໗. ຌານນ຺ຕຣິກກຖາວຓ຺ຓນາ

໘໑໗-໘໑໘. ອິທານິ ຌານນ຺ຕຣິກກຖາ ນາມ ໂຫຕິ. ຕຕ຺ຖ ເຍສໍ ສມເຍ ‘‘ປຎ຺ຈກນເຍ ປຎ຺ຈ ຌານານິ ວິຠຕ຺ຕານິ, ເກວລໍ ຕໂຍ ສມາຘີ ອຸທ຺ທິຏ຺ຐາ’’ຕິ ອວິຕກ຺ກວິຈາຣມຕ຺ຕສ຺ສ ສມາຘິໂນ ໂອກາສໍ ອຊານນ຺ຕານໍ ‘‘ປຐມສ຺ສ ຈ ທຸຕິຍສ຺ສ ຈ ຌານສ຺ສ ອນ຺ຕເຣ ຌານນ຺ຕຣິກາ ນາມ ເອສາ’’ຕິ ລທ຺ຘິ, ເສຍ຺ຍຖາປິ ສມ຺ມິຕິຍານຎ຺ເຈວ ເອກຈ຺ຈານຎ຺ຈ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຌານມ຺ປິ ເຈຕສິກາ ຘມ຺ມາ, ຜສ຺ສາທໂຍປິ, ຕສ຺ມາ ຍທິ ຌານນ຺ຕຣິກາ ນາມ ຠເວຍ຺ຍ, ຜສ຺ສນ຺ຕຣິກາທີຫິປິ ຠວິຕພ຺ພ’’ນ຺ຕິ ໂຈທນຕ຺ຖໍ ອຕ຺ຖິ ຜສ຺ສນ຺ຕຣິກາຕິອາທິມາຫ.

ທຸຕິຍສ຺ສ ຈ ຌານສ຺ສາຕິ ‘‘ຍທິ ຌານນ຺ຕຣິກາ ນາມ ຠເວຍ຺ຍ, ທຸຕິຍຕຕິຍາທີນິປິ ຌານາເນວ, ເຕສມ຺ປິ ອນ຺ຕຣິກາຍ ຠວິຕພ຺ພ’’ນ຺ຕິ ໂຈທນຕ຺ຖໍ ວຸຕ຺ຕໍ. ໂສ ເກວລໍ ລທ຺ຘິຍາ ອຠາເວນ ປຏິກ຺ຂິປຕິ ເຈວ ປຏິຊານາຕິ ຈ. ປຐມສ຺ສ ຈາຕິ ປຸຏ຺ໂຐ ລທ຺ຘິວເສນ ປຏິຊານາຕິ.

໘໑໙. ສວິຕກ຺ໂກ ສວິຈາໂຣຕິອາທິ ‘‘ຕິຓ຺ຓມ຺ປິ ສມາຘີນໍ ສມາຘິຠາເວ ສມາເນ ອວິຕກ຺ໂກ ວິຈາຣມຕ຺ໂຕວ ສມາຘິ ຌານນ຺ຕຣິໂກ, ນ ອິຕໂຣຕິ ໂກ ເອຕ຺ຖ ວິເສສເຫຕູ’’ຕິ ໂຈທນຕ຺ຖໍ ວຸຕ຺ຕໍ.

໘໒໐-໘໒໒. ທ຺ວິນ຺ນໍ ຌານານໍ ປຏຸປ຺ປນ຺ນານນ຺ຕິ ປຐມທຸຕິຍານິ ສນ຺ຘາຍ ປຸຈ຺ຉຕິ. ອິຕໂຣ ‘‘ເຕສໍ ປຈ຺ຈຸປ຺ປນ຺ນານໍເຍວ ອນ຺ຕເຣ ອວິຕກ຺ໂກ ວິຈາຣມຕ຺ໂຕ ສມາຘິ ຌານນ຺ຕຣິໂກ ນາມ ໂຫຕີ’’ຕິ ລທ຺ຘິຍາ ປຏິຊານາຕິ. ປຐມໍ ຌານໍ ນິຣຸທ຺ຘນ຺ຕິ ປຸຏ຺ໂຐ ຕິຓ຺ຓໍ ເອກກ຺ຂເຓ ປວຕ຺ຕິ ນ ຍຸຕ຺ຕາຕິ ປຏິຊານາຕິ. ອວິຕກ຺ໂກ ວິຈາຣມຕ຺ໂຕ ສມາຘິ ປຐມໍ ຌານນ຺ຕິ ຈຕຸກ຺ກນຍວເສນ ປຸຈ຺ຉຕິ. ສກວາທີ ຕສ຺ມິໍ ນເຍ ຕສ຺ສ ອຠາວາ ປຏິກ຺ຂິປຕິ. ນນຸ ຕໂຍ ສມາຘີຕິ ເອຕ຺ຖາຍມຘິປ຺ປາໂຍ – ຍຖາ ເຕສຸ ຕີສຸ ສມາຘີສຸ ທ຺ເວ ສມາຘີ ຌານາເນວ, ນ ຌານນ຺ຕຣິກາ, ເອວໍ ອິຕເຣນປິ ຌາເນເນວ ຠວິຕພ຺ພໍ, ນ ຌານນ຺ຕຣິກາຍາຕິ.

ຌານນ຺ຕຣິກກຖາວຓ຺ຓນາ.