໑໓. ກມ຺ມປຈ຺ຈຍນິທ຺ເທສວຓ຺ຓນາ

໑໓. ກມ຺ມປຈ຺ຈຍນິທ຺ເທເສ ກມ຺ມນ຺ຕິ ເຈຕນາກມ຺ມເມວ. ກຏຕ຺ຕາ ຈ ຣູປານນ຺ຕິ ກມ຺ມສ຺ສ ກຏຕ຺ຕາ ອຸປ຺ປນ຺ນຣູປານໍ. ກມ຺ມປຈ຺ຈເຍນາຕິ ອເນການມ຺ປິ ກປ຺ປໂກຏີນໍ ມຕ຺ຖເກ ອຕ຺ຕໂນ ຜລໍ ອຸປ຺ປາເທຕຸໍ ສມຕ຺ເຖນ ນານາກ຺ຂຓິກກມ຺ມປຈ຺ຈເຍນາຕິ ອຕ຺ໂຖ. ກຸສລາກຸສລຎ຺ຫິ ກມ຺ມໍ ອຕ຺ຕໂນ ປວຕ຺ຕິກ຺ຂເຓ ຜລໍ ນ ເທຕິ. ຍທິ ທເທຍ຺ຍ, ຍໍ ມນຸສ຺ໂສ ເທວໂລກູປຄໍ ກຸສລກມ຺ມໍ ກໂຣຕິ, ຕສ຺ສານຸຠາເວນ ຕສ຺ມິໍເຍວ ຂເຓ ເທໂວ ຠເວຍ຺ຍ. ຍສ຺ມິໍ ປນ ຂເຓ ຕໍ ກຕໍ, ຕໂຕ ອຎ຺ຎສ຺ມິໍ ຂເຓ ອວິຊ຺ຊມານມ຺ປິ ເກວລໍ ກຏຕ຺ຕາເຍວ ທິຏ຺ເຐວ ຘມ຺ເມ ອຸປປຊ຺ເຊ ວາ ອປເຣ ວາ ປຣິຍາເຍ ອວເສສປຈ຺ຈຍສມາໂຍເຄ ສຕິ ຜລໍ ອຸປ຺ປາເທຕິ ນິຣຸທ຺ຘາປິ ປຸຣິມສິປ຺ປາທິກິຣິຍາ ວິຍ ກາລນ຺ຕເຣ ປຈ຺ຉິມສິປ຺ປາທິກິຣິຍາຍ. ຕສ຺ມາ ນານາກ຺ຂຓິກກມ຺ມປຈ຺ຈໂຍຕິ ວຸຈ຺ຈຕິ. ເຈຕນາ ສມ຺ປຍຸຕ຺ຕການໍ ຘມ຺ມານນ຺ຕິ ຍາ ກາຈິ ເຈຕນາ ອຕ຺ຕນາ ສມ຺ປຍຸຕ຺ຕການໍ ຘມ຺ມານໍ. ຕໍສມຸຏ຺ຐານານນ຺ຕິ ອິມິນາ ປຏິສນ຺ຘິກ຺ຂເຓ ກຏຕ຺ຕາຣູປມ຺ປິ ຄຓ຺ຫາຕິ. ກມ຺ມປຈ຺ຈເຍນາຕິ ອິທໍ ສຫຊາຕເຈຕນໍ ສນ຺ຘາຍ ວຸຕ຺ຕໍ. ກຸສລາທີສຸ ຫິ ຍາ ກາຈິ ສຫຊາຕເຈຕນາ ເສສຘມ຺ມານໍ ຈິຕ຺ຕປໂຍຄສງ຺ຂາເຕນ ກິຣິຍາຠາເວນ ອຸປກາຣິກາ ໂຫຕິ. ຕສ຺ມາ ສຫຊາຕກມ຺ມປຈ຺ຈໂຍຕິ ວຸຈ຺ຈຕິ. ອຍໍ ຕາເວຕ຺ຖ ປາຬິວຓ຺ຓນາ.

