໑໐. ປຸເຣຊາຕປຈ຺ຈຍນິທ຺ເທສວຓ຺ຓນາ

໑໐. ປຸເຣຊາຕປຈ຺ຈຍນິທ຺ເທເສ ປຸເຣຊາຕປຈ຺ຈເຍນ ປຈ຺ຈໂຍຕິ ເອຕ຺ຖ ປຸເຣຊາຕໍ ນາມ ຍສ຺ສ ປຈ຺ຈໂຍ ໂຫຕິ, ຕໂຕ ປຸຣິມຕຣໍ ຊາຕໍ ຊາຕິກ຺ຂຓໍ ອຕິກ຺ກມິຕ຺ວາ ຐິຕິກ຺ຂຓປ຺ປຕ຺ຕໍ. ຈກ຺ຂາຍຕນນ຺ຕິອາທິ ວຕ຺ຖຸປຸເຣຊາຕວເສນ ວຸຕ຺ຕໍ. ຣູປາຍຕນນ຺ຕິອາທິ ອາຣມ຺ມຓປຸເຣຊາຕວເສນ. ກິຎ຺ຈິກາເລ ປຸເຣຊາຕປຈ຺ຈເຍນາຕິ ປວຕ຺ຕິໍ ສນ຺ຘາຍ ວຸຕ຺ຕໍ. ກິຎ຺ຈິກາເລ ນ ປຸເຣຊາຕປຈ຺ຈເຍນາຕິ ປຏິສນ຺ຘິໍ ສນ຺ຘາຍ ວຸຕ຺ຕໍ. ເອວໍ ສພ຺ພຖາປິ ປຎ຺ຈທ຺ວາເຣ ວຕ຺ຖາຣມ຺ມຓວເສນ, ມໂນທ຺ວາເຣ ວຕ຺ຖຸວເສເນວາຍໍ ປາຬິ ອາຄຕາ, ປຎ຺ຫາວາເຣ ປນ ‘‘ອາຣມ຺ມຓປຸເຣຊາຕໍ – ເສກ຺ຂາ ວາ ປຸຖຸຊ຺ຊນາ ວາ ຈກ຺ຂຸໍ ອນິຈ຺ຈໂຕ ທຸກ຺ຂໂຕ ອນຕ຺ຕໂຕ ວິປສ຺ສນ຺ຕີ’’ຕິ ອາຄຕຕ຺ຕາ ມໂນທ຺ວາເຣປິ ອາຣມ຺ມຓປຸເຣຊາຕໍ ລພ຺ຠເຕວ. ອິຘ ປນ ສາວເສສວເສນ ເທສນາ ກຕາຕິ ອຍໍ ຕາເວຕ຺ຖ ປາຬິວຓ຺ຓນາ.

ອຍໍ ປນ ປຸເຣຊາຕປຈ຺ຈໂຍ ສຸທ຺ຘຣູປເມວ ໂຫຕິ. ຕຎ຺ຈ ໂຂ ອຸປ຺ປາທກ຺ຂຓໍ ອຕິກ຺ກມິຕ຺ວາ ຐິຕິປ຺ປຕ຺ຕໍ ອຏ຺ຐາຣສວິຘໍ ຣູປຣູປເມວ. ຕໍ ສພ຺ພມ຺ປິ ວຕ຺ຖຸປຸເຣຊາຕໍ ອາຣມ຺ມຓປຸເຣຊາຕນ຺ຕິ ທ຺ວິຘາ ຐິຕໍ. ຕຕ຺ຖ ຈກ຺ຂາຍຕນໍ…ເປ… ກາຍາຍຕນໍ ວຕ຺ຖຸຣູປນ຺ຕິ ອິທໍ ວຕ຺ຖຸປຸເຣຊາຕໍ ນາມ. ເສສໍ ອິມາຍ ປາຬິຍາ ອາຄຕຎ຺ຈ ອນາຄຕຎ຺ຈ ວຓ຺ໂຓ ສທ຺ໂທ ຄນ຺ໂຘ ຣໂສ ຈຕສ຺ໂສ ຘາຕຸໂຍ ຕີຓິ ອິນ຺ທ຺ຣິຍານິ ກພຬີກາໂຣ ອາຫາໂຣຕິ ທ຺ວາທສວິຘໍ ຣູປໍ ອາຣມ຺ມຓປຸເຣຊາຕປຈ຺ຈໂຍ ນາມາຕິ ເອວເມຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ເອວໍ ຠິນ຺ເນ ປເນຕ຺ຖ ຈກ຺ຂາຍຕນໍ ທ຺ວິນ຺ນໍ ຈກ຺ຂຸວິຎ຺ຎາຓານໍ ປຸເຣຊາຕປຈ຺ຈເຍນ ປຈ຺ຈໂຍ, ຕຖາ ອິຕຣານິ ຈຕ຺ຕາຣິ ໂສຕວິຎ຺ຎາຓາທີນໍ. ວຕ຺ຖຸຣູປໍ ປນ ຐເປຕ຺ວາ ທ຺ວິປຎ຺ຈວິຎ຺ຎາຓານິ ຈຕ຺ຕາໂຣ ຈ ອາຣຸປ຺ປວິປາເກ ເສສານໍ ສພ຺ເພສມ຺ປິ ຈຕຸຠູມການໍ ກຸສລາກຸສລາພ຺ຍາກຕານໍ ຈິຕ຺ຕເຈຕສິການໍ ປຸເຣຊາຕປຈ຺ຈໂຍ ໂຫຕິ. ຣູປາທີນິ ປນ ປຎ຺ຈາຣມ຺ມຓານິ ທ຺ວິປຎ຺ຈວິຎ຺ຎາຓານຎ຺ເຈວ ມໂນຘາຕູນຎ຺ຈ ເອກນ຺ເຕເນວ ປຸເຣຊາຕປຈ຺ຈຍາ ໂຫນ຺ຕິ. ອຏ຺ຐາຣສວິຘມ຺ປິ ປເນຕໍ ຣູປຣູປໍ ກາມາວຈຣກຸສລສ຺ສ ຣູປາວຈຣໂຕ ອຠິຎ຺ຎາກຸສລສ຺ສ ອກຸສລສ຺ສ ຕທາຣມ຺ມຓຠາວິໂນ ກາມາວຈຣວິປາກສ຺ສ ກາມາວຈຣກິຣິຍສ຺ສ ຣູປາວຈຣໂຕ ອຠິຎ຺ຎາກິຣິຍສ຺ສາຕິ ອິເມສໍ ຉນ຺ນໍ ຣາສີນໍ ປຸເຣຊາຕປຈ຺ຈໂຍ ໂຫຕີຕິ ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ປຸເຣຊາຕປຈ຺ຈຍນິທ຺ເທສວຓ຺ຓນາ.