໔. ນິຍາມກຖາວຓ຺ຓນາ

໔໒໘-໔໓໑. ອິທານິ ນິຍາມກຖາ ນາມ ໂຫຕິ. ຕຕ຺ຖ ໂຍ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກມິສ຺ສຕິ, ຕໍ ‘‘ຠພ຺ໂພ ເອສ ຘມ຺ມໍ ອຠິສເມຕຸ’’ນ຺ຕິ ຍສ຺ມາ ຠຄວາ ຊານາຕິ, ຕສ຺ມາ ‘‘ອນິຍຕສ຺ສ ປຸຖຸຊ຺ຊນສ຺ເສວ ສໂຕ ປຸຄ຺ຄລສ຺ສ ນິຍາມຄມນາຍ ຎາຓໍ ອຕ຺ຖີ’’ຕິ ເຍສໍ ລທ຺ຘິ, ເສຍ຺ຍຖາປິ ເອຕຣຫິ ອຸຕ຺ຕຣາປຖການໍ; ເຕ ສນ຺ຘາຍ ອນິຍຕສ຺ສາຕິ ປຸຈ຺ຉາ ສກວາທິສ຺ສ. ຕຕ຺ຖ ນິຍາມຄມນາຍາຕິ ນິຍາໂມ ວຸຈ຺ຈຕິ ມຄ຺ໂຄ, ມຄ຺ຄຄມນາຍ ມຄ຺ໂຄກ຺ກມນາຍາຕິ ອຕ຺ໂຖ. ຍໍ ປນສ຺ສ ຎາຓໍ ທິສ຺ວາ ຠຄວາ ‘‘ຠພ຺ໂພ ອຍ’’ນ຺ຕິ ຊານາຕິ, ຕໍ ສນ຺ຘາຍ ປຏິຎ຺ຎາ ປຣວາທິສ຺ສ.

ອຖສ຺ສ ສກວາທີ ອຍຸຕ຺ຕວາທິຕໍ ທີເປຕຸໍ ນິຍຕສ຺ສາຕິ ວິປຣີຕານຸໂຍຄມາຫ. ຕຕ຺ຖ ປຐມປຎ຺ເຫ ມຄ຺ເຄນ ນິຍຕສ຺ສ ອນິຍາມຄມນາຍ ຎາຓໍ ນາມ ນຕ຺ຖີຕິ ປຏິກ຺ຂິປຕິ. ທຸຕິເຍ ນຕ຺ຖິຠາເວນ ປຏິຊານາຕິ. ຕຕິເຍ ອນິຍຕສ຺ສ ນຕ຺ຖີຕິ ປຸຏ຺ຐຕ຺ຕາ ລທ຺ຘິວິໂຣເຘນ ປຏິກ຺ຂິປຕິ. ປຸນ ປຐມປຎ຺ຫເມວ ຈຕຸຕ຺ຖໍ ກຕ຺ວາ ນິຍຕສ຺ສ ນິຍາມຄມນາທິວເສນ ຕໂຍ ປຎ຺ຫາ ກຕາ. ເຕສຸ ປຐເມ ຍສ຺ມາ ອາທິມຄ຺ເຄນ ນິຍຕສ຺ສ ປຸນ ຕທຕ຺ຖາຍ ຎາຓໍ ນຕ຺ຖິ, ຕສ຺ມາ ປຏິກ຺ຂິປຕິ. ທຸຕິເຍ ນຕ຺ຖິຠາເວເນວ ປຏິຊານາຕິ. ຕຕິເຍ ລທ຺ຘິວິໂຣເຘເນວ ປຏິກ຺ຂິປຕິ. ປຸນ ປຐມປຎ຺ຫໍ ອຏ຺ຐມໍ ກຕ຺ວາ ອນິຍຕສ຺ສ ອນິຍາມຄມນາທິວເສນ ຕໂຍ ປຎ຺ຫາ ກຕາ. ເຕສໍ ອຕ຺ໂຖ ວຸຕ຺ຕນເຍເນວ ເວທິຕພ຺ໂພ. ປຸນ ປຐມປຎ຺ຫເມວ ທ຺ວາທສມໍ ກຕ຺ວາ ຕໍມູລກາ ອຕ຺ຖິ ນິຍາໂມຕິອາທໂຍ ປຎ຺ຫາ ກຕາ. ຕຕ຺ຖ ຍສ຺ມາ ນິຍາມຄມນາຍ ຎາຓໍ ນາມ ມຄ຺ຄຎາຓເມວ ໂຫຕິ, ຕສ຺ມາ ຕໍ ສນ຺ຘາຍ ອຕ຺ຖິ ນິຍາໂມຕິ ວຸຕ຺ຕໍ. ອິຕໂຣ ປນ ນິຍາໂມຕິ ວຸຕ຺ເຕ ປຏິກ຺ຂິປຕິ, ຎາຓນ຺ຕິ ວຸຕ຺ເຕ ປຏິຊານາຕິ. ສຕິປຏ຺ຐານາທີສຸປິ ເອເສວ ນໂຍ. ປຈ຺ຈນີກໍ ອຸຕ຺ຕານຕ຺ຖເມວ. ໂຄຕ຺ຣຠຸໂນຕິອາທິ ເຍນ ຍໍ ອປ຺ປຕ຺ຕໍ, ຕສ຺ສ ຕໍ ນຕ຺ຖີຕິ ທສ຺ສນຕ຺ຖໍ ວຸຕ຺ຕໍ. ຠຄວາ ຊານາຕີຕິ ອຕ຺ຕໂນ ຎາຓພເລນ ຊານາຕິ, ນ ຕສ຺ສ ນິຍາມຄມນຎາຓສພ຺ຠາວໂຕ. ຕສ຺ມາ ອິມິນາ ກາຣເຓນ ປຕິຏ຺ຐິຕາປິສ຺ສ ລທ຺ຘິ ອປ຺ປຕິຏ຺ຐິຕາເຍວາຕິ.

ນິຍາມກຖາວຓ຺ຓນາ.