໖. ສມ຺ປຍຸຕ຺ຕວາຣວຓ຺ຓນາ

໓໙໒-໔໐໐. ສມ຺ປຍຸຕ຺ຕວາເຣ ກຸສລໍ ຘມ຺ມໍ ສມ຺ປຍຸຕ຺ໂຕຕິ ກຸສລໍ ຘມ຺ມໍ ສມ຺ປຍຸຕ຺ຕປຈ຺ຈຍໍ ກຕ຺ວາຕິ ອຕ຺ໂຖ. ເສສເມຕ຺ຖ ສໍສຏ຺ຐວາເຣ ວຸຕ຺ຕນເຍເນວ ເວທິຕພ຺ພໍ. ອວສາເນ ປນສ຺ສ ‘‘ສໍສຏ຺ຐຕ຺ຕໍ ນາມ ສມ຺ປຍຸຕ຺ຕຕ຺ຕໍ, ສມ຺ປຍຸຕ຺ຕຕ຺ຕໍ ນາມ ສໍສຏ຺ຐຕ຺ຕ’’ນ຺ຕິ ອິທໍ ອຸຠິນ຺ນມ຺ປິ ເອເຕສໍ ວາຣານໍ ອຕ຺ຖໂຕ ນິນ຺ນານາກຣຓຠາວທສ຺ສນຕ຺ຖໍ ວຸຕ຺ຕໍ. ອຕ຺ຖໂຕ ຫິ ເອເຕປິ ປຏິຈ຺ຈສຫຊາຕາ ວິຍ ປຈ຺ຈຍນິສ຺ສຍາ ວິຍ ຈ ນິນ຺ນານາກຣຓາ. ເອວໍ ສນ຺ເຕປິ ອຎ຺ຎມຎ຺ຎສ຺ສ ອຕ຺ຖນິຍມນຕ຺ຖໍ ວຸຕ຺ຕາ. ‘‘ສໍສຏ຺ຐາ ໂຍຊິຕາ ຫຍາ’’ຕິອາທີສຸ (ຊາ. ໒.໒໒.໗໐) ຫິ ອສມ຺ປຍຸຕ຺ຕມ຺ປິ ສໍສຏ຺ຐນ຺ຕິ ວຸຈ຺ຈຕິ. ‘‘ຍາ ສາ ວີມໍສາ ໂກສຊ຺ຊສຫຄຕາ ໂກສຊ຺ຊສມ຺ປຍຸຕ຺ຕາ’’ຕິອາທີສຸ (ສໍ. ນິ. ໕.໘໓໒) ອສໍສຏ຺ຐໍ ໂວກິຓ຺ຓມ຺ປິ ສມ຺ປຍຸຕ຺ຕນ຺ຕິ. ອິຕິ ສໍສຏ຺ຐວາເຣນ ເອກຸປ຺ປາທລກ຺ຂຓສ຺ສ ສມ຺ປຍຸຕ຺ຕສ຺ສ ສໍສຏ຺ຐຠາວໍ ສມ຺ປຍຸຕ຺ຕວາເຣນ ຈ ສໍສຏ຺ຐສ຺ສ ເອກຸປ຺ປາທາທິລກ຺ຂຓສ຺ສ ສມ຺ປຍຸຕ຺ຕຠາວໍ ນິຍເມຕຸໍ ອຸໂຠເປເຕ ວຸຕ຺ຕາ. ອປິຈ ຕຖາ ພຸຊ຺ຌນການໍ ອຊ຺ຌາສຍວເສນ ເທສນາວິລາເສນ ນິຣຸຕ຺ຕິປຏິສມ຺ຠິທາປເຠທຊານນວເສນ ຈາປິ ເອເຕ ອຸໂຠປິ ວຸຕ຺ຕາຕິ.

ສມ຺ປຍຸຕ຺ຕວາຣວຓ຺ຓນາ.

ເອເຕສຸ ປນ ຉສຸ ວາເຣສຸ ອຕ຺ຖິ ໂກຈິ ປຈ຺ຈໂຍ ເອກນ຺ຕໍ ອນຸໂລມໂຕ ນ ຕິຏ຺ຐຕິ, ປຈ຺ຈນີກໂຕວ ຕິຏ຺ຐຕິ; ອຕ຺ຖິ ເອກນ຺ຕໍ ປຈ຺ຈນີກໂຕ ນ ຕິຏ຺ຐຕິ, ອນຸໂລມໂຕວ ຕິຏ຺ຐຕິ; ອຕ຺ຖິ ອເນກນ຺ຕໍ ອນຸໂລມໂຕ ເຈວ ຕິຏ຺ຐຕິ, ປຈ຺ຈນີກໂຕ ຈາຕິ ອິທໍ ປກິຓ຺ຓກໍ ເວທິຕພ຺ພໍ. ຕຕ຺ຖ ປຐໂມ ປຎ຺ໂຫ ປຈ຺ຉາຊາຕສ຺ສ, ທຸຕິໂຍ ມຫາຈຕຸກ຺ກສ຺ສ, ຕຕິໂຍ ຍຸຊ຺ຊມານການໍ ເສສານໍ ວເສນ ເວທິຕພ຺ໂພຕິ.