໕. ປຣິໂຠຄມຍປຸຎ຺ຎກຖາວຓ຺ຓນາ

໔໘໓. ອິທານິ ປຣິໂຠຄມຍປຸຎ຺ຎກຖາ ນາມ ໂຫຕິ. ຕຕ຺ຖ ‘‘ເຕສໍ ທິວາ ຈ ຣຕ຺ໂຕ ຈ, ສທາ ປຸຎ຺ຎໍ ປວຑ຺ຒຕີ’’ຕິ (ສໍ. ນິ. ໑.໔໗) ຈ ‘‘ຍສ຺ສ ຠິກ຺ຂເວ, ຠິກ຺ຂຸ ຈີວຣໍ ປຣິຠຸຎ຺ຊມາໂນ’’ຕິ (ອ. ນິ. ໔.໕໑) ຈ ເອວມາທີນິ ສຸຕ຺ຕານິ ອໂຍນິໂສ ຄເຫຕ຺ວາ ເຍສໍ ປຣິໂຠຄມຍໍ ນາມ ປຸຎ຺ຎໍ ອຕ຺ຖີ’’ຕິ ລທ຺ຘິ, ເສຍ຺ຍຖາປິ ຣາຊຄິຣິກສິທ຺ຘຕ຺ຖິກສມ຺ມິຕິຍານໍ; ເຕ ສນ຺ຘາຍ ປຣິໂຠຄມຍນ຺ຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ປຸຎ຺ຎໍ ນາມ ຜສ຺ສາທໂຍ ກຸສລາ ຘມ຺ມາ, ນ ຕໂຕ ປຣໍ, ຕສ຺ມາ ຜສ຺ສາທີຫິ ເຕ ວຑ຺ຒິຕພ຺ພ’’ນ຺ຕິ ໂຈເທຕຸໍ ປຣິໂຠຄມໂຍ ຜສ຺ໂສຕິອາທິ ອາຣທ຺ຘໍ. ຕໍ ສພ຺ພໍ ອິຕເຣນ ເຕສໍ ອວຑ຺ຒນໂຕ ປຏິກ຺ຂິຕ຺ຕໍ. ລຕາວິຍາຕິອາທີນິ ‘‘ກິຣິຍາຍ ວາ ຠາວນາຍ ວາ ວິນາປິ ຍຖາ ລຕາທີນິ ສຍເມວ ວຑ຺ຒນ຺ຕິ, ກິໍ ເຕ ເອວໍ ວຑ຺ຒນ຺ຕີ’’ຕິ ໂຈທນຕ຺ຖໍ ວຸຕ຺ຕານິ. ຕຖາ ປນສ຺ສ ອວຑ຺ຒນໂຕ ນ ເຫວາຕິ ປຏິກ຺ຂິຕ຺ຕໍ.

໔໘໔. ນ ສມນ຺ນາຫຣຕີຕິ ປຎ຺ເຫ ປຏິຄ຺ຄາຫການໍ ປຣິໂຠເຄນ ປຸຣິມເຈຕນາ ວຑ຺ຒຕິ, ເອວໍ ຕໍ ໂຫຕິ ປຸຎ຺ຎນ຺ຕິ ລທ຺ຘິວເສນ ປຏິຊານາຕິ. ຕໂຕ ອນາວຏ຺ເຏນ຺ຕສ຺ສາຕິອາທີຫິ ປຸຏ຺ໂຐ ທາຍກສ຺ສ ຈາຄເຈຕນໍ ສນ຺ຘາຍ ປຏິກ຺ຂິປຕິ. ຕຕ຺ຖ ອນາວຏ຺ເຏນ຺ຕສ຺ສາຕິ ທານເຈຕນາຍ ປຸເຣຈາຣິເກນ ອາວຊ຺ຊເນນ ຠວງ຺ຄໍ ອນາວຏ຺ເຏນ຺ຕສ຺ສ ອປຣິວຏ຺ເຏນ຺ຕສ຺ສ. ອນາໂຠຄສ຺ສາຕິ ນິຣາໂຠຄສ຺ສ. ອສມນ຺ນາຫຣນ຺ຕສ຺ສາຕິ ນ ສມນ຺ນາຫຣນ຺ຕສ຺ສ. ອາວຊ຺ຊນຎ຺ຫິ ຠວງ຺ຄໍ ວິຈ຺ຉິນ຺ທິຕ຺ວາ ອຕ຺ຕໂນ ຄຕມຄ຺ເຄ ອຸປ຺ປຊ຺ຊມານໍ ທານເຈຕນໍ ສມນ຺ນາຫຣຕິ ນາມ. ເອວໍກິຈ຺ເຈນ ອິມິນາ ຈິຕ຺ເຕນ ອສມນ຺ນາຫຣນ຺ຕສ຺ສ ປຸຎ຺ຎໍ ໂຫຕີຕິ ປຸຈ຺ຉຕິ. ອມນສິກໂຣນ຺ຕສ຺ສາຕິ ມນໍ ອກໂຣນ຺ຕສ຺ສ. ອາວຊ຺ຊເນນ ຫິ ຕທນນ຺ຕຣໍ ອຸປ຺ປຊ຺ຊມານໍ ມນໍ ກໂຣຕິ ນາມ. ເອວໍ ອກໂຣນ຺ຕສ຺ສາຕິ ອຕ຺ໂຖ. ອຸປໂຍຄວຈນສ຺ມິຎ຺ຫິ ເອຕໍ ຠຸມ຺ມໍ. ອເຈຕຍນ຺ຕສ຺ສາຕິ ເຈຕນໍ ອນຸປ຺ປາເທນ຺ຕສ຺ສ. ອປຕ຺ເຖນ຺ຕສ຺ສາຕິ ປຕ຺ຖນາສງ຺ຂາຕໍ ກຸສລຈ຺ຉນ຺ທໍ ອກໂຣນ຺ຕສ຺ສ. ອປ຺ປຓິທຫນ຺ຕສ຺ສາຕິ ທານເຈຕນາວເສນ ຈິຕ຺ຕໍ ອຏ຺ຐເປນ຺ຕສ຺ສາຕິ ອຕ຺ໂຖ. ນນຸ ອາວຏ຺ເຏນ຺ຕສ຺ສາຕິ ວາເຣ ອາໂຠຄສ຺ສາຕິ ອາໂຠຄວໂຕ. ອຖ ວາ ອາໂຠຄາ ອສ຺ສ, ອາໂຠຄສ຺ສ ວາ ອນນ຺ຕຣໍ ຕໍ ປຸຎ຺ຎໍ ໂຫຕີຕິ ອຕ຺ໂຖ.

