໖. ສມ຺ມຸຕິຎາຓກຖາວຓ຺ຓນາ

໔໓໔-໔໓໕. ອິທານິ ສມ຺ມຸຕິຎາຓກຖາ ນາມ ໂຫຕິ. ຕຕ຺ຖ ສມ຺ມຸຕິສຈ຺ຈໍ ປຣມຕ຺ຖສຈ຺ຈນ຺ຕິ ທ຺ເວ ສຈ຺ຈານິ. ເຍ ປນ ເອວໍ ວິຠາຄໍ ອກຕ຺ວາ ສຈ຺ຈນ຺ຕິ ວຈນສາມຎ຺ເຎນ ສມ຺ມຸຕິຎາຓມ຺ປິ ‘‘ສຈ຺ຈາຣມ຺ມຓເມວາ’’ຕິ ວທນ຺ຕິ, ເສຍ຺ຍຖາປິ ອນ຺ຘກາ; ເຕ ອຍຸຕ຺ຕວາທິໂນຕິ ເຕສໍ ວາທວິໂສຘນຕ຺ຖໍ ອຍໍ ກຖາ ອາຣທ຺ຘາ. ຕຕ຺ຖ ນ ວຕ຺ຕພ຺ພນ຺ຕິ ປຸຈ຺ຉາ ປຣວາທິສ຺ສ, ປຣມຕ຺ຖສຈ຺ຈໍ ສນ຺ຘາຍ ປຏິຎ຺ຎາ ສກວາທິສ຺ສ. ສມ຺ມຸຕິສຈ຺ຈມ຺ຫີຕິ ສມ຺ມຸຕິໍ ອນຸປວິຏ຺ເຐ ສຈ຺ຈມ຺ຫິ. ປຈ຺ຈຕ຺ເຕ ວາ ຠຸມ຺ມວຈນໍ, ສມ຺ມຸຕິສຈ຺ຈນ຺ຕິ ອຕ຺ໂຖ. ສມ຺ມຸຕິຎາຓໍ ສຈ຺ຈາຣມ຺ມຓຎ຺ເຎວາຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ຕໂຕ ນໍ ‘‘ຍທິ ຕໍ ອວິເສເສນ ສຈ຺ຈາຣມ຺ມຓຎ຺ເຎວ, ເຕນ ຎາເຓນ ທຸກ຺ຂປຣິຎ຺ຎາທີນິ ກເຣຍ຺ຍາ’’ຕິ ໂຈເທຕຸໍ ເຕນ ຎາເຓນາຕິອາທິມາຫ.

ສມ຺ມຸຕິຎາຓກຖາວຓ຺ຓນາ.