປຊ຺ຊິຕ຺ວາ ປຸເຣ ອຸປ຺ປນ຺ນານໍ ອຸປຕ຺ຖມ຺ຠນວເສນ ປຈ຺ຈຍຠາວໂຕ ປຈ຺ຉາຊາຕປຈ຺ຈເຍ ສງ຺ຄຫໍ ຄຈ຺ຉຕິ. ອຕ຺ຖິປຈ຺ຈຍອວິຄຕປຈ຺ຈຍາ ສຫຊາຕປຸເຣຊາຕປຈ຺ຉາຊາຕອາຫາຣິນ຺ທ຺ຣິຍານຎ຺ເຈວ ອຕ຺ຖິອວິຄເຕສຸ ຈ ເອເກກສ຺ສ ວເສນ ຉຫິ ເຠເທຫິ ຐິຕາ. ຕຕ຺ຖ ສຫຊາຕອຕ຺ຖິອວິຄຕາ ສຫຊາຕານຎ຺ເຎວ ອຕ຺ຖິອວິຄຕປຈ຺ຈຍຠາວໂຕ. ສຫຊາຕປຈ຺ຈເຍ ສງ຺ຄຫໍ ຄຈ຺ຉນ຺ຕິ. ປຸເຣຊາຕາ ປຸເຣ ອຸປ຺ປຊ຺ຊິຕ຺ວາ ປຈ຺ຉາ ອຸປ຺ປຊ຺ຊມານານໍ ປຈ຺ຈຍຠາວໂຕ ປຸເຣຊາຕປຈ຺ຈເຍ ສງ຺ຄຫໍ ຄຈ຺ຉນ຺ຕິ. ປຈ຺ຉາຊາຕາ ປຈ຺ຉາ ອຸປ຺ປຊ຺ຊິຕ຺ວາ ປຸເຣ ອຸປ຺ປນ຺ນານໍ ອຸປຕ຺ຖມ຺ຠນວເສນ ປຈ຺ຈຍຠາວໂຕ ປຈ຺ຉາຊາຕປຈ຺ຈເຍ ສງ຺ຄຫໍ ຄຈ຺ຉນ຺ຕິ. ອາຫາຣຠູຕາ ກພຬີກາຣາຫາຣປຈ຺ຈເຍ ສງ຺ຄຫໍ ຄຈ຺ຉນ຺ຕິ. ອິນ຺ທ຺ຣິຍຠູຕາ ຣູປຊີວິຕິນ຺ທ຺ຣິຍປຈ຺ຈເຍ ສງ຺ຄຫໍ ຄຈ຺ຉນ຺ຕີຕິ ເອວໍ ອິເມ ໂສຬສ ປຈ຺ຈຍາ ອິເມສຸ ອຏ຺ຐສຸ ປຈ຺ຈເຍສຸ ສງ຺ຄຫໍ ຄຈ຺ຉນ຺ຕີຕິ ເວທິຕພ຺ພາ.

ອິເມສມ຺ປິ ປນ ອຏ຺ຐນ຺ນໍ ປຈ຺ຈຍານໍ ອຎ຺ຎມຎ຺ຎໍ ສງ຺ຄໂຫ ອຕ຺ຖິເຍວ. ອາທິໂຕ ນິທ຺ທິຏ຺ໂຐ ຫິ ອາຣມ຺ມຓປຈ຺ຈໂຍ ອຘິປຕິອນຘິປຕິເຠເທນ ທຸວິໂຘ. ຕຕ຺ຖ ອຘິປຕິຠູໂຕ ອາຣມ຺ມຓູປນິສ຺ສຍລກ຺ຂເຓນ ອຸປນິສ຺ສເຍ ສງ຺ຄຫໍ ຄຈ຺ຉຕິ. ອນຘິປຕິຠູໂຕ ສຸທ຺ໂຘ ອາຣມ຺ມຓປຈ຺ຈໂຍວ. ກມ຺ມປຈ຺ຈໂຍປິ ສຫຊາຕນານາກ຺ຂຓິກວເສນ ທຸວິໂຘ. ຕຕ຺ຖ ສຫຊາຕກມ຺ມໍ ອຕ຺ຕນາ ສຫຊາຕານຎ຺ເຎວ ກມ຺ມປຈ຺ຈຍຠາວໂຕ ສຫຊາເຕເຍວ ສງ຺ຄຫໍ ຄຈ຺ຉຕິ. ນານາກ຺ຂຓິກກມ຺ມໍ ພລວທຸພ຺ພລວເສນ ທຸວິຘໍ. ຕຕ຺ຖ ພລວກມ຺ມໍ ວິປາກຘມ຺ມານໍ ອຸປນິສ຺ສໂຍວ ຫຸຕ຺ວາ ປຈ຺ຈໂຍ ໂຫຕີຕິ ອຸປນິສ຺ສເຍ ສງ຺ຄຫໍ ຄຈ຺ຉຕິ. ພລວມ຺ປິ ປນ ຣູປານໍ ທຸພ຺ພລຎ຺ຈ ອຣູປານໍ ນານາກ຺ຂຓິກກມ຺ມປຈ຺ຈເຍເນວ ປຈ຺ຈໂຍ. ອາຫາຣປຈ຺ຈໂຍປິ ຣູປາຣູປໂຕ ທຸວິໂຘ. ຕຕ຺ຖ ອຣູປາຫາໂຣ ອຕ຺ຕນາ ສຫຊາຕານຎ຺ເຎວ ປຈ຺ຈໂຍ ໂຫຕີຕິ ສຫຊາຕປຈ຺ຈເຍ ສງ຺ຄຫໍ ຄຈ຺ຉຕິ. ຣູປາຫາໂຣ ສຫຊາຕປຸເຣຊາຕປຈ຺ຉາຊາຕານໍ ປຈ຺ຈໂຍ ນ ໂຫຕິ. ອຕ຺ຕໂນ ປນ ອຸປ຺ປາທກ຺ຂຓໍ ອຕິກ຺ກມິຕ຺ວາ ຐິຕິປ຺ປຕ຺ໂຕ ອາຫາຣປຈ຺ຈຍຕໍ ສາເຘຕີຕິ ອາຫາຣປຈ຺ຈໂຍວ ໂຫຕິ. ອິນ຺ທ຺ຣິຍປຈ຺ຈໂຍປິ ຣູປາຣູປໂຕ ທຸວິໂຘ. ຕຕ຺ຖ ອຣູປິນ຺ທ຺ຣິຍປຈ຺ຈໂຍ ອຕ຺ຕນາ ສຫຊາຕານຎ຺ເຎວ ອິນ຺ທ຺ຣິຍປຈ຺ຈຍຕໍ ສາເຘຕີຕິ ສຫຊາເຕເຍວ ສງ຺ຄຫໍ ຄຈ຺ຉຕິ. ຣູປິນ຺ທ຺ຣິຍປຈ຺ຈໂຍ ປນ ອຊ຺ຌຕ຺ຕພຫິທ຺ຘາເຠທໂຕ ທຸວິໂຘ. ຕຕ຺ຖ ອຊ຺ຌຕ຺ຕໍ ອິນ຺ທ຺ຣິຍປຈ຺ຈໂຍ ປຸເຣ ອຸປ຺ປຊ຺ຊິຕ຺ວາ ປຈ຺ຉາ ອຸປ຺ປຊ຺ຊມານານໍ ສສມ຺ປຍຸຕ຺ຕຘມ຺ມານໍ ຈກ຺ຂຸວິຎ຺ຎາຓາທີນໍ ອິນ຺ທ຺ຣິຍປຈ຺ຈໂຍ ໂຫຕີຕິ ປຸເຣຊາເຕເຍວ ສງ຺ຄຫໍ ຄຈ຺ຉຕິ. ພາຫິໂຣ ອິນ຺ທ຺ຣິຍປຈ຺ຈໂຍ ນາມ ຣູປຊີວິຕິນ຺ທ຺ຣິຍໍ, ຕໍ ສຫຊາຕານໍ ປຈ຺ຈໂຍ ໂຫນ຺ຕມ຺ປິ ອນຸປາລນມຕ຺ຕວເສເນວ ໂຫຕິ, ນ ຊນກວເສນາຕິ ອິນ຺ທ຺ຣິຍປຈ຺ຈໂຍວ ໂຫຕິ. ເອວໍ ອິເມ ອຏ຺ຐ ປຈ຺ຈຍາ ອຎ຺ຎມຎ຺ຎມ຺ປິ ສງ຺ຄຫໍ ຄຈ຺ຉນ຺ຕີຕິ ເວທິຕພ຺ພາ. ອຍໍ ຕາວ ອຏ຺ຐສຸ ປຈ຺ຈເຍສຸ ອວເສສານໍ ໂສຬສນ຺ນຎ຺ເຈວ ເຕສໍເຍວ ຈ ອຏ຺ຐນ຺ນໍ ອຎ຺ຎມຎ຺ຎວເສນ ສງ຺ຄຫນໂຍ.