໔໘໕. ທ຺ວິນ຺ນໍ ຜສ຺ສານນ຺ຕິອາທີສຸປິ ເອກກ຺ຂເຓ ທາຍກສ຺ສ ທ຺ວິນ຺ນໍ ຜສ຺ສາທີນໍ ອຠາວາ ປຏິກ຺ຂິປຕິ, ທາຍກສ຺ສ ຈ ປຣິຠຸຎ຺ຊນ຺ຕສ຺ສ ຈາຕິ ອຸຠິນ຺ນໍ ຜສ຺ສາທໂຍ ສນ຺ຘາຍ ປຏິຊານາຕິ. ອປິຈສ຺ສ ປຎ຺ຈນ຺ນໍ ວິຎ຺ຎາຓານໍ ສໂມຘານໍ ໂຫຕີຕິ ລທ຺ຘິ, ຕສ຺ສາປິ ວເສນ ປຏິຊານາຕິ. ອຖ ນໍ ສກວາທີ ປຣິຍາຍສ຺ສ ທ຺ວາຣໍປິທຫິຕ຺ວາ ອຸຊຸວິປຈ຺ຈນີກວເສນ ໂຈເທຕຸໍ ກຸສລາທິປຎ຺ຫໍ ປຸຈ຺ຉຕິ. ຕຕ຺ຣາປິ ກຸສລາກຸສລານໍ ເອກສ຺ເສກກ຺ຂເຓ ສມ຺ປໂຍຄາຠາວໍ ສນ຺ຘາຍ ປຏິກ຺ຂິປຕິ. ປຣິໂຠຄມຍໍ ປນ ຈິຕ຺ຕວິປ຺ປຍຸຕ຺ຕໍ ອຸປ຺ປຊ຺ຊຕີຕິ ລທ຺ຘິຍາ ປຏິຊານາຕິ. ອຖ ນໍ ສກວາທີ ສຸຕ຺ເຕນ ນິຄ຺ຄຓ຺ຫາຕິ.

໔໘໖. ສຸຕ຺ຕສາຘເນ ອາຣາມໂຣປກາທີນໍ ອນຸສ຺ສຣຓປຏິສງ຺ຂຣຓາທິວເສນ ອນ຺ຕຣນ຺ຕຣາ ອຸປ຺ປຊ຺ຊມານໍ ປຸຎ຺ຎໍ ສນ຺ຘາຍ ສທາ ປຸຎ຺ຎໍ ປວຑ຺ຒຕີຕິ ວຸຕ຺ຕໍ. ອປ຺ປມາໂຓ ຕສ຺ສ ປຸຎ຺ຎາຠິສນ຺ໂທຕິ ອິທໍ ອປ຺ປມາຓວິຫາຣິໂນ ທິນ຺ນປຈ຺ຈຍຕ຺ຕາ ຈ ‘‘ເອວຣູໂປ ເມ ຈີວຣໍ ປຣິຠຸຎ຺ຊຕີ’’ຕິ ອນຸໂມທນວເສນ ຈ ວຸຕ຺ຕໍ. ຕໍ ໂສ ປຣິໂຠຄມຍນ຺ຕິ ສລ຺ລກ຺ເຂຕິ. ຍສ຺ມາ ປນ ປຏິຄ຺ຄາຫເກນ ປຏິຄ຺ຄເຫຕ຺ວາ ອປຣິຠຸຕ຺ເຕປິ ເທຍ຺ຍຘມ຺ເມ ປຸຎ຺ຎໍ ໂຫຕິເຍວ, ຕສ຺ມາ ສກວາທີວາໂທວ ພລວາ, ຕຕ຺ຖ ປຏິຄ຺ຄາຫເກນ ປຏິຄ຺ຄຫິເຕຕິ ອຕ຺ໂຖ ທຏ຺ຐພ຺ໂພ. ເສສໍ ອຸຕ຺ຕານຕ຺ຖເມວາຕິ.

ປຣິໂຠຄມຍປຸຎ຺ຎກຖາວຓ຺ຓນາ.