໑. ນິຍາມກຖາວຓ຺ຓນາ

໔໔໕-໔໔໗. ອິທານິ ນິຍາມກຖາ ນາມ ໂຫຕິ. ຕຕ຺ຖ ນິຍາໂມຕິ ‘‘ຠພ຺ໂພ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕ’’ນ຺ຕິ (ປຸ. ປ. ໑໓) ວຈນໂຕ ອຣິຍມຄ຺ໂຄ ວຸຈ຺ຈຕິ. ຍສ຺ມາ ປນ ຕສ຺ມິໍ ອຸປ຺ປຊ຺ຊິຕ຺ວາ ນິຣຸທ຺ເຘປິ ປຸຄ຺ຄໂລ ອນິຍໂຕ ນາມ ນ ໂຫຕິ, ຕສ຺ມາ ‘‘ໂສ ນິຍາໂມ ນິຈ຺ຈຏ຺ເຐນ ອສງ຺ຂໂຕ’’ຕິ ເຍສໍ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ຕໂຕ ‘‘ຍທິ ໂສ ອສງ຺ຂໂຕ, ເອວຣູເປນ ເຕນ ຠວິຕພ຺ພ’’ນ຺ຕິ ທີເປນ຺ໂຕ ນິພ຺ພານນ຺ຕິອາທິມາຫ. ສໍສນ຺ທນປຸຈ຺ຉາ ອຸຕ຺ຕານຕ຺ຖາເຍວ.

ອຕ຺ຖິ ເກຈີຕິອາທິ ນິຍາມສ຺ສ ສງ຺ຂຕຠາວທີປນຕ຺ຖໍ ວຸຕ຺ຕໍ. ມຄ຺ໂຄ ອສງ຺ຂໂຕຕິປຎ຺ເຫ ຕສ຺ສ ອຸປ຺ປາທນິໂຣຘຠາວໂຕ ປຏິກ຺ຂິປຕີຕິ. ນິຍາໂມ ສງ຺ຂໂຕຕິປຎ຺ເຫ ນິຣຸທ຺ເຘປິ ມຄ຺ເຄ ນິຍາມສ຺ສ ອຕ຺ຖິຕໍ ສນ຺ຘາຍ ປຏິກ຺ຂິປຕິ. ໂສຕາປຕ຺ຕິນິຍາໂມຕິອາທິປຎ຺ເຫສຸປິ ອນຸໂລມໂຕ ຈ ປຏິໂລມໂຕ ຈ ອິມິນາວ ນເຍນ ອຕ຺ໂຖ ເວທິຕພ຺ໂພ. ປຎ຺ຈ ອສງ຺ຂຕານີຕິ ປຸຏ຺ໂຐ ປຎ຺ຈນ຺ນໍ ອສງ຺ຂຕານໍ ອາຄຕຏ຺ຐານໍ ອປສ຺ສນ຺ໂຕ ປຏິກ຺ຂິປຕິ. ທຸຕິຍໍ ປຸຏ຺ໂຐ ຈຕຸນ຺ນໍ ສມ຺ມຕ຺ຕນິຍາມານໍ ນິຍາມວຈນໂຕ ນິພ຺ພານສ຺ສ ຈ ອສງ຺ຂຕຠາວໂຕ ປຏິຊານາຕິ. ມິຈ຺ຉຕ຺ຕນິຍາມປຎ຺ໂຫ ນິຍາມວຈນມຕ຺ເຕນ ອສງ຺ຂຕຕາຍ ອຍຸຕ຺ຕຠາວທີປນຕ຺ຖໍ ວຸຕ຺ໂຕຕິ.

ນິຍາມກຖາວຓ຺ຓນາ.