໑. ປຣູປຫາຣວຓ຺ຓນາ

໓໐໗. ອິທານິ ປຣູປຫາຣກຖາ ນາມ ໂຫຕິ. ຕຕ຺ຖ ເຍ ອຣຫຕ຺ຕໍ ປຏິຊານນ຺ຕານໍ ອປ຺ປຕ຺ເຕ ປຕ຺ຕສຎ຺ຎີນໍ ອຘິມານິການໍ ກຸຫການໍ ວາ ອຣຫຕ຺ຕໍ ປຏິຊານນ຺ຕານໍ ສຸກ຺ກວິສ຺ສຏ຺ຐິໍ ທິສ຺ວາ ‘‘ມາຣກາຍິກາ ເທວຕາ ອຣຫໂຕ ອສຸຈິໍ ອຸປສໍຫຣນ຺ຕີ’’ຕິ ມຎ຺ຎນ຺ຕິ; ເສຍ຺ຍຖາປິ ເອຕຣຫິ ປຸພ຺ພເສລິຍາ ຈ ອປຣເສລິຍາ ຈ; ເຕ ສນ຺ຘາຍ ອຕ຺ຖິ ອຣຫໂຕຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອິທານິ ຍສ຺ມາ ສຸກ຺ກວິສ຺ສຏ຺ຐິ ນາມ ຣາຄສມຸຏ຺ຐານາ ໂຫຕິ, ຕສ຺ມາ ອຕ຺ຖິ ອຣຫໂຕ ຣາໂຄຕິ ອນຸໂຍໂຄ ອາຣທ຺ໂຘ. ໂສ ສພ຺ໂພປິ ອຸຕ຺ຕານຕ຺ໂຖເຍວ.

ມາຣກາຍິກາ ເທວຕາ ອຕ຺ຕໂນຕິອາທິປຎ຺ເຫ ຍສ຺ມາ ຕາສໍ ເທວຕານໍ ສຸກ຺ກວິສ຺ສຏ຺ຐິ ນາມ ນຕ຺ຖິ, ອຎ຺ເຎສມ຺ປິ ສຸກ຺ກໍ ຄເຫຕ຺ວາ ນ ອຸປສໍຫຣນ຺ຕິ, ອຣຫໂຕ ປນ ສຸກ຺ກເມວ ນຕ຺ຖິ, ຕສ຺ມາ ນ ເຫວນ຺ຕິ ປຏິກ຺ຂິປຕິ.

ເນວ ອຕ຺ຕໂນຕິປຎ຺ເຫ ປນ ນິມ຺ມິນິຕ຺ວາ ອຸປສໍຫຣນ຺ຕີຕິ ລທ຺ຘິຍາ ປຏິຊານາຕິ. ໂລມກູເປຫີຕິປຎ຺ເຫ ສປ຺ປິເຕລານໍ ວິຍ ໂລມກູເປຫິ ອຸປສໍຫຣຓາຠາວໍ ທິສ຺ວາ ປຏິກ຺ຂິປຕິ.

໓໐໘. ຫນ຺ທ ຫີຕິ ວຈສາຍຕ຺ເຖ ນິປາໂຕ. ‘‘ອຣຫາ ນຸ ໂຂ ອຫໍ, ໂນ’’ຕິ ເອວໍ ວິມຕິໍ ຄາຫຍິສ຺ສາມາຕິ ເອວໍ ວຈສາຍໍ ກຕ຺ວາ ອຸປສໍຫຣນ຺ຕີຕິ ອຕ຺ໂຖ. ອຕ຺ຖິ ອຣຫໂຕ ວິມຕີຕິ ປຸຏ຺ໂຐ ອຏ຺ຐວຕ຺ຖຸກໍ ວິຈິກິຈ຺ຉໍ ສນ຺ຘາຍ ປຏິກ຺ຂິປຕິ, ທຸຕິຍໍ ປຸຏ຺ໂຐ ອິຕ຺ຖິປຸຣິສານໍ ນາມໂຄຕ຺ຕາທີສຸ ສນ຺ນິຏ຺ຐານາຠາວໍ ສນ຺ຘາຍ ປຏິຊານາຕິ.

໓໐໙. ອຕ຺ຖິ ຕສ຺ສ ອາສໂຍຕິ ຕສ຺ສ ສຸກ຺ກສ຺ສ ອຸຈ຺ຈາຣປສ຺ສາວານໍ ວິຍ ປຕິຏ຺ຐາໂນກາໂສ ອຕ຺ຖີຕິ ປຸຈ຺ຉຕິ.

໓໑໒. ສຘມ຺ມກຸສລສ຺ສາຕິ ອຕ຺ຕໂນ ອຣຫຕ຺ຕຘມ຺ມມຕ຺ເຕເຍວ ກຸສລສ຺ສ. ປຎ຺ຎາວິມຸຕ຺ຕໍ ສນ຺ຘາເຍວໍ ວທຕິ. ປຣຘມ຺ມກຸສລສ຺ສາຕິ ສຘມ຺ມໂຕ ປຣສ຺ມິໍ ອຏ຺ຐສມາປຕ຺ຕິຘມ຺ເມປິ ກຸສລສ຺ສ. ອຸຠໂຕຠາຄວິມຸຕ຺ຕໍ ສນ຺ຘາເຍວໍ ວທຕິ. ເສສເມຕ຺ຖ ປາຬິອນຸສາເຣເນວ ເວທິຕພ຺ພນ຺ຕິ.

ປຣູປຫາຣກຖາວຓ຺ຓນາ.