໑໒. ອາເສວນປຈ຺ຈຍນິທ຺ເທສວຓ຺ຓນາ

໑໒. ອາເສວນປຈ຺ຈຍນິທ຺ເທເສ ປຸຣິມາ ປຸຣິມາຕິ ສພ຺ພນເຍສຸ ສມນນ຺ຕຣາຕີຕາວ ທຏ຺ຐພ຺ພາ. ກສ຺ມາ ປເນຕ຺ຖ ອນນ຺ຕຣປຈ຺ຈເຍ ວິຍ ‘‘ປຸຣິມາ ປຸຣິມາ ກຸສລາ ຘມ຺ມາ ປຈ຺ຉິມານໍ ປຈ຺ຉິມານໍ ອພ຺ຍາກຕານໍ ຘມ຺ມານ’’ນ຺ຕິອາທິນາ ນເຍນ ຠິນ຺ນຊາຕິເກຫິ ສທ຺ຘິໍ ນິທ຺ເທໂສ ນ ກໂຕຕິ? ອຕ຺ຕໂນ ຄຕິໍ ຄາຫາເປຕຸໍ ອສມຕ຺ຖຕາຍ. ຠິນ຺ນຊາຕິກາ ຫິ ຠິນ຺ນຊາຕິການໍ ອຣູປຘມ຺ມານໍ ອາເສວນຄຸເຓນ ປຄຸຓພລວຠາວໍ ສາຘຍມານາ ອຕ຺ຕໂນ ກຸສລາທິຠາວສງ຺ຂາຕໍ ຄຕິໍ ຄາຫາເປຕຸໍ ນ ສກ຺ໂກນ຺ຕິ. ຕສ຺ມາ ເຕຫິ ສທ຺ຘິໍ ນິທ຺ເທສໍ ອກຕ຺ວາ ເຍ ເຍສໍ ວາສນາສງ຺ຂາເຕນ ອາເສວເນນ ປຄຸຓຕຣພລວຕຣຠາວວິສິຏ຺ຐໍ ອຕ຺ຕໂນ ກຸສລາທິຠາວສງ຺ຂາຕໍ ຄຕິໍ ຄາຫາເປຕຸໍ ສກ຺ໂກນ຺ຕິ, ເຕສໍ ເຕຫິ ສມານຊາຕິເກເຫວ ສທ຺ຘິໍ ນິທ຺ເທໂສ ກໂຕຕິ ເວທິຕພ຺ໂພ. ອຖ ວິປາກາພ຺ຍາກຕໍ ກສ຺ມາ ນ ຄຫິຕນ຺ຕິ? ອາເສວນາຠາເວນ. ວິປາກຎ຺ຫິ ກມ຺ມວເສນ ວິປາກຠາວປ຺ປຕ຺ຕໍ ກມ຺ມປຣິຓາມິຕໍ ຫຸຕ຺ວາ ວຕ຺ຕຕິ ນິຣຸສ຺ສາຫໍ ທຸພ຺ພລນ຺ຕິ ຕໍ ອາເສວນຄຸເຓນ ອຕ຺ຕໂນ ສຠາວໍ ຄາຫາເປຕ຺ວາ ປຣິຠາເວຕ຺ວາ ເນວ ອຎ຺ຎໍ ວິປາກໍ ອຸປ຺ປາເທຕຸໍ ສກ຺ໂກຕິ, ນ ປຸຣິມວິປາການຸຠາວໍ ຄເຫຕ຺ວາ ອຸປ຺ປຊ຺ຊິຕຸນ຺ຕິ. ກມ຺ມເວຄກ຺ຂິຕ຺ຕໍ ປນ ປຕິຕໍ ວິຍ ຫຸຕ຺ວາ ອຸປ຺ປຊ຺ຊຕີຕິ ສພ຺ພຖາປິ ວິປາເກ ອາເສວນໍ ນຕ຺ຖີຕິ ອາເສວນາຠາເວນ ວິປາກໍ ນ ຄຫິຕໍ. ກຸສລາກຸສລກິຣິຍານນ຺ຕຣໍ ອຸປ຺ປຊ຺ຊມານມ຺ປິ ເຈຕໍ ກມ຺ມປຏິພທ຺ຘວຸຕ຺ຕິຕາຍ ອາເສວນຄຸຓໍ ນ ຄຓ຺ຫາຕີຕິ ກຸສລາທໂຍປິສ຺ສ ອາເສວນປຈ຺ຈຍາ ນ ໂຫນ຺ຕິ. ອປິຈ ນານາຊາຕິກຕ຺ຕາເປເຕ ນ ໂຫນ຺ຕິເຍວ. ຠູມິໂຕ ປນ ອາຣມ຺ມຓໂຕ ວາ ນານາຊາຕິກຕ຺ຕໍ ນາມ ນຕ຺ຖິ. ຕສ຺ມາ ກາມາວຈຣກຸສລກິຣິຍາມຫຄ຺ຄຕກຸສລກິຣິຍານມ຺ປິ, ສງ຺ຂາຣາຣມ຺ມຓຎ຺ຈ ອນຸໂລມກຸສລໍ ນິພ຺ພານາຣມ຺ມຓສ຺ສ ໂຄຕ຺ຣຠຸກຸສລສ຺ສ ອາເສວນປຈ຺ຈໂຍ ໂຫຕິເຍວາຕິ ອຍໍ ຕາເວຕ຺ຖ ປາຬິວຓ຺ຓນາ. ອຍໍ ປນ ອາເສວນປຈ຺ຈໂຍ ຊາຕິໂຕ ຕາວ ກຸສໂລ ອກຸສໂລ ກິຣິຍາພ຺ຍາກໂຕຕິ ຕິຘາ ຐິໂຕ. ຕຕ຺ຖ ກຸສໂລ ຠູມິໂຕ ກາມາວຈໂຣ ຣູປາວຈໂຣ ອຣູປາວຈໂຣຕິ ຕິວິໂຘ ໂຫຕິ, ອກຸສໂລ ກາມາວຈໂຣວ ກິຣິຍາພ຺ຍາກໂຕ ກາມາວຈໂຣ ຣູປາວຈໂຣ ອຣູປາວຈໂຣຕິ ຕິວິໂຘວ, ໂລກຸຕ຺ຕໂຣ ອາເສວນປຈ຺ຈໂຍ ນາມ ນຕ຺ຖີຕິ ເອວເມຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ເອວໍ ຠິນ຺ເນ ປເນຕ຺ຖ ກາມາວຈຣກຸສລໍ ອຕ຺ຕໂນ ອນນ຺ຕຣສ຺ສ ກາມາວຈຣກຸສລສ຺ເສວ. ຍໍ ປເນຕ຺ຖ ຎາຓສມ຺ປຍຸຕ຺ຕໍ, ຕໍ ອຕ຺ຕນາ ສທິສເວທນສ຺ສ ຣູປາວຈຣກຸສລສ຺ສ ອຣູປາວຈຣກຸສລສ຺ສ ໂລກຸຕ຺ຕຣກຸສລສ຺ສາຕິ ອິເມສໍ ຣາສີນໍ ອາເສວນປຈ຺ຈໂຍ ໂຫຕິ. ຣູປາວຈຣກຸສລໍ ປນ ຣູປາວຈຣກຸສລສ຺ເສວ. ອຣູປາວຈຣກຸສລໍ ອຣູປາວຈຣກຸສລສ຺ເສວ. ອກຸສລໍ ປນ ອກຸສລສ຺ເສວ ອາເສວນປຈ຺ຈໂຍ ໂຫຕິ. ກິຣິຍໂຕ ປນ ກາມາວຈຣກິຣິຍສງ຺ຂາໂຕ ຕາວ ກາມາວຈຣກິຣິຍສ຺ເສວ. ໂຍ ປເນຕ຺ຖ ຎາຓສມ຺ປຍຸຕ຺ໂຕ, ໂສ ອຕ຺ຕນາ ສທິສເວທນສ຺ສ ຣູປາວຈຣກິຣິຍສ຺ສ ອຣູປາວຈຣກິຣິຍສ຺ສາຕິ ອິເມສໍ ຣາສີນໍ ອາເສວນປຈ຺ຈໂຍ ໂຫຕິ. ຣູປາວຈຣກິຣິຍສງ຺ຂາໂຕ ປນ ຣູປາວຈຣກິຣິຍສ຺ເສວ, ອຣູປາວຈຣກິຣິຍສງ຺ຂາໂຕ ອຣູປາວຈຣກິຣິຍສ຺ເສວ ອາເສວນປຈ຺ຈໂຍ ໂຫຕິ. ວິປາໂກ ປນ ເອກຘມ຺ມສ຺ສາປິ ເອກຘມ຺ໂມປິ ວາ ໂກຈິ ວິປາກສ຺ສ ອາເສວນປຈ຺ຈໂຍ ນຕ຺ຖີຕິ ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ອາເສວນປຈ຺ຈຍນິທ຺ເທສວຓ຺ຓນາ.