ອິທານິ ອິເມສໍ ອຏ຺ຐນ຺ນໍ ປຈ຺ຈຍານໍ ເອເກກສ຺ມິໍ ຈຕຸວີສຕິຍາປິ ປຈ຺ຈເຍສຸ ເຍ ເຍ ສງ຺ຄຫໍ ຄຈ຺ຉນ຺ຕິ, ເຕ ເຕ ເວທິຕພ຺ພາ. ຕຕ຺ຖ ອຏ຺ຐນ຺ນໍ ຕາວ ສພ຺ພປຐເມ ອາຣມ຺ມຓປຈ຺ຈເຍ ອາຣມ຺ມຓປຈ຺ຈໂຍວ ສງ຺ຄຫໍ ຄຈ຺ຉຕິ, ນ ເສສາ ເຕວີສຕິ. ທຸຕິເຍ ສຫຊາຕປຈ຺ຈເຍ ເຫຕຸປຈ຺ຈໂຍ ສຫຊາຕາຘິປຕິປຈ຺ຈໂຍ ສຫຊາຕປຈ຺ຈໂຍ ອຎ຺ຎມຎ຺ຎປຈ຺ຈໂຍ ສຫຊາຕນິສ຺ສຍປຈ຺ຈໂຍ ສຫຊາຕກມ຺ມປຈ຺ຈໂຍ ວິປາກປຈ຺ຈໂຍ ສຫຊາຕອາຫາຣປຈ຺ຈໂຍ ສຫຊາຕອິນ຺ທ຺ຣິຍປຈ຺ຈໂຍ ຌານປຈ຺ຈໂຍ ມຄ຺ຄປຈ຺ຈໂຍ ສມ຺ປຍຸຕ຺ຕປຈ຺ຈໂຍ ສຫຊາຕວິປ຺ປຍຸຕ຺ຕປຈ຺ຈໂຍ ສຫຊາຕຕ຺ຖິປຈ຺ຈໂຍ ສຫຊາຕາວິຄຕປຈ຺ຈໂຍຕິ ອິເມ ປນ຺ນຣສ ປຈ຺ຈຍາ ສງ຺ຄຫໍ ຄຈ຺ຉນ຺ຕິ. ຕຕິເຍ ອຸປນິສ຺ສຍປຈ຺ຈເຍ ອຘິປຕິຠູໂຕ ອາຣມ຺ມຓປຈ຺ຈໂຍ ອາຣມ຺ມຓຠູໂຕ ອຘິປຕິປຈ຺ຈໂຍ ອນນ຺ຕຣສມນນ຺ຕຣອຸປນິສ຺ສຍອາເສວນປຈ຺ຈຍາ ນານາກ຺ຂຓິໂກ ພລວກມ຺ມປຈ຺ຈໂຍ ນຕ຺ຖິປຈ຺ຈໂຍ ວິຄຕປຈ຺ຈໂຍຕິ ອິເມ ນວ ປຈ຺ຈຍາ ສງ຺ຄຫໍ ຄຈ຺ຉນ຺ຕິ. ຈຕຸຕ຺ເຖ ປຸເຣຊາຕປຈ຺ຈເຍ ປຸເຣຊາຕນິສ຺ສຍປຈ຺ຈໂຍ ປຸເຣຊາຕປຈ຺ຈໂຍ ປຸເຣຊາຕິນ຺ທ຺ຣິຍປຈ຺ຈໂຍ ປຸເຣຊາຕວິປ຺ປຍຸຕ຺ຕປຈ຺ຈໂຍ ປຸເຣຊາຕຕ຺ຖິປຈ຺ຈໂຍ ປຸເຣຊາຕາວິຄຕປຈ຺ຈໂຍຕິ ອິເມ ຉ ປຈ຺ຈຍາ ສງ຺ຄຫໍ ຄຈ຺ຉນ຺ຕິ. ປຎ຺ຈເມ ປຈ຺ຉາຊາຕປຈ຺ຈເຍ ປຈ຺ຉາຊາຕປຈ຺ຈໂຍ ປຈ຺ຉາຊາຕວິປ຺ປຍຸຕ຺ຕປຈ຺ຈໂຍ ປຈ຺ຉາຊາຕຕ຺ຖິປຈ຺ຈໂຍ ປຈ຺ຉາຊາຕາວິຄຕປຈ຺ຈໂຍຕິ ອິເມ ຈຕ຺ຕາໂຣ ປຈ຺ຈຍາ ສງ຺ຄຫໍ ຄຈ຺ຉນ຺ຕິ. ຉຏ຺ເຐ ກມ຺ມປຈ຺ຈເຍ ນານາກ຺ຂຓິກກມ຺ມປຈ຺ຈໂຍວ ສງ຺ຄຫິໂຕ. ສຕ຺ຕເມ ອາຫາຣປຈ຺ຈເຍ ກພຬີກາຣາຫາຣວເສເນວ ອາຫາຣປຈ຺ຈໂຍ ອາຫາຣຕ຺ຖິປຈ຺ຈໂຍ ອາຫາຣາວິຄຕປຈ຺ຈໂຍຕິ ອິເມ ຕໂຍ ປຈ຺ຈຍາ ສງ຺ຄຫິຕາ. ອຏ຺ຐເມ ອິນ຺ທ຺ຣິຍປຈ຺ຈເຍ ຣູປຊີວິຕິນ຺ທ຺ຣິຍປຈ຺ຈໂຍ ອິນ຺ທ຺ຣິຍຕ຺ຖິປຈ຺ຈໂຍ ອິນ຺ທ຺ຣິຍາວິຄຕປຈ຺ຈໂຍຕິ ອິເມ ຕໂຍ ປຈ຺ຈຍາ ສງ຺ຄຫໍ ຄຈ຺ຉນ຺ຕິ. ເອວໍ ອິເມສໍ ອຏ຺ຐນ຺ນໍ ປຈ຺ຈຍານໍ ເອເກກສ຺ມິໍ ອິເມ ຈິເມ ຈ ປຈ຺ຈຍາ ສງ຺ຄຫໍ ຄຕາຕິ ຎຕ຺ວາ ເຍ ຍຕ຺ຖ ສງ຺ຄຫໍ ຄຕາ, ເຕ ຕສ຺ສ ຄຓເນນ ຄຫິຕາວ ໂຫນ຺ຕີຕິ ເວທິຕພ຺ພາ.

ເອວໍ ສພ຺ພປຈ຺ຈຍສງ຺ຄາຫການໍ ອິເມສໍ ອຏ຺ຐນ຺ນໍ ປຈ຺ຈຍານໍ ວເສນ ເອກູນປຎ຺ຎາສາຍ ປຎ຺ເຫສຸ ອິມສ຺ມິໍ ປຈ຺ຈນີເຍ ‘‘ກຸສໂລ ຘມ຺ໂມ ກຸສລສ຺ສ ຘມ຺ມສ຺ສ ອາຣມ຺ມຓປຈ຺ຈເຍນ ປຈ຺ຈໂຍ’’ຕິອາທໂຍ ອິເມ ປນ຺ນຣສ ປຎ຺ຫາ ອຸທ຺ຘຣິຕ຺ວາ ວິສ຺ສຊ຺ຊິຕາ. ຕຕ຺ຖ ກຸສໂລ ກຸສລສ຺ສ, ກຸສໂລ ອກຸສລສ຺ສ, ກຸສໂລ ອພ຺ຍາກຕສ຺ສ, ກຸສໂລ ກຸສລາພ຺ຍາກຕສ຺ສາຕິ ກຸສລາທິກາ ຈຕ຺ຕາໂຣ ປຎ຺ຫາ; ຕຖາ ອກຸສລາທິກາ; ອພ຺ຍາກໂຕ ປນ ອພ຺ຍາກຕສ຺ສ, ອພ຺ຍາກໂຕ ກຸສລສ຺ສ, ອພ຺ຍາກໂຕ ອກຸສລສ຺ສາຕິ ອພ຺ຍາກຕາທິກາ ຕໂຍ; ກຸສໂລ ຈ ອພ຺ຍາກໂຕ ຈ ກຸສລສ຺ສ; ຕຖາ ອພ຺ຍາກຕສ຺ສ; ອກຸສໂລ ຈ ອພ຺ຍາກໂຕ ຈ ອກຸສລສ຺ສ; ຕຖາ ອພ຺ຍາກຕສ຺ສາຕິ ທຸມູລເກກາວສານາ ຈຕ຺ຕາໂຣ ໂຫນ຺ຕິ. ເຕສຸ ປຐເມ ປຎ຺ເຫ ເຍຫິ ຠວິຕພ຺ພໍ, ເຕ ສພ຺ເພ ສງ຺ຄເຫຕ຺ວາ ຕໂຍ ປຈ຺ຈຍາ ວຸຕ຺ຕາ. ທຸຕິເຍ ທ຺ເວ, ຕຕິເຍ ປຎ຺ຈ, ຈຕຸຕ຺ເຖ ເອໂກວ ປຎ຺ຈເມ ຕໂຍ, ຉຏ຺ເຐ ທ຺ເວ, ສຕ຺ຕເມ ປຎ຺ຈ, ອຏ຺ຐເມ ເອໂກວ ນວເມ ສຕ຺ຕ, ທສເມ ຕໂຍ, ເອກາທສເມ ຕໂຍ, ທ຺ວາທສເມ ທ຺ເວ, ເຕຣສເມ ຈຕ຺ຕາໂຣ, ຈຸທ຺ທສເມ ທ຺ເວ, ປນ຺ນຣສເມປິ ຈຕ຺ຕາໂຣວ. ເຕ ‘‘ສຫຊາຕປຈ຺ຈເຍນາ’’ຕິ ອວຕ຺ວາ ‘‘ສຫຊາຕໍ ປຈ຺ຉາຊາຕ’’ນ຺ຕິ ວຸຕ຺ຕາ. ຕຕ຺ຖ ກາຣຓໍ ປຣໂຕ ວກ຺ຂາມ.

ສມາສໂຕ ປເນຕ຺ຖ ເອໂກ ທ຺ເວ ຕໂຍ ຈຕ຺ຕາໂຣ ປຎ຺ຈ ສຕ຺ຕາຕິ ຉເຬວ ປຈ຺ຈຍປຣິຈ຺ເຉທາ ໂຫນ຺ຕິ. ອຍໍ ປຎ຺ຫາວາຣສ຺ສ ປຈ຺ຈນີເຍ ອຸກ຺ກຏ຺ຐວເສນ ປຎ຺ຫາປຣິຈ຺ເຉໂທ ເຈວ ເຕ ເຕ ປຈ຺ຈເຍ ສງ຺ຄເຫຕ຺ວາ ທສ຺ສິຕປຈ຺ຈຍປຣິຈ຺ເຉໂທ ຈ. ‘‘ນ ເຫຕຸປຈ຺ຈໂຍ’’ຕິອາທີສຸ ຫິ ຈຕຸວີສຕິຍາປິ ປຈ຺ຈຍປຈ຺ຈນີເຍສຸ ເອກປຈ຺ຈນີເຍປິ ອິໂຕ ອຸທ຺ຘໍ ປຎ຺ຫາ ວາ ປຈ຺ຈຍາ ວາ ນ ລພ຺ຠນ຺ຕິ, ເຫຏ຺ຐາ ລພ຺ຠນ຺ຕິ. ຕສ຺ມາ ເຍສຸ ປຎ຺ເຫສຸ ‘‘ກຸສໂລ ຘມ຺ໂມ ກຸສລສ຺ສ ຈ ອພ຺ຍາກຕສ຺ສ ຈ ຘມ຺ມສ຺ສ ສຫຊາຕປຈ຺ຈເຍນ ປຈ຺ຈໂຍ’’ຕິ ເອວໍ ເອໂກວ ປຈ຺ຈໂຍ ອາຄໂຕ, ຕສ຺ມິໍ ປຈ຺ຈເຍ ປຏິກ຺ຂິຕ຺ເຕ ເຕ ປຎ຺ຫາ ປຣິຫາຍນ຺ຕິ. ຍສ຺ມິໍ ປນ ປຎ຺ເຫ ‘‘ກຸສໂລ ຘມ຺ໂມ ອກຸສລສ຺ສ ຘມ຺ມສ຺ສ ອາຣມ຺ມຓປຈ຺ຈເຍນ ປຈ຺ຈໂຍ ອຸປນິສ຺ສຍປຈ຺ຈເຍນ ປຈ຺ຈໂຍ’’ຕິ ເອວໍ ທ຺ເວ ປຈ຺ຈຍາ ອາຄຕາ. ຕຕ຺ຖ ນາຣມ຺ມຓປຈ຺ຈຍາຕິ ເອວໍ ເອກສ຺ມິໍ ປຈ຺ຈເຍ ປຏິກ຺ຂິຕ຺ເຕປິ ອິຕຣສ຺ສ ປຈ຺ຈຍສ຺ສ ວເສນ ໂສ ປຎ຺ໂຫ ລພ຺ຠເຕວ. ເຕສຸ ປນ ທ຺ວີສຸປິ ປຈ຺ຈເຍສຸ ປຏິກ຺ຂິຕ຺ເຕສຸ ໂສ ວາໂຣ ປຈ຺ຉິຊ຺ຊຕິ. ເອວເມວ ເຍສຸ ປຎ຺ເຫສຸ ຕໂຍ ຈຕ຺ຕາໂຣ ປຎ຺ຈ ສຕ຺ຕ ວາ ລພ຺ຠນ຺ຕິ, ເຕສຸ ຐເປຕ຺ວາ ປຏິກ຺ຂິຕ຺ເຕ ປຈ຺ຈເຍ ອວເສສານໍ ວເສນ ເຕ ປຎ຺ຫາ ລພ຺ຠນ຺ຕິເຍວ. ສພ຺ເພສຸ ປນ ປຈ຺ຈເຍສຸ ປຏິກ຺ຂິຕ຺ເຕສຸ ສພ຺ເພປິ ເຕ ວາຣາ ປຈ຺ຉິຊ຺ຊນ຺ຕີຕິ ອິທເມວ ເຈຕ຺ຖ ລກ຺ຂຓໍ. ອິມິນາ ລກ຺ຂເຓນ ອາທິໂຕ ປຏ຺ຐາຍ ເຕສຸ ເຕສຸ ປຎ຺ເຫສຸ ສງ຺ຂິປິຕ຺ວາ ວຸຕ຺ຕປຈ຺ຈຍານໍ ປເຠໂທ ຈ ຕສ຺ມິໍ ຕສ຺ມິໍ ປຈ຺ຈນີເຍ ເຕສໍ ເຕສໍ ປຎ຺ຫານໍ ປຣິຫານິ ຈ ເວທິຕພ຺ພາ.

