໑. ຉຄຕິກຖາວຓ຺ຓນາ

໕໐໓-໕໐໔. ອິທານິ ຉຄຕິກຖາ ນາມ ໂຫຕິ. ຕຕ຺ຖ ອສຸຣກາເຍນ ສທ຺ຘິໍ ຉຄຕິໂຍຕິ ເຍສໍ ລທ຺ຘິ, ເສຍ຺ຍຖາປິ ອນ຺ຘການຎ຺ເຈວ ອຸຕ຺ຕຣາປຖການຎ຺ຈ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ສກວາທີ ‘‘ປຎ຺ຈ ໂຂ ປນິມາ, ສາຣິປຸຕ຺ຕ, ຄຕິໂຍ’’ຕິ (ມ. ນິ. ໑.໑໕໓) ໂລມຫໍສນປຣິຍາເຍ ປຣິຈ຺ຉິນ຺ນານໍ ຄຕີນໍ ວເສນ ໂຈເທຕຸໍ ນນຸ ປຎ຺ຈ ຄຕິໂຍຕິອາທິມາຫ. ອິຕໂຣ ສຸຕ຺ຕວິໂຣຘຠເຍນ ປຏິຊານາຕິ. ກສ຺ມາ ປນ ສກວາທີ ຉ ຄຕິໂຍ ນ ສມ຺ປຏິຈ຺ຉຕິ, ນນຸ ‘‘ຈຕູຫາປາເຍຫິ ຈ ວິປ຺ປມຸຕ຺ໂຕ’’ຕິ ເອຕ຺ຖ ອສຸຣກາໂຍປິ ຄຫິໂຕຕິ. ສຈ຺ຈໍ ຄຫິໂຕ, ນ ປເນສາ ຄຕິ. ກສ຺ມາ? ວິສຸໍ ອຠາວໂຕ. ອສຸຣກາຍສ຺ມິຎ຺ຫິ ກາລກຎ຺ຈິກາ ອສຸຣາ ເປຕຄຕິຍາ ສງ຺ຄຫິຕາ, ເວປຈິຕ຺ຕິປຣິສາ ເທວຄຕິຍາ, ອສຸຣກາໂຍຕິ ວິສຸໍ ເອກາ ຄຕິ ນາມ ນຕ຺ຖິ.

ອິທານິ ເອຕເມວ ອຕ຺ຖໍ ທສ຺ເສຕຸໍ ນນຸ ກາລກຎ຺ຈິກາຕິອາທິ ອາຣທ຺ຘໍ. ຕຕ຺ຖ ສມານວຓ຺ຓາຕິ ສທິສຣູປສຓ຺ຐານາ ພີຠຈ຺ຉາ ວິຣູປາ ທຸທ຺ທສ຺ສິກາ. ສມານໂຠຄາຕິ ສທິສເມຖຸນສມາຈາຣາ. ສມານາຫາຣາຕິ ສທິສເຂຬສິງ຺ຆາຓິກປຸພ຺ພໂລຫິຕາທິອາຫາຣາ. ສມານາຍຸກາຕິ ສທິສອາຍຸປຣິຈ຺ເຉທາ. ອາວາຫວິວາຫນ຺ຕິ ກຎ຺ຎາຄຫຓຎ຺ເຈວ ກຎ຺ຎາທານຎ຺ຈ. ສຸກ຺ກປກ຺ເຂ ສມານວຓ຺ຓາຕິ ສທິສຣູປສຓ຺ຐານາ ອຠິຣູປາ ປາສາທິກາ ທສ຺ສນີຍາ ປຠາສມ຺ປນ຺ນາ. ສມານໂຠຄາຕິ ສທິສປຎ຺ຈກອາມຄຸຓໂຠຄາ. ສມານາຫາຣາຕິ ສທິສສຸຘາໂຠຊນາທິອາຫາຣາ. ເສສໍ ວຸຕ຺ຕນຍເມວ. ນນຸ ອຕ຺ຖິ ອສຸຣກາໂຍຕິ ອິທໍ ອສຸຣກາຍສ຺ເສວ ສາຘກໍ. ຕສ຺ສ ປນ ວິສຸໍ ຄຕິປຣິຈ຺ເຉທາຠາເວນ ນ ຄຕິສາຘກນ຺ຕິ.

ຉຄຕິກຖາວຓ຺ຓນາ.