໓. ວິປຣີຕກຖາວຓ຺ຓນາ

໔໒໔. ອິທານິ ວິປຣີຕກຖາ ນາມ ໂຫຕິ. ຕຕ຺ຖ ‘‘ຍ຺ວາຍໍ ປຖວີກສິເຓ ປຖວີສຎ຺ຎີ ສມາປຊ຺ຊຕິ, ຕສ຺ສ ຕໍ ຎາຓໍ ວິປຣີຕຎາຓ’’ນ຺ຕິ ເຍສໍ ລທ຺ຘິ, ເສຍ຺ຍຖາປິ ອນ຺ຘການໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ປຖວິໍ ນິສ຺ສາຍ ອຸປ຺ປນ຺ນນິມິຕ຺ຕຎ຺ຫິ ນ ປຖວີເຍວ, ຕຕ຺ຣ ຈາຍໍ ປຖວີສຎ຺ຎີ. ຕສ຺ມາ ວິປຣີຕຎາຓນ຺ຕິ ອຍເມຕສ຺ສ ອຘິປ຺ປາໂຍ. ຕໂຕ ສກວາທີ ‘‘ລກ຺ຂຓປຖວີປິ ສສມ຺ຠາຣປຖວີປິ ນິມິຕ຺ຕປຖວີປິ ປຖວີເທວຕາປິ ສພ຺ພາ ປຖວີເຍວ, ຕາສຸ ປຖວີຕິ ຎາຓໍ ວິປຣີຕໍ ນ ໂຫຕິ. ອນິຈ຺ເຈ ນິຈ຺ຈນ຺ຕິອາທິວິປຣິເຍໂສ ປນ ວິປຣີຕຎາຓໍ ນາມ. ກິໍ ເຕ ອິທໍ ເອເຕສຸ ອຎ຺ຎຕຣ’’ນ຺ຕິ ໂຈເທຕຸໍ ອນິຈ຺ເຈ ນິຈ຺ຈນ຺ຕິອາທິມາຫ. ອິຕໂຣ ວິປລ຺ລາສລກ຺ຂຓາຠາວໍ ສນ຺ຘາຍ ປຏິກ຺ຂິປຕິ, ປຖວີນິມິຕ຺ຕໍ ສນ຺ຘາຍ ປຏິຊານາຕິ.

ກຸສລນ຺ຕິ ເສກ຺ຂປຸຖຸຊ຺ຊນານໍ ຎາຓໍ ສນ຺ຘາຍ ວຸຕ຺ຕໍ. ອຕ຺ຖິ ອຣຫໂຕຕິ ປຎ຺ເຫສຸປິ ວິປລ຺ລາສລກ຺ຂຓາຠາເວນ ປຏິກ຺ຂິປຕິ. ປຖວີນິມິຕ຺ຕໍ ສນ຺ຘາຍ ປຏິຊານາຕິ. ສພ຺ເພວ ປຖວີຕິ ສພ຺ພໍ ຕໍ ປຖວີກສິຓໍ ລກ຺ຂຓປຖວີເຍວ ໂຫຕີຕິ ປຸຈ຺ຉຕິ. ສກວາທີ ຕຖາ ອຠາວໂຕ ປຏິກ຺ຂິປຕິ. ນນຸ ປຖວີ ອຕ຺ຖິ, ອຕ຺ຖິ ຈ ໂກຈິ ປຖວິໍ ປຖວິໂຕ ສມາປຊ຺ຊຕີຕິ ປຸຈ຺ຉາ ສກວາທິສ຺ສ. ຕສ຺ສຕ຺ໂຖ – ນນຸ ນິມິຕ຺ຕປຖວີ ອຕ຺ຖິ, ອຕ຺ຖິ ຈ ໂກຈິ ຕໍ ປຖວິໍ ປຖວິໂຕເຍວ ສມາປຊ຺ຊຕິ, ນ ອາປໂຕ ວາ ເຕຊໂຕ ວາຕິ. ປຖວີ ອຕ຺ຖີຕິອາທິ ‘‘ຍທິ ຍໍ ຍຖາ ອຕ຺ຖິ, ຕໍ ຕຖາ ສມາປຊ຺ຊນ຺ຕສ຺ສ ຎາຓໍ ວິປຣີຕໍ ໂຫຕິ, ນິພ຺ພານໍ ອຕ຺ຖິ, ຕມ຺ປິ ສມາປຊ຺ຊນ຺ຕສ຺ສ ສພ຺ພວິປຣິເຍສສມຸຄ຺ຆາຕນໍ ມຄ຺ຄຎາຓມ຺ປິ ເຕ ວິປຣີຕໍ ໂຫຕູ’’ຕິ ທສ຺ສນຕ຺ຖໍ ວຸຕ຺ຕນ຺ຕິ.

ວິປຣີຕກຖາວຓ຺ຓນາ.