໗. ຈິຕ຺ຕາຣມ຺ມຓກຖາວຓ຺ຓນາ

໔໓໖-໔໓໘. ອິທານິ ຈິຕ຺ຕາຣມ຺ມຓກຖາ ນາມ ໂຫຕິ. ຕຕ຺ຖ ເຈໂຕປຣິຍາເຍ ຎາຓນ຺ຕິ ວຈນມຕ຺ຕເມວ ຄເຫຕ຺ວາ ‘‘ຕໍ ຎາຓໍ ຈິຕ຺ຕາຣມ຺ມຓເມວາ’’ຕິ ເຍສໍ ລທ຺ຘິ, ເສຍ຺ຍຖາປິ ເອຕຣຫິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖສ຺ສ ‘‘ໂຍ ສຣາຄາທິວເສນ ຈິຕ຺ຕໍ ຊານາຕິ, ຕສ຺ສ ຣາຄາທໂຍປິ ອາຣມ຺ມຓາ ໂຫນ຺ຕິ, ຕສ຺ມາ ນ ວຕ຺ຕພ຺ພໍ ຕໍ ຈິຕ຺ຕາຣມ຺ມຓຎ຺ເຎວາ’’ຕິ ໂຈທນຕ຺ຖໍ ນນຸ ອຕ຺ຖິ ໂກຈີຕິອາທິ ອາຣທ຺ຘໍ. ຜສ຺ສາຣມ຺ມເຓຕິ ຜສ຺ສສງ຺ຂາເຕ ອາຣມ຺ມເຓ. ເວທນາຣມ຺ມເຓຕິອາທີສຸປິ ເອເສວ ນໂຍ. ປຸນ ຜສ຺ສາຣມ຺ມເຓ ຎາຓໍ ນ ວຕ຺ຕພ຺ພນ຺ຕິ ປຸຏ຺ໂຐ ຜສ຺ສສ຺ສ ຜຸສນລກ຺ຂຓໍ ມນສິກໂຣໂຕ ຜສ຺ໂສວາຣມ຺ມຓໍ ໂຫຕີຕິ ປຏິຊານາຕິ. ກິໍ ປເນຕໍ ຜສ຺ສປຣິຍາເຍ ຎາຓນ຺ຕິ ປຸຏ຺ໂຐ ປນ ຕາທິສສ຺ສ ສຸຕ຺ຕປທສ຺ສ ອຠາວາ ປຏິກ຺ຂິປຕິ. ເວທນາທີສຸປິ ເອເສວ ນໂຍ. ອິທານິ ຍໍ ນິສ຺ສາຍ ລທ຺ຘິ, ຕເທວ ທສ຺ເສຕ຺ວາ ລທ຺ຘິໍ ປຕິຏ຺ຐາເປຕຸໍ ນນຸ ເຈໂຕປຣິຍາເຍ ຎາຓນ຺ຕິອາທິມາຫ. ສາ ປເນສາ ວຈນມຕ຺ຕາຠິນິເວເສນ ປຕິຏ຺ຐາປິຕາປິ ອປ຺ປຕິຏ຺ຐາປິຕາວ ໂຫຕີຕິ.

ຈິຕ຺ຕາຣມ຺ມຓກຖາວຓ຺ຓນາ.