໑໐. ວິປາໂກ ວິປາກຘມ຺ມຘມ຺ໂມຕິກຖາວຓ຺ຓນາ

໕໐໑. ອິທານິ ວິປາໂກ ວິປາກຘມ຺ມຘມ຺ໂມຕິກຖາ ນາມ ໂຫຕິ. ຕຕ຺ຖ ຍສ຺ມາ ວິປາໂກ ວິປາກສ຺ສ ອຎ຺ຎມຎ຺ຎາທິປຈ຺ຈຍວເສນ ປຈ຺ຈໂຍ ໂຫຕິ, ຕສ຺ມາ ວິປາໂກປິ ວິປາກຘມ຺ມຘມ຺ໂມຕິ ເຍສໍ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ຕສ຺ສ ວິປາໂກຕິ ຕສ຺ສ ວິປາກຘມ຺ມຘມ຺ມສ຺ສ ວິປາກສ຺ສ ໂຍ ວິປາໂກ, ໂສປິ ເຕ ວິປາກຘມ຺ມຘມ຺ໂມ ໂຫຕີຕິ ປຸຈ຺ຉຕິ. ອິຕໂຣ ອາຍຕິໍ ວິປາກທານາຠາວໍ ສນ຺ຘາຍ ປຏິກ຺ຂິປຕິ. ທຸຕິຍໍ ປຸຏ຺ໂຐ ຕປ຺ປຈ຺ຈຍາປິ ອຎ຺ຎສ຺ສ ວິປາກສ຺ສ ອຸປ຺ປຕ຺ຕິໍ ສນ຺ຘາຍ ປຏິຊານາຕິ. ເອວໍ ສນ຺ເຕ ປນສ຺ສ ກຸສລາກຸສລສ຺ສ ວິຍ ຕສ຺ສາປິ ວິປາກສ຺ສ ວິປາໂກ, ຕສ຺ສາປິ ວິປາໂກຕິ ວຏ຺ຏານຸປຈ຺ເຉໂທ ອາປຊ຺ຊຕີຕິ ປຸຏ຺ໂຐ ສມຍວິໂຣຘຠເຍນ ປຏິກ຺ຂິປຕິ.

ວິປາໂກຕິ ວາຕິອາທິມ຺ຫິ ວຈນສາຘເນ ປນ ຍທິ ວິປາກສ຺ສ ວິປາກຘມ຺ມຘມ຺ເມນ ເອກຕ຺ຖຕາ ຠເວຍ຺ຍ, ກຸສລາກຸສລພ຺ຍາກຕານໍ ເອກຕ຺ຖຕໍ ອາປຊ຺ເຊຍ຺ຍາຕິ ປຏິກ຺ຂິປຕິ. ວິປາໂກ ຈ ວິປາກຘມ຺ມຘມ຺ໂມ ຈາຕິ ເອຕ຺ຖ ອຍໍ ອຘິປ຺ປາໂຍ – ໂສ ຫິ ຈຕູສຸ ວິປາກກ຺ຂນ຺ເຘສຸ ເອເກກໍ ອຎ຺ຎມຎ຺ຎປຈ຺ຈຍາທີສຸ ປຈ຺ຈຍຏ຺ເຐນ ວິປາກຘມ຺ມຘມ຺ມຕໍ ປຈ຺ຈຍຸປ຺ປນ຺ນຏ຺ເຐນ ຈ ວິປາກໍ ມຎ຺ຎມາໂນ ‘‘ວິປາໂກ ວິປາກຘມ຺ມຘມ຺ໂມ’’ຕິ ປຸຏ຺ໂຐ ອາມນ຺ຕາຕິ ປຏິຊານາຕິ. ອຖ ນໍ ສກວາທີ ‘‘ຍສ຺ມາ ຕຍາ ເອກກ຺ຂເຓ ຈຕູສຸ ຂນ຺ເຘສຸ ວິປາໂກ ວິປາກຘມ຺ມຘມ຺ໂມປິ ອນຸຎ຺ຎາໂຕ, ຕສ຺ມາ ເຕສໍ ສຫຄຕາທິຠາໂວ ອາປຊ຺ຊຕີ’’ຕິ ໂຈເທຕຸໍ ເອວມາຫ. ອິຕໂຣ ກຸສລາກຸສລສງ຺ຂາຕໍ ວິປາກຘມ຺ມຘມ຺ມໍ ສນ຺ຘາຍ ປຏິກ຺ຂິປຕິ. ຕຎ຺ເຎວ ອກຸສລນ຺ຕິ ຍທິ ເຕ ວິປາໂກ ວິປາກຘມ຺ມຘມ຺ໂມ, ໂຍ ອກຸສລວິປາໂກ, ໂສ ອກຸສລໍ ອາປຊ຺ຊຕິ. ກສ຺ມາ? ວິປາກຘມ຺ມຘມ຺ເມນ ເອກຕ຺ຕາ. ຕຎ຺ເຎວ ກຸສລນ຺ຕິອາທີສຸປິ ເອເສວ ນໂຍ.

໕໐໒. ອຎ຺ຎມຎ຺ຎປຈ຺ຈຍາຕິ ອິທໍ ສຫຊາຕານໍ ປຈ຺ຈຍມຕ຺ຕວເສນ ວຸຕ຺ຕໍ, ຕສ຺ມາ ອສາຘກໍ. ມຫາຠູຕານມ຺ປິ ຈ ອຎ຺ຎມຎ຺ຎປຈ຺ຈຍຕາ ວຸຕ຺ຕາ, ນ ຈ ຕານິ ວິປາການິ, ນ ຈ ວິປາກຘມ຺ມຘມ຺ມານີຕິ.

ວິປາໂກ ວິປາກຘມ຺ມຘມ຺ໂມຕິກຖາວຓ຺ຓນາ.

ສຕ຺ຕໂມ ວຄ຺ໂຄ.