໖. ຌານສງ຺ກນ຺ຕິກຖາວຓ຺ຓນາ

໘໑໓-໘໑໖. ອິທານິ ຌານສງ຺ກນ຺ຕິກຖາ ນາມ ໂຫຕິ. ຕຕ຺ຖ ເຍສໍ ‘‘ອິຘ, ຠິກ຺ຂເວ, ຠິກ຺ຂຸ ວິວິຈ຺ເຈວ ກາເມຫິ ປຐມໍ ຌານໍ ອຸປສມ຺ປຊ຺ຊ ວິຫຣຕິ, ວິຕກ຺ກວິຈາຣານໍ ວູປສມາ ທຸຕິຍໍ ຌານໍ, ຕຕິຍໍ ຌານໍ, ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕີ’’ຕິ (ສໍ. ນິ. ໕.໙໒໓-໙໓໔) ອິມໍ ປຏິປາຏິເທສນໍ ນິສ຺ສາຍ ‘‘ຕສ຺ສ ຕສ຺ສ ຌານສ຺ສ ອຸປຈາຣປ຺ປວຕ຺ຕິໍ ວິນາວ ຌານາ ຌານໍ ສງ຺ກມຕີ’’ຕິ ລທ຺ຘິ, ເສຍ຺ຍຖາປິ ມຫິສາສການຎ຺ເຈວ ເອກຈ຺ຈານຎ຺ຈ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ເຕ ທຸຕິຍຊ຺ຌານູປຈາຣໍ ອປ຺ປຕ຺ວາ ອຸປ຺ປຏິປາຏິຍາ ປຐມຊ຺ຌານາ ທຸຕິຍຊ຺ຌານເມວ ສງ຺ກມຕິ, ປຐມໂຕ ຕຕິຍໍ, ທຸຕິຍໂຕ ຈຕຸຕ຺ຖມ຺ປິ ສງ຺ກເມຍ຺ຍາ’’ຕິ ໂຈເທຕຸໍ ປຐມາ ຌານາຕິອາທິມາຫ. ຍາ ປຐມສ຺ສາຕິອາທິ ‘‘ຍທິ ປຐມໂຕ ອນນ຺ຕຣໍ ທຸຕິຍໍ, ທຸຕິຍາທີຫິ ວາ ຕຕິຍາທີນິ ສມາປຊ຺ຊຕິ, ເອກາວຊ຺ຊເນນ ສມາປຊ຺ເຊຍ຺ຍາ’’ຕິ ໂຈທນຕ຺ຖໍ ວຸຕ຺ຕໍ. ກາເມ ອາທີນວໂຕຕິ ປຐມໍ ກາເມ ອາທີນວໂຕ ມນສິ ກໂຣໂຕ ປຈ຺ຉາ ອຸປ຺ປຊ຺ຊຕິ. ຌານກ຺ຂເຓ ປເນສ ນິມິຕ຺ຕເມວ ມນສິ ກໂຣຕິ. ຕຎ຺ເຎວ ປຐມນ຺ຕິ ‘‘ຍທິ ປຸຣິມຊວນໂຕ ປຈ຺ຉິມຊວນໍ ວິຍ ອນນ຺ຕຣໍ ອຸປ຺ປຊ຺ເຊຍ຺ຍ, ຐເປຕ຺ວາ ປຸຣິມປຈ຺ຉິມຠາວໍ ລກ຺ຂຓໂຕ ຕຎ຺ເຎວ ຕໍ ຠເວຍ຺ຍາ’’ຕິ ໂຈເທຕຸໍ ປຸຈ຺ຉຕິ. ອິມິນາ ອຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ວິວິຈ຺ເຈວ ກາເມຫີຕິອາທີຫິ ປຏິປາຏິຍາ ຌານານໍ ເທສິຕຠາວໍ ທີເປຕິ, ນ ອນນ຺ຕຣຸປ຺ປຕ຺ຕິໍ, ຕສ຺ມາ ອສາຘກນ຺ຕິ.

ຌານສງ຺ກນ຺ຕິກຖາວຓ຺ຓນາ.