໒. ອນ຺ຕຣາຠວກຖາວຓ຺ຓນາ

໕໐໕. ອິທານິ ອນ຺ຕຣາຠວກຖາ ນາມ ໂຫຕິ. ຕຕ຺ຖ ເຍສໍ ‘‘ອນ຺ຕຣາ ປຣິນິພ຺ພາຍີ’’ຕິ ສຸຕ຺ຕປທໍ ອໂຍນິໂສ ຄເຫຕ຺ວາ ‘‘ອນ຺ຕຣາຠໂວ ນາມ ອຕ຺ຖິ, ຍຕ຺ຖ ສຕ຺ໂຕ ທິພ຺ພຈກ຺ຂຸໂກ ວິຍ ອທິພ຺ພຈກ຺ຂຸໂກ, ອິທ຺ຘິມາ ວິຍ ອນິທ຺ຘິມາ ມາຕາປິຕິສມາຄມຎ຺ເຈວ ອຸຕຸສມຍຎ຺ຈ ໂອໂລກຍມາໂນ ສຕ຺ຕາຫໍ ວາ ອຕິເຣກສຕ຺ຕາຫໍ ວາ ຕິຏ຺ຐຕີ’’ຕິ ລທ຺ຘິ, ເສຍ຺ຍຖາປິ ປຸພ຺ພເສລິຍານຎ຺ເຈວ ສມ຺ມິຕິຍານຎ຺ຈ; ເຕ ສນ຺ຘາຍ ອຕ຺ຖີຕິ ປຸຈ຺ຉາ ສກວາທິສ຺ສ, ລທ຺ຘິຍໍ ຐຕ຺ວາ ປຏິຎ຺ຎາ ອິຕຣສ຺ສ. ອຖ ນໍ ເຍ ຈ ຠຄວຕາ ຕໂຍ ຠວາ ວຸຕ຺ຕາ, ເຕສໍ ວເສນ ໂຈເທຕຸໍ ກາມຠໂວຕິອາທິມາຫ. ຕຕ຺ຣາຍໍ ອຘິປ຺ປາໂຍ – ຍທິ ເຕ ອນ຺ຕຣາຠໂວ ນາມ ໂກຈິ ຠໂວ ອຕ຺ຖິ, ເຕນ ກາມຠວາທີນໍເຍວ ອຎ຺ຎຕເຣນ ຠວິຕພ຺ພໍ ປຎ຺ຈໂວກາຣຠວາທິນາ ວິຍ, ເຕນ ຕໍ ປຸຈ຺ຉາມິ – ‘‘ກິໍ ເຕ ອຍໍ ອນ຺ຕຣາຠໂວ ນາມ ກາມຠໂວ, ອຸທາຫຸ ຣູປຠໂວ ອຣູປຠໂວ ວາ’’ຕິ? ອິຕໂຣ ຕຖາ ອນິຈ຺ຉນ຺ໂຕ ສພ຺ພໍ ປຏິກ຺ຂິປຕິ. ກາມຠວສ຺ສ ຈາຕິອາທິ ຍທິ ອນ຺ຕຣາຠໂວ ນາມ ອຕ຺ຖິ, ອິເມສໍ ຠວານໍ ອນ຺ຕຣາ ທ຺ວິນ຺ນໍ ສີມານໍ ສີມນ຺ຕຣິກາ ວິຍ ຠເວຍ຺ຍາຕິ ໂຈເທຕຸໍ ອາຣທ຺ຘໍ. ປຣວາທີ ປນ ຕຖາ ອນິຈ຺ຉນ຺ໂຕ ສພ຺ພປຎ຺ເຫ ປຏິກ຺ຂິປຕິ ເກວລໍ ລທ຺ຘິຍາ, ນ ສຫຘມ຺ເມນ. ເຕເນວ ນໍ ສກວາທີ ‘ໂນ ວຕ ເຣ’ຕິ ປຏິເສເຘຕິ.

