໖. ອິໂຕທິນ຺ນກຖາວຓ຺ຓນາ

໔໘໘-໔໙໑. ອິທານິ ອິໂຕ ທິນ຺ນກຖາ ນາມ ໂຫຕິ. ຕຕ຺ຖ ເຍສໍ ‘‘ອິໂຕ ທິນ຺ເນນ ຍາເປນ຺ຕິ, ເປຕາ ກາລງ຺ກຕາ ຕຫິ’’ນ຺ຕິ (ເປ. ວ. ໑໙) ວຈນໍ ນິສ຺ສາຍ ‘‘ຍໍ ອິໂຕ ຈີວຣາທິ ທິນ຺ນໍ ເຕເນວ ຍາເປນ຺ຕີ’’ຕິ ລທ຺ຘິ, ເສຍ຺ຍຖາປິ ຣາຊຄິຣິກສິທ຺ຘຕ຺ຖິການໍ; ເຕ ສນ຺ຘາຍ ອິໂຕ ທິນ຺ເນນາຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ປຸນ ຈີວຣາທິວເສນ ອນຸຍຸຕ຺ໂຕ ປຏິກ຺ຂິປຕິ. ອຎ຺ໂຎ ອຎ຺ຎສ຺ສ ກາຣໂກຕິ ອຎ຺ຎສ຺ສ ວິປາກທາຍການໍ ກມ຺ມານໍ ອຎ຺ໂຎ ກາຣໂກ, ນ ອຕ຺ຕນາວ ອຕ຺ຕໂນ ກມ຺ມໍ ກໂຣຕີຕິ ວຸຕ຺ຕໍ ໂຫຕິ. ເອວໍ ປຸຏ຺ໂຐ ປນ ອິຕໂຣ ສຸຕ຺ຕວິໂຣຘຠເຍນ ປຏິກ຺ຂິປຕິ. ທານໍ ເທນ຺ຕນ຺ຕິ ທານໍ ທທມານໍ ທິສ຺ວາຕິ ອຕ຺ໂຖ. ຕຕ຺ຖ ຍສ຺ມາ ອຕ຺ຕໂນ ອນຸໂມທິຕຕ຺ຕາ ຈ ເຕສໍ ຕຕ຺ຖ ໂຠຄາ ອຸປ຺ປຊ຺ຊນ຺ຕິ, ຕສ຺ມາສ຺ສ ອິມິນາ ກາຣເຓນ ລທ຺ຘິໍ ປຕິຏ຺ຐເປນ຺ຕສ຺ສາປິ ອປ຺ປຕິຏ຺ຐິຕາວ ໂຫຕິ. ນ ຫິ ເຕ ອິໂຕ ທິນ຺ເນເນວ ວຕ຺ຖຸນາ ຍາເປນ຺ຕິ. ເສເສສຸປິ ສຸຕ຺ຕສາຘເນສຸ ເອເສວ ນໂຍຕິ.

ອິໂຕ ທິນ຺ນກຖາວຓ຺ຓນາ.