໔. ອນນ຺ຕຣປຈ຺ຈຍນິທ຺ເທສວຓ຺ຓນາ

໔. ອນນ຺ຕຣປຈ຺ຈຍນິທ຺ເທເສ ມໂນຘາຕຸຍາຕິ ວິປາກມໂນຘາຕຸຍາ. ມໂນວິຎ຺ຎາຓຘາຕຸຍາຕິ ສນ຺ຕີຣຓກິຈ຺ຈາຍ ອເຫຕຸກວິປາກມໂນວິຎ຺ຎາຓຘາຕຸຍາ. ຕໂຕ ປຣໍ ປນ ໂວຏ຺ຐພ຺ພນຊວນຕທາຣມ຺ມຓຠວງ຺ຄກິຈ຺ຈາ ມໂນວິຎ຺ຎາຓຘາຕຸໂຍ ວຕ຺ຕພ຺ພາ ສິຍຸໍ, ຕາ ອວຸຕ຺ຕາປິ ອິມິນາວ ນເຍນ ເວທິຕພ຺ພາຕິ ນຍໍ ທສ຺ເສຕ຺ວາ ເທສນາ ສງ຺ຂິຕ຺ຕາ. ‘‘ປຸຣິມາ ປຸຣິມາ ກຸສລາ ຘມ຺ມາ’’ຕິອາທິເກ ຈ ຉຏ຺ຐນເຍ ຕາ ສງ຺ຄຫິຕາຕິປິ ອິຘ ນ ວຸຕ຺ຕາຕິ ເວທິຕພ຺ພາ. ຕຕ຺ຖ ປຸຣິມາ ປຸຣິມາຕິ ຉສຸ ທ຺ວາເຣສຸປິ ອນນ຺ຕຣາຕີຕາ ກຸສລຊວນຘມ຺ມາ ທຏ຺ຐພ຺ພາ. ປຈ຺ຉິມານໍ ປຈ຺ຉິມານນ຺ຕິ ອນນ຺ຕຣອຸປ຺ປຊ຺ຊມານານຎ຺ເຎວ. ກຸສລານນ຺ຕິ ສທິສກຸສລານໍ. ອພ຺ຍາກຕານນ຺ຕິ ອິທໍ ປນ ກຸສລານນ຺ຕຣໍ ຕທາຣມ຺ມຓຠວງ຺ຄຜລສມາປຕ຺ຕິວເສນ ວຸຕ຺ຕໍ. ອກຸສລມູລເກ ອພ຺ຍາກຕານນ຺ຕິ ຕທາຣມ຺ມຓຠວງ຺ຄສງ຺ຂາຕານຎ຺ເຎວ. ອພ຺ຍາກຕມູລເກ ອພ຺ຍາກຕານນ຺ຕິ ອາວຊ຺ຊນຊວນວເສນ ວາ ຠວງ຺ຄວເສນ ວາ ປວຕ຺ຕານໍ ກິຣິຍວິປາກາພ຺ຍາກຕານໍ ກິຣິຍມໂນຘາຕຸໂຕ ປຏ຺ຐາຍ ປນ ຍາວ ໂວຏ຺ຐພ຺ພນກິຈ຺ຈາ ມໂນວິຎ຺ຎາຓຘາຕຸ, ຕາວ ປວຕ຺ເຕສຸ ວີຖິຈິຕ຺ເຕສຸປິ ອຍໍ ນໂຍ ລພ຺ຠເຕວ. ກຸສລານນ຺ຕິ ປຎ຺ຈທ຺ວາເຣ ໂວຏ຺ຐພ຺ພນານນ຺ຕຣານໍ ມໂນທ຺ວາເຣ ອາວຊ຺ຊນານ຺ຕຣານໍ ປຐມຊວນກຸສລານໍ. ອກຸສລານນ຺ຕິ ປເທປິ ເອເສວ ນໂຍ. ເຍສໍ ເຍສນ຺ຕິ ອິທໍ ສພ຺ເພສມ຺ປິ ອນນ຺ຕຣປຈ຺ຈຍຘມ຺ມານໍ. ສງ຺ເຂປລກ຺ຂຓນ຺ຕິ ອຍໍ ຕາເວຕ຺ຖ ປາຬິວຓ຺ຓນາ.

