໘. ອນາຄຕຎາຓກຖາວຓ຺ຓນາ

໔໓໙-໔໔໐. ອິທານິ ອນາຄຕຎາຓກຖາ ນາມ ໂຫຕິ. ຕຕ຺ຖ ອນາຄຕໍ ນາມ ອນ຺ຕຣມ຺ປິ ອຕ຺ຖິ, ອນນ຺ຕຣມ຺ປິ. ເຕສຸ ອນນ຺ຕເຣ ເອກນ຺ເຕເນວ ຎາຓໍ ນຕ຺ຖິ. ຍຖາ ຈ ອນນ຺ຕເຣ, ຕຖາ ເອກວີຖິເອກຊວນປຣິຍາປນ຺ເນປິ. ຕຕ຺ຖ ເຍ ສພ຺ພສ຺ມິມ຺ປິ ອນາຄເຕ ຎາຓໍ ອິຈ຺ຉນ຺ຕິ, ເສຍ຺ຍຖາປິ ອນ຺ຘກາ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍໍ ເຕ ອນາຄເຕ ຎາຓໍ, ກິໍ ເຕນ ອນນ຺ຕຣໍ ອນາຄຕໍ ມູລາທິວເສນ ຊານາຕີ’’ຕິ ໂຈເທຕຸໍ ອນາຄຕໍ ມູລໂຕຕິອາທິມາຫ. ຕຕ຺ຖ ມູລໂຕຕິອາທີນິ ສພ຺ພານິ ກາຣຓເວວຈນາເນວ. ກາຣຓຎ຺ຫິ ຍໍ ອຕ຺ຕໂນ ຜລໍ ກໂຣຕິ, ຕໍ ຕຕ຺ຖ ມູລຍຕິ ປຕິຏ຺ຐາຕີຕິ ມູລໍ. ຕໂຕ ຈ ຕໍ ຫິໂນຕິ ປວຕ຺ຕຍຕີຕິ ເຫຕຸ. ຕເທວ ຕໍ ນິເທຕິ ‘‘ຫນ຺ທ ນໍ ຄຓ຺ຫຖາ’’ຕິ. ນິຍ຺ຍາເຕຕິ ວິຍາຕິ ນິທານໍ. ຕໂຕ ຕໍ ສມ຺ຠວຕີຕິ ສມ຺ຠໂວ. ປຠວຕີຕິ ປຠໂວ. ຕຕ຺ຖ ຈ ຕໍ ສມຸຏ຺ຐາຕິ, ຕໍ ວາ ນໍ ສມຸຏ຺ຐາເປຕີຕິ ສມຸຏ຺ຐານໍ. ຕເທວ ນໍ ອາຫຣຕີຕິ ອາຫາໂຣ. ຕຎ຺ຈສ຺ສ ອປຣິຈ຺ຈຊິຕພ຺ພຏ຺ເຐນ ອາຣມ຺ມຓໍ. ຕເທວ ເຈຕໍ ປຏິຈ຺ຈ ເອຕີຕິ ປຈ຺ຈໂຍ. ຕໂຕ ນໍ ສມຸເທຕີຕິ ສມຸທໂຍຕິ ວຸຈ຺ຈຕິ. ຍສ຺ມາ ປນ ອນນ຺ຕຣໍ ຈິຕ຺ຕໍ ເອເຕຫາກາເຣຫິ ນ ສກ຺ກາ ຊານິຕຸໍ, ຕສ຺ມາ ນ ເຫວນ຺ຕິ ປຏິກ຺ຂິປຕິ. ອນາຄຕໍ ເຫຕຸປຈ຺ຈຍຕນ຺ຕິ ຍາ ອນນ຺ຕຣານາຄເຕ ຈິຕ຺ເຕ ເຫຕຸປຈ຺ຈຍຕາ, ຕໍ ຊານາຕິ. ເຍ ຕຕ຺ຖ ຘມ຺ມາ ເຫຕຸປຈ຺ຈຍາ ໂຫນ຺ຕິ, ເຕ ຊານາຕີຕິ ອຕ຺ໂຖ. ເສສປເທສຸປິ ເອເສວ ນໂຍ. ໂຄຕ຺ຣຠຸໂນຕິອາທິ ຍສ຺ມິໍ ອນາຄເຕ ຎາຓໍ ນ ອຸປ຺ປຊ຺ຊຕິ, ຕໍ ສຣູປໂຕ ທສ຺ເສຕຸໍ ວຸຕ຺ຕໍ. ປາຏລິປຸຕ຺ຕສ຺ສາຕິ ສຸຕ຺ຕໍ ຍສ຺ມິໍ ອນາຄເຕ ຎາຓໍ ອຸປ຺ປຊ຺ຊຕິ, ຕໍ ທສ຺ເສຕຸໍ ອາຫຏໍ. ຍສ຺ມາ ປເນຕໍ ນ ສພ຺ພສ຺ມິໍ ອນາຄເຕ ຎາຓສ຺ສ ສາຘກໍ; ຕສ຺ມາ ອນາຫຏເມວາຕິ.

ອນາຄຕຎາຓກຖາວຓ຺ຓນາ.