໑໐. ຊີວິຕິນ຺ທ຺ຣິຍກຖາວຓ຺ຓນາ

໕໔໐. ອິທານິ ຊີວິຕິນ຺ທ຺ຣິຍກຖາ ນາມ ໂຫຕິ. ຕຕ຺ຖ ເຍສໍ ຊີວິຕິນ຺ທ຺ຣິຍໍ ນາມ ຈິຕ຺ຕວິປ຺ປຍຸຕ຺ໂຕ ອຣູປຘມ຺ໂມ, ຕສ຺ມາ ຣູປຊີວິຕິນ຺ທ຺ຣິຍໍ ນຕ຺ຖີຕິ ລທ຺ຘິ, ເສຍ຺ຍຖາປິ ປຸພ຺ພເສລິຍານຎ຺ເຈວ ສມ຺ມິຕິຍານຎ຺ຈ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ນຕ຺ຖິ ຣູປີນໍ ຘມ຺ມານໍ ອາຍູຕິ ປຎ຺ເຫ ອຸປາທິນ຺ນຣູປານມ຺ປິ ຕິຓກຏ຺ຐາທີນມ຺ປິ ສນ຺ຕານວເສນ ປວຕ຺ຕິເມວ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາຕິ ອິຈ຺ຉຕິ, ຕສ຺ມາ ປຏິກ຺ຂິປຕິ. ອຕ຺ຖີຕິ ປຎ຺ເຫປິ ອິມິນາ ກາຣເຓນ ປຏິຊານາຕິ. ອຕ຺ຖິ ອຣູປຊີວິຕິນ຺ທ຺ຣິຍນ຺ຕິ ປຎ຺ເຫ ອຣູປຘມ຺ມານໍ ຈິຕ຺ຕວິປ຺ປຍຸຕ຺ຕໍ ຊີວິຕິນ຺ທ຺ຣິຍສນ຺ຕານໍ ນາມ ອຕ຺ຖີຕິ ອິຈ຺ຉຕິ, ຕສ຺ມາ ປຏິຊານາຕິ.

໕໔໑. ຣູປີນໍ ຘມ຺ມານໍ ອາຍຸ ອຣູປຊີວິຕິນ຺ທ຺ຣິຍນ຺ຕິ ປຎ຺ເຫ ສຕ຺ຕສນ຺ຕາເນ ຣູປິໂນ ວາ ໂຫນ຺ຕຸ ອຣູປິໂນ ວາ, ສພ຺ເພສໍ ຈິຕ຺ຕວິປ຺ປຍຸຕ຺ຕໍ ອຣູປຊີວິຕິນ຺ທ຺ຣິຍເມວ ອິຈ຺ຉຕິ, ຕສ຺ມາ ປຏິຊານາຕິ.

໕໔໒. ນິໂຣຘສມາປນ຺ນປຎ຺ເຫສຸປິ ຈິຕ຺ຕວິປ຺ປຍຸຕ຺ຕໍ ອຣູປຊີວິຕເມວ ສນ຺ຘາຍ ປຏິກ຺ຂິປຕິ ຈ ປຏິຊານາຕິ ຈ. ສກວາທີ ປນ ຕໍ ອສມ຺ປຏິຈ຺ຉນ຺ໂຕ ຍໍ ອຣູປປວຕ຺ເຕ ອສຕິ ອຕ຺ຖິ, ຣູເປນ ເຕນ ຠວິຕພ຺ພນ຺ຕິ ໂຈເທຕຸໍ ຫຎ຺ຈີຕິອາທິມາຫ. ສງ຺ຂາຣກ຺ຂນ຺ຘປຎ຺ເຫ ຜສ຺ສາທິສງ຺ຂາຣກ຺ຂນ຺ຘໍ ສນ຺ຘາຍ ປຏິກ຺ຂິປຕິ, ກາຍກມ຺ມາທິສງ຺ຂາຣກ຺ຂນ຺ຘໍ ສນ຺ຘາຍ ປຏິຊານາຕິ. ກາຍວິຎ຺ຎຕ຺ຕິ ວຈີວິຎ຺ຎຕ຺ຕິ ສມ຺ມາວາຈາ ສມ຺ມາກມ຺ມນ຺ໂຕ ຊີວິຕິນ຺ທ຺ຣິຍນ຺ຕິ ເອວມາທໂຍປິ ຘມ຺ມາ ສງ຺ຂາຣກ຺ຂນ຺ຘປຣິຍາປນ຺ນາຕິສ຺ສ ລທ຺ຘິ. ສກວາທີ ປນ ຕໍ ອສມ຺ປຏິຈ຺ຉນ຺ໂຕ ຍທິ ນິຣຸທ຺ເຘປິ ອຣູປປວຕ຺ເຕ ສງ຺ຂາຣກ຺ຂນ຺ໂຘ ອຕ຺ຖິ, ຈຕຸນ຺ນມ຺ປິ ຂນ຺ຘານໍ ອຕ຺ຖິຕາ ໂຫຕູຕິ ໂຈເທຕຸໍ ອຕ຺ຖິ ເວທນາກ຺ຂນ຺ໂຘຕິ ອາທິມາຫ. ອິຕໂຣ ອນ຺ໂຕສມາປຕ຺ຕິໍ ສນ຺ຘາຍ ປຏິກ຺ຂິປຕິ, ສມາປຊ຺ຊນ຺ຕສ຺ສ ຈ ວຸຏ຺ຐຫນ຺ຕສ຺ສ ຈ ປຸພ຺ພາປຣຠາຄໍ ສນ຺ຘາຍ ປຏິຊານາຕິ.