ຕຕ຺ຣາຍໍ ວິຕ຺ຖາຣກຖາ – ປຐມປຎ຺ເຫ ຕາວ ຕີຫິ ປຈ຺ຈເຍຫິ ເອກູນວີສຕິ ປຈ຺ຈຍາ ທສ຺ສິຕາ. ກຖໍ? ກຸສໂລ ຫິ ກຸສລສ຺ສ ປຸເຣຊາຕປຈ຺ຉາຊາຕວິປາກວິປ຺ປຍຸຕ຺ເຕເຫວ ປຈ຺ຈໂຍ ນ ໂຫຕິ, ເສເສຫິ ວີສຕິຍາ ໂຫຕິ, ເຕສຸ ອາຣມ຺ມຓປຈ຺ຈໂຍ ເອໂກວ ສຫຊາເຕ ປນ ສພ຺ພສງ຺ຄາຫິກວເສນ ປນ຺ນຣສ ປຈ຺ຈຍາ ສງ຺ຄຫໍ ຄຈ຺ຉນ຺ຕີຕິ ວຸຕ຺ຕາ. ເຕສຸ ເຫຕຸປຈ຺ຈເຍ ປຏິກ຺ຂິຕ຺ເຕ ຈຸທ຺ທສ ໂຫນ຺ຕິ. ກຸສໂລ ປນ ກຸສລສ຺ສ ເນວ ວິປາກປຈ຺ຈໂຍ ນ, ວິປ຺ປຍຸຕ຺ຕປຈ຺ຈໂຍຕິ ເຕ ທ຺ເວ ອປເນຕ຺ວາ ເສເສ ທ຺ວາທສ ສນ຺ຘາຍ ສຫຊາຕປຈ຺ຈເຍນ ປຈ຺ຈໂຍຕິ ວຸຕ຺ຕໍ. ອຸປນິສ຺ສຍປຈ຺ຈເຍປິ ສພ຺ພສງ຺ຄາຫິກວເສນ ນວ ປຈ຺ຈຍາ ສງ຺ຄຫໍ ຄຈ຺ຉນ຺ຕີຕິ ວຸຕ຺ຕາ. ເຕສຸ ອຘິປຕິຠູໂຕ ອາຣມ຺ມຓປຈ຺ຈໂຍ ອາຣມ຺ມຓຠູໂຕ ຈ ອຘິປຕິປຈ຺ຈໂຍ ອາຣມ຺ມຓູປນິສ຺ສຍວເສນ ອຸປນິສ຺ສຍເມວ ອນຸປວິຏ຺ໂຐ. ກຸສໂລ ປນ ກຸສລສ຺ສ ນານາກ຺ຂຓິກກມ຺ມປຈ຺ຈໂຍ ນ ໂຫຕີຕິ ຕໍ ອປເນຕ຺ວາ ເສເສ ຉ ສນ຺ຘາຍ ອຸປນິສ຺ສຍປຈ຺ຈເຍນ ປຈ຺ຈໂຍຕິ ວຸຕ຺ຕໍ. ເອວໍ ປຐມປຎ຺ເຫ ຕີຫິ ປຈ຺ຈເຍຫິ ເອກູນວີສຕິປຈ຺ຈຍາ ທສ຺ສິຕາຕິ ເວທິຕພ຺ພາ. ເຕສຸ ອິມສ຺ມິໍ ເຫຕຸປຈ຺ຈນີເຍ ‘‘ກຸສໂລ ຘມ຺ໂມ ກຸສລສ຺ສ ຘມ຺ມສ຺ສ ນເຫຕຸປຈ຺ຈເຍນ ປຈ຺ຈໂຍຕິ ທານໍ ທຕ຺ວາ ສີລໍ ສມາທິຍິຕ຺ວາ ອຸໂປສຖກມ຺ມໍ ກຕ຺ວາ ຕໍ ປຈ຺ຈເວກ຺ຂຕິ, ປຸພ຺ເພ ສຸຈິຓ຺ຓານິ ປຈ຺ຈເວກ຺ຂຕີ’’ຕິ ເອວມາທິນາ ອາຣມ຺ມຓປຈ຺ຈຍາທີສຸ ວຸຕ຺ຕນເຍເນວ ອຸທ຺ຘຣິຕ຺ວາ ປາຬິ ທສ຺ເສຕພ຺ພາ.

ອາຣມ຺ມຓປຈ຺ຈເຍ ປນ ປຏິກ຺ຂິຕ຺ເຕ ຕສ຺ສ ວິຕ຺ຖາຣໍ ອປເນຕ຺ວາ ເຫຕຸປຈ຺ຈຍວິຕ຺ຖາຣໍ ປກ຺ຂິປິຕ຺ວາ ສາເຍວ ປາຬິ ທສ຺ເສຕພ຺ພາ, ເສສປຈ຺ຈຍປຏິກ຺ເຂເປສຸປິ ເອເສວ ນໂຍ. ຕສ຺ມິໍ ປນ ປຈ຺ຈເຍ ປຏິກ຺ຂິຕ຺ເຕ ເຍ ວາຣາ ປຣິຫາຍນ຺ຕິ, ເຕ ປຣໂຕ ວກ຺ຂາມ.

ທຸຕິຍປຎ຺ເຫ ປນ ທ຺ວີຫິ ປຈ຺ຈເຍຫິ ຕໂຍ ປຈ຺ຈຍາ ທສ຺ສິຕາ. ກຖໍ? ກຸສໂລ ຫິ ອກຸສລສ຺ສ ອນນ຺ຕຣາທິວເສນ ປຈ຺ຈໂຍ ນ ໂຫຕິ. ຕສ຺ມາ ເຕ ອປເນຕ຺ວາ ອາຣມ຺ມຓູປນິສ຺ສຍວເສນ ສງ຺ຄຫິຕໍ ອາຣມ຺ມຓາຘິປຕິຎ຺ເຈວ ປກຕູປນິສ຺ສຍຎ຺ຈ ສນ຺ຘາຍ ອຸປນິສ຺ສຍປຈ຺ຈເຍນ ປຈ຺ຈໂຍຕິ ວຸຕ຺ຕໍ. ຕສ຺ມາ ສຸທ຺ໂຘ ອາຣມ຺ມຓປຈ຺ຈໂຍ ອາຣມ຺ມຓາຘິປຕິວເສນ ອຘິປຕິປຈ຺ຈໂຍ ອຸປນິສ຺ສຍປຈ຺ຈໂຍຕິ ທຸຕິຍປຎ຺ເຫ ທ຺ວີຫິ ປຈ຺ຈເຍຫິ ອິເມ ຕໂຍ ປຈ຺ຈຍາ ທສ຺ສິຕາຕິ ເວທິຕພ຺ພາ.

ຕຕິຍປຎ຺ເຫ ປນ ປຎ຺ຈຫິ ປຈ຺ຈເຍຫິ ອຏ຺ຐາຣສ ປຈ຺ຈຍາ ທສ຺ສິຕາ. ກຖໍ? ກຸສໂລ ຫິ ອພ຺ຍາກຕສ຺ສ ອຎ຺ຎມຎ຺ຎປຸເຣຊາຕາເສວນວິປາກສມ຺ປຍຸຕ຺ເຕຫິເຍວ ປຈ຺ຈໂຍ ນ ໂຫຕິ, ເສເສຫິ ເອກູນວີສຕິຍາ ໂຫຕິ. ເຕສຸ ອາຣມ຺ມຓປຈ຺ຈໂຍ ເອໂກ. ຍສ຺ມາ ປນ ກຸສໂລ ອພ຺ຍາກຕສ຺ສ ອຎ຺ຎມຎ຺ຎວິປາກສມ຺ປຍຸຕ຺ຕວເສນ ປຈ຺ຈໂຍ ນ ໂຫຕິ, ເຫຕຸປຈ຺ຈໂຍ ປຏິກ຺ຂິຕ຺ໂຕ, ກມ຺ມປຈ຺ຈໂຍ ວິສຸໍ ຄຫິໂຕ, ຕສ຺ມາ ອິເມ ປຎ຺ຈ ອປເນຕ຺ວາ ສຫຊາເຕນ ທສ ປຈ຺ຈຍາ ທສ຺ສິຕາ. ອຸປນິສ຺ສເຍນ ເຫຏ຺ຐາ ວຸຕ຺ເຕສຸ ຉສຸ ຐເປຕ຺ວາ ອາເສວນໍ ເສສາ ປຎ຺ຈ. ປຈ຺ຉາຊາໂຕ ເອໂກວ ຕຖາ ສຫຊາຕນານາກ຺ຂຓິກວເສນ ທຸວິໂຘປິ ກມ຺ມປຈ຺ຈໂຍຕິ ເອວໍ ຕຕິຍປຎ຺ເຫ ປຎ຺ຈຫິ ປຈ຺ຈເຍຫິ ອິເມ ອຏ຺ຐາຣສ ປຈ຺ຈຍາ ທສ຺ສິຕາຕິ ເວທິຕພ຺ພາ.

