໗. ຈິຕ຺ຕຏ຺ຐິຕິກຖາວຓ຺ຓນາ

໓໓໕. ອິທານິ ຈິຕ຺ຕຏ຺ຐິຕິກຖາ ນາມ ໂຫຕິ. ຕຕ຺ຖ ເຍສໍ ສມາປຕ຺ຕິຈິຕ຺ຕຎ຺ເຈວ ຠວງ຺ຄຈິຕ຺ຕຎ຺ຈ ອນຸປ຺ປພນ຺ເຘນ ປວຕ຺ຕມານໍ ທິສ຺ວາ ‘‘ເອກເມວ ຈິຕ຺ຕໍ ຈິຣໍ ຕິຏ຺ຐຕີ’’ຕິ ລທ຺ຘິ ເສຍ຺ຍຖາປິ ເອຕຣຫິ ເຫຏ຺ຐາ ວຸຕ຺ຕປ຺ປເຠທານໍ ອນ຺ຘການໍ, ຕໍລທ຺ຘິວິໂສຘນຕ຺ຖໍ ເອກໍ, ຈິຕ຺ຕໍ ທິວສໍ ຕິຏ຺ຐຕີຕິ ປຸຈ຺ຉາ ສກວາທິສ຺ສ, ປຏິຎ຺ຎາ ປຣວາທິສ຺ສ. ອຸປຑ຺ຒທິວໂສ ອຸປ຺ປາທກ຺ຂໂຓຕິ ເອຕ຺ຖ ຐິຕິກ຺ຂຓໍ ອນາມສິຕ຺ວາ ‘‘ອນິຈ຺ຈາ ວຕ ສງ຺ຂາຣາ, ອຸປ຺ປາທວຍຘມ຺ມິໂນ’’ຕິ (ສໍ. ນິ. ໑.໑໘໖; ໒.໑໔໓) ເທສນານເຍນ ອຸປ຺ປາທວຍວເສເນວ ປຸຈ຺ຉາ ກຕາ.

ເຕ ຘມ຺ມາ ຈິຕ຺ເຕນ ລຫຸປຣິວຕ຺ຕາຕິ ປຸຏ຺ໂຐ ຈິຕ຺ຕໂຕ ລຫຸຕຣປຣິວຕ຺ຕິໂນ ຘມ຺ເມ ອປສ຺ສນ຺ໂຕ ປຏິກ຺ຂິປຕິ. ທຸຕິຍໍ ປຸຏ຺ໂຐ ຍສ຺ສ ຈິຕ຺ຕສ຺ສ ທີຆຏ຺ຐິຕິໍ ອິຈ຺ຉຕິ, ຕໍ ສນ຺ຘາຍ ປຏິຊານາຕິ. ຍາວຕາຍຸກໍ ຕິຏ຺ຐຕີຕິ ປຎ຺ເຫ ‘‘ຈຸລ຺ລາສີຕິສຫສ຺ສານິ, ກປ຺ປາ ຕິຏ຺ຐນ຺ຕິ ເຍ ມຣູ’’ຕິອາທິວຈນວເສນ (ມຫານິ. ໑໐) ອາຣຸປ຺ປໂຕ ອຎ຺ຎຕ຺ຣ ປຏິກ຺ຂິປຕິ, ອາຣຸປ຺ເປ ປຏິຊານາຕິ. ມຸຫຸຕ຺ຕໍ ມຸຫຸຕ຺ຕໍ ອຸປ຺ປຊ຺ຊຕີຕິ ປຎ຺ເຫ ປຣວາທິສ຺ສ ‘‘ອຸປ຺ປາທວຍຘມ຺ມິໂນ’’ຕິອາທິສຸຕ຺ຕວິໂຣຘຠເຍນ ປຏິຊານາຕິ. ຐິຕິໍ ປນສ຺ສ ລທ຺ຘິວເສນ ອິຈ຺ຉຕິ. ເສສເມຕ຺ຖ ອຸຕ຺ຕານຕ຺ຖເມວາຕິ.

ຈິຕ຺ຕຏ຺ຐິຕິກຖາວຓ຺ຓນາ.