໓. ອຘິປຕິປຈ຺ຈຍນິທ຺ເທສວຓ຺ຓນາ

໓. ອຘິປຕິປຈ຺ຈຍນິທ຺ເທເສ ຉນ຺ທາຘິປຕີຕິ ຉນ຺ທສງ຺ຂາໂຕ ອຘິປຕິ. ຉນ຺ທໍ ຘຸຣໍ ກຕ຺ວາ ຉນ຺ທໍ ເຊຏ຺ຐກໍ ກຕ຺ວາ ຈິຕ຺ຕຸປ຺ປຕ຺ຕິກາເລ ອຸປ຺ປນ຺ນສ຺ສ ກຕ຺ຕຸກມ຺ຍຕາຉນ຺ທສ຺ເສຕໍ ນາມໍ. ເສເສສຸປິ ເອເສວ ນໂຍ. ກສ຺ມາ ປນ ຍຖາ ເຫຕຸປຈ຺ຈຍນິທ຺ເທເສ ເຫຕູ ເຫຕຸສມ຺ປຍຸຕ຺ຕການ’’ນ຺ຕິ ວຸຕ຺ຕໍ, ເອວມິຘ ‘‘ອຘິປຕີ ອຘິປຕິສມ຺ປຍຸຕ຺ຕການນ຺ຕິ ອວຕ຺ວາ ‘‘ຉນ຺ທາຘິປຕິ ຉນ຺ທສມ຺ປຍຸຕ຺ຕການ’’ນ຺ຕິອາທິນາ ນເຍນ ເທສນາ ກຕາຕິ? ເອກກ຺ຂເຓ ອຠາວໂຕ. ປຸຣິມນຍສ຺ມິຎ຺ຫິ ທ຺ເວ ຕໂຍ ເຫຕູ ເອກກ຺ຂເຓປິ ເຫຕຸປຈ຺ຈໂຍ ໂຫນ຺ຕິ ມູລຏ຺ເຐນ. ອຸປກາຣກຠາວສ຺ສ ອວິຊຫນໂຕ. ອຘິປຕິ ປນ ເຊຏ຺ຐກຏ຺ເຐນ ອຸປກາຣໂກ, ນ ຈ ເອກກ຺ຂເຓ ພຫູ ເຊຏ຺ຐກາ ນາມ ໂຫນ຺ຕິ. ຕສ຺ມາ ເອກໂຕ ອຸປ຺ປນ຺ນານມ຺ປິ ເນສໍ ເອກກ຺ຂເຓ ອຘິປຕິປຈ຺ຈຍຠາໂວ ນຕ຺ຖິ. ຕສ຺ສ ອຘິປຕິປຈ຺ຈຍຠາວສ຺ສ ເອກກ຺ຂເຓ ອຠາວໂຕ ອິຘ ເອວໍ ເທສນາ ກຕາຕິ.

ເອວໍ ສຫຊາຕາຘິປຕິໍ ທສ຺ເສຕ຺ວາ ອິທານິ ອາຣມ຺ມຓາຘິປຕິໍ ທສ຺ເສຕຸໍ ຍໍ ຍໍ ຘມ຺ມໍ ຄຣຸໍ ກຕ຺ວາຕິອາທິ ອາຣທ຺ຘໍ. ຕຕ຺ຖ ຍໍ ຍໍ ຘມ຺ມນ຺ຕິ ຍໍ ຍໍ ອາຣມ຺ມຓຘມ຺ມໍ. ຄຣຸໍ ກຕ຺ວາຕິ ຄຣຸກາຣຈິຕ຺ຕີກາຣວເສນ ວາ ອສ຺ສາທວເສນ ວາ ຄຣຸໍ ຠາຣິຍໍ ລທ຺ຘພ຺ພໍ ອວິຊຫິຕພ຺ພໍ ອນວຎ຺ຎາຕໍ ກຕ຺ວາ. ເຕ ເຕ ຘມ຺ມາຕິ ເຕ ເຕ ຄຣຸກາຕພ຺ພຘມ຺ມາ. ເຕສໍ ເຕສນ຺ຕິ ເຕສໍ ເຕສໍ ຄຣຸກາຣກຘມ຺ມານໍ. ອຘິປຕິປຈ຺ຈເຍນາຕິ ອາຣມ຺ມຓາຘິປຕິປຈ຺ຈເຍນ ປຈ຺ຈໂຍ ໂຫຕີຕິ ອຍໍ ຕາເວຕ຺ຖ ປາຬິວຓ຺ຓນາ.