ຈຕຸຕ຺ຖປຎ຺ເຫ ປນ ເອເກນ ປຈ຺ຈເຍນ ທສ. ກຖໍ? ກຸສໂລ ຫິ ກຸສລາພ຺ຍາກຕສ຺ສ ສຫຊາເຕ ວຸຕ຺ເຕສຸ ປນ຺ນຣສສຸ ອຎ຺ຎມຎ຺ຎວິປາກສມ຺ປຍຸຕ຺ຕວິປ຺ປຍຸຕ຺ເຕຫິ ປຈ຺ຈໂຍ ນ ໂຫຕິ, ເຫຕຸປຈ຺ຈໂຍ ປຏິກ຺ຂິຕ຺ໂຕ. ອິຕິ ອິເມ ປຎ຺ຈ ອປເນຕ຺ວາ ເສສາ ທສ ປຈ຺ຈຍາ ເອຕ຺ຖ ເອເກນ ປຈ຺ຈເຍນ ທສ຺ສິຕາຕິ ເວທິຕພ຺ພາ.

໕໒໘. ຍຖາ ຈ ອິເມສຸ ກຸສລາທິເກສຸ ຈຕູສຸ, ຕຖາ ອກຸສລາທິເກສຸປິ ຈຕູສຸ ປຎ຺ເຫສຸ ເຕຫິ ເຕຫິ ປຈ຺ຈເຍຫິ ເຕ ເຕເຍວ ປຈ຺ຈຍາ ທສ຺ສິຕາຕິ ເວທິຕພ຺ພາ.

໕໒໙. ຕໂຕ ປຣານໍ ອພ຺ຍາກຕາທີນໍ ຕິຓ຺ຓໍ ປຎ຺ຫານໍ ປຐມປຎ຺ເຫ ສຕ຺ຕຫິ ປຈ຺ຈເຍຫິ ເຕວີສຕິ ປຈ຺ຈຍາ ທສ຺ສິຕາ. ກຖໍ? ອພ຺ຍາກໂຕ ຫິ ອພ຺ຍາກຕສ຺ສ ຈຕຸວີສຕິຍາປິ ປຈ຺ຈເຍຫິ ປຈ຺ຈໂຍ ໂຫຕິ. ເຫຕຸປຈ຺ຈເຍ ປນ ປຏິກ຺ຂິຕ຺ເຕ ເຕວີສຕິ ໂຫນ຺ຕິ. ເຕສຸ ອາຣມ຺ມຓປຈ຺ຈໂຍ ເອໂກວ. ຍສ຺ມາ ປເນຕ຺ຖ ອສຫຊາຕານມ຺ປິ ສງ຺ຄຫຓຕ຺ຖໍ ອາຫາຣິນ຺ທ຺ຣິຍປຈ຺ຈຍາ ວິສຸໍ ຄຫິຕາ. ຕສ຺ມາ ອິເມ ຕໂຍ ອປເນຕ຺ວາ ສຫຊາເຕນ ທ຺ວາທສ ປຈ຺ຈຍາ ທສ຺ສິຕາ. ອຸປນິສ຺ສເຍນ ເຫຏ຺ຐາ ວຸຕ຺ຕາ ຉ, ປຸເຣຊາໂຕ ເອໂກວ ຕຖາ ປຈ຺ຉາຊາຕອາຫາຣິນ຺ທ຺ຣິຍປຈ຺ຈຍາຕິ ເອວເມຕ຺ຖ ສຕ຺ຕຫິ ປຈ຺ຈເຍຫິ ອິເມ ເຕວີສຕິ ປຈ຺ຈຍາ ທສ຺ສິຕາຕິ ເວທິຕພ຺ພາ. ທຸຕິເຍ ຕີຫິ ປຈ຺ຈເຍຫິ ທ຺ວາທສ ທສ຺ສິຕາ. ກຖໍ? ອາຣມ຺ມຓປຈ຺ຈໂຍ ເອໂກ, ອຸປນິສ຺ສເຍນ ປນ ອາຣມ຺ມຓູປນິສ຺ສຍວເສນ ອາຣມ຺ມຓາຘິປຕິອນນ຺ຕຣສມນນ຺ຕຣນຕ຺ຖິວິຄຕອຸປນິສ຺ສຍປຈ຺ຈໂຍຕິ ຉ ທສ຺ສິຕາ. ປຸເຣຊາເຕນ ປຸເຣຊາຕນິສ຺ສຍວິປ຺ປຍຸຕ຺ຕອຕ຺ຖິອວິຄຕາ ປຎ຺ຈາຕິ ເອວເມຕ຺ຖ ຕີຫິ ປຈ຺ຈເຍຫິ ອິເມ ທ຺ວາທສ ປຈ຺ຈຍາ ທສ຺ສິຕາຕິ ເວທິຕພ຺ພາ. ຕຕິເຍປິ ເອເສວ ນໂຍ.

໕໓໐. ຕໂຕ ປຣານໍ ທຸກມູລການໍ ຈຕຸນ຺ນໍ ປຎ຺ຫານໍ ປຐມປຎ຺ເຫ ‘‘ສຫຊາຕປຈ຺ຈເຍນ ປຸເຣຊາຕປຈ຺ຈເຍນາ’’ຕິ ອວຕ຺ວາ ‘‘ສຫຊາຕໍ ປຸເຣຊາຕ’’ນ຺ຕິ ວຸຕ຺ເຕຫິ ທ຺ວີຫິ ນິສ຺ສຍອຕ຺ຖິອວິຄຕວເສນ ຕໂຍ ປຈ຺ຈຍາ ທສ຺ສິຕາ. ກຸສລາ ຫິ ຂນ຺ຘາ ວຕ຺ຖຸນາ ສທ຺ຘິໍ ເອກໂຕ ກຸສລສ຺ສ ປຈ຺ຈຍຠາວໍ ສາຘຍມານາ ກິຎ຺ຈາປິ ສຫຊາຕາ, ສຫຊາຕປຈ຺ຈຍາ ປນ ນ ໂຫນ຺ຕິ ວຕ຺ຖຸມິສ຺ສກຕ຺ຕາ. ຕສ຺ມາ ເຕສໍ ສຫຊາຕານໍ ນິສ຺ສຍອຕ຺ຖິອວິຄຕານໍ ວເສນ ສຫຊາຕນ຺ຕິ ວຸຕ຺ຕໍ. ວຕ຺ຖຸມ຺ຫິປິ ເອເສວ ນໂຍ. ຕມ຺ປິ ຫິ ກິຎ຺ຈາປິ ປຸເຣຊາຕໍ, ຂນ຺ຘມິສ຺ສກຕ຺ຕາ ປນ ປຸເຣຊາຕປຈ຺ຈໂຍ ນ ໂຫຕິ. ເກວລໍ ປຸເຣຊາຕານໍ ນິສ຺ສຍາທີນໍ ວເສນ ປຸເຣຊາຕນ຺ຕິ ວຸຕ຺ຕໍ.

ທຸຕິຍປຎ຺ເຫ ‘‘ສຫຊາຕໍ ປຈ຺ຉາຊາຕໍ ອາຫາຣໍ ອິນ຺ທ຺ຣິຍ’’ນ຺ຕິ ວຸຕ຺ເຕຫິ ຈຕູຫິປິ ສຫຊາຕນິສ຺ສຍອຕ຺ຖິອວິຄຕວເສນ ຈຕ຺ຕາໂຣ ປຈ຺ຈຍາ ທສ຺ສິຕາ. ອິມສ຺ມິຎ຺ຫິ ວາເຣ ສຫຊາຕປຈ຺ຈໂຍ ລພ຺ຠຕິ, ປຈ຺ຉາຊາຕປຈ຺ຈຍາທໂຍ ນ ລພ຺ຠນ຺ຕິ. ປຈ຺ຉາຊາຕານໍ ປນ ອາຫາຣິນ຺ທ຺ຣິຍສງ຺ຂາຕານຎ຺ຈ ອຕ຺ຖິອວິຄຕານໍ ວເສເນຕໍ ວຸຕ຺ຕໍ. ກຸສລາ ຫິ ຂນ຺ຘາ ອພ຺ຍາກຕາ ຈ ມຫາຠູຕາ ອຸປາທາຣູປານໍ ສຫຊາຕປຈ຺ຈເຍນ ນິສ຺ສຍປຈ຺ຈເຍນ ອຕ຺ຖິອວິຄຕປຈ຺ຈເຍຫີຕິ ຈຕຸຘາ ປຈ຺ຈຍາ ໂຫນ຺ຕິ. ປຈ຺ຉາຊາຕາ ປນ ກຸສລາ ເຕຫິເຍວ ຠູເຕຫິ ສທ຺ຘິໍ ເຕສຎ຺ເຎວ ອຸປາທາຣູປານໍ ອຕ຺ຖິອວິຄຕວເສນ ປຈ຺ຈໂຍ. ກພຬີກາຣາຫາໂຣປິ ປຈ຺ຉາຊາເຕຫິ ກຸສເລຫິ ສທ຺ຘິໍ ປຸເຣຊາຕສ຺ສ ກາຍສ຺ສ ອຕ຺ຖິອວິຄຕວເສເນວ ປຈ຺ຈໂຍ. ຣູປຊີວິຕິນ຺ທ຺ຣິຍມ຺ປິ ປຈ຺ຉາຊາເຕຫິ ກຸສເລຫິ ສທ຺ຘິໍ ກຏຕ຺ຕາຣູປານໍ ອຕ຺ຖິອວິຄຕປຈ຺ຈເຍເນວ ປຈ຺ຈໂຍ. ອິຕິ ອິມໍ ຈຕຸຘາ ປຈ຺ຈຍຠາວໍ ສນ຺ຘາຍ ‘‘ສຫຊາຕໍ ປຈ຺ຉາຊາຕໍ, ອາຫາຣໍ ອິນ຺ທ຺ຣິຍ’’ນ຺ຕິ ອິທໍ ວຸຕ຺ຕໍ. ປຈ຺ຉາຊາຕາຫາຣິນ຺ທ຺ຣິຍປຈ຺ຈຍາ ປເນຕ຺ຖ ນ ລພ຺ຠນ຺ຕິເຍວ. ປຣໂຕ ອກຸສລມິສ຺ສກປຎ຺ຫາທ຺ວເຍປິ ເອເສວ ນໂຍຕິ. ເອວເມຕ຺ຖ ເຕສຸ ເຕສຸ ປຎ຺ເຫສຸ ສງ຺ຂິປິຕ຺ວາ ວຸຕ຺ຕປຈ຺ຈຍານໍ ປເຠໂທ ເວທິຕພ຺ໂພ. ຕສ຺ມິໍ ຕສ຺ມິໍ ປນ ປຈ຺ຈເຍ ເຕສໍ ເຕສໍ ປຎ຺ຫານໍ ປຣິຫານາປຣິຫານິໍ ປຣໂຕ ອາວິກຣິສ຺ສາມາຕິ.

