໒໐. ວິປ຺ປຍຸຕ຺ຕປຈ຺ຈຍນິທ຺ເທສວຓ຺ຓນາ

໒໐. ວິປ຺ປຍຸຕ຺ຕປຈ຺ຈຍນິທ຺ເທເສ ຣູປິໂນ ຘມ຺ມາ ອຣູປີນນ຺ຕິ ອິທໍ ຕາວ ຫທຍວຕ຺ຖຸໂນ ເຈວ ຈກ຺ຂຸນ຺ທ຺ຣິຍາທີນຎ຺ຈ ວເສນ ເວທິຕພ຺ພໍ. ຣູປຘມ຺ເມສຸ ຫິ ເອເຕເຍວ ຉ ໂກຏ຺ຐາສາ ອຣູປກ຺ຂນ຺ຘານໍ ວິປ຺ປຍຸຕ຺ຕປຈ຺ຈເຍນ ປຈ຺ຈຍາ ໂຫນ຺ຕິ. ຣູປາຍຕນາທໂຍ ປນ ອາຣມ຺ມຓຘມ຺ມາ ກິຎ຺ຈາປິ ວິປ຺ປຍຸຕ຺ຕຘມ຺ມາ, ວິປ຺ປຍຸຕ຺ຕປຈ຺ຈຍາ ປນ ນ ໂຫນ຺ຕິ. ກິໍ ກາຣຓາ? ສມ຺ປໂຍຄາສງ຺ກາຍ ອຠາວໂຕ. ອຣູປິໂນ ຫິ ຂນ຺ຘາ ຈກ຺ຂາທີນໍ ວຕ຺ຖູນໍ ອພ຺ຠນ຺ຕຣໂຕ ນິກ຺ຂມນ຺ຕາ ວິຍ ອຸປ຺ປຊ຺ຊນ຺ຕິ. ຕຕ຺ຖ ອາສງ຺ກາ ໂຫຕິ – ‘‘ກິໍ ນຸ ໂຂ ເອເຕ ເອເຕຫິ ສມ຺ປຍຸຕ຺ຕາ, ອຸທາຫຸ ວິປ຺ປຍຸຕ຺ຕາ’’ຕິ. ອາຣມ຺ມຓຘມ຺ມາ ປນ ວຕ຺ຖຸນິສ຺ສເຍນ ອຸປ຺ປຊ຺ຊມານານໍ ອາຣມ຺ມຓມຕ຺ຕາ ໂຫນ຺ຕີຕິ ນຕ຺ຖິ ເຕສຸ ສມ຺ປໂຍຄາສງ຺ກາ. ອິຕິ ສມ຺ປໂຍຄາສງ຺ກາຍ ອຠາວໂຕ ນ ເຕ ວິປ຺ປຍຸຕ຺ຕປຈ຺ຈຍາ. ຫທຍວຕ຺ຖຸອາທີສຸ ເອວ ປນາຍໍ ວິປ຺ປຍຸຕ຺ຕປຈ຺ຈຍຕາ ເວທິຕພ຺ພາ. ວຸຕ຺ຕມ຺ປິ ເຈຕໍ ປຎ຺ຫາວາເຣ – ວຕ຺ຖຸ ກຸສລານໍ ຂນ຺ຘານໍ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ວຕ຺ຖຸ ອກຸສລານໍ ຂນ຺ຘານໍ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ຈກ຺ຂາຍຕນໍ ຈກ຺ຂຸວິຎ຺ຎາຓສ຺ສ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ໂສຕ… ຆານ… ຊິວ຺ຫາ… ກາຍາຍຕນໍ ກາຍວິຎ຺ຎາຓສ຺ສ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ວຕ຺ຖຸ ວິປາກາພ຺ຍາກຕານໍ ກິຣິຍາພ຺ຍາກຕານໍ ຂນ຺ຘານໍ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍຕິ.

ອຣູປິໂນ ຘມ຺ມາ ຣູປີນນ຺ຕິ ອິທໍ ປນ ຈຕຸນ຺ນໍ ຂນ຺ຘານໍ ວເສນ ເວທິຕພ຺ພໍ. ອຣູປຘມ຺ເມສຸ ຫິ ຈຕ຺ຕາໂຣ ຂນ຺ຘາວ ສຫຊາຕປຸເຣຊາຕານໍ ຣູປຘມ຺ມານໍ ວິປ຺ປຍຸຕ຺ຕປຈ຺ຈຍາ ໂຫນ຺ຕິ, ນິພ຺ພານໍ ປນ ອຣູປມ຺ປິ ສມານໍ ຣູປສ຺ສ ວິປ຺ປຍຸຕ຺ຕປຈ຺ຈໂຍ ນ ໂຫຕິ. ‘‘ຈຕູຫິ ສມ຺ປໂຍໂຄ ຈຕູຫິ ວິປ຺ປໂຍໂຄ’’ຕິ ຫິ ວຸຕ຺ຕໍ. ອິຕິ ຈຕຸນ຺ນໍ ອຣູປກ຺ຂນ຺ຘານໍເຍວ ວິປ຺ປຍຸຕ຺ຕປຈ຺ຈຍຕາ ເວທິຕພ຺ພາ. ວຸຕ຺ຕມ຺ປິ ເຈຕໍ ປຎ຺ຫາວາເຣ – ສຫຊາຕາ ກຸສລາ ຂນ຺ຘາ ຈິຕ຺ຕສມຸຏ຺ຐານານໍ ຣູປານໍ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ປຈ຺ຉາຊາຕາ ກຸສລາ ຂນ຺ຘາ ປຸເຣຊາຕສ຺ສ ອິມສ຺ສ ກາຍສ຺ສ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ປຏິສນ຺ຘິກ຺ຂເຓ ວິປາກາພ຺ຍາກຕາ ຂນ຺ຘາ ກຏຕ຺ຕາຣູປານໍ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ, ຂນ຺ຘາ ວຕ຺ຖຸສ຺ສາຕິ. ເອວໍ ຕາເວຕ຺ຖ ປາຬິວຓ຺ຓນາ ເວທິຕພ຺ພາ.