ອຍໍ ປນ ອນນ຺ຕຣປຈ຺ຈໂຍ ນາມ ຐເປຕ຺ວາ ນິພ຺ພານໍ ຈຕຸຠູມໂກ ອຣູປຘມ຺ມຣາສິເຍວາຕິ ເວທິຕພ຺ໂພ. ໂສ ຊາຕິວເສນ ກຸສລາກຸສລວິປາກກິຣິຍໂຕ ຈຕຸຘາ ຠິຊ຺ຊຕິ. ຕຕ຺ຖ ກຸສໂລ ກາມາວຈຣາທິເຠທໂຕ ຈຕຸພ຺ພິໂຘ ໂຫຕິ, ອກຸສໂລ ກາມາວຈໂຣວ ວິປາໂກ ຈຕຸຠູມໂກ, ກິຣິຍານນ຺ຕຣປຈ຺ຈໂຍ ປນ ເຕ ຠູມໂກຕິ ເອວເມຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ເອວໍ ຠິນ຺ເນ ປເນຕ຺ຖ ກາມາວຈຣກຸສໂລ ອຕ຺ຕນາ ສທິສສ຺ເສວ ກາມາວຈຣກຸສລສ຺ສ ອນນ຺ຕຣປຈ຺ຈໂຍ ໂຫຕິ. ຎາຓສມ຺ປຍຸຕ຺ຕກາມາວຈຣກຸສໂລ ປນ ຣູປາວຈຣກຸສລສ຺ສ ອຣູປາວຈຣກຸສລສ຺ສ ໂລກຸຕ຺ຕຣກຸສລສ຺ສາຕິ ອິເມສໍ ຕິຓ຺ຓໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ກາມາວຈຣກຸສໂລ ຈ ກາມາວຈຣວິປາກສ຺ສ, ຣູປາວຈຣາຣູປາວຈຣວິປາກສ຺ສ, ຎາຓສມ຺ປຍຸຕ຺ໂຕ ໂລກຸຕ຺ຕຣວິປາກສ຺ສາປີຕິ ອິເມສໍ ຈຕຸນ຺ນໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ຣູປາວຈຣກຸສໂລ ຣູປາວຈຣກຸສລສ຺ສ, ຎາຓສມ຺ປຍຸຕ຺ຕກາມາວຈຣວິປາກສ຺ສ, ຣູປາວຈຣວິປາກສ຺ສາຕິ ອິເມສໍ ຕິຓ຺ຓໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ອຣູປາວຈຣກຸສໂລ ເຕສໍ ທ຺ວິນ຺ນໍ ວິປາການໍ ອຕ຺ຕໂນ ກຸສລສ຺ສ ວິປາກສ຺ສ ຈາຕິ ອວິເສເສນ ຈຕຸນ຺ນໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ວິເສເສນ ປເນຕ຺ຖ ເນວສຎ຺ຎານາສຎ຺ຎາຍຕນກຸສໂລ ອນາຄາມິຜລສງ຺ຂາຕສ຺ສ ໂລກຸຕ຺ຕຣວິປາກສ຺ສປິ ອນນ຺ຕຣປຈ຺ຈໂຍ ໂຫຕິ. ໂລກຸຕ຺ຕຣກຸສໂລ ໂລກຸຕ຺ຕຣວິປາກສ຺ເສວ ອນນ຺ຕຣປຈ຺ຈໂຍ ໂຫຕິ. ອກຸສໂລ ອວິເສເສນ ອກຸສລສ຺ສ ເຈວ ກຸສລາກຸສລວິປາກສ຺ສ ຈ. ວິເສເສນ ປເນຕ຺ຖ ສຸຂມຊ຺ຌຕ຺ຕເວທນາສມ຺ປຍຸຕ຺ໂຕ ອກຸສໂລ ຣູປາວຈຣາຣູປາວຈຣວິປາກສ຺ສາປີຕິ ອິເມສໍ ຈຕຸນ຺ນໍ ຣາສີນໍ ອນນ຺ຕຣປຈ຺ຈໂຍ ໂຫຕິ.

ກາມາວຈຣວິປາກສ຺ສ ຎາຓສມ຺ປຍຸຕ຺ໂຕ ວາ ຎາຓວິປ຺ປຍຸຕ຺ໂຕ ວາ ວິປາໂກ ກາມາວຈຣກິຣິຍາວຊ຺ຊນສ຺ສ, ຎາຓສມ຺ປຍຸຕ຺ຕວິປາໂກ ປເນຕ຺ຖ ປຏິສນ຺ຘິວເສນ ອຸປ຺ປຊ຺ຊມານສ຺ສ ຣູປາວຈຣາຣູປາວຈຣວິປາກສ຺ສາປີຕິ ອິເມສໍ ຈຕຸນ຺ນໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ຣູປາວຈຣວິປາໂກ ສເຫຕຸກກາມາວຈຣວິປາກສ຺ສ ຣູປາວຈຣາຣູປາວຈຣວິປາກສ຺ສ ກາມາວຈຣກິຣິຍາວຊ຺ຊນສ຺ສາຕິ ອິເມສໍ ຈຕຸນ຺ນໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ອຣູປາວຈຣວິປາໂກ ຕິເຫຕຸກກາມາວຈຣວິປາກສ຺ສ ອຣູປາວຈຣວິປາກສ຺ສ ກາມາວຈຣກິຣິຍາວຊ຺ຊນສ຺ສາຕິ ຕິຓ຺ຓໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ໂລກຸຕ຺ຕຣວິປາໂກ ຕິເຫຕຸກກາມາວຈຣວິປາກສ຺ສ ຣູປາວຈຣາຣູປາວຈຣໂລກຸຕ຺ຕຣວິປາກສ຺ສາຕິ ຈຕຸນ຺ນໍ ຣາສີນໍ ອນນ຺ຕຣປຈ຺ຈໂຍ ໂຫຕິ.

ກາມາວຈຣກິຣິຍໍ ກາມາວຈຣກຸສລາກຸສລສ຺ສ ຈຕຸຠູມກວິປາກສ຺ສ ເຕຠູມກກິຣິຍສ຺ສາຕິ ນວນ຺ນໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ຣູປາວຈຣກິຣິຍໍ ຕິເຫຕຸກກາມາວຈຣວິປາກສ຺ສ ຣູປາວຈຣວິປາກສ຺ສ ຣູປາວຈຣກິຣິຍສ຺ສາຕິ ຕິຓ຺ຓໍ ຣາສີນໍ ອນນ຺ຕຣປຈ຺ຈໂຍ ໂຫຕິ. ອຣູປາວຈຣກິຣິຍໍ ຕິເຫຕຸກກາມາວຈຣວິປາກສ຺ສ ຣູປາວຈຣາຣູປາວຈຣໂລກຸຕ຺ຕຣວິປາກສ຺ສ ອຣູປາວຈຣກິຣິຍສ຺ສາຕິ ປຎ຺ຈນ຺ນໍ ຣາສີນໍ ອນນ຺ຕຣປຈ຺ຈໂຍ ໂຫຕີຕິ. ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ອນນ຺ຕຣປຈ຺ຈຍນິທ຺ເທສວຓ຺ຓນາ.