໑໑. ປຈ຺ຉາຊາຕປຈ຺ຈຍນິທ຺ເທສວຓ຺ຓນາ

໑໑. ປຈ຺ຉາຊາຕປຈ຺ຈຍນິທ຺ເທເສ ປຈ຺ຉາຊາຕາຕິ ຍສ຺ສ ກາຍສ຺ສ ປຈ຺ຈຍາ ໂຫນ຺ຕິ, ຕສ຺ມິໍ ອຸປ຺ປຊ຺ຊິຕ຺ວາ ຐິເຕ ຊາຕາ. ປຸເຣຊາຕສ຺ສາຕິ ເຕສໍ ອຸປ຺ປາທໂຕ ປຐມຕຣໍ ຊາຕສ຺ສ ຊາຕິກ຺ຂຓໍ ອຕິກ຺ກມິຕ຺ວາ ຐິຕິປ຺ປຕ຺ຕສ຺ສ. ອິມສ຺ສ ກາຍສ຺ສາຕິ ອິມສ຺ສ ຈຕຸສມຸຏ຺ຐານິກຕິສມຸຏ຺ຐານິກຠູຕອຸປາທາຣູປສງ຺ຂາຕສ຺ສ ກາຍສ຺ສ. ເອຕ຺ຖ ຈ ຕິສມຸຏ຺ຐານິກກາໂຍຕິ ອາຫາຣສມຸຏ຺ຐານສ຺ສ ອຠາວໂຕ ພ຺ຣຫ຺ມປາຣິສຊ຺ຊາທີນໍ ກາໂຍ ເວທິຕພ຺ໂພ. ອຍເມຕ຺ຖ ປາຬິວຓ຺ຓນາ. ອຍໍ ປນ ປຈ຺ຉາຊາຕປຈ຺ຈໂຍ ນາມ ສງ຺ເຂປໂຕ ຐເປຕ຺ວາ ອາຣຸປ຺ປວິປາເກ ອວເສສາ ຈຕຸຠູມກາ ອຣູປກ຺ຂນ຺ຘາ. ໂສ ຊາຕິວເສນ ກຸສລາກຸສລວິປາກກິຣິຍເຠເທນ ຈຕຸຘາ ຠິຊ຺ຊຕີຕິ ເອວເມຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ເອວໍ ຠິນ຺ເນ ປເນຕ຺ຖ ປຎ຺ຈໂວກາຣຠເວ ອຸປ຺ປນ຺ນໍ ຈຕຸຠູມກກຸສລຎ຺ຈ ອກຸສລຎ຺ຈ ອຸປ຺ປາທກ຺ຂຓໍ ອຕິກ຺ກມິຕ຺ວາ ຐິຕິປ຺ປຕ຺ຕສ຺ສ ຈຕຸສມຸຏ຺ຐານິກຕິສມຸຏ຺ຐານິກຣູປກາຍສ຺ສ ປຈ຺ຉາຊາຕປຈ຺ຈໂຍ ໂຫຕິ. ວິປາເກປິ ຐເປຕ຺ວາ ປຏິສນ຺ຘິວິປາກໍ ອວເສໂສ ກາມາວຈຣຣູປາວຈຣວິປາໂກ ຕສ຺ເສວ ເອກນ຺ເຕນ ປຈ຺ຉາຊາຕປຈ຺ຈໂຍ ໂຫຕິ. ໂລກຸຕ຺ຕໂຣປິ ປຎ຺ຈໂວກາເຣ ອຸປ຺ປນ຺ນວິປາໂກ ຕສ຺ເສວ ປຈ຺ຉາຊາຕປຈ຺ຈໂຍ ໂຫຕິ. ເຕຠູມກກິຣິຍາປິ ປຎ຺ຈໂວກາເຣ ອຸປ຺ປນ຺ນາວ ວຸຕ຺ຕປ຺ປກາຣສ຺ສ ກາຍສ຺ສ ປຈ຺ຉາຊາຕປຈ຺ຈໂຍ ໂຫຕີຕິ ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ປຈ຺ຉາຊາຕປຈ຺ຈຍນິທ຺ເທສວຓ຺ຓນາ.