໕໔໓. ອສຎ຺ຎສຕ຺ຕວາເຣປິ ເອເສວ ນໂຍ. ຕສ຺ສ ຫິ ລທ຺ຘິຍາ ອສຎ຺ຎສຕ຺ຕານໍ ປຏິສນ຺ຘິກາເລ ຈິຕ຺ຕໍ ອຸປ຺ປຊ຺ຊິຕ຺ວາ ນິຣຸຊ຺ຌຕິ, ເຕນ ສຫ ຈິຕ຺ຕວິປ຺ປຍຸຕ຺ຕອຣູປຊີວິຕິນ຺ທ຺ຣິຍໍ ອຸປ຺ປຊ຺ຊິຕ຺ວາ ຍາວຕາຍຸກໍ ປວຕ຺ຕຕິ. ຕສ຺ມາ ເຕສໍ ຊີວິຕິນ຺ທ຺ຣິຍໍ ນຕ຺ຖີຕິ ປຸຏ຺ໂຐ ປຏິກ຺ຂິປຕິ, ອຕ຺ຖີຕິ ປຸຏ຺ໂຐ ປຏິຊານາຕິ. ເວທນາກ຺ຂນ຺ຘາທໂຍປິ ເຕສໍ ປວຕ຺ຕິວເສນ ປຏິກ຺ຂິປຕິ, ຈຸຕິປຏິສນ຺ຘິວເສນ ປຏິຊານາຕິ. ສກວາທີ ປນ ຕໍ ອນິຈ຺ຉນ຺ໂຕ ‘‘ສເຈ ຕຕ຺ຖ ເອກກ຺ຂເຓປິ ເວທນາທໂຍ ອຕ຺ຖິ, ປຎ຺ຈໂວກາຣຠວຕ຺ຕໍ ປາປຸຓາຕີ’’ຕິ ໂຈເທຕຸໍ ປຎ຺ຈໂວກາຣຠໂວຕິ ອາຫ. ອິຕໂຣ ສຸຕ຺ຕວິໂຣຘຠຍາ ປຏິກ຺ຂິປຕິ.

໕໔໔-໕໔໕. ເອກເທສໍ ຠິຊ຺ຊຕີຕິ ປຎ຺ເຫ ສມ຺ປຍຸຕ຺ຕໍ ຠິຊ຺ຊຕິ, ວິປ຺ປຍຸຕ຺ຕໍ ຕິຏ຺ຐຕີຕິ ຕສ຺ສ ລທ຺ຘິ, ຕສ຺ມາ ປຏິຊານາຕິ. ທ຺ເວ ຊີວິຕິນ຺ທ຺ຣິຍານີຕິ ປຸຈ຺ຉາ ປຣວາທິສ຺ສ, ປຏິຎ຺ຎາ ສກວາທິສ຺ສ. ຣູປາຣູປວເສນ ຫິ ທ຺ເວ ຊີວິຕິນ຺ທ຺ຣິຍານິ, ເຕຫິເຍວ ສຕ຺ໂຕ ຊີວຕິ, ເຕສໍ ຠງ຺ເຄນ ມຣຕີຕິ ວຸຈ຺ຈຕິ. ຈຸຕິກ຺ຂຓສ຺ມິຎ຺ຫິ ທ຺ເວປິ ຊີວິຕານິ ສເຫວ ຠິຊ຺ຊນ຺ຕິ.

ຊີວິຕິນ຺ທ຺ຣິຍກຖາວຓ຺ຓນາ.