໕໐໖. ປຎ຺ຈມີ ສາ ໂຍນີຕິອາທີນິປິ ຍຖາປຣິຈ຺ຉິນ຺ນໂຍນິອາທີສຸ ໂສ ສໂມຘານໍ ນ ຄຈ຺ຉຕິ, ອຖ ເຕນ ຕໂຕ ຕໂຕ ອຕິເຣເກນ ຠວິຕພ຺ພນ຺ຕິ ໂຈເທຕຸໍ ວຸຕ຺ຕານິ. ອນ຺ຕຣາຠວູປຄໍ ກມ຺ມນ຺ຕິ ຍທິ ໂສປິ ເອໂກ ຠໂວ, ຍຖາ ກາມຠວູປຄາທີນິ ກມ຺ມານິ ອຕ຺ຖີຕິ ສຕ຺ຖາຣາ ວິຠຊິຕ຺ວາ ທສ຺ສິຕານິ, ເອວໍ ຕທຸປເຄນາປິ ກມ຺ເມນ ຠວິຕພ຺ພນ຺ຕິ ໂຈທນຕ຺ຖໍ ວຸຕ຺ຕໍ. ຍສ຺ມາ ປນ ປຣສມເຍ ອນ຺ຕຣາຠວູປຄໍ ນາມ ປາຏິເຍກ຺ກໍ ກມ຺ມໍ ນຕ຺ຖິ, ຍໍ ຍໍ ຠວໍ ອຸປປຊ຺ຊິສ຺ສຕິ, ຕທຸປເຄເນວ ກມ຺ເມນ ອນ຺ຕຣາຠເວ ນິພ຺ພຕ຺ຕຕີຕິ ເຕສໍ ລທ຺ຘິ, ຕສ຺ມາ ‘ນເຫວ’ນ຺ຕິ ປຏິກ຺ຂິຕ຺ຕໍ. ອຕ຺ຖິ ອນ຺ຕຣາຠວູປຄາ ສຕ຺ຕາຕິ ປຸຏ຺ໂຐປິ ກາມຠວູປຄາເຍວ ນາມ ເຕຕິ ລທ຺ຘິຍາ ປຏິກ຺ຂິປຕິ. ຊາຍນ຺ຕີຕິອາທີນິ ປຸຏ຺ໂຐປິ ຕຕ຺ຖ ຊາຕິຊຣາມຣຓານິ ເຈວ ຈຸຕິປຏິສນ຺ຘິປຣມ຺ປຣຎ຺ຈ ອນິຈ຺ຉນ຺ໂຕ ປຏິກ຺ຂິປຕິ. ຣູປາທິວເສນ ປຸຏ຺ໂຐປິ ຍສ຺ມາ ອນ຺ຕຣາຠວສຕ຺ຕສ຺ສ ອນິທສ຺ສນໍ ຣູປໍ, ເວທນາທໂຍປິ ອຎ຺ເຎສໍ ວິຍ ນ ໂອຬາຣິກາຕິ ຕສ຺ສ ລທ຺ຘິ, ຕສ຺ມາ ປຏິກ຺ຂິປຕິ. ອິມິນາວ ກາຣເຓນ ປຎ຺ຈໂວກາຣຠວຠາເວປິ ປຏິກ຺ເຂໂປ ເວທິຕພ຺ໂພ.

໕໐໗. ອິທານິ ກາມຠໂວ ຠໂວ ຄຕີຕິອາທິ ຠວສໍສນ຺ທນໍ ນາມ ໂຫຕິ. ຕຕ຺ຣາຍໍ ອຘິປ຺ປາໂຍ – ຍທິ ເຕ ອນ຺ຕຣາຠໂວ ນາມ ໂກຈິ ຠໂວ ຠເວຍ຺ຍ, ຍຖາ ກາມຠວາທີສຸ ຠວຄຕິອາທິເຠໂທ ລພ຺ຠຕິ, ຕຖາ ຕຕ຺ຣາປິ ລພ຺ເຠຖ. ຍຖາ ວາ ຕຕ຺ຖ ນ ລພ຺ຠຕິ, ຕຖາ ອິເມສຸປິ ນ ລພ຺ເຠຖ. ສມານສ຺ມິຎ຺ຫິ ຠວຠາເວ ເອເຕສ຺ເວເວສ ວິຠາໂຄ ອຕ຺ຖິ, ນ ອິຕຣສ຺ມິນ຺ຕິ ໂກ ເອຕ຺ຖ ວິເສສເຫຕູຕິ. ອິຕໂຣ ປຸນ ລທ຺ຘິມຕ຺ຕວເສນ ຕໍ ຕໍ ປຏິຊານາຕິ ເຈວ ປຏິກ຺ຂິປຕິ ຈ.

໕໐໘. ສພ຺ເພສຎ຺ເຎວ ສຕ຺ຕານໍ ອຕ຺ຖິ ອນ຺ຕຣາຠໂວຕິ ປຸຏ຺ໂຐ ຍສ຺ມາ ນິຣຍູປຄອສຎ຺ຎສຕ຺ຕູປຄອຣູປູປຄານໍ ອນ຺ຕຣາຠວໍ ນ ອິຈ຺ຉຕິ, ຕສ຺ມາ ປຏິກ຺ຂິປຕິ. ເຕເນວ ກາຣເຓນ ປຏິໂລເມ ປຏິຊານາຕິ. ອານນ຺ຕຣິຍສ຺ສາຕິອາທິ ເຍສໍ ໂສ ອນ຺ຕຣາຠວໍ ນ ອິຈ຺ຉຕິ, ເຕ ຕາວ ວິຠຊິຕ຺ວາ ທສ຺ເສຕຸໍ ວຸຕ຺ຕໍ. ຕໍ ສພ຺ພໍ ປາຬິອນຸສາເຣເນວ ເວທິຕພ຺ພໍ ສທ຺ຘິໍ ສຸຕ຺ຕສາຘເນນາຕິ.

ອນ຺ຕຣາຠວກຖາວຓ຺ຓນາ.