ອຍໍ ປນ ອຘິປຕິ ນາມ ສຫຊາຕາຣມ຺ມຓວເສນ ທຸວິໂຘ. ຕຕ຺ຖ ສຫຊາໂຕ ຉນ຺ທາທິວເສນ ຈຕຸພ຺ພິໂຘ. ເຕສຸ ເອເກໂກ ກາມາວຈຣາທິວເສນ ຠູມິໂຕ ຈຕຸພ຺ພິໂຘ. ຕຕ຺ຖ ກາມາວຈໂຣ ກຸສລາກຸສລກິຣິຍວເສນ ຕິວິໂຘ. ອກຸສລໍ ປຕ຺ວາ ປເນຕ຺ຖ ວີມໍສາຘິປຕິ ນ ລພ຺ຠຕິ. ຣູປາຣູປາວຈໂຣ ກຸສລກິຣິຍວເສນ ທຸວິໂຘ, ອປຣິຍາປນ຺ໂນ ກຸສລວິປາກວເສນ ທຸວິໂຘ. ອາຣມ຺ມຓາຘິປຕິ ປນ ຊາຕິເຠທໂຕ ກຸສລາກຸສລວິປາກກິຣິຍຣູປນິພ຺ພານານໍ ວເສນ ຉພ຺ພິໂຘຕິ ເອວເມຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ເອວໍ ຠິນ຺ເນ ປເນຕ຺ຖ ສຫຊາຕາຘິປຕິມ຺ຫິ ຕາວ ກາມາວຈຣກຸສລກິຣິຍສງ຺ຂາໂຕ ອຘິປຕິ ທຸເຫຕຸກຕິເຫຕຸເກສຸ ຈິຕ຺ຕຸປ຺ປາເທສຸ ຉນ຺ທາທີນໍ ອຎ຺ຎຕຣໍ ເຊຏ຺ຐກໍ ກຕ຺ວາ ອຸປ຺ປຕ຺ຕິກາເລ ອຕ຺ຕນາ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປສ຺ສ ຈ ອຘິປຕິປຈ຺ຈໂຍ ໂຫຕິ. ຣູປາວຈຣກຸສລກິຣິຍສງ຺ຂາເຕປິ ເອເສວ ນໂຍ. ອຍໍ ປນ ເອກນ຺ເຕເນວ ລພ຺ຠຕິ. ນ ຫິ ເຕ ຘມ຺ມາ ສຫຊາຕາຘິປຕິໍ ວິນາ ອຸປ຺ປຊ຺ຊນ຺ຕິ. ອຣູປາວຈຣກຸສລກິຣິຍສງ຺ຂາໂຕ ປນ ປຎ຺ຈໂວກາເຣ ຣູປາວຈຣອຘິປຕິສທິໂສວ ຈຕຸໂວກາເຣ ປນ ສມ຺ປຍຸຕ຺ຕຘມ຺ມານຎ຺ເຎວ ອຘິປຕິປຈ຺ຈໂຍ ໂຫຕິ. ຕຖາ ຕຕ຺ຖຸປ຺ປນ຺ໂນ ສພ຺ໂພປິ ກາມາວຈຣາຘິປຕິ. ອປຣິຍາປນ຺ໂນ ກຸສລໂຕປິ ວິປາກໂຕປິ ປຎ຺ຈໂວກາເຣ ເອກນ຺ເຕເນວ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປານຎ຺ຈ ອຘິປຕິປຈ຺ຈໂຍ ໂຫຕິ, ຈຕຸໂວກາເຣ ອຣູປຘມ຺ມານຎ຺ເຎວ. ອກຸສໂລ ກາມຠເວ ມິຈ຺ຉຕ຺ຕນິຍຕຈິຕ຺ເຕສຸ ເອກນ຺ເຕເນວ ສມ຺ປຍຸຕ຺ຕການຎ຺ເຈວ ຈິຕ຺ຕສມຸຏ຺ຐານຣູປານຎ຺ຈ ອຘິປຕິປຈ຺ຈໂຍ ໂຫຕິ. ອນິຍໂຕ ກາມຠວຣູປຠເວສຸ ອຕ຺ຕໂນ ອຘິປຕິກາເລ ເຕສຎ຺ເຎວ. ອຣູປຠເວ ອຣູປຘມ຺ມານຎ຺ເຎວ ອຘິປຕິປຈ຺ຈໂຍ ໂຫຕິ. ອຍໍ ຕາວ ສຫຊາຕາຘິປຕິມ຺ຫິ ນໂຍ.