ປຈ຺ຈນີຍຸທ຺ຘາຣສ຺ສ ອຕ຺ຖວຓ຺ຓນາ.

ປຈ຺ຈນີຍຄຓນວຓ຺ຓນາ

໕໓໒. ອິທານິ ເອເຕ ‘‘ກຸສໂລ ຘມ຺ໂມ ກຸສລສ຺ສ ຘມ຺ມສ຺ສາ’’ຕິອາທໂຍ ອນຸໂລມວເສນ ປນ຺ນຣສ ວາຣາ ທສ຺ສິຕາ. ຍສ຺ມາ ປຈ຺ຈນີເຍປິ ເອເຕເຍວ, ນ ອິໂຕ ອຸທ຺ຘໍ; ເຫຏ຺ຐາ ປນ ໂຫນ຺ຕິ, ຕສ຺ມາ ຍສ຺ສ ຍສ຺ສ ປຈ຺ຈຍສ຺ສ ປຈ຺ຈນີເຍ ເຍ ເຍ ວາຣາ ລພ຺ຠນ຺ຕິ, ເຕ ເຕ ອາທິໂຕ ປຏ຺ຐາຍ ຄຓນວເສນ ທສ຺ເສຕຸໍ ນເຫຕຸຍາ ປນ຺ນຣສາຕິອາທິ ອາຣທ຺ຘໍ.

ຕຕ຺ຖ ນເຫຕຸຍາ ສພ຺ເພສມ຺ປິ ຍຖາທສ຺ສິຕານໍ ປຈ຺ຈຍານໍ ວເສນ ປນ຺ນຣສ ລພ຺ຠນ຺ຕິ. ນາຣມ຺ມເຓ ສຫຊາເຕ ເຫຕຸປຈ຺ຈໂຍ ປວິສຕິ. ຕສ຺ມິໍ ຕສ຺ມິໍ ວາເຣ ສຸທ຺ໂຘ ອາຣມ຺ມຓປຈ຺ຈໂຍ ປຣິຫາຍຕິ, ເສສປຈ຺ຈຍວເສນ ເຕ ວາຣາ ວິສ຺ສຊ຺ຊນໍ ລຠນ຺ຕິ. ຍຖາ ຈ ນາຣມ຺ມເຓ, ເອວໍ ເສເສສຸປິ. ສຫຊາເຕ ເຫຕຸປຈ຺ຈໂຍ ປວິສຕິ. ຕສ຺ມິໍ ຕສ຺ມິຎ຺ຈ ວາເຣ ນອຸປນິສ຺ສເຍ ນອນນ຺ຕເຣຕິ ເອວໍ ປຈ຺ຈນີຍໂຕ ຐິຕາ ປຈ຺ຈຍາ ປຣິຫາຍນ຺ຕິ, ອວເສສປຈ຺ຈຍວເສນ ເຕ ເຕ ວາຣາ ວິສ຺ສຊ຺ຊນໍ ລຠນ຺ຕິ. ນສຫຊາເຕ ປນ ‘‘ກຸສໂລ ຘມ຺ໂມ ກຸສລສ຺ສ ຈ ອພ຺ຍາກຕສ຺ສ ຈ, ອກຸສໂລ ຘມ຺ໂມ ອກຸສລສ຺ສ ຈ ອພ຺ຍາກຕສ຺ສ ຈ, ກຸສໂລ ຈ ອພ຺ຍາກໂຕ ຈ ຘມ຺ມາ ກຸສລສ຺ສ, ອກຸສໂລ ຈ ອພ຺ຍາກໂຕ ຈ ຘມ຺ມາ ອກຸສລສ຺ສາຕິ ອິເມ ຈຕ຺ຕາໂຣ ວາຣາ ປຣິຫາຍນ຺ຕິ. ເອເຕສຎ຺ຫິ ຈຕຸນ຺ນໍ ປຸຣິເມສຸ ທ຺ວີສຸ ສຫຊາຕປຈ຺ຈເຍນ ປຈ຺ຈໂຍຕິ ເອກາທສນ຺ນໍ ປຈ຺ຈຍານໍ ວເສນ ເອໂກວ ປຈ຺ຈຍສງ຺ຄໂຫ ວຸຕ຺ໂຕ. ເຕ ຕສ຺ມິໍ ປຏິກ຺ຂິຕ຺ເຕ ອຎ຺ເຎນາກາເຣນ ວິສ຺ສຊ຺ຊນໍ ນ ລຠນ຺ຕິ. ປຈ຺ຉິເມສຸ ທ຺ວີສຸ ນິສ຺ສຍອຕ຺ຖິອວິຄຕປຈ຺ຈເຍ ສນ຺ຘາຍ ‘‘ສຫຊາຕໍ ປຸເຣຊາຕ’’ນ຺ຕິ ວຸຕ຺ຕໍ. ເຕ ສຫຊາເຕ ປຏິກ຺ຂິຕ຺ເຕ ອວເສສານໍ ເຫຕຸອາທີນຎ຺ຈ ປຸເຣຊາຕານຎ຺ເຈວ ນິສ຺ສຍອຕ຺ຖິອວິຄຕານໍ ວເສນ ວິສ຺ສຊ຺ຊນໍ ນ ລຠນ຺ຕິ, ຕສ຺ມາ ອິເມ ຈຕ຺ຕາໂຣປິ ວາຣາ ປຣິຫາຍນ຺ຕິ. ອວເສສານໍ ວເສນ ‘‘ເອກາທສາ’’ຕິ ວຸຕ຺ຕໍ.

ຕຕ຺ຖ ສິຍາ – ຍຖາ ເຫຕຸມ຺ຫິ ປຏິກ຺ຂິຕ຺ເຕ ເສສານໍ ອຘິປຕິອາທີນໍ ວເສນ ເຕ ວາຣາ ລທ຺ຘາ, ເອວໍ ສຫຊາເຕ ປຏິກ຺ຂິຕ຺ເຕ ອວເສສານໍ ເຫຕຸອາທີນໍ ວເສນ ກສ຺ມາ ນ ລພ຺ຠນ຺ຕີຕິ? ນິປ຺ປເທສຕ຺ຕາ. ເຫຕຸອາທໂຍ ຫິ ສຫຊາຕານໍ ເອກເທສມຕ຺ຕໂຕ ສປ຺ປເທສາ, ຕສ຺ມາ ເຕສຸ ປຏິກ຺ຂິຕ຺ເຕສຸ ອຎ຺ເຎສໍ ວເສນ ເຕ ວາຣາ ລພ຺ຠນ຺ຕິ. ສຫຊາໂຕ ປນ ນິປ຺ປເທໂສ ສພ຺ເພປິ ເຫຕຸອາທໂຍ ຄຓ຺ຫາຕິ, ຕສ຺ມາ ຕສ຺ມິໍ ປຏິກ຺ຂິຕ຺ເຕ ສພ຺ເພປິ ເຕ ປຏິກ຺ຂິຕ຺ຕາ ໂຫນ຺ຕິ. ນ ຫິ ອສຫຊາຕາ ເຫຕຸປຈ຺ຈຍາທໂຍ ນາມ ອຕ຺ຖິ. ອິຕິ ສຫຊາຕສ຺ສ ນິປ຺ປເທສຕ຺ຕາ ຕສ຺ມິໍ ປຏິກ຺ຂິຕ຺ເຕ ສພ຺ເພປິ ເຕ ອຸໂຠປິ ວາຣາ ນ ລພ຺ຠນ຺ຕິ. ‘‘ສຫຊາຕໍ ປຸເຣຊາຕ’’ນ຺ຕິ ວິສ຺ສຊ຺ຊິຕວາເຣສຸ ປນ ກິຎ຺ຈາປິ ສຫຊາຕປຈ຺ຈໂຍເຍວ ນຕ຺ຖິ, ຍສ຺ມາ ປເນຕ຺ຖ ສຫຊາຕາວ ອຣູປກ຺ຂນ຺ຘາ ນິສ຺ສຍອຕ຺ຖິອວິຄຕວເສນ ປຈ຺ຈຍາ, ສຫຊາເຕ ຈ ປຏິກ຺ຂິຕ຺ເຕ ເອກນ຺ເຕນ ສຫຊາຕນິສ຺ສຍອຕ຺ຖິອວິຄຕາ ປຏິກ຺ຂິຕ຺ຕາ ໂຫນ຺ຕິ, ຕສ຺ມາ ຕສ຺ສ ປຏິກ຺ຂິຕ຺ຕຕ຺ຕາ ເຕປິ ວາຣາ ນ ລພ຺ຠນ຺ຕີຕິ ເອວໍ ສພ຺ພຖາເປຕ຺ຖ ອິເມ ຈຕ຺ຕາໂຣ ວາຣາ ປຣິຫາຍນ຺ຕິ. ອວເສສານຎ຺ເຎວ ວເສນ ເອກາທສາຕິ ວຸຕ຺ຕໍ.

ນອຎ຺ຎມຎ຺ຎນນິສ຺ສຍນສມ຺ປຍຸຕ຺ເຕປິ ເຕເຍວ ວາຣາ ປຣິຫາຍນ຺ຕິ. ກສ຺ມາ? ສຫຊາຕຄຕິກຕ຺ຕາ. ຍເຖວ ຫິ ອຣູປຘມ຺ມຠູໂຕ ສຫຊາຕປຈ຺ຈໂຍ ນິປ຺ປເທເສນ ຈຕ຺ຕາໂຣ ອຣູປກ຺ຂນ຺ເຘ ຄຓ຺ຫາຕິ, ຕຖາ ອຎ຺ຎມຎ຺ຎນິສ຺ສຍສມ຺ປຍຸຕ຺ຕາປີຕິ ສຫຊາຕຄຕິກຕ຺ຕາ ເອເຕສຸປິ ປຏິກ຺ຂິຕ຺ເຕສຸ ເຕ ວາຣາ ນ ລພ຺ຠນ຺ຕີຕິ ເວທິຕພ຺ພາ. ເຕນ ວຸຕ຺ຕໍ ນອຎ຺ຎມຎ຺ເຎ ເອກາທສ, ນນິສ຺ສເຍ ເອກາທສ, ນສມ຺ປຍຸຕ຺ເຕ ເອກາທສາຕິ.

