໒. ປຏິຈ຺ຈສມຸປ຺ປາທກຖາວຓ຺ຓນາ

໔໔໘. ອິທານິ ປຏິຈ຺ຈສມຸປ຺ປາທກຖາ ນາມ ໂຫຕິ. ຕຕ຺ຖ ເຍສໍ ນິທານວຄ຺ເຄ ‘‘ອຸປ຺ປາທາ ວາ ຕຖາຄຕານໍ ອນຸປ຺ປາທາ ວາ ຕຖາຄຕານໍ ຐິຕາວ ສາ ຘາຕຸ ຘມ຺ມຏ຺ຐິຕຕາ’’ຕິອາທິວຈນໂຕ (ສໍ. ນິ. ໒.໒໐) ‘‘ປຏິຈ຺ຈສມຸປ຺ປາໂທ ອສງ຺ຂໂຕ’’ຕິ ລທ຺ຘິ, ເສຍ຺ຍຖາປິ ປຸພ຺ພເສລິຍານຎ຺ຈ ມຫິສາສການຎ຺ຈ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ.

໔໔໙. ອວິຊ຺ຊາ ອສງ຺ຂຕາຕິ ອາທໂຍ ປຎ຺ຫາ ອວິຊ຺ຊາທີນໍເຍວ ປຏິຈ຺ຈສມຸປ຺ປາທຠາວທສ຺ສນຕ຺ຖໍ ວຸຕ຺ຕາ. ເຍນ ປນຕ຺ເຖນ ຕຕ຺ຖ ເອເກກໍ ອງ຺ຄໍ ‘‘ປຏິຈ຺ຈສມຸປ຺ປາໂທ’’ຕິ ວຸຈ຺ຈຕິ, ໂສ ປຏິຈ຺ຈສມຸປ຺ປາທວິຠງ຺ເຄ ວຸຕ຺ໂຕເຍວ.

໔໕໑. ອວິຊ຺ຊາປຈ຺ຈຍາ ສງ຺ຂາຣາຕິ ຍາ ຕຕ຺ຖ ຘມ຺ມຏ຺ຐິຕຕາຕິອາທິ ເຍນ ສຸຕ຺ເຕນ ລທ຺ຘິ ປຕິຏ຺ຐາປິຕາ, ຕສ຺ເສວ ອຕ຺ຖທສ຺ສເນນ ລທ຺ຘິຠິນ຺ທນຕ຺ຖໍ ວຸຕ຺ຕໍ. ອຍຎ຺ເຫຕ຺ຖ ອຕ຺ໂຖ – ຍາ ອຍໍ ເຫຏ຺ຐາ ‘‘ຐິຕາວ ສາ ຘາຕຸ ຘມ຺ມຏ຺ຐິຕຕາ ຘມ຺ມນິຍາມຕາ’’ຕິ ວຸຕ຺ຕາ ນ ສາ ອຎ຺ຎຕ຺ຣ ອວິຊ຺ຊາທີຫິ ວິສຸໍ ເອກາ ອຕ຺ຖິ. ອວິຊ຺ຊາທີນໍ ປນ ປຈ຺ຈຍານໍເຍເວຕໍ ນາມໍ. ອຸປ຺ປນ຺ເນປິ ຫິ ຕຖາຄເຕ ອນຸປ຺ປນ຺ເນປິ ອວິຊ຺ຊາໂຕ ສງ຺ຂາຣາ ສມ຺ຠວນ຺ຕິ, ສງ຺ຂາຣາທີຫິ ຈ ວິຎ຺ຎາຓາທີນິ, ຕສ຺ມາ ‘‘ອວິຊ຺ຊາປຈ຺ຈຍາ ສງ຺ຂາຣາ’’ຕິ ຍາ ເອຕສ຺ມິໍ ປເທ ສງ຺ຂາຣຘມ຺ມານໍ ກາຣຓຏ຺ເຐນ ຐິຕຕາຕິ ຘມ຺ມຏ຺ຐິຕຕາ. ເຕສໍເຍວ ຈ ຘມ຺ມານໍ ກາຣຓຏ຺ເຐເນວ ນິຍາມຕາຕິ ຘມ຺ມນິຍາມຕາຕິ ອວິຊ຺ຊາ ວຸຈ຺ຈຕິ. ສາ ຈ ອສງ຺ຂຕາ, ນິພ຺ພານຎ຺ຈ ອສງ຺ຂຕນ຺ຕິ ປຸຈ຺ຉຕິ. ປຣວາທີ ລທ຺ຘິວເສນ ປຏິຊານິຕ຺ວາ ປຸນ ທ຺ເວ ອສງ຺ຂຕານີຕິ ປຸຏ຺ໂຐ ສຸຕ຺ຕາຠາເວນ ປຏິກ຺ຂິປິຕ຺ວາ ລທ຺ຘິວເສເນວ ປຏິຊານາຕິ. ເສສປເທສຸປິ ເອເສວ ນໂຍ. ເຫຏ຺ຐາ ວຸຕ຺ຕສທິສໍ ປນ ຕຕ຺ຖ ວຸຕ຺ຕນເຍເນວ ເວທິຕພ຺ພນ຺ຕິ.

ປຏິຈ຺ຈສມຸປ຺ປາທກຖາວຓ຺ຓນາ.