ອາຣມ຺ມຓາຘິປຕິມ຺ຫິ ປນ ກາມາວຈຣກຸສໂລ ອາຣມ຺ມຓາຘິປຕິ ກາມາວຈຣກຸສລສ຺ສ ໂລຠສຫຄຕາກຸສລສ຺ສາຕິ ອິເມສໍ ທ຺ວິນ຺ນໍ ຣາສີນໍ ອາຣມ຺ມຓາຘິປຕິປຈ຺ຈໂຍ ໂຫຕິ. ຣູປາວຈຣາຣູປາວຈເຣປິ ກຸສລາຣມ຺ມຓາຘິປຕິມ຺ຫິ ເອເສວ ນໂຍ. ອປຣິຍາປນ຺ນກຸສໂລ ປນ ອາຣມ຺ມຓາຘິປຕິ ກາມາວຈຣໂຕ ຎາຓສມ຺ປຍຸຕ຺ຕກຸສລສ຺ສ ເຈວ ຎາຓສມ຺ປຍຸຕ຺ຕກິຣິຍສ຺ສ ຈ ອາຣມ຺ມຓາຘິປຕິປຈ຺ຈໂຍ ໂຫຕິ. ອກຸສໂລ ປນ ອາຣມ຺ມຓາຘິປຕິ ນາມ ໂລຠສຫຄຕຈິຕ຺ຕຸປ຺ປາໂທ ວຸຈ຺ຈຕິ. ໂສ ໂລຠສຫຄຕາກຸສລສ຺ເສວ ອາຣມ຺ມຓາຘິປຕິປຈ຺ຈໂຍ ໂຫຕິ. ກາມາວຈໂຣ ປນ ວິປາກາຣມ຺ມຓາຘິປຕິ ໂລຠສຫຄຕາກຸສລສ຺ເສວ ອາຣມ຺ມຓາຘິປຕິປຈ຺ຈໂຍ ໂຫຕິ. ຕຖາ ຣູປາວຈຣາຣູປາວຈຣວິປາກາຣມ຺ມຓາຘິປຕິ. ໂລກຸຕ຺ຕໂຣ ປນ ວິປາກາຣມ຺ມຓາຘິປຕິ ກາມາວຈຣໂຕ ຎາຓສມ຺ປຍຸຕ຺ຕກຸສລກິຣິຍານຎ຺ເຎວ ອາຣມ຺ມຓາຘິປຕິປຈ຺ຈໂຍ ໂຫຕິ. ກາມາວຈຣາທິເຠທໂຕ ປນ ຕິວິໂຘປິ ກິຣິຍາຣມ຺ມຓາຘິປຕິ ໂລຠສຫຄຕາກຸສລສ຺ເສວ ອາຣມ຺ມຓາຘິປຕິປຈ຺ຈໂຍ ໂຫຕິ. ຈຕຸສມຸຏ຺ຐານິກຣູປສງ຺ຂາໂຕ ຣູປກ຺ຂນ຺ໂຘ ອາຣມ຺ມຓາຘິປຕິ ໂລຠສຫຄຕາກຸສລສ຺ເສວ ອາຣມ຺ມຓາຘິປຕິປຈ຺ຈໂຍ ໂຫຕິ. ນິພ຺ພານໍ ກາມາວຈຣໂຕ ຎາຓສມ຺ປຍຸຕ຺ຕກຸສລສ຺ສ ຎາຓສມ຺ປຍຸຕ຺ຕກິຣິຍສ຺ສ ໂລກຸຕ຺ຕຣກຸສລສ຺ສ ໂລກຸຕ຺ຕຣວິປາກສ຺ສ ຈາຕິ ອິເມສໍ ຈຕຸນ຺ນໍ ຣາສີນໍ ອາຣມ຺ມຓາຘິປຕິປຈ຺ຈໂຍ ໂຫຕີຕິ ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ອຘິປຕິປຈ຺ຈຍນິທ຺ເທສວຓ຺ຓນາ.