ຕຕ຺ຖ ສິຍາ – ກິຎ຺ຈາປິ ອິເມ ອວິເສເສນ ກຸສລາທິເຠທານໍ ຈຕຸນ຺ນໍ ຂນ຺ຘານໍ ສງ຺ຄາຫກຕ຺ຕາ ສຫຊາຕຄຕິກາ, ກຸສໂລ ປນ ກຸສລາພ຺ຍາກຕສ຺ສ ຐເປຕ຺ວາ ສຫຊາຕປຈ຺ຈຍໍ ອຎ຺ຎຖາ ປຈ຺ຈໂຍວ ນ ໂຫຕິ, ຕສ຺ມາ ຕສ຺ມິໍ ປຏິກ຺ຂິຕ຺ເຕ ໂສ ວາໂຣ ປຣິຫາຍຕຸ. ກຸສໂລ ປນ ກຸສລາພ຺ຍາກຕານໍ ເນວ ອຎ຺ຎມຎ຺ຎປຈ຺ຈໂຍ ໂຫຕິ, ຕສ຺ມິໍ ປຏິກ຺ຂິຕ຺ເຕ ໂສ ວາໂຣ ກສ຺ມາ ປຣິຫາຍຕີຕິ? ອຎ຺ຎມຎ຺ຎປຈ຺ຈຍຘມ຺ມວເສນ ປວຕ຺ຕິສພ຺ຠາວໂຕ. ຍເຖວ ຫິ ກຸສລາພ຺ຍາກຕາ ກຸສລສ຺ສ ສຫຊາຕປຈ຺ຈໂຍວ ນ ໂຫນ຺ຕິ. ສຫຊາຕຘມ຺ມວເສນ ປນ ນິສ຺ສຍປຈ຺ຈຍາທີຫິ ປວຕ຺ຕິສພ຺ຠາວໂຕ ຕສ຺ມິໍ ປຏິກ຺ຂິຕ຺ເຕ ໂສ ວາໂຣ ປຣິຫາຍຕິ, ເອວມິຘາປິ ອຎ຺ຎມຎ຺ຎປຈ຺ຈຍຘມ຺ມວເສນ ສຫຊາຕາທີຫິ ປວຕ຺ຕິສພ຺ຠາວໂຕ ຕສ຺ມິໍ ປຏິກ຺ຂິຕ຺ເຕ ໂສ ວາໂຣ ປຣິຫາຍຕິ. ນອຎ຺ຎມຎ຺ຎປຈ຺ຈເຍນ ປຈ຺ຈໂຍຕິ ປທສ຺ສ ຫິ ອຍມຕ຺ໂຖ – ເຍ ຘມ຺ມາ ອຎ຺ຎມຎ຺ຎປຈ຺ຈຍສງ຺ຄຫໍ ຄຕາ, ນ ເຕຫິ ປຈ຺ຈໂຍ. ກຸສໂລ ຈ ກຸສລາພ຺ຍາກຕານໍ ສຫຊາຕາທິວເສນ ປຈ຺ຈໂຍ ໂຫນ຺ໂຕ ອຎ຺ຎມຎ຺ຎປຈ຺ຈຍຘມ຺ເມເຫວ ປຈ຺ຈໂຍ ໂຫຕິ, ຕສ຺ມາ ຕສ຺ມິໍ ປຏິກ຺ຂິຕ຺ເຕ ໂສ ວາໂຣ ປຣິຫາຍຕິ. ຍຖາ ຈ ໂສ ວາໂຣ, ຕຖາ ເສສາປິ ຕໂຍຕິ ຈຕ຺ຕາໂຣປິ ເຕ ວາຣາ ປຣິຫາຍນ຺ຕິ.

ນນິສ຺ສເຍ ເອກາທສາຕິ ເອຕ຺ຖາປິ ຍສ຺ມາ ເຕສໍ ວາຣານໍ ເອເກນ຺ເຕນ ສຫຊາຕປຈ຺ຈຍຘມ຺ມາວ ນິສ຺ສຍຠູຕາ, ຕສ຺ມາ ນິສ຺ສເຍ ປຏິກ຺ຂິຕ຺ເຕ ປຣິຫາຍນ຺ຕິ. ນປຸເຣຊາເຕ ເຕຣສາຕິ ສຫຊາຕໍ ປຸເຣຊາຕນ຺ຕິ ວຸຕ຺ຕວິສ຺ສຊ຺ຊເນ ທ຺ວິມູລເກ ທ຺ເວ ອປເນຕ຺ວາ ເຕຣສ. ຍຖາ ຫິ ເຕ ສຫຊາເຕ ປຏິກ຺ຂິຕ຺ເຕ ປຸເຣຊາຕານຎ຺ເຎວ ນິສ຺ສຍອຕ຺ຖິອວິຄຕານໍ ວເສນ ວິສ຺ສຊ຺ຊນໍ ນ ລຠນ຺ຕິ, ຕຖາ ປຸເຣຊາເຕປິ ປຏິກ຺ຂິຕ຺ເຕ ສຫຊາຕານຎ຺ເຎວ ນິສ຺ສຍອຕ຺ຖິອວິຄຕານໍ ວເສນ ວິສ຺ສຊ຺ຊນໍ ນ ລຠນ຺ຕິ, ຕສ຺ມາ ເຕ ອປເນຕ຺ວາ ເຕຣສາຕິ ເວທິຕພ຺ພາ.

ນປຈ຺ຉາຊາເຕ ປນ຺ນຣສາຕິ ເອຕ຺ຖ ‘‘ປຈ຺ຉາຊາຕປຈ຺ຈເຍນ ປຈ຺ຈໂຍ’’ຕິ ວາ ‘‘ສຫຊາຕໍ ປຈ຺ຉາຊາຕໍ ອາຫາຣໍ ອິນ຺ທ຺ຣິຍ’’ນ຺ຕິ ວາ ອາຄຕຏ຺ຐາເນສຸ ຐເປຕ຺ວາ ປຈ຺ຉາຊາຕໍ ອວເສສວເສນປິ ເຕ ປຎ຺ຫາ ລພ຺ຠນ຺ຕິ, ຕສ຺ມາ ປນ຺ນຣເສວ ວຸຕ຺ຕາ. ນກມ຺ເມຕິອາທີສຸ ຍສ຺ມາ ກມ຺ມວິປາກາຫາຣິນ຺ທ຺ຣິຍຌານມຄ຺ຄາປິ ກຸສລາທິເຠທານໍ ຈຕຸນ຺ນໍ ຂນ຺ຘານໍ ເອກເທໂສວ ຕສ຺ມາ ຐເປຕ຺ວາ ເຕ ຘມ຺ເມ ອວເສສຘມ຺ມວເສນ ສຫຊາຕຘມ຺ມາ ປຈ຺ຈຍາ ໂຫນ຺ຕີຕິ ເອກມ຺ປິ ປຎ຺ຫາວິສ຺ສຊ຺ຊນໍ ນ ປຣິຫີນໍ. ນສມ຺ປຍຸຕ຺ເຕ ເອກາທສາຕິ ຍສ຺ມາ ເຕສຸ ຈຕູສຸ ວາເຣສຸ ສມ຺ປຍຸຕ຺ຕຘມ຺ມາ ສຫຊາຕາທິປຈ຺ຈເຍນ ປຈ຺ຈຍາ ໂຫນ຺ຕິ, ຕສ຺ມາ ສມ຺ປຍຸຕ຺ຕປຈ຺ຈຍປຏິກ຺ເຂເປນ ເຕເຍວ ວາຣາ ປຣິຫາຍນ຺ຕີຕິ ເວທິຕພ຺ພາ. ນວິປ຺ປຍຸຕ຺ເຕ ນວາຕິ ທຸມູລກເອກາວສານາ ຈຕ຺ຕາໂຣ ເອກມູລກທຸກາວສານາ ທ຺ເວ ຈາຕິ ອິເມ ຉ ວາຣາ ເອກນ຺ເຕນ ວິປ຺ປຍຸຕ຺ຕປຈ຺ຈຍຘມ຺ເມຫິ ຍຸຕ຺ຕາ. ເຕຫິ ສຫຊາຕາທິວເສນ ປຈ຺ຈຍາ ໂຫນ຺ຕິ, ຕສ຺ມາ ວິປ຺ປຍຸຕ຺ເຕ ປຏິກ຺ຂິຕ຺ເຕ ສພ຺ເພປິ ເຕ ປຣິຫາຍນ຺ຕີຕິ ນເວວ ລພ຺ຠນ຺ຕິ. ເຕນ ວຸຕ຺ຕໍ ‘‘ນວິປ຺ປຍຸຕ຺ເຕ ນວາ’’ຕິ. ໂນອຕ຺ຖິໂນອວິຄເຕສຸປິ ເຕເຍວ ເວທິຕພ຺ພາ. ເອກນ຺ເຕນ ຫິ ເຕ ວາຣາ ອຕ຺ຖິອວິຄຕປຈ຺ຈຍຘມ຺ມຍຸຕ຺ຕາ, ຕສ຺ມາ ເຕ ເຕສໍ ປຏິກ຺ເຂເປ ປຣິຫາຍນ຺ຕິ. ເຍປິ ລພ຺ຠນ຺ຕິ, ເຕສຸ ອາຣມ຺ມຓວເສນ ອນນ຺ຕຣາທິວເສນ ວາ ວິສ຺ສຊ຺ຊນານິ ກາຕພ຺ພານິ. ສຫຊາຕປຸເຣຊາຕປຈ຺ຉາຊາຕອາຫາຣິນ຺ທ຺ຣິຍເຠທໂຕ ປຎ຺ຈນ຺ນໍ ອຕ຺ຖິອວິຄຕານໍ ວິປ຺ປຍຸຕ຺ຕຘມ຺ມານໍ ວາ ວເສນ ນ ກາຕພ຺ພານີຕິ.

