໔. ທານກຖາວຓ຺ຓນາ

໔໗໘. ອິທານິ ທານກຖາ ນາມ ໂຫຕິ. ຕຕ຺ຖ ທານໍ ນາມ ຕິວິຘໍ – ຈາຄເຈຕນາປິ, ວິຣຕິປິ, ເທຍ຺ຍຘມ຺ໂມປິ. ‘‘ສທ຺ຘາ ຫິຣິຍໍ ກຸສລຎ຺ຈ ທານ’’ນ຺ຕິ (ອ. ນິ. ໘.໓໐) ອາຄຕຏ຺ຐາເນ ຈາຄເຈຕນາ ທານໍ. ‘‘ອຠຍໍ ເທຕີ’’ຕິ (ອ. ນິ. ໘.໓໙) ອາຄຕຏ຺ຐາເນ ວິຣຕິ. ‘‘ທານໍ ເທຕິ ອນ຺ນໍ ປານ’’ນ຺ຕິ ອາຄຕຏ຺ຐາເນ ເທຍ຺ຍຘມ຺ໂມ. ຕຕ຺ຖ ຈາຄເຈຕນາ ‘‘ເທຕິ ວາ ເທຍ຺ຍຘມ຺ມໍ, ເທນ຺ຕິ ວາ ເອຕາຍ ເທຍ຺ຍຘມ຺ມ’’ນ຺ຕິ ທານໍ. ວິຣຕິ ອວຂຓ຺ຑນຏ຺ເຐນ ລວນຏ຺ເຐນ ວາ ທານໍ. ສາ ຫິ ອຸປ຺ປຊ຺ຊມານາ ຠຍເຠຣວາທິສງ຺ຂາຕໍ ທຸສ຺ສີລ຺ຍເຈຕນໍ ທາຕິ ຂຓ຺ເຑຕິ ລຸນາຕິ ວາຕິ ທານໍ. ເທຍ຺ຍຘມ຺ໂມ ທິຍ຺ຍຕີຕິ ທານໍ. ເອວເມຕໍ ຕິວິຘມ຺ປິ ອຕ຺ຖໂຕ ເຈຕສິໂກ ເຈວ ຘມ຺ໂມ ເທຍ຺ຍຘມ຺ໂມ ຈາຕິ ທຸວິຘໍ ໂຫຕິ. ຕຕ຺ຖ ເຍສໍ ‘‘ເຈຕສິໂກວ ຘມ຺ໂມ ທານໍ, ນ ເທຍ຺ຍຘມ຺ໂມ’’ຕິ ລທ຺ຘິ, ເສຍ຺ຍຖາປິ ຣາຊຄິຣິກສິທ຺ຘຕ຺ຖິການໍ; ເຕ ສນ຺ຘາຍ ເຈຕສິໂກຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ເທຍ຺ຍຘມ຺ມວເສນ ໂຈເທຕຸໍ ລພ຺ຠາຕິ ປຸຈ຺ຉາ ສກວາທິສ຺ສ, ອນ຺ນາທີນິ ວິຍ ໂສ ນ ສກ຺ກາ ທາຕຸນ຺ຕິ ປຏິກ຺ເຂໂປ ອິຕຣສ຺ສ. ປຸນ ທຬ຺ຫໍ ກຕ຺ວາ ປຸຏ຺ເຐ ‘‘ອຠຍໍ ເທຕີ’’ຕິ ສຸຕ຺ຕວເສນ ປຏິຎ຺ຎາ ຕສ຺ເສວ. ຜສ຺ສປຎ຺ຫາທີສຸ ປນ ຜສ຺ສໍ ເທຕີຕິອາທິໂວຫາຣໍ ອປສ຺ສນ຺ໂຕ ປຏິກ຺ຂິປເຕວ.

໔໗໙. ອນິຏ຺ຐຜລນ຺ຕິອາທິ ອເຈຕສິກສ຺ສ ຘມ຺ມສ຺ສ ທານຠາວທີປນຕ຺ຖໍ ວຸຕ຺ຕໍ. ນ ຫິ ອເຈຕສິໂກ ອນ຺ນາທິຘມ຺ໂມ ອາຍຕິໍ ວິປາກໍ ເທຕິ, ອິຏ຺ຐຜລຠາວນິຍມນຕ຺ຖໍ ປເນຕໍ ວຸຕ຺ຕນ຺ຕິ ເວທິຕພ຺ພໍ. ອຍມ຺ປິ ເຫຕ຺ຖ ອຘິປ຺ປາໂຍ – ຍທິ ອເຈຕສິໂກ ອນ຺ນາທິຘມ຺ໂມ ທານໍ ຠເວຍ຺ຍ, ຫິຕຈິຕ຺ເຕນ ອນິຏ຺ຐໍ ອກນ຺ຕໍ ເຠສຊ຺ຊໍ ເທນ຺ຕສ຺ສ ນິມ຺ພພີຊາທີຫິ ວິຍ ນິມ຺ພາທໂຍ ອນິຏ຺ຐເມວ ຜລໍ ນິພ຺ພຕ຺ເຕຍ຺ຍ. ຍສ຺ມາ ປເນຕ຺ຖ ຫິຕຜຣຓຈາຄເຈຕນາ ທານໍ, ຕສ຺ມາ ອນິຏ຺ເຐປິ ເທຍ຺ຍຘມ຺ເມ ທານໍ ອິຏ຺ຐຜລເມວ ໂຫຕີຕິ.

ເອວໍ ປຣວາທິນາ ເຈຕສິກຘມ຺ມສ຺ສ ທານຠາເວ ປຕິຏ຺ຐາປິເຕ ສກວາທີ ອິຕເຣນ ປຣິຍາເຍນ ເທຍ຺ຍຘມ຺ມສ຺ສ ທານຠາວໍ ສາເຘຕຸໍ ທານໍ ອິຏ຺ຐຜລໍ ວຸຕ຺ຕໍ ຠຄວຕາຕິອາທິມາຫ. ປຣວາທີ ປນ ຈີວຣາທີນໍ ອິຏ຺ຐວິປາກຕໍ ອປສ຺ສນ຺ໂຕ ປຏິກ຺ຂິປຕິ. ສຸຕ຺ຕສາຘນໍ ປຣວາທີວາເທປິ ຍຸຊ຺ຊຕິ ສກວາທີວາເທປິ, ນ ປນ ເອເກນຕ຺ເຖນ. ເທຍ຺ຍຘມ຺ໂມ ອິຏ຺ຐຜໂລຕິ ອິຏ຺ຐຜລຠາວມຕ຺ຕເມວ ປຏິກ຺ຂິຕ຺ຕໍ. ຕສ຺ມາ ເຕນ ຫິ ນ ວຕ຺ຕພ຺ພນ຺ຕິ ອິຏ຺ຐຜລຠາເວເນວ ນ ວຕ຺ຕພ຺ພຕາ ຍຸຊ຺ຊຕິ. ທາຕພ຺ພຏ຺ເຐນ ປນ ເທຍ຺ຍຘມ຺ໂມ ທານເມວ. ທິນ຺ນຎ຺ຫິ ທານານໍ ສງ຺ກຣຠາວໂມຈນຕ຺ຖເມວ ອຍໍ ກຖາຕິ.

ທານກຖາວຓ຺ຓນາ.