໕. ປຏິສມ຺ຠິທາກຖາວຓ຺ຓນາ

໔໓໒-໔໓໓. ອິທານິ ປຏິສມ຺ຠິທາກຖາ ນາມ ໂຫຕິ. ຕຕ຺ຖ ເຍສໍ ‘‘ຍໍກິຎ຺ຈິ ອຣິຍານໍ ຎາຓໍ, ສພ຺ພໍ ໂລກຸຕ຺ຕຣເມວາ’’ຕິ ຄເຫຕ຺ວາ ‘‘ສພ຺ພໍ ຎາຓໍ ປຏິສມ຺ຠິທາ’’ຕິ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ສມ຺ມຸຕິຎາຓປຎ຺ເຫສຸ ປຖວີກສິຓສມ຺ມຸຕິຍໍ ສມາປຕ຺ຕິຎາຓໍ ສນ຺ຘາຍ ປຏິກ຺ຂິປຕິ, ນິຣຸຕ຺ຕິຎາຓໍ ສນ຺ຘາຍ ປຏິຊານາຕິ. ເຍ ເກຈິ ສມ຺ມຸຕິນ຺ຕິ ປຎ຺ເຫ ປຸຖຸຊ຺ຊເນ ສນ຺ຘາຍ ປຏິກ຺ຂິປຕິ. ເຈໂຕປຣິຍາຍປຎ຺ເຫສຸ ປຸຖຸຊ຺ຊນສ຺ສ ຎາຓໍ ສນ຺ຘາຍ ປຏິກ຺ຂິປຕິ, ອຣິຍສ຺ສ ຎາຓໍ ສນ຺ຘາຍ ປຏິຊານາຕິ. ສພ຺ພາ ປຎ຺ຎາຕິປຎ຺ເຫສຸ ກສິຓສມາປຕ຺ຕິປຎ຺ຫໍ ສນ຺ຘາຍ ປຏິກ຺ຂິປຕິ, ໂລກຸຕ຺ຕຣໍ ສນ຺ຘາຍ ປຏິຊານາຕິ. ປຖວີກສິຓສມາປຕ຺ຕິນ຺ຕິອາທິ ‘‘ຍາ ເອເຕສຸ ເອຕ຺ຕເກສຸ ຐາເນສຸ ປຎ຺ຎາ, ກິໍ ສພ຺ພາ ສາ ປຏິສມ຺ຠິທາ’’ຕິ ປຸຈ຺ຉນຕ຺ຖໍ ວຸຕ຺ຕໍ. ເຕນ ຫິ ສພ຺ພໍ ຎາຓນ຺ຕິ ຍສ຺ມາ ສພ຺ພາ ໂລກຸຕ຺ຕຣປຎ຺ຎາ ປຏິສມ຺ຠິທາ, ຕສ຺ມາ ສພ຺ພນ຺ຕິ ວຈນໍ ສາມຎ຺ຎຜເລນ ສທ຺ຘິໍ ປຕິຏ຺ຐາເປຕີຕິ.

ປຏິສມ຺ຠິທາກຖາວຓ຺ຓນາ.