໕໓໓. ເອວໍ ປຈ຺ຈນີເຍ ລທ຺ຘວາເຣ ຄຓນໂຕ ທສ຺ເສຕ຺ວາ ອິທານິ ທຸມູລກາທິວເສນ ປຈ຺ຈຍຄຓນໍ ທສ຺ເສຕຸໍ ນເຫຕຸປຈ຺ຈຍາ ນາຣມ຺ມເຓ ປນ຺ນຣສາຕິອາທິ ອາຣທ຺ຘໍ. ຕຕ຺ຖ ນເຫຕຸມູລກທຸເກສຸ ອຕິເຣກຄຓໂນ ອູນຕຣຄຓເນນ ສທ຺ຘິໍ ໂຍຊິໂຕ ອູນຕຣຄຓໂນວ ໂຫຕິ.

ຕິມູລເກ ນອຸປນິສ຺ສເຍ ເຕຣສາຕິ ກຸສໂລ ອກຸສລສ຺ສ, ອກຸສໂລ ກຸສລສ຺ສາຕິ ທ຺ເວ ວາຣາ ປຣິຫາຍນ຺ຕິ. ກສ຺ມາ? ນາຣມ຺ມເຓນ ສທ຺ຘິໍ ນອຸປນິສ຺ສຍສ຺ສ ຆຏິຕຕ຺ຕາ. ອາຣມ຺ມຓວເສນ ຫິ ອຸປນິສ຺ສຍວເສນ ຈ ອິເມສໍ ປວຕ຺ຕິ. ຕຎ຺ຈ ອຸຠຍໍ ປຏິກ຺ຂິຕ຺ຕໍ. ອາຣມ຺ມຓາຘິປຕິ ຈ ອາຣມ຺ມຓູປນິສ຺ສຍຄ຺ຄຫເຓນ ຄຫິໂຕ ໂຫຕິເຍວ.

ຉມູລເກປິ ນອຸປນິສ຺ສເຍ ເຕຣສາຕິ ເຕເຍວ ເຕຣສ. ສຕ຺ຕມູລເກ ປນ ນອຸປນິສ຺ສເຍ ສຕ຺ຕາຕິ ນສຫຊາເຕນ ສທ຺ຘິໍ ຆຏິຕຕ຺ຕາ ຕຕ຺ຖ ປຣິຫີເນຫິ ຈຕູຫິ ສທ຺ຘິໍ ‘‘ກຸສໂລ ກຸສລສ຺ສ, ກຸສໂລ ອກຸສລສ຺ສ, ອກຸສໂລ ອກຸສລສ຺ສ, ອກຸສໂລ ກຸສລສ຺ສາ’’ຕິ ອິເມ ອນນ຺ຕຣູປນິສ຺ສຍປກຕູປນິສ຺ສຍວເສນ ປວຕ຺ຕມານາ ຈຕ຺ຕາໂຣຕິ ອຏ຺ຐ ປຣິຫາຍນ຺ຕິ, ຕສ຺ມາ ອວເສສານໍ ວເສນ ສຕ຺ຕາຕິ ວຸຕ຺ຕໍ. ນປຸເຣຊາເຕ ເອກາທສາຕິ ນສຫຊາເຕນ ສທ຺ຘິໍ ຆຏິຕຕ຺ຕາ ເອກາທສ. ນປຈ຺ຉາຊາເຕ ນວາຕິ ເຕສຸ ເອກາທສສຸ ສຫຊາຕໍ ປຈ຺ຉາຊາຕໍ ອາຫາຣໍ ອິນ຺ທ຺ຣິຍນ຺ຕິ ລທ຺ຘວິສ຺ສຊ຺ຊເນສຸ ທຸມູລເກ ອພ຺ຍາກຕນ຺ເຕ ທ຺ເວ ວາເຣ ອປເນຕ຺ວາ. ເຕ ຫິ ສຫຊາເຕ ປຏິກ຺ຂິຕ຺ເຕປິ ປຈ຺ຉາຊາຕວເສນ ອປຣິຫີນາ. ສຫຊາເຕນ ປນ ສທ຺ຘິໍ ປຈ຺ຉາຊາເຕ ປຏິກ຺ຂິຕ຺ເຕ ປຣິຫາຍນ຺ຕີຕິ ເສສານໍ ວເສນ ນວາຕິ ວຸຕ຺ຕໍ. ອຏ຺ຐມູລເກ ນນິສ຺ສເຍ ເອກາທສາຕິ ສພ຺ພໍ ເຫຏ຺ຐາ ວຸຕ຺ຕສທິສເມວ. ນວມູລເກ ນອຸປນິສ຺ສເຍ ປຎ຺ຈາຕິ ກຸສລາທໂຍ ອພ຺ຍາກຕນ຺ຕາ ຕໂຍ ທຸມູລກາ ອພ຺ຍາກຕນ຺ຕາ ທ຺ເວ ຈາຕິ ປຎ຺ຈ. ເຕສຸ ນານາກ຺ຂຓິກກມ຺ມກພຬີກາຣາຫາຣຣູປຊີວິຕິນ຺ທ຺ຣິຍປຈ຺ຉາຊາຕຘມ຺ມວເສນ ວິສ຺ສຊ຺ຊນໍ ເວທິຕພ຺ພໍ.

ທສມູລເກ ນປຸເຣຊາເຕ ປຎ຺ຈາຕິອາທີສຸປິ ເຕເຍວ. ນປຈ຺ຉາຊາເຕ ຕີຓີຕິ ປຈ຺ຉາຊາຕວເສນ ລພ຺ຠມາເນ ທຸມູລເກ ອພ຺ຍາກຕນ຺ເຕ ທ຺ເວ ອປເນຕ຺ວາ ອວເສສາ. ນວິປ຺ປຍຸຕ຺ເຕປິ ເຕເຍວ ຕໂຍ. ໂນອຕ຺ຖິຍາ ທ຺ເວຕິ ນານາກ຺ຂຓິກກມ຺ມວເສນ ກຸສລຎ຺ຈ ອກຸສລຎ຺ຈ ກຏຕ຺ຕາຣູປສ຺ສ. ວິປາກໍ ປເນຕ຺ຖ ນອຸປນິສ຺ສເຍນ ສທ຺ຘິໍ ຆຏິຕຕ຺ຕາ ນ ລພ຺ຠຕິ. ເອກາທສມູລເກ ເຫຏ຺ຐາ ວຸຕ຺ຕສທິສາວ ຄຓນາ. ທ຺ວາທສມູລເກ ນກມ຺ເມ ເອກນ຺ຕິ ອພ຺ຍາກເຕນ ອພ຺ຍາກຕໍ. ຕຕ຺ຖ ຈ ອາຫາຣິນ຺ທ຺ຣິຍວເສນ ວິສ຺ສຊ຺ຊນໍ ເວທິຕພ຺ພໍ. ເຕຣສມູລກາທີສຸປິ ສພ຺ພຕ຺ຖ ເອກນ຺ຕິ ອາຄຕຏ຺ຐາເນ ອິທເມວ ຄເຫຕພ຺ພໍ. ນາຫາເຣ ປນ ອິນ຺ທ຺ຣິຍວເສນ ວິສ຺ສຊ຺ຊນໍ ເວທິຕພ຺ພໍ. ນອິນ຺ທ຺ຣິເຍ ອາຫາຣວເສນ. ຈຸທ຺ທສມູລກາທີສຸ ນກມ຺ເມນ ສທ຺ຘິໍ ຆຏິຕຕ຺ຕາ ໂນອຕ຺ຖິໂນອວິຄຕາ ນ ລພ຺ຠນ຺ຕີຕິ ນ ວຸຕ຺ຕາ. ນາຫາຣປຈ຺ຈຍາ ນຌານປຈ຺ຈຍາຕິ ນອິນ຺ທ຺ຣິຍໍ ອປເນຕ຺ວາ ວຸຕ຺ຕໍ. ຕສ຺ມາ ຕຕ຺ຖ ອິນ຺ທ຺ຣິຍວເສນ ເອກໍ ເວທິຕພ຺ພໍ. ນວິປາກປຈ຺ຈຍາ ນອິນ຺ທ຺ຣິຍປຈ຺ຈຍາຕິ ນາຫາຣໍ ອປເນຕ຺ວາ ວຸຕ຺ຕໍ, ຕສ຺ມາ ຕຕ຺ຖ ອາຫາຣວເສນ ເອກໍ ເວທິຕພ຺ພໍ. ອິເມສຸ ປນ ທ຺ວີສຸ ປຈ຺ຈນີຍໂຕ ຐິເຕສຸ ຄຓນາ ນາມ ນຕ຺ຖິ, ຕສ຺ມາ ເອກໂຕ ນ ທສ຺ສິຕາຕິ.

ນເຫຕຸມູລກໍ.

໕໓໔. ນາຣມ຺ມຓມູລກາທີສຸປິ ປນ຺ນຣສເຕຣສເອກາທສນວາຕິ ສພ຺ພທຸເກສຸ ຈຕ຺ຕາໂຣວ ມູລຄຓນປຣິຈ຺ເຉທາ. ຕິກາທີສຸ ປນ ພຫຸປຈ຺ຈຍສມາໂຍເຄ ອິຕຣານິປິ ສຕ຺ຕ ປຎ຺ຈ ຕີຓິ ທ຺ເວ ເອກນ຺ຕິ ປຣິຈ຺ຉິນ຺ນຄຓນານິ ວິສ຺ສຊ຺ຊນານິ ລພ຺ຠນ຺ຕິເຍວ. ເຕສຸ ເຍສໍ ປຈ຺ຈຍານໍ ສມາໂຍເຄ ຍໍ ຍໍ ລພ຺ຠຕິ, ຕໍ ຕໍ ເຫຏ຺ຐາ ວຸຕ຺ຕນເຍນ ສາຘຸກໍ ສລ຺ລກ຺ເຂຕ຺ວາ ອຸທ຺ຘຣິຕພ຺ພໍ. ສພ຺ເພສຸ ເຈເຕສຸ ນາຣມ຺ມຓມູລກາທີສຸ ນາຣມ຺ມຓາທີນິ ປທານິ ອຕິກ຺ກນ຺ເຕນ ເຫຕຸປເທນ ສທ຺ຘິໍ ປຐມໍ ພນ຺ຘິຕ຺ວາວ ຈກ຺ການິ ກຕານິ. ຍສ຺ມາ ປນ ຕານິ ນເຫຕຸມູລເກ ວຸຕ຺ຕສທິສາເນວ ໂຫນ຺ຕິ, ຕສ຺ມາ ວິຕ຺ຖາເຣນ ອທສ຺ເສຕ຺ວາ ສງ຺ເຂປໍ ກຕ຺ວາ ທສ຺ສິຕານິ. ຕຕ຺ຖ ຍຖາ ນເຫຕຸມູລເກ ນາຣມ຺ມຓນອຸປນິສ຺ສຍາ ວິສຸໍ ວິສຸໍ ປນ຺ນຣສ ວາເຣ ລຠນ຺ຕາປິ ສມາໂຍເຄ ເຕຣສ ລຠິໍສຸ, ເອວໍ ສພ຺ພຕ຺ຖ ເຕຣເສວ ລຠນ຺ຕິ. ຍຖາ ຈ ນາຣມ຺ມຓນສຫຊາເຕຫິ ສທ຺ຘິໍ ນອຸປນິສ຺ສເຍ ສຕ຺ຕ ວາຣາ ໂຫນ຺ຕິ, ເອວໍ ນອຸປນິສ຺ສຍນາຣມ຺ມເຓຫິ ສທ຺ຘິໍ ນສຫຊາເຕປິ ສຕ຺ຕ.