ອຍໍ ປນ ວິປ຺ປຍຸຕ຺ຕປຈ຺ຈໂຍ ນາມ ສງ຺ເຂປໂຕ ປຎ຺ຈໂວກາຣຠເວ ວຕ຺ຕມານາ ຣູປາຣູປຘມ຺ມາ. ເຕສຸ ຣູປໍ ວຕ຺ຖຸໂນ ຈກ຺ຂາທີນຎ຺ຈ ວເສນ ຉຘາ ຠິນ຺ນໍ, ອຣູປໍ ປຎ຺ຈໂວກາຣຠເວ ອຸປ຺ປນ຺ນກຸສລາກຸສລວິປາກກິຣິຍວເສນ ຈຕຸຘາ ຠິນ຺ນໍ. ຕສ຺ສ ຠູມິໂຕ ກາມາວຈຣາທິວເສນ ຈຕຸຘາ, ເອກຘາ, ຕິຘາ, ຕິຘາຕິ ເອກທສຘາ ເຠໂທ ໂຫຕິ. ອາຣຸປ຺ປວິປາກຎ຺ຫິ ວິປ຺ປຍຸຕ຺ຕປຈ຺ຈໂຍ ນ ໂຫຕີຕິ ເອວເມຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ເອວໍ ຠິນ຺ເນ ປເນຕ຺ຖ ປຎ຺ຈໂວກາຣຠເວ ອຸປ຺ປນ຺ນໍ ຈຕຸຠູມກມ຺ປິ ກຸສລໍ ອກຸສລຎ຺ຈ ອຕ຺ຕນາ ສມຸຏ຺ຐາປິຕຈິຕ຺ຕສມຸຏ຺ຐານຣູປສ຺ສ ສຫຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍ ໂຫຕິ. ອຸປ຺ປາທກ຺ຂຓໍ ປນ ອຕິກ຺ກມິຕ຺ວາ ຐິຕິກ຺ຂຓໍ ປຕ຺ຕສ຺ສ ປຸເຣຊາຕສ຺ສ ຈຕຸສມຸຏ຺ຐານິກຕິສມຸຏ຺ຐານິກຣູປກາຍສ຺ສ ປຈ຺ຉາຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍ ໂຫຕິ. ເອຕ຺ຖ ຈ ຕິສມຸຏ຺ຐານິກກາໂຍຕິ ອາຫາຣສມຸຏ຺ຐານສ຺ສ ອຠາວໂຕ ພ຺ຣຫ຺ມປາຣິສຊ຺ຊາທີນໍ ກາໂຍ ເວທິຕພ຺ໂພ. ກາມາວຈຣຣູປາວຈຣວິປາກໍ ປນ ປວຕ຺ເຕ ຈິຕ຺ຕສມຸຏ຺ຐານຣູປສ຺ສ, ປຏິສນ຺ຘິຍໍ ກຏຕ຺ຕາຣູປສ຺ສ ຈ ສຫຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍ ໂຫຕິ. ໂລກຸຕ຺ຕຣວິປາກໍ ຈິຕ຺ຕສມຸຏ຺ຐານຣູປສ຺ເສວ. ຕິວິຘມ຺ປິ ປເນຕໍ ປຸເຣຊາຕສ຺ສ ຈຕຸສມຸຏ຺ຐານິກຕິສມຸຏ຺ຐານິກກາຍສ຺ສ ປຈ຺ຉາຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ເຕຠູມກມ຺ປິ ກິຣິຍໍ ຈິຕ຺ຕສມຸຏ຺ຐານສ຺ສ ສຫຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍ, ປຸເຣຊາຕສ຺ສ ຈຕຸສມຸຏ຺ຐານິກຕິສມຸຏ຺ຐານິກກາຍສ຺ສ ປຈ຺ຉາຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ຉຘາ ຐິເຕສຸ ປນ ຣູເປສຸ ວຕ຺ຖຸຣູປໍ ປຏິສນ຺ຘິກ຺ຂເຓ ກາມາວຈຣຣູປາວຈຣວິປາການໍ ສຫຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍ, ປວຕ຺ເຕ ອຸປ຺ປຊ຺ຊມານານໍ ຈຕຸຠູມກກຸສລານໍ ອກຸສລານໍ ທ຺ວິປຎ຺ຈວິຎ຺ຎາຓວຊ຺ຊານໍ ເຕຠູມກວິປາການໍ ເຕຠູມກກິຣິຍານຎ຺ຈ ປຸເຣຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍ. ຈກ຺ຂາຍຕນາທີນິ ຈກ຺ຂຸວິຎ຺ຎາຓາທີນໍ ປຸເຣຊາຕວິປ຺ປຍຸຕ຺ຕປຈ຺ຈເຍນ ປຈ຺ຈໂຍຕິ ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ວິປ຺ປຍຸຕ຺ຕປຈ຺ຈຍນິທ຺ເທສວຓ຺ຓນາ.