ອຍໍ ປນ ກມ຺ມປຈ຺ຈໂຍ ອຕ຺ຖໂຕ ຈຕຸຠູມິກເຈຕນາມຕ຺ຕເມວ. ໂສ ຫິ ຊາຕິເຠທໂຕ ກຸສໂລ ອກຸສໂລ ວິປາໂກ ກິຣິຍາຕິ ຈຕຸຘາ ຠິຊ຺ຊຕິ. ຕຕ຺ຖ ກຸສໂລ ຠູມິໂຕ ກາມາວຈຣາທິວເສນ ຈຕຸຘາ ຠິຊ຺ຊຕິ. ອກຸສໂລ ເອກຘາວ ວິປາໂກ ຈຕຸຘາ, ກິຣິຍາ ຕິຘາວາຕິ ເອວເມຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ເອວໍ ຠິນ຺ເນ ປເນຕ຺ຖ ສຫຊາຕາ ກາມາວຈຣກຸສລເຈຕນາ ປຎ຺ຈໂວກາເຣ ອຕ຺ຕນາ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປສ຺ສ ຈ, ຈຕຸໂວກາເຣ ສມ຺ປຍຸຕ຺ຕກ຺ຂນ຺ຘານຎ຺ເຎວ ສຫຊາຕກມ຺ມປຈ຺ຈໂຍ ໂຫຕິ. ອຸປ຺ປຊ຺ຊິຕ຺ວາ ນິຣຸທ຺ຘາ ປນ ອຕ຺ຕໂນ ວິປາການໍ ຂນ຺ຘານໍ ກຏຕ຺ຕາ ຈ ຣູປານໍ ນານາກ຺ຂຓິກກມ຺ມປຈ຺ຈເຍນ ປຈ຺ຈໂຍ ໂຫຕິ. ສາ ຈ ໂຂ ປຎ຺ຈໂວກາເຣເຍວ, ນ ອຎ຺ຎຕ຺ຖ. ສຫຊາຕາ ຣູປາວຈຣກຸສລເຈຕນາ ອຕ຺ຕນາ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປານຎ຺ຈ ເອກນ຺ເຕເນວ ສຫຊາຕກມ຺ມປຈ຺ຈເຍນ ປຈ຺ຈໂຍ. ອຸປ຺ປຊ຺ຊິຕ຺ວາ ນິຣຸທ຺ຘາ ປນ ອຕ຺ຕໂນ ວິປາການຎ຺ເຈວ ກຏຕ຺ຕາຣູປານຎ຺ຈ ນານາກ຺ຂຓິກກມ຺ມປຈ຺ຈເຍນ ປຈ຺ຈໂຍ. ອຣູປາວຈຣາ ປນ ໂລກຸຕ຺ຕຣາ ຈ ສຫຊາຕາ ກຸສລເຈຕນາ ປຎ຺ຈໂວກາເຣ ອຕ຺ຕນາ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປານຎ຺ຈ, ຈຕຸໂວກາເຣ ສມ຺ປຍຸຕ຺ຕກ຺ຂນ຺ຘານຎ຺ເຎວ ສຫຊາຕກມ຺ມປຈ຺ຈເຍນ ປຈ຺ຈໂຍ. ອຸປ຺ປຊ຺ຊິຕ຺ວາ ນິຣຸທ຺ຘາ ປເນສາ ທຸວິຘາປິ ອຕ຺ຕໂນ ອຕ຺ຕໂນ ວິປາກກ຺ຂນ຺ຘານຎ຺ເຎວ ນານາກ຺ຂຓິກກມ຺ມປຈ຺ຈເຍນ ປຈ຺ຈໂຍ. ສຫຊາຕາ ອກຸສລເຈຕນາ ປຎ຺ຈໂວກາເຣ ອຕ຺ຕນາ ສມ຺ປຍຸຕ຺ຕກ຺ຂນ຺ຘານຎ຺ເຈວ ຈິຕ຺ຕສມຸຏ຺ຐານຣູປານຎ຺ຈ ຈຕຸໂວກາເຣ ອຣູປກ຺ຂນ຺ຘານຎ຺ເຎວ ສຫຊາຕກມ຺ມປຈ຺ຈເຍນ ປຈ຺ຈໂຍ. ອຸປ຺ປຊ຺ຊິຕ຺ວາ ນິຣຸທ຺ຘາ ປນ ວິປາກກ຺ຂນ຺ຘານຎ຺ເຈວ ກຏຕ຺ຕາຣູປານຎ຺ຈ ນານາກ຺ຂຓິກກມ຺ມປຈ຺ຈເຍນ ປຈ຺ຈໂຍ.

ກາມາວຈຣຣູປາວຈຣໂຕ ວິປາກເຈຕນາ ອຕ຺ຕນາ ສມ຺ປຍຸຕ຺ຕຘມ຺ມານໍ ປວຕ຺ເຕ ຈິຕ຺ຕສມຸຏ຺ຐານຣູປານໍ, ປຏິສນ຺ຘິຍໍ ກຏຕ຺ຕາຣູປານຎ຺ຈ ສຫຊາຕກມ຺ມປຈ຺ຈເຍນ ປຈ຺ຈໂຍ. ອຣູປາວຈຣວິປາກເຈຕນາ ອຕ຺ຕນາ ສມ຺ປຍຸຕ຺ຕຘມ຺ມານຎ຺ເຎວ ສຫຊາຕກມ຺ມປຈ຺ຈເຍນ ປຈ຺ຈໂຍ. ໂລກຸຕ຺ຕຣວິປາກເຈຕນາ ປຎ຺ຈໂວກາເຣ ອຕ຺ຕນາ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປສ຺ສ ຈ, ຈຕຸໂວກາເຣ ອຣູປສ຺ເສວ ສຫຊາຕກມ຺ມປຈ຺ຈເຍນ ປຈ຺ຈໂຍ. ເຕຠູມິກາ ກິຣິຍເຈຕນາ ປຎ຺ຈໂວກາເຣ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປສ຺ສ ຈ ສຫຊາຕກມ຺ມປຈ຺ຈເຍນ ປຈ຺ຈໂຍ. ຍາ ປເນຕ຺ຖ ອາຣຸປ຺ເປ ອຸປ຺ປຊ຺ຊຕິ, ສາ ອຣູປຘມ຺ມານຎ຺ເຎວ ສຫຊາຕກມ຺ມປຈ຺ຈເຍນ ປຈ຺ຈໂຍຕິ ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ກມ຺ມປຈ຺ຈຍນິທ຺ເທສວຓ຺ຓນາ.