໕໓໘. ນນິສ຺ສຍປຈ຺ຈຍາ ນອຸປນິສ຺ສຍປຈ຺ຈຍາ ນປຈ຺ຉາຊາເຕ ຕີຓີຕິ ກຸສລາທີນິ ອພ຺ຍາກຕນ຺ຕານິ. ເຕສຸ ກຏຕ຺ຕາຣູປຎ຺ຈ ອາຫາຣສມຸຏ຺ຐານຎ຺ຈ ປຈ຺ຈຍຸປ຺ປນ຺ນໍ.

໕໔໓-໕໔໔. ນາຫາຣນອິນ຺ທ຺ຣິຍມູລເກສຸ ຈຕຸກ຺ເກສຸ ນກມ຺ເມນ ສທ຺ຘິໍ ອຆຏິຕຕ຺ຕາ ນເຫຕຸມູລເກ ວິຍ ເອເກນ຺ເຕນ ລພ຺ຠນ຺ຕິ. ນອິນ຺ທ຺ຣິຍມູລເກ ນອຸປນິສ຺ສເຍ ຈ ນປຸເຣຊາເຕ ຈ ຐເປຕ຺ວາ ນາຫາເຣ ຕີຓີຕິ ກາຕພ຺ພນ຺ຕິ ນອິນ຺ທ຺ຣິຍປຈ຺ຈຍໂຕ ປຏ຺ຐາຍ ອິເມ ທ຺ເວ ປຈ຺ຈເຍ ຆເຏຕ຺ວາ ນອິນ຺ທ຺ຣິຍປຈ຺ຈຍາ…ເປ… ນອຸປນິສ຺ສຍປຈ຺ຈຍາ ນາຫາເຣ ຕີຓີ. ນອິນ຺ທ຺ຣິຍປຈ຺ຈຍາ…ເປ… ນປຸເຣຊາຕປຈ຺ຈຍາ ນາຫາເຣ ຕີຓີຕິ ເອວໍ ອິເມຫິ ປຈ຺ຈເຍຫິ ສທ຺ຘິໍ ນາຫາຣປຈ຺ຈເຍ ຈ ຄຓນາ ກາຕພ຺ພາຕິ ອຕ຺ໂຖ. ຕຕ຺ຖ ຕີຓີຕິ ກຸສລາທີເນວ ອພ຺ຍາກຕສ຺ສ. ຕຕ຺ຖ ກຸສລາກຸສລາ ກຏຕ຺ຕາຣູປານໍ ປຸເຣຊາຕສ຺ສ ຈ ກາຍສ຺ສ ປຈ຺ຉາຊາຕປຈ຺ຈເຍນ, ອພ຺ຍາກຕາ ປນ ຈິຕ຺ຕເຈຕສິກາ ປຈ຺ຉາຊາຕປຈ຺ຈເຍເນວາຕິ ອິເມສໍ ວເສນ ຕີຓິ ວິສ຺ສຊ຺ຊນານິ ກາຕພ຺ພານິ. ປຣໂຕ ປນ ນປຈ຺ຉາຊາເຕນ ສທ຺ຘິໍ ຆຏິຕຕ຺ຕາ ນາຫາເຣ ທ຺ເວຕິ ວຸຕ຺ຕໍ. ຕຕ຺ຖ ກຏຕ຺ຕາຣູປວເສນ ກຸສລໍ ອພ຺ຍາກຕສ຺ສ, ຕຖາ ອກຸສລນ຺ຕິ ເອຕ຺ຕກເມວ ລພ຺ຠຕິ. ອາຫາຣສ຺ສ ປນ ປຏິກ຺ຂິຕ຺ຕຕ຺ຕາ ກພຬີກາຣາຫາໂຣ ອຕ຺ຖິອວິຄຕວເສນາປິ ປຈ຺ຈຍຠາວໍ ນ ລຠຕິ.

໕໔໕. ນວິປ຺ປຍຸຕ຺ຕມູລກສ຺ສ ຈຕຸມູລເກ ນອຸປນິສ຺ສເຍ ປຎ຺ຈາຕິ ກຸສໂລ ສຫຊາຕກຸສລສ຺ສ, ກຸສໂລ ກຏຕ຺ຕາຣູປສງ຺ຂາຕສ຺ສ ອພ຺ຍາກຕສ຺ສ, ອກຸສໂລ ສຫຊາຕອກຸສລສ຺ສ, ຕຖາ ກຏຕ຺ຕາຣູປສງ຺ຂາຕສ຺ສ ອພ຺ຍາກຕສ຺ສ, ອພ຺ຍາກໂຕ ສຫຊາຕອພ຺ຍາກຕສ຺ສາຕິ ເອວໍ ປຎ຺ຈ. ນວິປ຺ປຍຸຕ຺ຕປຈ຺ຈຍາ…ເປ… ນອຸປນິສ຺ສເຍ ຕີຓີຕິ ເຫຏ຺ຐາ ວຸຕ຺ຕນເຍເນວ ກຸສລາທໂຍ ຕໂຍ ອພ຺ຍາກຕສ຺ສ.

໕໔໖. ໂນອຕ຺ຖິປຈ຺ຈຍາ ນເຫຕຸຍາ ນວາຕິ ນເຫຕຸປຈ຺ຈຍາ ໂນອຕ຺ຖິຍາ ວຸຕ຺ຕາ ນເວວ. ສພ຺ເພປິ ຫິ ເຕ ເອກມູລເກກາວສານາ ອນນ຺ຕຣປກຕູປນິສ຺ສຍວເສນ ລພ຺ຠນ຺ຕິ. ນາຣມ຺ມເຓ ນວາຕິປິ ເຕເຍວ ນາຣມ຺ມເຓ ຐຕ຺ວາ ນອຸປນິສ຺ສເຍ ທ຺ເວ ກາຕພ຺ພາ. ຍາວ ນິສ຺ສຍມ຺ປີຕິ ໂນອຕ຺ຖິມູລເກ ນເຍ ‘‘ໂນອຕ຺ຖິປຈ຺ຈຍາ ນເຫຕຸປຈ຺ຈຍາ ນາຣມ຺ມຓປຈ຺ຈຍາ’’ຕິ ເອວໍ ຈກ຺ກພນ຺ຘຄມເນນ ນາຣມ຺ມຓປຈ຺ຈເຍ ຐຕ຺ວາ ອິເມຫິ ວາ ຕີຫິ, ອິໂຕ ປເຣສຸ ນາຘິປຕິອາທີສຸ ອຎ຺ຎຕຣຎ຺ຎຕເຣນ ວາ ສທ຺ຘິໍ ຍາວ ນິສ຺ສຍປຈ຺ຈຍໍ ປາປຸຓາຕິ, ຕາວ ຄນ຺ຕ຺ວາ ນອຸປນິສ຺ສເຍ ທ຺ເວ ວິສ຺ສຊ຺ຊນານິ ກາຕພ຺ພານີຕິ ອຕ຺ໂຖ.

ເອວໍ ລກ຺ຂຓໍ ຐເປຕ຺ວາ ປຸນ ນາຣມ຺ມຓໂຕ ປຏ຺ຐາຍ ຍາວ ນິສ຺ສຍາ ສຕ຺ຕ ປຈ຺ຈເຍ ຄເຫຕ຺ວາ ນອຸປນິສ຺ສເຍ ທ຺ເວຕິ ອາຫ. ຕຕ຺ຖ ໂນອຕ຺ຖິປຈ຺ຈຍາ ນເຫຕຸປຈ຺ຈຍາ ນາຣມ຺ມຓປຈ຺ຈຍາ ນອຸປນິສ຺ສເຍ ທ຺ເວ, ໂນອຕ຺ຖິປຈ຺ຈຍາ ນເຫຕຸນາຣມ຺ມຓນາຘິປຕິປຈ຺ຈຍາ ນອຸປນິສ຺ສເຍ ທ຺ເວຕິ ເອວໍ ນາຣມ຺ມຓໂຕ ປຸຣິມປຈ຺ຉິເມຫິ ນິສ຺ສຍປຣິໂຍສາເນຫິ ສພ຺ພປເທຫິ ສທ຺ຘິໍ ໂຍຊນາ ກາຕພ຺ພາ. ທ຺ເວຕິ ປເນຕ຺ຖ ກຸສໂລ ອພ຺ຍາກຕສ຺ສ, ອກຸສໂລ ອພ຺ຍາກຕສ຺ສາຕິ ນານາກ຺ຂຓິກກມ຺ມວເສນ ກຏຕ຺ຕາຣູປສ຺ສ ປຈ຺ຈຍວເສນ ເວທິຕພ຺ພານິ. ນອຸປນິສ຺ສຍປເທນ ສທ຺ຘິໍ ນປຸເຣຊາຕາທີສຸ ສພ຺ພຕ຺ຖ ທ຺ເວ. ກມ຺ມປຈ຺ຈໂຍ ປເນຕ຺ຖ ນ ຄຫິໂຕ. ຕສ຺ມິຎ຺ຫິ ຄຫິເຕ ເຕປິ ທ຺ເວ ວາຣາ ຉິຊ຺ຊນ຺ຕິ, ວິສ຺ສຊ຺ຊນເມວ ນ ລພ຺ຠຕິ. ເອວໍ ເຍນ ເຍນ ສທ຺ຘິໍ ຍສ຺ສ ຍສ຺ສ ສໍສນ຺ທເນ. ຍໍ ລພ຺ຠຕິ, ຍຎ຺ຈ ປຣິຫາຍຕິ, ຕໍ ສພ຺ພໍ ສາຘຸກໍ ສລ຺ລກ຺ເຂຕ຺ວາ ສພ຺ພປຈ຺ຈນີເຍສຸ ຄຓນາ ອຸທ຺ຘຣິຕພ຺ພາຕິ.

ປຈ຺ຈນີຍຄຓນວຓ຺ຓນາ.