໔. ອຘິຄຍ຺ຫມນສິກາຣກຖາວຓ຺ຓນາ

໗໔໙-໗໕໓. ອິທານິ ອຘິຄຍ຺ຫ ມນສິກາຣກຖາ ນາມ ໂຫຕິ. ຕຕ຺ຖ ທຸວິໂຘ ມນສິກາໂຣ ນຍໂຕ ຈ ອາຣມ຺ມຓໂຕ ຈ. ຕຕ຺ຖ ເອກສງ຺ຂາຣສ຺ສາປິ ອນິຈ຺ຈຕາຍ ທິຏ຺ຐາຍ ສພ຺ເພ ສງ຺ຂາຣາ ອນິຈ຺ຈາຕິ ອວເສເສສຸ ນຍໂຕ ມນສິກາໂຣ ໂຫຕິ. ອຕີເຕ ປນ ສງ຺ຂາເຣ ມນສິກໂຣນ຺ໂຕ ນ ອນາຄເຕ ມນສິກາຕຸໍ ສກ຺ໂກຕິ. ອຕີຕາທີສຸ ອຎ຺ຎຕຣໍ ມນສິກໂຣໂຕ ອາຣມ຺ມຓໂຕ ມນສິກາໂຣ ໂຫຕິ. ຕຕ຺ຖ ປຈ຺ຈຸປ຺ປນ຺ເນ ມນສິກໂຣນ຺ໂຕ ເຍນ ຈິຕ຺ເຕນ ເຕ ມນສິກໂຣຕິ, ຕໍ ປຈ຺ຈຸປ຺ປນ຺ນກ຺ຂເຓ ມນສິກາຕຸໍ ນ ສກ຺ໂກຕິ. ຕຕ຺ຖ ເຍສໍ ‘‘ສພ຺ເພ ສງ຺ຂາຣາ ອນິຈ຺ຈາ’’ຕິອາທິວຈນໍ ນິສ຺ສາຍ ‘‘ມນສິກໂຣນ຺ໂຕ ນາມ ອຘິຄຍ຺ຫ ອຘິຄຓ຺ຫິຕ຺ວາ ສງ຺ຄຓ຺ຫິຕ຺ວາ ສພ຺ເພ ສງ຺ຂາເຣ ເອກໂຕ ມນສິກໂຣຕີ’’ຕິ ລທ຺ຘິ, ເສຍ຺ຍຖາປິ ປຸພ຺ພເສລິຍາປຣເສລິຍານໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ.

ອຖ ນໍ ຍສ຺ມາ ສພ຺ເພ ເອກໂຕ ມນສິກໂຣນ຺ເຕນ ເຍນ ຈິຕ຺ເຕນ ເຕ ມນສິກໂຣຕິ, ຕມ຺ປິ ມນສິກາຕພ຺ພໍ ໂຫຕິ. ຕສ຺ມາ ຕໍຈິຕ຺ຕຕາຍ ໂຈເທຕຸໍ ເຕນ ຈິຕ຺ເຕນາຕິ ອາຫ. ອິຕໂຣ ອາຣມ຺ມຓໍ ກຕ຺ວາ ນ ສກ຺ກາ ຊານິຕຸນ຺ຕິ ສນ຺ຘາຍ ປຏິກ຺ຂິປຕິ. ເອວໍລກ຺ຂຓໍ ຈິຕ຺ຕນ຺ຕິ ຎາຕຕ຺ຕາ ປນ ຕມ຺ປິ ຈິຕ຺ຕໍ ຎາຕເມວ ໂຫຕີຕິ ສນ຺ຘາຍ ປຏິຊານາຕິ. ອຖ ວາ ຕຎ຺ເຎວ ຕສ຺ສ ອາຣມ຺ມຓໍ ນ ໂຫຕີຕິ ປຏິກ຺ຂິປຕິ. ‘‘ສພ຺ເພ ສງ຺ຂາຣາ ອນິຈ຺ຈາ, ຍທາ ປຎ຺ຎາຍ ປສ຺ສຕີ’’ຕິອາທີນິ ນິສ຺ສາຍ ອຸປ຺ປນ຺ນລທ຺ຘິວເສນ ປຏິຊານາຕິ. ເສສປຎ຺ຫທ຺ວເຍປິ ເອເສວ ນໂຍ. ເຕນ ຜສ຺ເສນາຕິອາທີສຸ ປນ ຕຖາຣູປໍ ສຸຕ຺ຕໍ ອປສ຺ສນ຺ໂຕ ປຏິກ຺ຂິປເຕວ. ອຕີຕາທິປຎ຺ເຫສຸ ເຫຏ຺ຐາ ວຸຕ຺ຕນເຍເນວ ປຏິກ຺ເຂປປຏິຎ຺ຎາ ເວທິຕພ຺ພາ. ເສສໍ ຍຖາປາຬິເມວ ນິຍ຺ຍາຕີຕິ. ສພ຺ເພ ສງ຺ຂາຣາຕິອາທິວຈນໍ ນຍໂຕ ທສ຺ສນໍ ສນ຺ຘາຍ ວຸຕ຺ຕໍ, ນ ເອກກ຺ຂເຓ ອາຣມ຺ມຓໂຕ, ຕສ຺ມາ ອສາຘກນ຺ຕິ.

ອຘິຄຍ຺ຫມນສິກາຣກຖາວຓ຺ຓນາ.